Muolhoi, July 29, 2016, Virthli (ONP): Vawisun khan Muolhoi HWA NC Hills & Karbi Anglong Joint Headquarters huoihawtna hnuoia TRANSFORMATION ti thupui hmangin CH Khawthlang Memorial Hall Muolhoiah Seminar nei a nih. Hi hunah hin nuhmei ruol mi 500 neka tam an fekhawm a nih.
Pi Hnemi Tuolor, General Secretary, HWA NC Hills & Karbi Anglong in “Kohran le Khawtlanga Nuhmei Mawphurna” ti thupui hmangin thu hrilna le paper presentna a nei a, Pi Niiangi Hrangchal, Vice President HWA NCH&KA chun “Inchukna” ti thupui hmangin thu a hril bawka, Pi Zohnem Hmar, Asst.Gen. Secy in “Fina le Hriselna” ti thupui a hril a, Pi Ropui Hmar, President HWA NCH&KA chun inkhawm keithuoiin “Hnam” ti thupui hrilna a nei bawk.
Hi programme hi NC Hills & Karbi Anglong Joint Headquarters huoihawtna hnuoia khuo dang dang hieng Harangajao, Mahur, Tuolpui, Muollien (Jinam Valley) a hai lo nei ta ani bawk. HWA NC Hills & Karbi Anglong in “Transformation” thupui hmangin hieng ang hin thupui thenawi hran hran hai hmangin Nuhmei hai lai inhrilhrietna sin hi nasa taka hnam ta ding le khawtlang ta dingin an lo thaw ve ta a nih. Hi hi thil hin ei khawtlang le hnam siemthatna ding chun inthlak danglamna tha angai a, chu chu intluntu dingin abikin Nu hai le Nuhmei haiin kawng dang dangah mawphurna a nei haia inhrilhrietna hun an hmang hlak a, tangkai le hlawk an ti hle bawk.
