Responsive Ad Slot

Facebook group HLC in lekhabu pahni ISBN No. nei thei ngat a ruolin an tlangzar

Saturday, July 23, 2016

/ by VIRTHLI HMAR
~ LRS Puruolte

CCPUR | July 22, 2016, Virthli (ONP): Kum hni liemtah a inthawka Facebook group siem a um Hmar Literature Circle (HLC) chun lekhabu pahni "SINLUNG SERMEI & HIGHLAND MUSINGS" an buotsai chu July 22, 2016 zan 6:30 PM khan Life Cafe, Rengkai Road JJ Plaza, CCPur hmun ah puithu taka tlangzarna an nei. Hi lekhabu hai hi Indige NE, Centre for Organisation Research & Education (CORE), Imphal 795 001, Manipur, India in an insuo (Published) pek a nih. Hi lekhabu sunga hin thu-le-hla le Ṭawng upa hrilfiena khawm a umsa nghal bawk a nih. Facebook group HLC member laia mi, mi tum tumin an ziek hai hi lekhabu haia hin thunkhawm a nih. Cover design khawm insit a um naw tak zet a, tulai ṭawng takin a creative hle. A designtu hi Tv. Lienthanglur Khawzawl Editorial Member, Highland Musings le Admin, Virthli a nih.

Sinlung Sermei lekhabu hi Prof. (Dr.) Laldena Intoate, Retired Professor le Senior Fellow, Indian Council of Social Science Research nilaiin a tlangzar a, Highland Musings ti lekhabu chu Pu Isaac Pakhuongte, Principal, Sielmat Christian Higher Secondary School in a tlangzar bawk. Hi huna hin Pu Joseph Lalrothang President, HI GHQ; Pi Zosangkim Pudaite, HLS (Manipur); Pi JL Sawmi President, HWA GHQ; Pu Timothy Z. Zote Editor, Manmasi Digest Magazine haia inthawk thuhril tawi ngaithlak a nih.


Hi huna hin Nk. Lorinda Varte le Pu James Pakhuongte haiin hla'n mi fekhawm hai an in awi a. Hun hawng ṭawngṭaina chu Rev. Benjamin Shakum in a nei a, Hunkhar malsawm tawngtaina chu Upa Darliensung in a nei. Welcome Speech le Vote of Thanks Pu James Songrolal Songate, Editorial Team Member of Sinlung Sermei and also Administrator of Hmar Literary Circle in a nei a, Introduction and Background of the publications Dr. Immanuel Zarzosang Varte, Co-Chief Editor of Sinlung Sermei & Highland Musings and Administrator, Hmar Literary Circle in a nei bawk.

HLC chun Hmar Literature Society (HLS) lan tuma HLC chu an indin an naw thu le HLC thil tum chu Hmar tawng suk hmasawn a ni thu hai an hril a. Thuhrilna hun hmangtuhai khawmin HLC chu inpakum an ti thu, hmatienga hai tawng sukhmasawntu hung ni pei dinga an ditsakna inhlanin, hienganga ziek le print ngeia lekhabu a siem chu Hmar ṭawng le hnam damna dinga pawimaw tak a ni thuhai uor takin an hril tawl.

Dr. Immanuel Zarzosang Varte, Chief Editor, Sinlung Sermei & Highland Musings le James Songrolal Songate, Editorial Member, Sinlung Sermai hai chun HLC aiawin hi hun ngaipawimaw le hlutasak peka ṭhang hai po po, Tlangzar pektu, thu ṭha tak tak hril a, ditsakna inhlantu, hla saka ṭawiawmtu hai, media partner www.virthli.in & facebook group Virthli (Online News Portal), social media tienga hi hunser suklar pektu Hmasawnna Thar (An Independent Daily Newspaper) le Churachandpur Times (facebook group le Online News Portal) hai chung ah lawmthu an hril.

Hi lekhabu sunga thu siektu hai lai hin naupang tak tak dam ni hai sienkhawm ST (Schedule Tribe) Shakespeare a ko thei ding khawpin an puitling a, a thiem in insit an um naw thu Dr. Immanuel Zarzosang Varte, Chief Editor, Sinlung Sermei & Highland Musings  chun a hril. Sinlung Sermei lekhabu tlangzartu Prof. (Dr.) Laldena Intoate chun Hiengang lekhabu hlu tak el tlangzar theia a um hi lawmum a ti thu a hrilin. Hla tak hi lekhabu hin phak ngei dinga a beisei thu le a ṭawngtaina a ni thu hai a hril a, HLC in hiengang lekhabu an siem hi hiengang tienga dangchar hai ṭhangpuitu a ni ngei a beisei thu a hril bawk.

Highland Musings ti lekhabu tlangzartu Pu Isaac Pakhuongte chun HLC in hienganga lekhabu a buotsai hi lawmum a ti thu hrilin Poets haiin hienganga lekhabu an hung siem hi a lawmthu a hril a, vanram khawm nisien, Pathien ropuina ding khawm  nisien hla pawimaw zie hai a hrilin Poets-hai an vulzing theina dingin a ditsakna insangtak an hlan. Tlangzartuhai hi HLC chun lekhabu pahni hai hi an inhlan a. Chuonglaizing chun Pu Isaac chun a lawmthu hrilnain Rs. 1,000/- in a chang pek.

Hi huna fekhawmhai chu Light Refreshment tuihnaitak Life Cafe product ngat coffee le muffin HLC chun an lo treat a nih. HLC chun Life Cafe neitu Tv. Michael Esh lr TV. Joseph R. Hmar hai chunga khawm lawmthu an hril. Anni hai inhawngna lr onprkzona zarin hi hunser hi a phuisui pha hle a nih. Chun hi hunser hosttu Jubille Tlangte a hnesawin a zei hle a, a hmel a ṭha bawk leiin hi huna hun hmangtuhai chun an thuhrilna huna hai an ngaisangthu an hril tawl. Tlangzarna hun le hmuna hin hieng lekhabu hai hi zawr suok nghal a nih. Hlutsak a hlaw hle. Manipur state puotieng khawm thawn a ni ding thu HLC chun an hril.

Hieng Lekhabu hai hi International Standard Book Number (ISBN Number) nei ngat le insitumlo tak an ni a Rs. 250/- peia pakhat a zawr a nih. A copy dit le zawr sawng nuom hai chun Immanuel Varte le Lrs Puruolte hai kuom ah ngaiven thei a nih.

Hi lekhabu hi a hlutna tam tak a um a, hnam rohlu a tling tak zet a, inchaw la, lo tiem la insir naw ti nih. I  ngainat zawng le ditsak zawng hai pek (present) khawmin a ṭha tak zet. Mihai tadinga malsawmna ropui tak lekhabu a nih!

Photographs: Muona Infimate | Virthli


Don't Miss
© all rights reserved
made with by Simon L Infimate