MHJU team in report an pek
CCPur: April 23, 2016 zingkara ruopui vanawn, thlipui le riel inthuoin Henglep biel a nuoina hmunhai chu MHJU team in a hmun ngeiah fekin report an pek. Report an pek danin In auksiet hi 80 chuong niin an hril. Chun, a biel mi han Polio Immunization ti lo Medical thil dawng an la neinaw thu, Govt. a inthawka hamthatna an hmu umsun chu MGNREGS chau a ni thu, sawrkarin hi thil a hmuna en dinga a tir hai chu a hmuna fe lovin Santingah Lalhai kokhawma report an lak a ni thu le Medical team khawmin Santing (L) a chau Medical camp an thaw niin an lo hril niin MHJU report chun a tarlang. Chun, a biel mipui chun thangpuina an mamaw nasa hle thu an lo hril bawk.
Committee kuomah Rs. 42789 an inhlan
CCPur: Saichang areaa thli, ruopui le riel in a nuoi leia harsatna tuortu hai sawmdawlna dinga Huichim Media Foundation in April 30, 2016 zana Charity Musical Nite an nei huna sum an hmusuok Rs. 42789/ chu zani 11:00AM khan Mr Raymon Gangte, Editor, Huihchim Media chun Chiengkawnpanga Relief Committee Officeah Committee Chairman S. Thienlaljoy Gangte kuomah an hlan. S. Thienlaljoy Gangte chun, pawisa hi Saichang areaa harsatna tuortu hai sawmdawlnaa hmang nghal a ni ding thu a hril.
JAC le MTMRC thuoitu han Mizoram inzinna report an pek
CCPur: Joint Action Committee (JAC) Against AntiTribal Bills le MTMRC thuoitu Mizorama inzin hai chun zani 1:00AM khan JAC Information Centre, KKL Complex, IB Roadah tuolsung chanchinbu reporters hai inhmupuiin an inzinna report an pek.
JAC le MTMRC team hi H. Mangchinkhup, Chief Convenor, JAC inrawinaa April 26, 2016 a kha Mizoram pana inzin an ni a, Mizorama an cham sungin CM Lalthanhawla, MNF President Zoramthanga; ZNP President Lalduhawma hai bakah Central YMA, MZP/GHQ, MUS le ZoRO thuoituhai an inhmupui a, May 1, 2016 khan CCPur an hung tlung nawk a nih.
H. Mangchinkhup chun, Singngat areaah AntiTribal Bills 3 hai le inzawmin hun remchang hmasa takah awareness program buotsai a ni ding thu a hril a; Singngata inthawk Mizoram an pan na lampuiah khaw tin haiah JAC in Bills 3 hai le inzawma pamphlet an siem hai sem peiin Singngat – Mualnuam inkar km,. 65 a sei lampui siemna fe mekah Bharti Infra Ltd. sinthawna an en malam pei thu a hril.
April 27, 2016 khan MNF President le ZNP President hai bakah Civil Organisation thuoitu tum tum hai an inhmupui a, Zoramthanga chun UGs le CSOs haileh hmatieng inthuruol taka hma la ding le Bills 3 hai nasa taka dodal pei dingin an fui bakah Bills chungthu mipui hai hrilhriet a tul thu a hril.
Mizoram CM le ZoRO thuoitu hai an inhmupui huna, Mizoram CM chun, state le state inkar ah direct involvement a remchangnaw ding leiin MTMRC in lampui a siemna Mizoram sawrkarin a thlawp ding thu a hril a, ZoRO thuoitu hai chun UN levelah Bills 3 chungthu an tlun ding thu a hril.
Mizorama an cham sunga team member 12 hai Tourist Lodgea an um le fak man chu MZP GHQ in an tum pek vawng thu H. Mangchinkhup chun a hril a, Mizoram Govt. in Tuivai leilak a daw ang bawkin Tipaimukh le infepawna ding Leilak khawm a hung siem ding niin a hril.
JAC le MTMRC chun,3 Bills thuah state, regional le national level haia hma an lakpuina leiin Mizoram CM, Zoramthanga, MSU, Central YMA hai kuomah Memento le Puon insiltirna an nei.
Graduation prog. an hmang
CCPur: Zani 10:00AM khan Rayburn College chun an College Chapelah Graduation 2016 (Degree section) Day prog. an hmang a, Rev. Khen P. Tombing, Principal, Rayburn College chun Graduate student hai ta dinga tawngtaipekna le degree inhlanna a nei.
Hi huna hin Prof. Dr N. Mohendro Singh, Academic Adviser, Rayburn College chun graduation speech a nei a, Dr Mary N. Baite le Dr GN Ching hai inrawinain Student of the Year award semna nei a ni bawk. Zanita graduate hai chu (TDC/Bsc/B.Com) English honorah mi 18, History honoursah mi 46, Political Science honours 56, Geography honours 32, Sociology honours 15 le B.Com honour mi 40 an nih.
Kum 99 mi niin Chanchinbu a la tiem thei
CCPur: Pi Kungi FamhoiteKhawbung (99) w/o (L) Germanlien of Saikawt, CCPur chu a May 1, 2013 khan a malru a tet tliek leiin duthusam in chang thei tanaw sienkhawm a hriselna a la tha hle a; mifel tak a ni bawk leh kum 99 sir mek nita sienkhawm ama le ama a lan enkawl thei bakah ngainat em em Hmasawnna Thar nitin chanchinbu a ziek chin vei leh tuk tinin bat lovin a la tiem thei zing a nih. Pi Kungi hi Pu Lalhmuok Famhoite piengna nu a nih.
Tuta hma in hawp le hmuom hai a lo thaw hlak a, sienkhawm a pasal leh anni nupa in hienganga hawp le hmuom an thaw chun an nauhai khawmin hung thaw vein, khap hnenaw thei a nih ti leiin an nghei tawp el a ni thu a hril a, tuchen hin a la nghei zing a; hi hi nu le pa tam tak ta dinga chona le entawn tlak a ni takzet. (reporting LRS Puruolte)
May 30 hnungtienga inlang ding chau lem
CCPur: Hmar Tlangval Raymond Rochanhlu le a thangna Swag Gang Crew (India) hai India’s Got Talenta an inlang ding hun April 30, 2016 ti kha hrietsuol pal a ni a, May 30, 2016 hnunga inlang ding an ni lem tiin ei thu laksawngna chun a hril. Raymond thangna Swag Gang bandh hin 2nd rounda ding shooting zosa diem an ni tah.
India’s Got Talent TV show hi April 30, 2016 khan tan a nita a, stage 1,2,3... a thein Swag Gang hi stage 9 naah an inlang phak ding chau ni a, an inlangna ding TV Channel kha ‘Colors’ a nih.
Study Tour a fe ding hai vailiem
CCPur: Thadou Kuki Students’ Union, CCPur College Branch, Shillong, Meghalayaa study tour a fe ding student 60 hai chu zani 7:30AM khan Hengkhopao Haokip, Adviser, TKSU GHQ in CCPur College a inthawk a vailiem a, Pastor Tongkai Haokip, Koite Lui Area Pastor, ECA in tawngtainain an thlaliem. Cherapunji, Mosynam,Sweet fall le hmun dang dang hai sir an ta, May 5, 2016 khin CCPur hung pan nawk an tih.
Panthou Masaikol Complexa buoina suokah motor 23 vel suksiet; hun tiemchin um lovin Curfew puong a nih
Imphal: Zani zing dar 7 vel khan Imphal East District huop sunga Wangkhei Hijam Leirak, Imphal hmuna Panthou Masaikol Complex sungah buoina nasa tak a suok a, mipui lungsenin Car le AutoRickshaw hai thangsain motor 13 vel an raw a, motor ke pahni nei 8 thangsain motor 10 vel suksiet a ni a, nuhmei kum tlinglo pakhat thangsain Panthou Masoikol hnungzuitu 3 le Imphal East Police Stationa OC S.K. Singh hai chu mipui kut tuorin an hliem niin ei thu dawngna chun a hril. S.K. Singh hi a awmah lunga deng hliem a nih. Panthou Masaikol Complex Auditorium mipui lungsen pungkhawm han an raw.
Hi thil tlu ngna hmuna hin police le Fire Brigade pawl an va fe a, Police han mipui hnawtdarna dingin Tear Gas le blank fire an kap bakah Fire Brigade pawlin thil kang hai hi an thel. Police hai hmalakna leiin mipui hnawtdawr an ni a, sienkhawm buoina boruok chu a la sosang hle nia hril a nih. Hi lei hin buoina suok nawk ding vengnain Police hai chu patrolling in an fe bakah hi lai hmuna hin an duty zing.
Buoina suokna hmun le a se velah zani 11AM a intahwk khan M. Joy, District Magistrate, Imphal East District chun hun tiemchin um lovin Curfew a puong. Curfew in a huopna hmun hai chu Wangkhei Wangkheimayum Leirak, Wangkhei Pukhrambam Leirak, wangkhei Ayangpali Road le Wangkhei Imphal Wairipok Road hai an nih.
Panthou Masaikol a hotu tak chu Hijam Ratan alias Panthou a ni a. Hi Complex sunga hin naupang 33 vel sie an ni a. Hieng naupanghai thuoisuok ding hin Child Welfare Committee, Imphal East District, Manipur Alliance for Child Rights, District Child Protection Unit,Social Welfare Department le Manipur Commission for Protection of Chil Rights hai bakah naupang nu le pahai an va fe a. Hi Complex enkawltu han naupanghai peksuokna ding hin hun minutes 30 lai an lak a, an awi a sawt taluo tiin hi taka Government Officialhai va zuitu Volunteers le Panthou Masaikhol Committee memberhai karah inselbuoina a hung suok leiin mipui an hung pungkhawm pei a, chu taka inthawk tharum insuona a hung intan a, buoina nasa tak hi a hung suok nia hril a nih. Government Committee members han hi lai hmun an fesan hnunga buoina hi hung suok nia hril a nih. Hi Complex a naupang 33 um hai laia 16 hai chu thuoisuok le an nu le pahai kuta inhlan an nih tiin member, Child Welfare Committee chun a hri. Panthou Masaikol ti hi temple ei ti ang hi a nih.
BJP President thar dingin Ksh Bhavananda; BJP Councillor an ban
Imphal: Kshetrimayum Bhavanada chu Manipur Pradesh Bharatiya Janata Party (BJP) President thar dinga ruot a ni a, BJP Manipur President ni lai Th.Chaoba chu BJP Election Committee convenor dinga ruot a nih tiin ei thu dawngna chun a hril.
Ksh Bhavanada hi BJP Manipur Vice President ni lai mek a ni a, BJP Manipur President dinga ruot a nina Order hi zanikhan BJP National Secretary Organisation Arun Singh in an suo a nih.Party sukhrat le IMC Election hung um dinga BJP in hratna an chang ngei theina dinga hmalak chu a thil ngaipawimaw hmasatak a ni ding thu a hril.
Imphal Municipal Council (IMC) Ward No. 19 a BJP Councillor Y. Ratikanta Singh chun BJP a suoksan thu le BJP party officeah zani hmasa k han inbanna lekha a peklut niin a hril. BJP president Th. Chaoba chunga a lungawinaw leia BJP suoksan a ni thu a a h ril a, IMC election nuhnung taka khan a hrietpui lovin ama khingtu dingin Th. Chaoba hin midang Cong I ticket in an ngir tir a nih tiin an tum.
Hieng laizing hin Sagolband Assembly Constituency sunga Ward 7 le 8 haia member Ch. Tombi le M. Vikramjit hai chun Congress party an zawm niin ei thu dawngna chun a hril.
Manipurah motors 2,78,514
Imphal: March, 2016 chen khan Manipurah Motors 2,78,514 a uma record a ni a, tuhin chu nuoi 3 a pel ta el thei tiin Manipur Transport Minister Dr Kh. Ratan Kumar chun a hril. Chun, Manipura inlirthei eksiden tlung hi nikhatah vawihni pei ang le ni 2 dan peiah inlirthei eksiden leiin mi 2 an thi ang pei a nih tiin a hril bawk. Motor pung zet hi kum khatah 10.6 percent a ni a, motor pung hrat dan hi ngaituo um takel a nih tiin Dr Kh. Ratan Kumar hin a hril.
AMFA Vice President dingin Pu Lalvullien
Imphal: May 1, 2016 khan All Manipur Football Association (AMFA) Office, Polo Ground, Imphal hmuna kum 20162020 sunga AMFA thuoitu ding thlangna nei a ni a. AMFA President dingin S. Sanatomba Singh, Imphal West DFA thlangtling a ni bakah Vice Presidents dingin Pu Lalvullien Zote, DSA CCPur; Y. Mangoljao Singh, IEDFA ; Wungpam Kasar, Ukhrul DSA; Yaima Singh,DFA Thoubal le L.Shyamo Singh,DFA Thoubal hai thlang an nih. Pu Lalvullien hi Churachandpur District Sports Assn. (CDSA) a President ni lai mek a ni a, term hmasa khawm khan AMFA Vice President a lo ni ta bawk a nih. AMFA hi All India Football Federation (AIFF), Asian Football Confideration (AFC), Federation of International Football Assn. (FIFA) le inthlungzawm vawng a nih.Reporting: LRS Puruolte.
Samak kaptu 9 man hai lai Forest guard 5
Guwahati: Assama Nagaon districta chun Kaziranga National Parka dan lova sapeltu (paochers) 9 man an ni a, hienghai lai hin forest guard 5 an thang tiin S.N. Singh, Chief of Special Task Force chun a hril. Hieng mana um mi 9 hai hin nikum November thla khan Samak pakhat kap hlumin a ki an lak hmang a nih tiin Mr Singh chun a hril.
Petrol le Diesel man sukpung
New Delhi: India rama chun Petrol le Diesel man sukpung a nih. Petrol litre 1ah Re. 1.06 a sukpung a ni a, Diesel chu litre khatah Rs. 2.94 a sukpung a nih. Hi dungzui hin Delhia chun Petrol litre 1ah Rs. 62.19; Kolkataah Rs. 65.73, Mumbaiah Rs. 66.71 le Chennaiah Rs. 61.64 hung ni tang a ta, Diesel chu Delhiah Rs. 50.95; Kolkataah Rs. 52.97; Mumbaiah Rs. 56.61 le Chennai –ah Rs. 51.78 a ni tah. IOC, Bharat Petroleum Corporation Limited le Hindustan Petroleum Corporation Limited hai chun khawvel pumpuia thautui man le foreign exchange rate dungzuiin thlatin ni 1 le ni 16 haiah an ennawn hlak a nih.
Scientist ‘E’ le IPS (postal) in an kaisang
Shillong: Upa Dr. Zawlthanglien Changsan chu May 2, 2016 khan, Scientist ‘D’ a inthawkin Scientist ‘E’ a hlangkai a nih. Ama hi Ministry of Environment and Forests (MoEF) Govt.of India hnuoia Central Pollution Control Board, North Eastern Zonal Office, Shillong hmuna thawk mek a nih.Ei hnam sunga ding chun, hi Ministry a Scientist ‘E’ kai hmasatak ala nih. Scientist hi ‘B’ a inthawka intanin ‘G’ chen a uma, Scientist ‘G’ chen kai ta hai hi chu Ministry a hai Adviser anni hlak tah a nih.
Chun, Pu Zopawllien Hmar s/o (L) H.R. Chunga of Hmarkhawlien chu Postal Service Group “B” a inthawk Indian Postal Service (IPS) Group “A” pek a nih. Pu Zopawllien Hmar hi Chief Post Master, General Office, North East Circle, Shillong hmuna thawk mek a nih. An kaisangna ei chanchinbu chun a lawmpui hle.(virthli)
Nagalandah In 1000 chuong a suksiet
Kohima: Zani hmasa zan khan Nagalanda Makokchung, Longleng, Phek, Wokha le Mon Distrit hai chu Thlipui, ruo le riel in nasa takin a nuoi a, In 1000 chuong a sukseit a, mi 2 an hliem pha a, Electricity Supply a suksiet vawng leiin electric meivar nei lovin an um pha tiin Nagaland State Disaster Management Authority thusuok chun a hril.
UP Congress sunga insiemthatna
New Delhi: Poll strategist inlar takel Prashant Kishor chun, Uttar Pradesha Congress keitho nawkna dingin Gandhi sungkuo a mi annawleh Brahmin hnama mi Chief Ministerial candidatea ruot that a ring thu a hril. Hiengang bawk hin party sunga khawm Priyanka annawleh Rahul Gandhi election inrawi thei hai sien an nuom thu an hril.
Hieng laizing hin Uttar Pradesh a chun May 19, 2016 a Assam, Kerala, Tamil Nadu, West Bengal le Puducherry haia Assembly electiona vote tla hai tiem zo hnung tieng Congress sunga insiemthatna a um el thei niin ei thu dawngna chun a hril. Hi huna hin Pradesh Congress Committee Chief, Congress Legislature Party leader le AICC levela state affair hai chen sawidanglam ni el theia hril a ni bawk.
Heroin grams 25 leh mi 2 man
Jammu: Jammu and Kashmira Kathua district a chun zani hmasa khan pasal 2 hai chu Heroin grams 25 leh man an nih. Mana um hai chu Navjot Sharma le Sumit Singh hai an nih. Navjot Sharma hi Jandi Morh hmuna Heroin grams 21, Rs. 50,000 manhu le man a ni a, Sumit Singh hi Ujh bridge hmuna heroin grams 4.5, Rs. 10,000 manhu le man a nih.
J&K sawrkarin Free Drug Policy
Jammu: Jammu and Kashmir sawrkar chun state sawrkar enkawl Hospital haiah June 1, 2016 a inthawk Free Drug Policy hmang a tum bakah Kishtwar districtah khum 100 um theina hospital bawl ning a tih tiin J&K Health Minister Bali Bhagat chun zanikhan a hril. State sawrkar chun Cancer leia damdawia inenkawl hai ta ding bikin sawrkar thlungpui kuomah Cancer institute indin dingin a ngen a, sawrkarin a hung sanction vat ta beisei a nih tiin a hril bawk.
Chhota Rajan in that dinga vauna a hmu
New Delhi: Security khau taka vengna hnuoia Tihar Jaila intang mek underworld don Rajendra Sadashiv Nikhaljie @ Chhota Rajan chun an khingpui Chhota Shakeel a inthawk that dinga vauna a hmuh. Rajan hi tuolthatna le suolna dang dang hai leia nikum October thlaa kha Indonesia rama man a ni hnunga India ram tienga hung phur, cases 74 lai zet nei mek a nih. Choota Shakeel in Rajan mobile phone fethlenga vauna a hung thawn a chun “The End of Chhota Rajan very soon” ti an ziek a, hi zo hin Tihar jaila landline phone fethlengin a hung call bawk nia hril a nih. Hi lei hin Rajan venghimna sin chu a hma neka uluk lema thaw a nih.
VAWISUN THUPUI
Pathien dit zawng inthawina chu thlarau lungriem ithlak hi a na, Aw Pathien, lungril lungriem ithlak le insir ngawi n gawi hi hmusit naw ti nih. 51: 17
Editorial
Mipui han ei lungril ei thlakthleng a tul a nih
Kawng hran hranah hma ei sawn a, thil chik le bichieng tiengpangah khawm mani tawkah hma ei sawn pei.Mani right le sawrkar khawm ei chik ve nasa ta hle a, sawrkar bakah khawtlanga ei thuoituhai, kohrana ei thuoituhai le pawl tum tuma ei thuoituhai khawm ei chik nuom sawt hle. Tuta hma angin thil nam liem mei mei khawm a thei ta nawh. Hi thil hi thil lawmum tak el a nih. Thil hrim hrim hi chik taka ngaituo hi a tha hrim a nih. Kawng tum tuma ei thuoituhai sinthaw le tawngbau hai khawm ei khel ngun ve ta a, hi thil hi ei la thatpui ngei ding a um. Sawrkar sin lakna kawnga khawm a hma nekin thil fe dan ei chik a, thenkhat lem chun thil indik naw um a an hriet chun Courtah an khing ngam ta leiin a hma nek chun sin lakna kawngah khawm tlawmin ei ram sawrkar a zieum deu ta niin an lang.
Political party tum tum han inthlang huna manifesto siemin vote an zawng hlak a, mi rama chun hi manifesto hi ram le hnam hnuk a ni laiin ei rama ruok chun ngaipawimaw a hlaw tawk ngai naw hle. Sarwkar siemtu han election huna an manifesto an bawzui naw a, mipui han ei hrietzui ta ngainaw bawk. Hi hi a pawi a, hma ei sawn naw pha bakah inhlemna thil an tlun pha a ni deu tak. Bawzui nekin ei en liem mei mei a, inthlang tawmah a pangngai ang bawkin ei indawr nawk a, chong chun umzie nei lovin ei fe vel mei mei a nih ti inla ei hril suol tam taluo ring a um nawh. Hienganga ei fe liem pei chun politician ei tihai hin an manifesto hi bawzui lovin an um pei el ding a ni awm.
Hieng a ni lei hin pawl thenkhat annawleh mi thahnemngai han political party tum tum hai manifesto bawzuina dingin Manipur Election Watch ti hi hung buotsai ve hai sienla ei tangkaipui hle ring a um. State dang haia chun hiengang Election Watch hi an indin a, an ram le mipui han an sawr tangkai hle. Ei ram thuoituhai hi an tawnbau le an sinthaw ngawr ngawr bakah inthlang laia an intiemna le an election manifesto hai chik taka ei bichieng le suizuina chang ei hriet hi a tul a nih. Hi hi ei ram le mipui tangkaipui ding a ni leiin ngaitha chi a ni nawh. Mi state han an thaw thei chu ei rama khawm ei thaw ve hi a hun ta a nih.
Inthlang ram ei ni leiin inthlang ei nei a, vote ei thlak a, sawrkarna siemtu an hung um hlak. Sawrkarna an hung chel a, mipui ei chier nuoi nuoi a. Inthlangpui dang a hung um nawk a, vote ei thlak nawk a, sawrkar siemtu an hung u m nawk pei a. Mipui ei chier sup sup nawk a. Chuongang peiin inthlangpui dang a hung um nawk pei a, ei damsung le khawvel um sung hin chu inthlangpui a hung um pei ding a nih. Hi lei hin sawrkar thar chu pieng a ta, a la hung pieng pei ding a nih. Tuchen hin chu sawrkar thar a hung pieng zatin ei chierna hi ei la bang thei nawh. Hi hi thudik a ni a, inthlangpui a hung umna taphawtah ram thuoitu dinga inpe han sawrkarna an hang siem hin, inthlangpi danga hai ang bawkin “chuongang chu kan ni ta ding a nih” an la ti thei pei a nih.
State puitling a hmu le nina khawm kum 44 lai a tling tep tah. Hi hun sung hin political party hran hran han sawrkarna an siem a, Chief Minister khawm 19 lai zet ei nei tah. Chief Minister sin chel hi mi hran hran an ni ang bawkin sawrkarna cheltu khawm political party tum tuma mihai an nih. Hi hun sunga sawrkarna siemtuhai hin ei ram hnuk tawk phak thil, ram rotling thei khawp indinna dingin hun tam tak an nei seng. An hun sung hin ram le hnam economy khaingir thei ding khawp hiel project lien tham thaw an nei tawl am? Mipui han lungril taka ei ngaituo chet chet nuom a um.
Inthlangpui (Assembly/MLA Election) ei hmasuon nawk meka hin ei politicianhai hin thil thar hril ding an hriet nawk a ni chun, tuta hmaa thaw ding an hril, sukpuitling lova la um hai kha, an lo hril le intiem ve mei meiah an ngaiin an pawm thei ding a ni? Ei lo inhrawnpui po po sawrkar siemtu le thlanglaltu chu mipuihai tho ei nih. Mipui lungril an hnuoi chun ram ngirhmun an sang thei ngai nawh. ei thlangtlinghai,ei thlanglalhai le sawrakrna ei insiemtirhai an mawphurna inhlensuoktir theinaw tu ni hi mipui han tlawmnaah la ve ta inla, ei aiawtu dinga ei thlangtlinghai hi sinthawna zakuo inhaktir ve tang ei tiu. Chu ding chun mipui han ei lungril put dan ei thlakthleng a tul a nih.
