Responsive Ad Slot

Hmasawnna Thar | 07 June, 2016

Tuesday, June 7, 2016

/ Published by VIRTHLI
Saidan khuoah Solar Energy Water Pump DC in a hawng
CCPUR: Pu Lunminthang Haokip, IAS, DC, CCPur chun zani zingkar 8:00AM khan Saidan, CCPur­ah Solar Energy Water Pump hmanga mipui han tui dawn ding indaitawk an hmu theina dinga siem a hawng a, Rev. Huolthangsei Thiek, Executive Director, EAC in Pathien kuoma tawngtainain an hlan.

Solar panel 1200 watt (1.2 KV) Energy power hmanga Saidan khuo mipui tui dawn ding pump­na dinga siem Solar Pump hi feet 180 a inthuk le tui litres 25,000 keng tanky nei a ni a, Tata Trust, Mumbai thangpuina hnuoia EAC in an siem a ni thu Simon L. Hrangchal, Secretary, Relief and Development Department, EAC chun a hril. Local level­a technician an umnaw leiin Rs.3 lakh sengin PHED, Imphal han drilling (180 ft) an cho a, Mangal Rural, Imphal in Solar panel installation an hung thaw a nih tiin a hril.


DC/CCPur chun, Solar Energy hmanga mipuiin tui dawn ding an hmu theina dinga Tata Trust, Mumbai le EAC hmalakna chu lawmum a ti thu hrilin, Solar energy hmanga sinthawna hin carbon emission a suktlawm el chau ni lovin hmasawnna nasatak a nih tiin a hril. Carbon emission suktlawmna dingin khawvel rambung han solar hmang hi nasatakin an hung uor ta thu; India khawm Solar production tiengpangah khawvela pahnina in a thang phak thu. Pathienin khawvel elvartu dingin Nisa a siem hi mihriem han darkar 2 el khawm a sekkhawl dan hriet chun power/energy indaitawk nei thei a ni zie, Solar hi energy dang ang a ninaw leiin hmang thiem a pawimaw tiin a hril.

Hawng­a um Diversion Based Irrigation construction of Solar Energy Water Pump for Drinking Water Supply system hin minute khatah tui litres 20 a pump suok thei a nih.

Felicitation prog. a thang seng dingin
IMPHAL: June 7, 2016 (vawisun) 10:30AM hin HSA CCPur Jt. Headquarters chun HL Daka Memorial Hall, HSA Campus, Rengkai, CCPur­ah tukuma Class X le Class XII exam­a hlawtlingna chang hai lawmpuina a nei ding a ni a. Hi huna hin Award dawng dinga thlang hai chau ni lovin HSA member hlawtlingna chang hai po po khawm lawmpuina hun hmang a ni ding leiin Class X le XII tukuma pass hai chu thang seng dingin President, HSA CCPur Jt. HQ in inhriettirna le ngenna a siem.

Rs. 54,000/­ an inhlan
CCPUR: Eimi CISF(Central Industries Security Force) Whatsapp Group –a Commandant a inthawk Rifleman chena mi 47 han Manipur Tribal Movement Road Construction Committee hmalaknaa Guite Road siemthatna dingin  zanikhan Rs. 54,000/­ construction committee kutah an inhlan.

25th Madras Regt. hai an insawn
CCPUR:  25th Madras Regiment, Khuga Dam a um hai chu Secunderabad a um dinga sawn an ni angin June 5, 2016 khan CCPur suoksanin an umna thar ding hmun an pan tah. Khuga Dam a hin Sikh Light Infantry pawl an hung um ding a nih.

LLIN/ITN 12908 an semdawk tah
CCPUR: District Malaria Dept. chun June 5, 2016 chen khan PHC 6 (Singngat, Behiang, Sangaikot, Thanlon, Henglep le Saikawt) huomsunga khuo le veng tum tum haiah Long Lasting Insecticide Net/Insecticide­treated Net (LLIN/ITN) 12908 an semdawk ta thu an hril. June 7, 2016 khin Malaria department staff hai chun Sangaikot Sub­Division (Saikawt PHC) hnuoia In 977 haiah LLIN/ITN sem nawk an tih.

CDFRA Election  
CCPUR: June 20, 2016, 10AM khin Churachandpur District Farmer’s Research Association (CDFRA) election KIC complex, Tuibuong­ah nei ning a tih. Hi inthlangnaa ngir nuom han June 18, 2016 chenin Rs. 100/­ pein Lalboi Tea Hotel, Agriculture Office Compound, & Vengnuam Gate­ah  nomination paper lak le file thei ning a tih.

LPG thua harsatna nei hai ta dingin
CCPUR: Kim Joe Gas Service customers, Gas (LPG) thuah bank account le Aadhar bakah Subsidy lutlo le Aadhar linking la fel lo hai ta dingin mani lekhabu chawiin vawisun (June 7, 2016) 8AM­1PM inkar sung hin Kim Joe Gas Service­ah buoipui thei ning a tih tiin Agency chun inhriettirna a siem.

TNHF 12th Meritorious award sem ding
CCPUR: June 10, 2016 , 11:30AM khin B. Vengnuom Community Hall, CCPur­ah TN Haokip Foundation (TNHF) hmalaknain 12th Meritorious Award Distribution, 2016 um a tih.

Chief Guest in D. Korungthang, Minister Health & FW, CADA&GAD thang a ta, James Doujapao Haokip, MCS, SDO/Tuibuong le Vanlallien Haokip, Principal, Salt Brook School hai Guest of Honour le Special Guest in thang an ta, Rev. Hemkhomang, Principal, DTS in award dawngtu hai tawngtaipekna nei a tih.

Hi huna hin Special invitees in Blessed Choir le MDCs hai thang bawk an tih. TN Haokip Foundation Trustee Board chun mitin hi hun hmangna uop dingin an fiel.

June 11­ah One day Lok Adalat
CCPUR: National Legal Services Authority le Manipur State Legal Services Authority enkaina hnuoiah June 11, 2016 khin Churachandpur District Legal Services Authority chun Chief Judicial Magistrate Court, CCPur­ah One Day National Lok Adalat buotsai a tih. MACT, Insurance claim, Banks le family thila thubuoi rel fel ding nei hai chun June 8, 2016, 12:00Noon chen khin ziek in Chairman/Secretary, CCPur Legal Services Authority, CJM, CCPur kuoma peklut thei ning a tih.

Bus Parking Public Toilet hawng
CCPUR: Pu Lunminthang Haokip, IAS, DC/CCPur chun zani 9:30AM khan Rengkai Road­a Sugnu Bus Parking le Public Toilet chu mipui hmang thei dingin a hawng. Public Toilet hi Sangaikot Sub­Divsion Chief Assn. in a ram neitu Miss Damhoihching phalnaa a compound sunga an bawl a ni a, Gents toilet 2 le Ladies toilet 2 a ni a, a enkai mawphurna chu Miss Damhoihching kuta an pekdawk. Public toilet hi Rs. 5/­ le Rs. 10/­ pein inzun le inhnawm thei nitang a tih.



DC, CCPur chun mani ta anga fai le thienghlim taka enkawl dingin a hmangtu ding mipui hai a ngen.

Chief Association­a Chairman Khupzasuan Zou chun, DC & MDC levela sum thawkhawm haia inthawk Rs. 4 lakh senga toilet hi bawl a ni thu le Chief Association in Rs. 2.2 lakh donation hmu a ni thu a hril.

HYA Muolvaiphei thuoitu thar ding hai
CCPUR: May 30, 2016 khan HYA Tuithaphai Jt. Hqrts inrawinain kum 2016­2018 sunga HYA Muolvaiphei Branch thuoitu ding thlangna Youth Club Hall, Muolvaiphei­ah  nei a nih. President dingin Ruolchunghnung; V. President in Fimsanglien; Secy. in Lalrammawi Hmar; Asst. Secy in E. Ramngailien; Fin. Secy in Upa Lalzamvel; Treasurer in Lalsiempui; Secy. Inf. & Publ. in Kenny Ruolngul; Secy. Art & Culture in Joshua Lalhmathuoi; Secy. Games & Sport in Samuel Lalhrietzing hai thlangtling an nih. Asst. Secy. Art & Culture chu Committee ruot dinga sie a nih.

Ngaiven le buoipui hun lai
CCPUR: CDSA a fresh/renewal affiliation/registration le transfer buoipui hun lai a nih. A thaw nuom hai ta dingin ngaiven hun a nih. Affiliation hi thaw mek a ni a, inter­district le inter­club transfer chu June 1­10, 2016 le June 11­20, 2016 inkara thaw ding a nih tiin General Secretary, CDSA chun inhriettirna a siem.

Vacation Dance Class a um ding
CCPUR: June 8­July 8, 2016 inkar sung khin HL Daka Memorial Hall, HSA Campus, Rengkai, CCPur hmunah Lam dan chi hran hran hieng­ Hip Hop Dance, Urban Dance, Break Dance, B­Boying, Foot Walk, Moon Walk le a dang dang inchukna Vocation Dance Class um a tih. Registration Fee Rs. 500/­ peka thang thei ning a tih. Inchuktirtu dinghai chu­ Kevin Lalrintluanga Khawlhring (Nobby), Choreographer; Jordan Munluo (Unique J),Tricking; Khumzamung (Mung ) Power Move le P.Haulunthang (B Boy C Kou), Breaking hai a ni a, thu chieng lem 91+ 8732024294/ fb­ Kevin Lalrintluanga Khawlhring­ah hriet thei ning a tih. Lam inchukna hi 2:30­3:30PM inkar le 3:50­4:50PM inkar nei ni hlak a tih.

Inhnikna neihai thang ve dingin
CCPUR: Tribal Rights Vigil, Manipur (TRUM) chun vawisun 12 noon a inthawk hin YPA General Conference Hall, Hiangtam Lamka­ah TRUM: A Climatization & propagation le TVRM JHQ Lamka Official Launching nei ning a tih. Inhnikna nei phawt Anti­Corruption le Rights Abuse interaction a thang ve dingin TRVM chun fielna an siem.

ATML in hrilfiena an sien
CCPUR:  All Tribal Movement of Lamka (ATML) chun, June 3, 2016 nia YPA Election huna pawisa sem a nih ti hriet a ni leiin T.S. Zamlian inhmupui a ni a, hiengang hi thil indiklo le ditumlo a ni thu; society sunga ieng election  khawm thienghlim taka nei tha an ti thu va hril a ni a. Hi taka inthawk suok a ni hnungin Facebook le Whatsapp hmangin T.S. Zamlian thuoihmang a nih tiin thudiklo post in a um a, report indiklo tak a umleiin ATML Chairman le Treasurer mawi lo taka man le thisen suok hiel khawpa sawisak anni chu ATML chun pawi a tih.

Facebook le Whatsapp hmanga report indklo post tu hi a tuortu ding a ni lem naw mani? tia indawnna siemin hi thuah hrilfiena a siem.

AG Pastor 5 han Chennai an pan
CCPUR:  Rev. Dr LH Jacky, Superintendent, Manipur District of AGEI inrawinain June 6, 2016 khan AG pastor 5 hai chun Churachandpur suoksanin Chennai an pan. June 7, 2016 hin New LIfe A G Church, Chennai­a Assemblies of God of India Presbytery meeting­ah thang an ta, June 8 le 9, 2016 haiah Assemblies of God of India Centenary (kum 100) tling lawmna New Life AG Church a nei huna thang an tih. Centenary lawmnaa thuhriltu ding chu Korea khawpui Seol a members 8,00,000 zet nei Rev. Paul. Youngi Cho ning a tih. June 10, 2016 in kum 2016­2019 sunga AG thuoitu thar ding thlangna um a ta, Election huna teller dingin Manipur­a inthawk Rev.  L. Khama le Rev. Lalsangthang, Hmarbiel Presbytery hai ruot an ni bawk.

IMC seats 27-a inthlangnaa seats 17 a vote tiemzo; INC 8, BJP 5 le IND in 4 an lak tah
IMPHAL:  Imphal Municipal Council (IMC) inthlangnaa vote tla hai chu zanikhan tiem tan le vote hi tiem mek a ni a, seats 27 haia inthlangna um laia zani zan dar 8 chen khan seats 17 tiemzo a nitah. Vote tiem zo ta poa hin Indian National Congress (INC) in seats 8 an lak ta a, Bharatiya Janata Party (BJP) in seats 5 le Independent in seat 4 an lak tah.

Zani zan khan Imphal West District­a Ward No. 10 chena mi tiem zo a ni a, Zanita vote tiem bak po chu June 7, 2016, 8AM a inthawk hin tiem tan nawk ning a tih.

Hi thu ei sut chena result ei hriet dan chu a hnuoia ang hi a nih.
IMPHAL WEST:
Ward No. 1 : Winner Gaidon, BJP
Ward No. 2 : Winner Th Purnachandra, BJP
Ward No. 3 : Winner H Nutanchandra, BJP
Ward No. 4 : Winner L Arenkumar, INC
Ward No. 5 : Winner H Bobby Sharma, BJP
Ward No. 6 : Winner T Indrajit, INC
Ward No. 7 : Winner RK Jiten, INC
Ward No. 8 : Winner P Devala, INC
Ward No. 9 : Winner Soram Sunil, INC
Ward No. 10 : Winner S Tiken, IND
IMPHAL EAST:
Ward No. 18 : Winner L Inunganbi, BJP
Ward No. 19 : Winner Y Lukamani, INC
Ward No. 20 : Winner L Tombi, INC
Ward No. 21 : Winner Joy Kabui, IND
Ward No. 22 : Winner N Kumudini, INC
Ward No. 23 : Winner L Romola, IND
Ward No. 26 : Winner M Phaomei, IND


Vawisun Union HM an inhmupui ding
IMPHAL:  All Party palai, New Delhi­a cham mek hai chun Union Home Minister Rajnath Singh inhmupui theina dingin appointment an hmu ta a, vawisun 11AM hin CM O.Ibobi Singh inrawinain Home minister Rajnath Singh an inhmupui ding niin New Dlehi a um All party palaia thang pakhat chun report a hung pek niin ei thu dawngna chun a hril. All party palaihai hi June 3, 2016 a inthawka New Delhi­a in camp an ni tah.

TPLA C­in­C Army han an man
IMPHAL: June 3, 2016 khan Red Shield Division hnuoia Jawalamukh Battalion han Thadou People Liberation Army (TPLA) Commander­in­Chief Nekholen Lhouvum @ Helen (45), s/o L. Sekhothang Lhouvum of L. Haibung, P.S. Kangpokpi, Senapati District chu Bethel Veng, Senapati district­ah USsiem 9mm Pistol 1, magazine 1 le a mu 5, Mobile phone le Kenwood (motorola) set 2 leh an man a, Imphal West Police station­ah an peklut niin PIB, Defence Wing, Imphal thusuok chun a hril.

Dy. CM in New Delhi a pan
IMPHAL: Dy. CM le Home Minister Gaikhangam chun zanikhan Imphal suoksanin New Delhi a pan. New Delhi­a cham mek All Party palaihai a zu zawm ding nia hril a nih. BJP, Manipur Pradesh in CM, O.Ibobi Sihngh in Union Home Minister Rajnath Singh inhmupuina dingin appointment a ngen naw hrim hrim tia a hril chu an dik naw a, hienga intumna um hi thil vangduoi thlak takel a nih tiin New Delhi a pan hmaa Babupara hmuna a quarter­a chanchinbumihai an hmupui huna a hril. Police han an man KSA volunteers Bidyalaxmi le P. Bruce hai chu June 8, 2016 chena insuo dinga thil tul hai buoipui a ni a, an hnu takah June 10, 2016 chena insuo ning a tih tiin Gaikhangam chun a hril bawk.

Non­ Manipuri dawr suksiet
IMPHAL: Zani 3PM vel khan Kangleipak Students Association (KSA) Volunters han Kakhulong le Masjid Road, Paona Keithel, Imphal­a Non­Manipuri­hai dawr an suksiet. Police han hi thil tlung an hriet le inruolin an hnawtzui nghal a, sienkhawm KSA volunteer­hai an lo tlanhmang hman leiin man an nei nawh. Fake l dawn ding thil haiah thil pawlsa (adulteration of food item) an nei tia intuma um hnung khawma state sawrkarin a ngaisak naw lei le an volunteers 2 mana an um dodalnaa hi thil hi an thaw nia hril a nih.

Danish nuhmei suolluitu mi 5 thiemnaw inchangtir
NEW DELHI: January 14, 2014­a Danish khuolzin (tourism) nuhmei kum 52 mi chemte leh chuktuoa suolluitu le a thil nei hai lapeka suomtua intum mi 5­ Mahendra alias Ganja (27), Mohd Raja (23), Raju (24), Arjun (22), Raju Chakka (23) hai chu ZanikhanDelhi High Court in thiemnaw an changtir, hi case­a inrawlna neivea intum dang pakhat Shyam Lal (56) chu tukum February thla khan a lo thi tah.

Mr Universe hlui Manohar Aich a thi
KOLKATA: India mihai laia Mr Universe ni hmasa tak Manohar Aich chu June 5, 2016, 3:50PM khan kum 104, thla 2 le ni 4 zeta upa niin a chengna Baguiati, West Bengal­ah a thi. Manohar Aich hi feet 4 le inches 11 chaua dung insang, kum 1942 a Royal Indian Air Force a lo lut, kum 1550 a Mr Hercules lo inelpui (contest) a nih. Hi huna hin kum 36 mi a nih. Kum 1952 a Mr Universe contest­ah Mr Universe title a lo lak a nih. Nau pasal 2 le nau nuhmei 2 a thisan. Kum 1991 khan BJP candidate in Lok Sabha election­ah a ngir ve a, tlingzo naw sienkhawm votes 1.36 lakh a hmu a, an khingpui hai laia hrat tak pathumna a nih.

VIP han Cars siren an hmang a khap
PUDUCHERRY:  Puducherry Lt. Governor Kiran Bedi chun, Puducherry Union Territory huop sungah VIPs han an car­ah Siren an hmang khapna thupek an suo. Hi thil hin Lieutenand Governor vengtu escort le pilot motor hai khawm a huomsa vawng a nih. Amiruokchu, emergency services hieng Ambulance le Fire services motors hai chu hi khapna hin a huomsa nawh.

Pak. in India Ngamantu 18 a hung insuo
KARACHI: Pakistan chun zanikhan Karachi­a Malir jail­a a hrentang India Ngamantu 18 a hung insuo zalen. India Ngamantu hai hi India ram pela Pakistan tuipui­ah Nga anman tia intumna leia a man le hrentang an ni a, Lahore­a inthawk Rel in hung chuong an ta, Wagah border­ah India thuneituhai kutah inhlan a tih. Tulai hnai khan Pakistan chun India Ngamantu 300 chuong zet, jail­a an intang hun ding a tawp ta leiin a lo hung insuo ta a, tuhin Karachi jail­ah India Ngamantu 400 chuong an lan tang mek bawk.
-------------------------------------------------------------------------------------------------------------------
VAWISUN THUPUI
Zangaina le ngaidamna chu Lalpa kan Pathien ta a nih; ama chunga chun kan lo hel ta sih a;   ­ Daniel 9:9

EDITORIAL: Editor & Publisher a inthawkin

Chanchinbu hi nitina suok dam, haptakar tina suok dam, thla tina suok dam le magazine chi hran hran hunbi tum tum nia suok dam tam takel a um a. Hieng chanchinbu buoipuituhai hin chanchinbu buoipui harsat dan anhriet seng ring a um. Ei ni lai ngeikhawm nitin Chanchinbu, haptakar tin chanchinbu le thla tina suok magazine tam takel a lo suok ta hlak. Amiruokchu, a dam khawsuok hi hril le hriet ding an um meu nawh. Hi taka inthawk khawm hin Chanchinbu buoipui a harsatzie chu an lang chieng hle. Chanchinbu hi vawikhat phur thuta thaw el chi a ninaw a, tumruna, taimakna le thutlukna fel tak neia thaw a tul takzet a nih.

Chanchinbu hi mi rama hai chu a hlawk el bakah inzaum le inlar a tling phak a. Hi lei hin mi hausa le a che thei hai chun Chanchnbu chi tum tum an insuo a, inlarna le hausak phanain an hmang hrim a nih. India rama Chanchinbu lien thawtuhai hi mi hausa, mi che thei, mi chunga lenghai le thenkhat chu political party lien dam, company le organisation lien le ropui tak takhai anni tlangpui. Ei ni lai ruok chu a ni ve nawh. A bikin iemie ti tawng hmang Hmar hnam sungah chun a ninaw zuol bik ti inla ei hril suol taluo ring a um nawh.

Ei ni lai hin Chanchinbu hi thil hlawk takel, sumdawngna a hmangtlak nisienla chu ei mi hausa le lekhathiemhai hin anthaw sup sup ngei ring a um. Amiruokchu, a ni ve tlat naw leiin ei ni laia Chanchinbu buoipuituhai chu mi hausa le che thei  hmu ding le hril ding an um nawh. Chanchinbu buoipui hi a harsatna chi hran hran um sienkhawm ei ni laia ei harsatna tak chu a latu ding le a man pe tha nuom ei tam naw hi a nih. Chanchinbu hmasawnna ding chun a latu tam, a man pek that le advertisement thaw nuomtu an tam hi a nih. Chanchinbu latu hi a tlawm takah mi 10,000 vel dam ni inla chu a man tlawm thei a ta, Chanchinbu hi suk changkang thei a hung ni ngei ding a nih ti hi latu le tiemtu han ei hriet ve a pawimaw. Hi khelah hin a man pek that le a semtu ringum le taimak a tul hle bawk.

Ei Chanchinbu hi October, 1984 a kha nitin Chanchinbua insuo tan a ni a. Khang hun lai khan ei ram le society ngirhmun a lan hnuoi em em a. Sum le pai hmuna ding (commercial purpose) thei ding a ni nawh ti chu chieng takin ka hriet a. Amiruokchu, ei unau tribe dang dang han nitin Chanchinbu an tawnga tiem ding an nei a, ei ni tribe (Hmar) khawmin ei nei ve tul ngeia hrietna, invawina, piengtharna ka nei leia ka damsunga nitin Chanchinbu hi thaw dinga thutlukna le inhlanna neia ka lo tan a nih. Sawrkar sin ka hmu naw leia chanchinbu thaw ka ni bik nawh. Keima tawkah Pathien zarin Staff Selection Commission hnuoia sin haiah khawm ka lo inziek tling ve a nih. Hi thil hi uongna thila ka ziek a ninaw a, ka thiltum dan le ka ngirhmun hi tiemtu han in mi lo hrietpui ka nuom leia ka zieklang a nih. Hienganga thutlukna siem thei dinga thurawn  mi petu hai chungah lawmthu ka hril.

Ei bul intanna kha Cyclostyle  a ni a. Pathien le latuhai zarin Cyclostyle a inthawk Letter Press in ei kai tung pei a, Letter Press a inthawk Sheedfed Offsed ah ei kaitung nawk pei a. Khawvela thiemna, varna, hrietna le technology hai in hma a hung sawn nawk pei bakah ei thil dit dan hai khawm a hung inthlakdanglam zung zung el a. Sheedfed Offset chu Chanchinbu thawna dingin sawrkar dan khawm a hung tlingzo nawk tanaw pei leiin Web Offset a hung tul nawk ta a. Tuta inthawk kum 5 hnunga chun Multi Color Web Offset hmanga Chanchinbu sut a hung tul nawk ngei ding niin an lang. Khawvel hi inelna ram, a tling le tlak tlak hai dam suokna a nita leiin Chanchinbu buoitsaitu le latuhai ei thangruol nasat a tul em em el a nih. Mihai thaw ang anga Chanchinbu khawm ei thaw le sut ve pei a tul tlat leiin Web Offset hmanga Chanchinbu sut chu lo thei lova ei hmabak a hung ni ta a nih.

Hiengang hi ei ngirhmun a ni leiin hungtlung ding October, 2016 a inthawk Web Offset hmangin Hmasawnna Thar khawm sut a, a phek suklien le suktam dingin (phek hni, vai phek tiema phekliin) hma ei lak mek a nih. Chanchinbu hi hiengang khawla ei sut thei pha chun international size/Standard size a hung ni ta ding a ni leiin a lakman khawm a hung kaisang ngei ngei a tul a, chu ding chun ei chanchinbu latuhai khawm in lo insingsat ve a tul ding a nih. Mihai thaw thei chu ei ni tribe khawmin ei thaw ve thei ngei ei ring tlat a nih. Ei thiltum a hung hlawtling theina ding le ei dam pei a, Hmasawnna Thar a fe tluong pei theina ding chun a lakman pek that le bat lo kha a nih ti latu han ei hrietzing nuom a um hle.

Ei Chanchinbu thiltum dang pakhat, thalaihai sin zawngna kawnga information pek ti khawm a hlawtling thawkkhat hle a nih ti tiemtu han ei hriet ve nuom a um. Hmasawnna Thar in sin ruok an suo hlak leia State le Central sawrkara sin hmu thahnemtawk tak an um ta a, thenkhat lem chu sawrkar officer, Bank officer le Department hran hran haia sin pawimaw le insang chel an um ta a. Sin hmu po poin an sin hmu thuah lawmthu hung hril kher nawhai sienkhawm thenkhatin an hung hril hlak leiin, an sinhmu ei lawmpui el bakah lawmthu hrilna chang  an hung hrietna thuah kan lawm takzet a nih. Hmatieng peia khawm thangruol ei ta, Hmasawnna Thar hi mimal annawleh sungkuo fakzawngna thil elah ngai lova a hung changkang pei a, Chanchinbu tha le innghatna tlak a hung ni pei theina dinga mani theina senga thahnem lo ngai zuol nawk sau sau dingin ka hung ngen cheu.

Don't Miss
© all rights reserved
made with by Simon L Infimate