Responsive Ad Slot

Importance of Media ti thupui hmangin Seminar nei

Saturday, April 9, 2016

/ Published by VIRTHLI
CCpur, April 9, 2016 (Virthli News): Vawisun khan Douglas Memorial High School, Rengkai-ah Manmasi Digest huoihawtna hnuoia “Importance of Media” (Thuthar khawmtu pawimaw zie) ti thupui hmangin Seminar nei a nih.

Seminar hawngna hi Pu Lal Hossan, Hon’ble Vice Chairman, ADC, CCPur in a neia, hun hawng tawngtaina chu Rev. Lalnghakthang Khawbung, Secretary, RPC-NEI in a hmang. Hun hmasa tieng Senior Journalist Joseph Joute in keynote address pekna neiin, media hi inthangliena dinga hmangruo pawimaw tak el a nia, internet le electronic media hai a hung inthanglien peia chu print media in mipui vantlang hrilhrietna kawnga chu a la pawimaw tak ani thu hai a hril.


Resource person Pu Robert L Sungte, Bangaluru a um Journalist chun community development na dingin Media hi a bik takin Churachandpur district sunga ding chun a pawimaw zie hai hrilin, development activities hieng road le ramtin le inzawmin Churchandpur a media hai huoisen taka, ringthlak le thudik suklangtu ni dingin a hrilsa bawk.

A hril nawk peina a chun thalai haiin media an hmangsuol thei thu, media thar hieng internet hai hin thawthei tamtak a uma, thalai lungvar nei hai chun sum lamna a hmang thei ani thu le media hi inhrietpawna pakhat ang chauh ani ta naw thu hai a hril.

Hi Seminar hi Manmasi Digest, Editor Pu Timothy Z Zote in a keihruoia, khawsunga kartin suok chanchinbu buotsaitu hai, Kohran Magazine editorial board, khawtlang thuoitu, hnam thuoitu, students le Politicians iemanizat an thang a nih. Hi seminar thiltum tak tulai khawvela inhrietpawna ringtlak pawl tak MEDIA pawimaw zie chipchier taka inhrilhriet tum ti ani ang bawkin a fekhawm hai le resource person hai leh hriltlangna hun nei a nih.

Tulai media thar hieng Facebook, Whatsapp le a dang dang hai thua ngaidan hritlang a nia, mipui in hieng hai hi thiemtaka ei hmang a pawimawi zie hai an hrila chun hi seminar hin thutlukna siemin hieng media chitum tum hai le inzawma inhrilhrietna hun hi mawphurna neitu haiin huoihawt hlak hai sien ti a nih. 











Don't Miss
© all rights reserved
made with by Simon L Infimate