Responsive Ad Slot

FAST in 18th Raising Day ursun takin an hmang

Saturday, June 18, 2016

/ Published by VIRTHLI
CCPUR | Virthli (ONP): June 17, 2016 1pm khan HL Daka Memorial Hall, HSA Campus, Rengkai, CCPur hmunah Rengkai besana um Frienship Athletic Sporting Team (FAST) chun 18th Raising Day ursun takin an hmang. Chief Guest in Pu M. Gouzamang Guite EM, ADCC & MDC, New Lamka East, Guest of Honour in Pu Joufonlien Joute Chief of Rengkai le Functional President in Pu Richard Laltanpuia Asst. Gen. Secy., HSA GHQ hai an thang a. FAST chun anni tadinga mi thahnemngai Tv. LRS Puruolte, Pu Ruotsang le Pu James Thomas hai le tukum board exam a Class 10 le 12 an member sunga mi hlawtlingna changhai kuomah Chawimawina thu ziek (Memento) an inhlan. Hi hun hi nulepa khawmin uopin thuhrilna hun an hmang a, FAST chu suongum le inpakum an ti thuhai an inzawt tawl. Sun Programme hmangzoin zantieng ruoi the a ni bawk.


Hi huna Chief Guest Pu M. Gouzamang Guite EM, ADCC & MDC, New Lamka East chun FAST hai chu state le national level a hai chen mi iemanizat an lo sersuok thei tah le football chau nilo a an ni member sung a mi sawrkar sin hmu iemanizat an lo um thei ta chu inpakum le lawmum a ti hle thu hai a hril a. Churachandpur-a tribal hnam tum tum hai chu hnambing ang zawnga hma la lo a, huopzau taka renga damtlangna ding ngaituoa hma laktlang a pawimaw thu hai a hril. FAST hai chu hmatieng ah a theina haia thangpui an tiem baka thilpek an hlan bawk.

Guest of Honour le Functional President hai khawmin FAST hai hmalakna chu inpakum an ti thu le hmatieng peia hai thangpui an huom thu hai an hril. Hun an hmang zoin thilpek an inhlan ve. Sun huna hin an member fam lo changtah hai minute 1 sung totawk a sunna hun an hmang a, tulaia Hmar laia Singer inlar Nk. Grace Famhoite le Nk. Jenifer Nianglawmkim haiin hla'n mipui an inawi a. Zan hun chu a hmun pangngai a bawk Raising Day lawmnain Open Concert a hun hlimum tak hmang a ni bawk.

FAST hin Rengkai khawlaili Vengpui lai tak Office neiin Club/Team inlar le changtlung ve tak an ni mek a nih. An Player hai chu India ram hmun tum tum a hai Club inlar le tha tak tak zawmin, NE Tamchon le tournament inlar tak tak a hai dam an inkhel a, an player hai chu Club/Team hran hran in an lak (hire) rawp hlak bawk. "Together until Triumph" ti chu FAST motto a nih. Chuongang pei chun anni Club/Team hi an inthuruol hle a, hma an sawn hrat hle bawk. Tuta 1st Rengkai Premier League fe mek khawm hi anni le Rengkai Athletic & Cultural Club (RACC) thangruola an huoihawt a nih.
Don't Miss
© all rights reserved
made with by Simon L Infimate