Responsive Ad Slot

HSA Choir sumpui bawm ramah khuolzin

Monday, September 26, 2016

/ Published by VIRTHLI

- George Mang Neihsial, Secretary Social & Culture, HSA GHQ

Nun hi a’nher a’nher a, harsatna le beidawngna ruom hraw lai khawm hin hlimna le lawmna hun hi ei lo tlung hlak a ni hih. !! Hun iemanichen liemta a inthawka kan lo beisei le hnam rawngbawl dinga ke pen dinga kan lo insingsa chu, Kum 2016 September thla ni 15 zingkar nisa suok chuh khawvel ta dinga ni thar a ni el khelah kei le HSA CHOIR membarhai ta ding lem chun ni lawmum, HSA Choir-in Hnam rawngbawlnaa ngaia HSA JHQ, Branch le unithai fang dinga ruohmangna kan lo siem; a tak a tlung Kan ring phak naw, beiseinaa kan lo thlir hlak hlawtlingna dinga ni thar suok a nih.

Zingkar dar 8:30 a ni a,  CH Khawthlang Hall tuolah HSA Choir Membarhai kan kim thap a, Pu RS Puruolte, Auditor, HSA Gen.Hqrs, le Pu Lalhmarthang Hmar, Adviser, HSA JHQ NCH&KA haiin an mi hung inthlaa. Pu RS Puruolte-in tawngtainaa a mi’n thla hnungin TATA Mobile-in Shilong Khawpuia HSA Freshers Meet Vawi 59na hmangpui ding le tour nei dingin New Haflong Rel chawlhmun kan pan  a. Rel chawlhmun a inthawk Sun dar 12 velin Guwahati panin kan suok a, HSA CHOIR a ngir a inthawka kan inzin lam hmasa tak chu mizie hran hran, hmel inang naw ngawt Nunghak17 le Pasal 16 chun kan hei hraw tlang tah a. Zingkar bu fa lova fe kan ni a, Sum um naw leiin AC chu  vana ra, Sleeper Class khawm a la hnai nawh, General class; cheng 55 man ngeiah kan hei chuong tawl tah a. A ropui narawh ie. Silchar a inthawk vai ngal sang deu deuvin thungna an hung hluo bit zo tah leiin thung hmun kan la hei chang nawk nawh!  Pasal-hai chu ngaithiem a um, nunghakhai mawl kha lungsiet an um! Vaihai hlak chun an tuolzal nunah ‘Tlawmngaina’ hi an lo nei ve naw am anih “Hei inkien ka tih ie.” an ti nuom si nawh khaw lum leh, thlan rim le Rel buol ina zun hing rim inhnam puma zin lam hei hraw chuh ‘Kea lawn si loah chun’ sawl a um khawp el. Zan dar 11 velin Guwahati khawpui chuh kan tlung a, ni danga ka lo hmu rawp hlak nisienkhawm, hi tuma Guwahati hi chuh HSA Choir hminga inzin kan ni leiin a mawi dangdai rieuin ka hriet! Pu Joseph V Tuolor, Genral Secretary, HSA Gen.Hqrs in kan chuongna ding lirthei (Sumo 3)a mi lo ngaituo pekah chun chuongin Guwahati khawpui suoksanin Shillong khawpui chuh kan pan nawk tah a. Sumo-ah chuongin Meghalaya ram kan hei lut chuh khawlum khawm a zie-um deu. Ni 16 September 2016, Zingkar dar 2 vel chun Barapani-ah Bu fak kan tum a, Mi 8 fak ding chau an nei leiin kan la insuong sa/sap tira, a dang povin la nghakin kan fak tah a. Kan chau tawngkhawng ve ta bawk, phing a lo tam bawk ning a ta an dawr kan inruok chieng kher el!
Sawt nawte sawl zuolpui kan hadam hnung chun Shillong pan chun kan suok nawk tah a. Zingkar dar 3:30 pelin Demthring Petrol Pump kan tlung a, HSA JHQ Shillong Thuoitu le Membarhaiin an mi lo hmuok a. Tv.Ezra Darngawn Secretary HSA JHQ Shillong in Pathien kawla lawmthu hrilna le Choir hai lawmlutna tawngtaina hun a nei a. Zingkar dar 3 pel hnungah Nunghak le Tlangvalhaiin Thingpui le a vawi tieng inhnik tak leh hlim sanga an mi lo dawngsawng zet kha chuh ‘Halelui’ hei pek rap el chak a um! Lawm an umin an fel a, Hmar ni inzak a um nawh!  Kan tlungna ding sengah mi thakin kan thuomhnaw-hai an mi hei chawipek zet kha chuh Kamding kan ni tah am anih ti a awl !

Ni 16 September 2016, chuh HSA Choir album a dinga Shooting nei tuma inriruong khah chung tienga inthawk malsawmna a tla rawn em leiin kan thul a, hadamnain kan hmang tah ringawt a! HSA Jt.Hqtr. Shillong thuoitu hai le inpawltlangna neiin kan hlim tlang hle a. Kan nunghak le tlangvalhai lai inhawi ti deu deu an umin ka hriet. Zan hunah ICI Sub-Hqtr. Hall ah Hla ennawna hun kan hmanga, hi huna hin ICI Sub Hqtr. KTP Chairman Pu.Simeon Sungte in mi keihruoiin tawngtaina hai a mi nei pek a, a tupa hnung a mi thul zo pek hne em em leiin lawmum ka ti khawpel.

Ni 17 September 2016, Inringni a ni a. Anton Hall-ah Shillonga Hmar inchuklaihai pungkhawm karah sun dar 11 chun hun tan a nia, hun hawngna hla ‘AW Kan Hmarram’ Pu Lalkhum Keivawm phuok chuh sakin kan  keithuoi a, hi program sungah hin hla 5 kan sak a; ‘Zaleng Kan lawm’ Pu Rev Dr Hrilrokhum Thiek-in HSA General Assembly, Patpuihmunah kum 1956 a nei a ni tuma HSA Hlapui dinga a phuok, ‘Tapna ding chauvin maw’ Pu Timothhy Z Zote, Editor, Manamasi Digest, in kum 2003 a ei hnam ngirhmun ena mittui leh a lo phuok, ‘Zotlang sangah’ Pu L Keivom-in a phuok, ‘Manmasi Nau’ Pu James Songrolal Songate-in a phuok, le ‘Are Are Lanu’  (medley) hai chuh kan sak a nih. Hun tawpna takah ‘ Aw Kan Hmarram’ bawkin hun kan khar nawk a, HSA Choir-in inhawi kan ti hle.

Pathienni, 18 September 2016, zingkar EFCI Centre -a Zingkar inkhawmah inkhawm vein hun kan hmang a. HSA Choir-in hla 1 (Nangma thil ropui hai an hril, Austria Version) kan sak a, Kan nunghakhai; Rose Puruolte le Vanlalmawi Vankal-in malzai an sak bawk. Inkhawm tinin Gospel Centenary Hall-ah Thingpui le a vawitieng inhnik tawk tak el kan fakin kan dawn a.

Kan inlawi a, ruo sur chat kan nghak a, a chat hnungin ‘Wards Lake’-ah Shooting hlimum tak kan nei a. A hlimum el khelah a hlawkthlak, DP/PP that neinain kan hmang tawla inhawi kan tiin kan hlim tlang hle!!
Kan lo hlim taluo deu am anih bu khawm kan fak hman ta nawh, ICI Shillong Sub-Hqrs Biek Inah zan inkhawm kan hmang nawk a. HSA Choir-in hla 1 le Kan nunghakhai; Rose Puruolte, Vanlalmawi Vankal le Lalthakim Khawbung  ainthawkin Malzai kan nei thei bawk. Inkhawm tinah Thingpui inhnik em em el kan dawn tlanga lawmum kan ti hle! Hienga Kohrana hun kan hmangah hin ‘Ei Theina chitah Hnam ta dingin’ ti chu kan khekpui tak anih a. Mipui khawmin an pawm hlein kan hriet!

HSA JHQ Shillong, EFCI hmunpui le ICI Sub-Hqrs haiin an mi lo dawngsawng danah HSA Choir hi lawm naw thei kan ni nawh. Kan lawmthu inzawt dingin kan thiem tawk nawh a, hril naw ding hlakin kan hril naw thiem bawk si nawh! Kan lawm a nih ti hin hei hril tawp el chi a nih !

Thawtanni, 19 September 2016, a ni a. HSA Choir Album a dingin Shooting ding bawkin Golf Link panin kan suok nawk a. HSA Choir ta dinga inpe em em, an thil nei inro der lohai; Pu Lalthlamuana Hmar, Speaker, HSA Gen.Hqrs, Brando H Keivom, President, HSA JHQ Shillong, Ramengmawi Khawzawl, le Jeffrey Khawzawl -in an lirthei phal em em a an min hmang tir kha HSA Choir ta dingin theinghil phal chi a ni nawh. Shillong khawpuiah keini thingtlang nunghak le tlangval , kan tlin nawna tam tak hmu kana fel em ema mi lo tlungtuhai chungah lawmthu hril naw thei kan ni nawh. An ni lei khan Shillong khawpui kha inhawi kan ti in kan mikhuol nawh a, HSA Choir membarhai damsung hril a tling tah ding a nih.

Amiruokchu van ruo tui tam talu leiin Shooting khawm nei thei lovin zantieng dar 3 in ka tarpu Pu.Lalnghaklien Buhril hai in ah Choir Member hai thlankhawmin zan dar 11:55 rel hnawt dingin kan insiem lem tah a. Zantieng dar 4-in Demthring Petrol Pump a bawk Pu Lalthlamuana Hmar-in tawngtaina a min thla hnungin Hmangai takhai lengna ‘ Muolhoi’ pan dingin Shillong khawpui chuh kan hung suok san nawh tah a. Guwahati kan tlung hnungin Synod Guest House-ah  insukfaiin bu kan fak a, Zan dar 11:55 relin Haflong kan hung pan nawk a. Rethei ta sa sa zan khawvarin thungna mumal um loin vai hai kara ei hei intat chu imu intuo thei muol kan um nawh. ni 20 september 2016, Zingkar dar 10:30 vel chun New Haflong Rel chawlhmun kan tlung a. Hmangai takhai lengna Muolhoi chuh dar 12 velin kan tlung tah a, a thang lova minit khat khawm hun hmang ka nuom tah naw leia kumtluonga dinga ka intiempui; Faith a nu ngei khawmin naute le Bawngsa chartang leh ngat an mi lo hmuok chuh  nu a tling kher el, ‘A pasal nia insal hi ka’n zak nawh!’

Don't Miss
© all rights reserved
made with by Simon L Infimate