Responsive Ad Slot

Hmasawnna Thar | 20 May, 2016

Friday, May 20, 2016

/ Published by VIRTHLI
Mini­ Secretariat bawl mek an enfel
CCPUR: Mr T. Lalkhohao Haokip,President, KSO/CCPur inrawinain KSO CCPur thuoituhai chun zani 11AM khan Mini Secretariat bawlna fe mek a hmuna an va enfel a, Contractor hai inbiekpuina neiin, kum 2011 a inthawka bawl tan iengleia tuchena zo lova la um am? tiin indawnna an siem. Hi le inzawm hin KSO chun DLO block 3&4 sinthawna chu March, 2017 chena zo ding le DLO block I&2 bakah barrack 2, quarter le auditorium hai chu September, 2016 chena zofel dingin KSO chun contractor hai an inhriettir. Hun an pek sunga an zonaw chun sinthawna an suktawp pek ding thu hrilin warning an pek.



Hieng laizing hin Avantica Company a­ site engineer Loken Singh chun, bandh le blockade tam leia hmangruo hai a hun taka a hungtlung theinaw leia sin fe hrat lo a ni thu a hrila, sin tamlem zo a nita a, single room quarter 2, double room quarter 4, DLO building/quarter 2 hai khawm zo tep an nitah tiin a hril.

Quality thua indawnna dawnin Loken Singh chun, sawrkar le mipui duthusam angin 100%  maintain zo ninaw sienkhawm  tulai hnaiin Manipur chun simkhawlei inhning hrat  thawk hni a tuok ta a, sienkhawm Mini Secretariat bawlna fe mek hi iengkhawm tawksiet a la neinaw thu a hril. Tuibuong a Mini­Secretariat hi a fencing thangin state sawrkarin Avantica Company kuoma a pekdawk, Rs. 39.65 crore zet sanction a ni a, piengphunga ruolbanlo hai wheel chair­a an intawl theina ding Ramp siem a ni naw thung.

Children Home Bus in naupang a hrut hlum pal
CCPUR: Zani zantieng 4:50PM vel khan Saikawt Children Home campus­ah Children Home Bus chun naupang thak zoa motor sie (park) dinga an singsat laiin a hnungtieng an tawl naah Master Immanuel Zarzolien (6) s/o Lalhawnglien of Saikawt a hrut fuk pal a, a luah bakah hnar le nakawr haiah thisen a suok leiin inrang taka District hospital panpui a ni a. Sienkhawm damzo lovin zani zantieng 5:20 vel khan District Hospital­ah a thi. Immanuel Zarzolien hi Stephen High School, Saikawt­a Class I inchuklai a nih.



Ei thu dawngnain a hril danin campus sunga Bus tlanlut hi naupang 7 velin a hnungah an lo hnawt a, chu huna driver in  bus hi park dinga hnungtieng a zuk intawl huna Bus hnungtieng ki takah naupang hin a lu a tet niin a hril.

Hi thil tlung le inzawm hin zani zan ma khan RPC kohran/Home thuneitu hai chun ngaidam inhniin thingpui an va khai a, mithi sungkuo tieng chun anni tiengpang an lan rawn tlang phawt ding thu hrilin an lan the phawt niin ei thu dawngna chun a hril.

Swachh Bharat Pakhwada hmang
CCPUR: May 16­31, 2016 sung aw ding Swachh Bharat Pakhwada chu Post Office, Tuibuong­ah hmang a ni a, staff han thienghlimna tengpang le inzawmin program an hmang a, a kar lakah social work khawm nei hlak an tih.

HSA Langza Unit
CCPUR:  Hieng a hnuoia hai hi kum 2016­2018 inkar sunga HSA Langza Unit thuoitu thar dinga thlangtling a nih. President­ Hranghmingsang; Vice President Lalkhohlun; Secretary­Hauzakhum; Asst. Secretary­ Lalthathang; Treasurer­ Lalhmingthang; Finance Secretary­ Philip Lalbelsa le Info. Secretary in Keleb Lalramsawn.

ZC Cabinet meeting
CCPUR: Zani sun dar 11 khan Hiangtam Lamka PTC Conference Hall­ah Zomi Council Cabinet Committee meeting nei a nih. Hi huna hin Zomi Council­a Vice Chairman 8 hai portfolio pekna le Anti­Tribal Bills thua Coordination Committee indin ding chungthu le thu pawimaw dang dang an hriltlang.

Pherzawl­a Medical camp nei dingin an suok
CCPUR: ADC/CCPur le Lions Club of CCPur Greater hai thangruola Pherzawl khuoa Free Medical Camp nei ding le inzawmin Mr Langkhanpau Guite, Chariman, ADCC le  Lions Club, CCPur Greater President; bieltu MDC Pu Lalhmangpui; Doctors 3, Pharmacist le Nurses 7 hai chun zani zingkar 7AM khan Tuithaphai suoksanin ADC/CCPur Ambulance hmangin Pherzawl an pan.  Medical camp team hai hi Pu Lalhossan, Vice Chairman, ADCC in a vailiem a, Elder Thangzadal Guite in tawngtaipekna a nei.


YLS in Awareness walk an nei ding
CCPUR: Young Learners’ School (YLS), CCPur chun tukum an School Silver Jubilee tling lawmna le inzawmin May 20, 2016 (vawisun) hin ‘Clean Today for a Better Tomorrow’ ti thupuia hmangin ‘Awareness walk­ lam hrawna an nei ding a nih. Hi huna hin CCPur khawpui sung vawngfai le thienghlim ditna leiin school naupanghai kutsuok ngei ‘Dust Bin’ hmun hran hrana sieng an tih. Awareness walk hi Pu L. Mangkhogin Haokip, SP, CCPur in flag off a tih.

Honorary Wildlife Warden dingin
CCPUR: State Board for Wildlife meeting January 18, 2016 nia CM inrawinaa nei hunah CCPur District­a inthawk H. Thangdam s/o (L) Pahau of Siloam Veng, Bungmual le T. Dongzakai Gangte, s/o (L) Thangzam Gangte of Hill Town hai chu kum 1 sunga dingin Honorary Wildlife Warden dinga thlang anni thu KS Tawmbing, Divisional Forest Officer: Southern Division, CCPur chun a hril a, a lawmpui thu a hril bawk.

JAC in lawmthu an hril
CCPUR: Joint Action Committee Against Anti­Tribal Bills chun, May 16, 2016 zanrila inthawk May 18, 2016 zanril chen  darkar 48 sung Manipur­a tribal hai chengna biela Total Shutdown an thaw tha taka an thlawpna thuah Tamenglong, Senapati, Sadar Hills, Ukhrul, Chandel, Singngat, Jiribam, Lamka le sub­divisional headquarters tina JAC units hai chunga lawmthu a hril. Hieng bills 3 hai le Inner Line Permit System (ILPS) in iengkhawm inkungkaina a nei nawh tiin zanita JAC thusuok chun a hril a, mipui lungril thuoikawi thei  zawnga thu insuo lo dingin Media houses tin hai an ngen bawk.

Congress le BJP candidate hai chunga curfew
IMPHAL: IMC Election hung um dinga Congress le BJP candidate hai umna le a se vel haiah KCP Poirei Meitei Lup chun Curfew an puong. ILPS bills 3 thla 8 zet pending­a siea a umna thuah  mawphurtua intumna leia Curfew hi  an puong khum niin hi pawl thusuok chun a hril.

JCILPS in darkar 38 Shutdown
IMPHAL:  Inner Line PErmit System (ILPS) le Manipur Assembly in Bills 3 a pasi thu hai le inzawmin vawituk zing dar 4 a inthawk May 21, 2016 zan dar 6 chen, darkar 38 sung Shutdown Joint Committee on Inner Line Permit System (JCILPS) in an thaw ding thu zanikhan Khomdram Ratan, Convenor, JCILPS chun JCILPS Office, Keisampat, Sega Road, Imphal a Press Meet huna a puonglang. Hi Shutdown hin passenger motor, dawr, sumdawngna hmun, schools, Colleges, Govt. le Private Office hai a huomsa ding niin a hril. Nitin pawimaw (essential services) thil hai ruok chu huomsa naw nih tiin a hril.

Nupui pakhat a thisaa hmu
IMPHAL: Zani zingkar khan Mayang Imphal Police station huop sunga Uchiwa Awang Salam Thamna Houbi Leikai­a Fish Farm ah W. Echan Devi (23) d/o (L) W. Birkumar Singh of Sekmaijing Khunou Mayai Leikai chu a thisaa hmu a nih. Echan Devi hi pasal nei tasa, a taksa hi hruia khit le a ring chu Ngakul tuia inphum nia hril a nih. Suollui zo hnunga that ni dinga ringhla a nih.

MLA Gate­ah bomb sukpuok
IMPHAL: May 18, 2016 zan dar 9 vel khan Wangjing Tentha A/C MLA P. Brojen chengna In Gate, Wangjing Tentha ah bomb sukpuok a nih. Thil suksiet lien tham ruok chu a nei nawh. Police chun IED ni dingin an ringhla.

NSCN (IM) ni dinga ringhla hai leh an inkaptuo
IMPHAL: Zani zing dar 10 vel khan Thoubal District a Heirok Police Station huop sunga Melei Lampak Lhingon hmuna 54Bn. BSF D­Coy patrolling a fehai le NSCN(IM) ni dinga ringhla hai chu minutes 30 sung vel an inkaptuo a, a tu tieng tieng khawm thi le hliem an um naw nia hril a nih. Minutes 30 zovin helpawlhai hi ramhnuoi tieng an inrelhmang niin Police thusuok chun a hril.

Assam le Kerala haiah Congress hneban an nih; NE-ah BJP sawrkar hmasa tak Assam-ah
NEW DELHI: State 4 le Union Territory pakhat haia Assembly election result chu znaikhan puong a ni ta a, Assam le Kerala haiah Congress hneban an ni a, West Bengal­ah TMC le Tamil Nadu­ah  AIADMK hai anhrat nawk a, Puducherry a chun Congress an hrat filawr. Assam­ah BJP le an thlawppui hai le Kerala­ah LDF hai an hrat filawr bawk.

West Bengal ­a hin Trinamool Congress (TMC) a zawna term hni an hratna a ni ta a, Ms Mamata Banerjee bawk a Chief Minister nawk ding a nih. Tamil Nadu a chun kum 32 sunga AIADMK a zawna term hni an hratna a la ni a, Ms J. Jayalalitha bawk a Chief Minister nawk ding a nih.

Assam a chun BJP le an thlawpui han sawrkarna siem an ta, Union Minister of State for Youth Affairs & Sports (Independent Charge) Sarbananda Sonowal chu Assam Chief Minister thar a hung  ning a tih. Assam­a hin BJP, AGP le  BPF hai an thangruol a, BJP in seat 60, AGP in seat 14 le BPF in seat 12 lain Assam Assembly seats 126 umah seat 86 an lak a nih. Congress in seat 26, AIUDF in seat 13 le Independent in seat 1 an lak. AGP thuoitu le Assam CM hlui Prafulla Kumar Mahanta le AGP President Atul Bora hai khawm thlangtling an nih. Assam CM thar ding Sarbananda Sonowal hi politics­ah a lut hmain All Assam Students Union (AASU) le North East Student Organisation (NESO) haia President sin lo chel hlak a nih.

Meghalaya state a Tura Parliamentary seat a byelection a chun (L) P.A. Sangma naupa le NPP candidate Conrad Sangma thlangtling a nih. Jharkhand Assembly seat 2 a byelection a chun BJP le Congress candidate pakhat ve ve  an tling a, Telangan a A/C pakhata byelection a chun TRS candidate a tling a, Gujarat A/C pahnia byelection a chun BJP candidate  ve ve thlangtling an nih.

States 4 le UT pakhat haia Party tum tum hai ngirhmun chu a hnuoia ang hi a nih.


KERALA - 140
Party
Won
LDF
91
UDF
47
BJP+
01
OTHERS
01
TAMIL NADU - 234
Party
 Won
AIADMK
 134
DMK+
 97
DMDK+
 00
NDA+
 00
OTHERS
 01
WEST BENGAL - 294

Party
 Won

TMC
211

CPI(M)
26

INC
44

BJP+
06

OTHERS
01

ASSAM - 126

Party
Won

BJP+
86

INC
26

AIUDF
13

CPI
00

OTHERS
01

PUDUCHERRY - 30
Party
Won
INC+
17
AIADMK
04
AINRC
08
DMDK+
00
OTHERS
01

Uttarakand Congress MLA hel 9 han BJP an zawm
NEW DELHI: Uttarakhand­a Congress MLA hel 9,  BJP an thlawp leia Anti­Defection Law hnuoia  Uttarakhand Assembly Speaker in a disqualified hai chun an hotu tak Chief Minister hlui Vijay Bahuguna thangin zani hmasa khan New Delhi­a BJP headquarters­ah  BJP an zawm. Mr Bahuguna chun, Mr Harish Rawat sawrkar chu mipuiin ringzona an neinaw thu hrilin Uttarakhand Assembly chu dissolved (thiek) a election a thara nei dingin  a ngen. Uttarakhand BJP President Ajay Bhatt chun, Congress  MLA hel dang pakhat, Harish Rawat in floor test a nei huna Rawat kal zawnga vote petu  Rekha Arya khawm BJP zawmtu hai laia thang ve dinga ti a ni a, sienkhawm Ujjain­a  Mahakumbh ah a thang leiin a thang thei naw a nih tiin a hril.

Tripura­ah tuilien leiin mi 4000 chengna ding nei lovin
AGARTALA: Tripura state­a May 17, 2016 a inthawk  ruo nasa taka a sur leia Dharmanagar hmunah tuilien leiin sungkuo 800 haia mipui 4,000 hai chu chengna ding In nei lovin an um pha. Assam­Agartala National Highway chu tuiin a chim leiin state dang leh lampuia infepaw thei lovin an um mek. Hieng mi 4000 hai hi relief camps 5 haiah sie an nih tiin Sub­Divisional Magistrate, Pradip Acharya chun a hril. Lawng 10 hmangin tuilien leia intang hai sansuokna sin thaw a ni a, tuilien hin kiem tieng a pan pei tiin a hril.

Hieng laizing hin Khowai district­a Krishnabari hmuna MGNREGA hnuoia sinthawtu pahni hai chu  zani hmasa khan an sin thawnaa Tekin a deng hlum niin Police official thusuok chun a hril. Tekin a deng hlum hai chu Bipul Debbarma (19) le Basana Debbarma (42) hai an nih.

Bihar­ah thlise hrang leiin mi 12 an thi
PATNA: Bihar­a chun zani hmasa zan khan thlise in north Eastern le Kosi region hmun tum tum hai thlise in a nuoi a, mi 12 in thina an tuok. Thlise in a nuoi leia mihriem thina hmun hai chu Purnea, Katihar, Kishanganj, Araria, Bhagalpur, Madhepura, Supaul, Saharsa,Madhubani, Munger le Lakhisarai district hai an nih. Thli hrang hin In le thingkung tam tak suksiein a mutthluk bakah thlai tam tak a suksiet bawk.

Egypt vuongna Mediterranean tuipuiah a tlalut
CAIRO: Egypt vuongna flight MS804 chu Paris khawpuia inthawk Cairo pana a vuong laiin Mediterranean sea (tuipui)­ah a tla lut niin Al Mayadeen TV channel report chun a hril. Hi vuongnaa hin passengers 56 thangin mi 66 an chuong niin ei thu dawngna chun a hril. Vuongnaa chuong hai lai hin Egyptians 30; French mi 15, British 1, Iraqis 2 bakah Canada, Belgium, Kuwait, Saudi Arabia, Algeria, Sudan, Chad le Portugal mi khawm an thang a, chu lai chun naupang 3 an thang sa bawk. Egyptian Armed Forces­a special team chu a hmuna enfel le sansuokna sin thaw dingin vuongna tlak na hmun hi an tlung ta a,search operation thaw zing a nih.  Hi vuongna hi Paris­a Charles de Gaulle Airport­a inthawka vuongsuok le Cairo International Airport tum dinga ti a nih.

VAWISUN THUPUI
Chuongchun, remchang hun ei nei ang peiin mi po po kuomah thil tha chu thawng ei tiu, ringna sunghai laia mi chungah thaw bik tak ei tiu.  ­ Galati 6:9

Editorial: Furpui hun sung hnatlang vawikhat bek nei nisienla

Ruosur naw leia khaw inthal leia tui harsatna nasa tak el ei tuok kha zani lai chau kha ei sawn lai zingin furpui hun ei lo tlung nawk der ta a. Tui dawn ding le hmang ding thuah chun ei harsatna a hung inkieng ta a. Amiruokchu, van ruotui tam leiin harsatna chi tum tum ei tuok tan mek a, fur hun sung ding hi a la sei a, tui tam leia harsatna ei tuok ding chu a hung intan ding chau a nih. Van boruok, sik le sa fe dan ding tienga thiemna le hrietna nei bik mithiemhai chun nikum nekin van ruotui tukum hin a tamlem ding niin an lo hrillawk ta a, a hungtlung indik ding niin an lang. India  hmarsak  biel huom sungah Van ruotui hi a tla tam zuol bik ding niin mithiemhai chun an hril. Hi lei hin tuilien le mimkei hungtlung ding lakah ei inveng fimkhur a ngai hle ding niin an lang. Van ruotui ei hmu hi Pathien malsawmna ropui takel a ni a, van ruotui tam lakah chier inhruoi le lungawinaw ding ei ni nawh ti hi theinghil der lo dinga tha a nih.

Inlirthei nasa takin a hung pung a, thal huna khan chu motor tlan inlawn tam leia motor khu le pilvut khu hai kha buoipui tham a tling el bakah chimum takel a ni hlak. Motor khu, pilvut khu le khu dang dang hai lei khan hritlang khawsik a hung intlun hlak a. Van ruotui hung tla leia motor khu, pilvut khu le khu dang danghai a hung re duok khawm hi hnuoi mihriem hai ta ding chun thil lawmum le malsawmna a nih. Mi rethei han mihausahai zar ei zona pakhat pilvut khu a hung re thei hrim hrim khawm hi lawm a um a, furpui hun hi ei ta ding chun malsawmna ropui takel a ni bawk. Pilvut khu, motor khu le khu dang danghai hi mihriem hriselna sukse thei vawng anni leiin thil khu hi chu ditum lo takel a nih.

Furpui leia khuorel sietna chi tum tum hai hungtlung leiin ina vai chi ran, ramsa, chungleng vate le thilhring chi tum tum han thina hiel tuokhai sienkhawm, siemtu Pathien thil siemhai laia a chunghnung tak mihriem han thina em ei la tuok naw lei le hmatienga hun la hungtlung ding haia khawm ei tuok nawna dinga ei Pathien kuoma  hni le ngen theinghil ngainaw inla nuom a um.  India ram state hran hrana ruosur naw leia tui dawn ding nei lo, huon lo nei thei lo, bu le bal ching thei lova beidawng em ema an um lai le loneitu thenkhat beidawng leia anni le anni an inthat el laia van ruotui ei dawng thei bik elna lei khawm hin Pathien kuomah lawmthu hril mawl mawl ding ei nih. Lawmna chang hriet hi mihriemhai  chau ni lovin a mi siemtu Pathien lawm zawng khawm a nih.

Furpui a hungtlung a, van ruotui ei dawng tam leiin Churachandpur town sunga lamlien thenkhat vadungte ang elin tuihawk mihriem pal zo ruollo khawpin a luong dum dum el a. Hi thil hi tuiluongkawr  (drain network) that tawknaw lei le mihriem chenghai fel zonaw lei a nih  ti inla ei hril suol taluo ring a um nawh. Churachandpur town sunga cheng mipuihai hin tuiluongkawrhai (nullah) hi hmunhnawk pei le dehawnnain ei hmang a. Thal hun sung po po hmunhnawk peina (dustbin) a ei hmang a, nullah khurhai po po chu hmunhnawkin a sip a, tuihawk han luongna ding an invai a, hi lei hin tuihawk hi lamlienpuiah an luong dum dum el hlak a nih. Ei town sunga lamlienpui sira nulla­hai dustbin a ei hmang sung hin chu ei town sunga lamlienpui haia tuihawk luong dum dum hi bo ngai naw nih. Ei town sukhmelhemtu le suktawptu a nizing el ding a nih.

Hi kawngah hin ei ram sawrkar a pawngpuia dem el thei ding khawm niin an lang nawh. Ei ram sawrkar chun furpui kum tina hungtlung hlak a nih ti a hriet a. Hi lei hin a thei ang tawka thain ei town sunga lamlienpui sir haiah nullah a mi siem pek a. Amiruokchu, a mipui han nullah chu ei enkawl tha naw a, enkawl le inthiel fai nekin dustbin in ei hmang leia tuihawkin luongna ding an invai a nih. Ei nullah­hai hi mihriemhai anga tawng suok thei nihai sienla chu CCPur mipuihai hi mi halin, an min thiemnaw hle ring a um. Mipui han an luongna lampui ding ei dal tlat a nih.

Iengpo khawm nisienla, sawrkar chu nu le pa a ni ang hrimin furpui hun sung hin vawikhat bek chu ei town sunga nullah­hai sukfaina kawngah hin hma hung la sienla nuom a um. Hi kawnga hin ei DC sap, District Administrator hin hma hung la thei sienla thil tha tak ning a tih. DC danghai khawmin hi kawngah hin hma an lo lak ta hlak a, khang huna an lo thaw dan ang bawk khan hma hung la sienla a tha ring a um. Tlawmngai Pawl chi tum tum, HYA, YPA, YMA, KKL etc hai khawm ei town sung le ei lamlienpui sira nulla­hai sukfai ding hin hnatlang nei an hniel ring a um nawh. Sawrkarin sum a nei nawh ti hi suonlam a tling nawh. District Administrator in hnatlang rawtna le ngenna a siem hi a tul hmasa a nih.

Don't Miss
© all rights reserved
made with by Simon L Infimate