Hmasawnna Thar | 05 May, 2016

Truck eksiden­in In a del siet; inbiekremna nei a ni tah

CCPur: May 4, 2016, 2:00PM vel khan Varparkawn (Valpakawt), Churachandpur khaw sung, Sugnu Road­ah Thing­at phur hlak, Pu Paosei of Buongjang Shaktiman Truck NL08A­2523 Mr Haosei (driver) in a khal chu changsuolin lamthlang­ah an letthla a, lam thlanga Pu Lalrinawm chengna in a del a, an bedroom chu a del siet hne hle. An bedroom a delchima hin Truck hi a thalin an nghat tawp a nih. An common room tieng khawm hluo tlak ta lo ding khawpin a delsiet bawk. Amiruokchu, hi thil tlung huna hin insunga tukhawm an umnaw leiin thi le hliemna tuok an um nawh. Chun Motor­a chuong hai khawm hliem an um naw niin ei thu dawngna chun a hril. Mita hmutu hai chun Truck hi a tlan hrat taluo leia eksiden niin an hril. Truck­a hin mi 3 an chuong niin ei thu dawngna chun a hril bawk.

     

Hi eksiden tlung le inzawm hin motor neitu le motor eksiden in IN a delsie neitu han zanikhan inbiekna neiin inbiekremna an nei nghal. An inbiekremna dungzuiin, motor neitu han In a suksiet neitu hai kuomah Pathienni chenah Rs. 1 lakh an pek ding; pawisa sum inhlan huna  hrepuitu dingin Kuki Inpi a President/Secretary annawleh mi pahni bek an hung thang ding ti le, In hluo tlak a ni tanaw leiin thiek nghal ni raw se ti hai a nih.

Tu ti hrietlo han pasal pakhat an thuoihmang

CCPur: May 3, 2016 zan dar 12:00 vel khan Bongbal khuo, CCPur district­a Pu T. Lala, special Contractor hnuoia driver sinthaw Tongdon Singh (30) s/o Kh. Kwaklei of Dulaithabi, Imphal West chu tuti hrietlo silai chawi mi 7/8 vel han an thuoihmang a, tuchen hin a umna chin hriet a la ni nawh. Hi thil tlung le inzawm hin thuoihmanga um Tongdon Singh sunghai chun Police­ah report an pek a, CCPur Police station­a OC inrawinain spot inquiry an thaw nghal. Zani zingkar chen khan chu a mahajon han tu pawla inthawk khawmin phone call an la dawngnaw a, sienkhawm pawisa ngenna le inzawm ni dinga an ring thu an hril.

     

Hi lai hmun hi tuta hmaa special contractor S. Dama driver mi pahni han an thuoihmangna hmun bawk kha a ni leiin mi thuoihmangtu hai hi tuta hmaa mi thuoihmangtu hai bawk kha ni dinga ring an ni a, tuta hmaa mi an thuoihmang huna khan intlansuokna dingin Rs. 50 lakh an lo ngen a nih.

IIM Indore­ah MBA admission a hmu

CCPur/N. Delhi: Tv. Sungmam @Lalhrietsung Sanate s/o Ramnunsiem Sanate of Shillong Hills, Rengkai chun IIM (Indore) ah MBA inchuk thei dingin admission a hmuh. Common Admission Test (CAT) Exam November, 2015­ah a hlawtling hnunga March, 2016 a writing Ability le Personality Interview –ah a hung hlawtling nawk pei leia admission hi a hmu a nih. (Virthli)

SSC exam postponed thu a hung inhriettir

CCPur: Regional Office (NER), Staff Selection Commission­a Regional Director Sh. N. Zimik  chun, May 22, 2016 nia Combine Graduate Level Examination, 2016 nei dinga ti chu postponed (thul) a ni thu T. Goukhomang, ZEO, CCPur a hung inhriettir. Exam hi August, 2016 thla sunga nei ding le a hun ding chu a hnunga  ruot le inhriettir a la ni ding thu a hung inhriettir bawk.

ZC Cabinet post 6­a inthlangna

CCPur: Zani 11AM khan Hiangtam Lamka­a PTC GHQ Office­ah kum 2016­18 sunga Zomi Council cabinet post 6 haia ding inthlangna nei a ni a, Ginzamang T. Zomi, Chief Election Commission inrawinain election hi nei niin proposal system hmang a ni a, tukhawm inkhingpui ding um lova post tin haia mi pakhat hming chau pei proposed a ni leiin uncontest in tlinga puong vawng an nih. Chuonghai chu­ General Secy.­ Th Khamneihthang;Secy.Administrative Affairs­R.Sanga; Secy. Finance­ Paukhogen Gangte; Secy. Treasurer­T.Chinlunthang; Speaker­KG Tungnung; Dy Speaker­ G.Chinkhanmuan hai an ni a, CEC hin zani ma khan intiemkamna an nei tir nghal.

ADC Chairman rawiin an meeting

CCPur: Mr Langkhanpau Guite, Chairman, ADC, CCPur inrawinain zani sun dar 11:00 khan a office chamber­ah ADC/CCPur hnuoia MDCs han meeting an nei. Hi huna hin thli, ruo le riel­in In le lo a suksiet hai chungthu an hriltlang a, MDC hai chun an biel chita SDOs hai le inhrepaw a, thil a suksiet hai list DC/CCPur kuoma peklut dingin an rel. Hi baka hin ei rama inremna le muongna a um theina dingin tu pawl khawmin inthuoihmangna hi ching lo dingin an ngen.

March thla chenah Bank haiah Rs. 37217.97 lakh deposit

CCPur: Zani 12:00noon khan DC/CCPur inrawinain DC Office­a BRGF Resource Centre­ah Bank le inzawmin District Consultative Committee (DCC)/Dist. Level Review Committee (DLRC) meeting nei a nih. Hi huna hin March 31, 2016 chena Bank hai CD Ratio ennawnna nei a ni a, March 31, 2016 chenah Distr. ACP 2015­16 achievement; Govt. sponsored scheme/program sinthaw hai; RSETI sinthawna; CCPur  District sunga ATM hai ngirhmun an ennawn bakah Bank sinthaw dan tum tum hai an hriltlang.

     

March 31, 2016 chen khan CCPur District­a bank tum tum haiah Rs. 37217.97 deposit (thun) a ni a, loan (advance) semdawk zat Rs. Rs.18,426.67 lakhs niin CD Ratio 50% a tling phak. March 31, 2016 chen khan Priority Sector­ah advance a semdawk Rs. 12,285.31 lakhs a ni a, total advance 67%, Agriculture advance semdawk Rs. Rs.3422.45 lakhs (19%) a nih. Weaker Section­ah advance semdawk zat Rs. Rs.4158.31 lakhs (23%) a tling bawk.

     

Hi meeting huna hin Thuamzamuan Hauzel, Chief General Manager, RBI/Imphal chun sin thaw tha Bank 11 hai kuomah Appreciation certificate an hlan. Chuong Bank hai chu­UBI, MSCB, ICICI, MRB, Canara Bank in award 3, UCO Bank le SBI/Tuibuong hai an nih.

Bufai  500qtls le rangva bundle 100 

CCPur: Thli, ruo le riel in tulai hnaia In le lo le thil dang dang a suksiet hai sawmdawlna dingin Henglep SDO Seiminlien Lengngen inrawinain zanikhan Imphal­ah bufai quintals 500 le rangva (CGI sheet) bundle 100 CCPur an hung phurtlung. Hieng Rangva le bufai hai hi May 5, 2016, 7:00AM hin Tuibuong Peace Ground­ah flag off program hmang ning a ta, hi zo hin SDO Henglep inrawinain Henglep Sub­Division sunga harsatatna tuortu hai kuoma sem dingin phur ning a tih. Hi huna hin an zawmpui officer hai kim taka thang dingin DC/CCPur chun an hriettir.

Mi 11 in NFSA an ration card an pekkir tah

CCPur: May 3, 2016 chen khan DC Office, Churachandpur­a um District Supply Officer (DSO), Churachandpur Office­ah National Food Security Act (NFSA) hnuoia Ration Card pekir (surrendered) chu mi 11 an tling ta a, chuonghai chu, Kaikhanlian Guite of Bungmual; V. Vungzapum of Zenhang Lamka; L. Luaizachin Ngaihte of Hebron Veng, New Lamka; L. Khamzachin of Hebron Veng, N. Lamka; Sumzamang of Bungmual; T. Pumzahau of Hebron Veng, N. Lamka; T. Chinzam of Bungmual; K. Pauzalian of Vengnuam, N.Lamka; Khamzathang of Bungmual le Khamvung of  Bungmual hai an nih.

Thoubal district-ah CM in 33/11KV Power Sub-Station pahni a hawng

Imphal: Zanikhan Manipur Chief Minister O.Ibobi Singh in Thoubal District a Thoubal Leishangthem Thoudam le Lilong Usoipokpi hmun haiah 33/11 KV Power Sub­Station pahni a hawng. Hi huna hin Wabagai A/C MLA Md. Fazur Rahim, N. Sarat Singh, Managing Director, MSPCL, DC Thoubal, SP Thoubal, Zilla Parishad Members, Pradhans le District Level Officers, Thoubal district hai an thang tawl.

     

Thil hawng hi sawrkar ngaipawimaw tak a ninaw a, sawrkar ngaipawimaw le dit chu sawrkarin mipui ta dinga an siem le an din hai mipuiin hlawk tak le hmasawnna dinga an hmang hi a nih. Thil hawngna hun (Inaugural function) hi mipuihai hmaa thu hrilna hmun dinga political platform a ni nawh. Hi lei hin hieng Power Sub­Station pahnihai khawm hi a biela Zilla Parishad annawleh Panchayat members/representatives hai inhawngtir lem dingin  Managing Director, MSPCL chu ka lo hril hrim a nih tiin  hi huna CM O.Ibobi Singh in thu a hrilna huna a hril. Hieng Power Sub­Station hai hawng theina dinga hma lo latu MSPCL hai chunga CM chun lawmthu a hril.

           

Thoubal Laisangthem Thoudam hmuna 33/11 KV Power Sub­Station hi Central Special Plan  Assistance (Planning Commission) hnuoia Rs. 1086.96 lakh senga 13­12­2013 a inthawka bawl tan a nih. Lilong Usoipokpi hmuna 33/11 KV Power Sub­Station hi 10th Plan hnuoia Rajiv Gandhi Grameen Vidyutikaran Yojana (RGGVY) Scheme Rs. 3.50 crore senga bawl a nih tiin MSPCL a Managing Director chun a hril.

BJP President tharin sin a chel tan

Imphal: BJP Manipur President hlui Th. Chaoba Singh chun zanikhan BJP Manipur Pradesh President thar dinga ruot Ksh Bhabananda kutah BJP Manipur Pradesh sin inhlanna a nei. Charge inhlanna hi BJP Manipur Pradesh Office, Nityapat Chuthek, Imphal­ah nei a ni a, hi huna hin Manipur CM hlui R.K. Dorendro Singh le BJP thuoituhai an thang. ‘Ka hat chauin thil ka thaw thei naw ding a ni a, in renga thangpuina le thlawpna ka ngen’ tiin hi huna thanghai po po bakah BJP mi le sahai chu Ksh Bhabananda chun a ngen tawl.

Darkar 48 Manipur Bandh le Public Curfew

Imphal: Zani zan zanrila inthawk khan Manipur State pumpui huopin darkar 48 sung aw ding bandh le Public Curfew thaw tan a nih. Bandh hi S. Prasanta thina le inzawma JAC indina um in an thaw a ni a; Public Curfew hi JCILPS in an thaw a nih. Bandh hin May 6, 2016 zanril chen a daw ding a nih. Public Curfew May 7, zanril a inthawk darkar 42 sung a aw ding niin JCILPS thusuok chun a hril.

Manipur­ah sin awng mi 7,51,376 an um

Imphal: March, 2016 chen khan Manipur­ah sin zawng Employment Exchange hran hrana inzieklut mi 7,51,376 an tling ta a, hienghai laia 5,31,313 hai chu pasal le 2,20,063 hai chu nuhmei an nih tiin Directorate of Employment, Manipur thusuok chun a hril. Imphal West district­ah 1,96,224 (pasal 1,27,199 le numei 69,025); Imphal East district­ah 1,19,875 (pasal 84,225 le nuhmei 35,650), Thoubal 1,27,478 (99,300 pasal le nuhmei 28,178); Bishnupur 71,878 (pasal 53,085 le nuhmei 18,793); Churachandpur 74,953 (pasal 54,773 le numei 20,180); Ukhrul 30,721 (pasal 21,323 le nuhmei 9,398; Senapati 62,306 (pasal 44,800 le nuhmei 17,506); Tamenglong 26,343 (pasal 19,821 le nuhmei 6,522); Chandel 32,040 (pasal 21,781 le nuhmei 10,259) an um. Chun, ruolbanlo sin zawng mi 6,764 an um a, hienghai laia 3,130 pasal an ni a, 3,634 hai chu nuhmei an nih.

Jiribam FCI Godown­ah bufai matric ton 5,000

Imphal: DIPR, Govt.of Manipur huoihawtna hnuoia Jiribam a Press Conducted Tour a fe Chanchinbumihai chu zanikhan Imphal an hungtlung nawk tah. Jiribam­a an cham sungin Railway Station, Jiribam le FCI Godown, Jiribam hai an va sir a, FCI Godown, Jiribam a hin  bufai matric ton 5,000 a um mek ti an mit ngeiin an va hmu tiin DIPR thusuok chun a hril.

DESAM in ST ngenna an thlawp

Imphal: Meitei/Meetei Scheduled Tribe category a zieklut dinga ngenna chu an thlawp ve thu Democratic Student’s Alliance of Manipur (DESAM) chun zanikhan a puonglang. Hi le inzawma ST Demand Committee in May 22, 2016 a an thil ngen nawrnaa mipuiin lampui hrawna huoihawt an tum khawm an th lawp ding thu DESAM thusuok chun a hril. All Manipur Students Union (AMSU) ruok chun hi ngenna hi tha an tinaw a, an thlawp naw ding thu an hril.

BJP Councilor in Congress a zawm

Imphal: Yaiskul A/C a Ward No. 19 a BJP Councilor Y. Ratikanta chun zanikhan Congress party a zawm. Zani ma khan Congress Bhavan, Imphal­ah MPCC President T.N. Haokip in Congress ah lawmlutna a nei. Congress Party motto le ideology thatzie an hriet leiin mi tam takin Congress an hung zawma, hmatieng peiah khawm an la hung zawm  nawk pei beisei a nih tiin T.N. Haokip chun a hril.

Dy. CM in Community Hall a hawng

Imphal: Zanikhan Dy. CM Gaikhangam in Irom Meijrao Mamang Maakha Leikai Community Hall a hawng. Hnam tin le chi tin haai chu inrem tak le inhmangai taka cheng tlang diel diel dingin Gaikhangam chun thu a hril huna ngenna a siem. Muongna le inremna chu ei ram le hnam mamaw a nih tiin a hril.

LPG­ah sawrkarin Rs. 21,000 crores a hum phak

New Delhi: Sawrkar thlungpuiin thlaisuongna LPG subsidy le inzawma duplicate/multiple connection sukbona dinga bank account leh tlung zawma subsidy po an account­a a thun pek peia inthawk kum 2 (two financial year sung) sawrkar chun Rs. 21,000 crores a hum (saved) phak ta niin Oil Minister Dharmendra Pradhan chun zanikhan a hril. Hi system hi November 2014 a inthawk khan district thlangsuok haia hmang tan a ni a, January 1, 2015 a inthawk khan India ram pumpuia hmang a nih. April 1, 2015 chen khan registered LPG Consumers 18.19 crores an um a, duplicate/multiple consumers 3.34 crore vel that/suktawp a nih. Hi lei hin kum 2014­15 sung khan sawrkar chun Rs. 14,672 crore vel le 2015­16 in Rs. 7,000 crores vel a hum (saved) phak a nih tiin Oil Minister chun a hril bawk.

Vyapam scam a mawphurtu taka intum an man

Lucknow: Madhya Pradesh Professional Examination ‘Vyapam’ scam thubuoia mawphurtu taka intum Ramesh Shivhare chu CBI le Uttar Pradesh Special Task Force (UP STF) thangruol han an man niin zani zingkar khan Uttar Pradesh DGP Javeed Ahmad chun a hril. Shivhare hi Zila Panchayat chairperson hlui Mahoba pasal a ni a, hi scam­a hin inrawlna a nei ngei thu khawm an puong ta niin DGP Javeed Ahmad chun a hril.

SC in May 6 chen Centre hun a pek

New Delhi: Uttarakhand President Rule hnuoia sie a ni le inzawma Supreme Court in ama (SC) enkaina hnuoia Uttarakhand Assembly floor test nei a remti le remtinaw thua dawnna May 4, 2016 nia dawnna pe dinga Supreme Court in Attorney General an hriettirna le inzawm khan; Attorney General chun sawrkar thlungpui (centre) a inthawk thu iengkhawm a la dawngnaw thu a hril leiin Supreme Court chun hi thua dawnna chu May 6, 2016 chena pe dingin a sawn hla.

Pawisa  lem Rs. 50,000 anghu leh mi 4 man

Motihari: India le Nepal ramri zul Bihar­a Champaran district­a chun zanikhan Police han India pawisa lem (Fake Indian Currency Note­ FICN) Rs. 50,000 anghu leh mi 4 an man. Mana um mi 4 hai lai hin nuhmei pakhat a thang tiin Raxaul Station House Officer Rajeshwar Prasad chun a hril. India pawisa lem hai hi Nepal­a inthawk a ruka India rama an hung phurlut a nih.

VAWISUN THUPUI

Lalpa tina chu hrietna bul a nih; Amiruokchu, invet chun varna le inchuktirna chu a hmusit a. Ka naupa, i pa inchuktirna hi ngai la, I nu inchuktirna chu nghatsan naw  rawh;                                          ­ Thuvarhai 1:7­8

Editorial

Mipui sie lal thiem hai sienla

Ei hriet seng angin sawrkar thawktuhai sinpui tak chu mipui rawngbawl a ni a, democracy hi mipui sawrkar ti a ni leiin “Government servant” ti khawm hi “mipui siehlaw” annawleh “mipui rawngbawltu” amani tina a nih. Sawrkar thawktu ei tihai hi sawrkar annawleh mipui han hlaw neia an ruoi an ni leiin, a ruoitu mipuihai inza ding le sie lal thiem dinga ngai an nih. Mipui boin sawrkar a um thei naw a, mipui um lovin sawrkar thawktu ding lak thei a ni naw bawk. Mipui zar lieu lieu a sawrkar thawktu hi an hung um thei a ni leiin indu annawleh intithei taka um ding chi chu an ni der nawh ti hi sawrkar thawktuhai hin a thar taka an hriet nuom a um. Mani nina hrietchieng le um dan tawk thiem hi a tul khawp el.

     

Mipui siehlaw annawleh mipui rawngbawltu an ni leia sawrkar thawktuhai hi mipuihai hin ei nuom a ninga tir le vau el ding amani ti pal ei tih ti ruok hi chu inlau um tak el a nih. Dit le mamaw ei neihai mi thaw pek theitu anni leiin tawngbau tha hmanga ei va dawr chu mipui mawphurna a nih. Chun, thaw an nei lai taka va biek buoi sen hi ching ngailo ding a nih. Sin tul em em el thaw an lo nei lai tak a ni chun zaidaw taka an inhman hun nghak hram hram hi ei va dawr dan ding a nih. Inhrietthiemtuona a um naw pha pha leh nuorna le insuk lungsenna hi a hung um hlak.

     

Amiruokchu, sawrkar thawktu, a va dawrtuhai ngaipawimaw lo le inza lova an lo um a ni ruok chun tosan le en liem mei mei el ding an ni der nawh. Hremna hmu thei ding khawpa thuneina insang cheltuhai kuoma intlun ngam ngei ngei ding a nih. Mi tam lemin hiengang thil hi an tuok changin an tobopui el hlak leiin office va dawrtuhai hi hmusit taka biek sisaw hlak an nih. Hiengang thil hi a tlung nawna dingin office va dawrtu han a tul a ni chun Court chenah ei khing ngam a tul a nih. Chuong a ninaw chun phaze sak an ta, office va dawrtu mipui tieng hi ei inchep deu deu el ding a nih. Ei Bible in a mi hril le inchuktir, i venghai hek naw ti leh hi thil hin inzawmna a nei nawh. Hek dinga um hai chu ei hek ngam ding a nih.

     

Ei minister, MLA le ram thoituhai chun sawrkar thawktuhai chu an rawngbawl pek mipuihai ngaipawimaw a, sie lal thiem dingin an infui rawp hlak. Hienganga infuina thu an hrilna san chu, sawrkar thawktu han mipui an sie lal thiem tawk naw lei niin an lang. Tuta ei ngirhmuna hin ei ram thuoitu han an hril le infuina angin hiengtieng kawngah hin sawkar thawktu tam tak hin chu thanglakna ding an nei ti an lang chieng hle. A bikin hmel hriet tha nei le nei lo thingtlanga inthawka sawrkar office hung dawr ding, thil kalhmang la hre lo tak tak han nuorna le sawiselna an nei hlak a inthawk hin thil umdan chu a chieng hle. A hre lo hai lo hril hriet, lo keithuoi a, an dit ang lo thaw pek chu sawrkar thawktuhai thaw ding le mawphurna a ni a, hlaw an lak san tak khawm hieng anni hung dawrtu mipuihai hi an nih.

     

Tuta hma ngaituo chun sawrkar office dawr khawm an hawi ta hle a, mi thenkhat tlawmte leiin Department or sawrkar thawktuhai hming a se hlak a, hi thil hi Department hotu han enzuiin ngaimaw zuol hai sienla nuom a um. Mi tam tak hril dan chun Officer lien chin hai chu indawrpui an inhawi tlangpui a, a lailung velah hin harsatna hi a tam deu niin an hril hlak. Ei ram thuoitu han sawrkar thawktuhaia n infuina hi thil pawimaw takel a ni leiin sawrkar thawktu taphawtin ngaipawimawin zui le zawm tum seng hai sienla nuom a um hle.

           

Sawrkar thawktuhai chau ni lovin kohran pawl tum tum le private institution hran hrana thawktuhai lai khawm hin an office va dawrtuhai lo ngaisak tha nuom lo le lo inzana chang hre lo hi an bo bik nawh. Mipui leia sin nei le office kai thei an nizie an hriet naw lei a ni a. Hiengang thawktuhai khawm hin mipui sie lal thiem ve ngeihai sienla nuom a um. Chun, hril sa lo thei lo chu, Bank hran hrana thawktuhai hi an nih. Bank fe dan hi office danghai nekin a danglam deu a, hi lei hin Bank va dawrtuhai ta dingin hriet lo hi a tam leiin mawl hlaw a awl khawp el. Hieng a ni lei hin Bank thawktuhai khawmin mipui leia thawkna nei le Bank a hung  um thei a nih ti hriezinga an customer­hai inza le duot taka an lo indawrpui nuom a um hle.