Responsive Ad Slot

CCpur District-a a hmasatak ding, Sielmat Christian Hospital in Rs. 18 Lakhs man X-Ray machine a nei thar

Wednesday, April 20, 2016

/ Published by VIRTHLI
CCPUR | April 20, 2016 (Virthli News): Sielmat Christian Hospital (SCH), Sielmat, Churachandpur chun Churachandpur District-a a hmasatak ni dingin Rs. 18 Lakhs man CR Computed Radiograph (Digital X-Ray) Machine chu April 20, 2016 chawhma dar 9 AM khan an Hospital Chapel le Hospital hmun ah hawngna hunser programme an hmang a. Pathien kuoma tawngtaina’n Rev. Ruolhlei Pakhuongte Sr. Vice-President, PMS lo ni hlak chun inhlanna a nei.


Hi huna hin Mrs. Lawm Pudaite Administrative Officer, Sielmat Christian Hospital chun lawmthu hrilna a nei huna chun hi hunser uoptu PMS hnuoia thawktu, EFCI Kohran tienga thuoitu un tak tak hai le Hospital Staff popo aiaw in Rev. John Pudaite PMS le BFW hotu chungah lawmthu a hril a. Dr. Chongrolien Chonzik MS Medical Superintendent, Sielmat Christian Hospital chun hiengang X-Ray machine nei theia an umna chungthu ah lawmum a ti hle thu hai hrilin Sielmat Christian Hospital chu 1964 laia kha lo indin tah le Churachandpur District a X-Ray machine nei hmasatak an ni thu, chuonglai huna chun a lun hle thu, sienkhawm a result laksuok dan kawnga ruok chun tuta machine thar le hin inthlau tak a ni thu hai a hrillangsa baka hiengang X-Ray machine changkang tak el hi mi nazawng i them thei lo a ni thu hrilin ei ni mi ngei hi machine them le enkawl thei ding Sielmat Christian Hospital in a nei chu lawmum le vangnei thlak tak a ni thu hai a hrillangsa bawk.

Tuta X-Ray machine CR Computed Radiograph ruok hi chu tulai khawvel thiemna tharlam tak hmanga siem suok niin a result siethat thei, pen drive, CD a hai khawm peksuok thei, Computer a hai copy (lakkai) thei le ralkanga khawm nisien tulai khawvel thiemna hmanga hmun danga mi Doctor thiem zuk thawna, zuk in rawnpui thei a ni ding thu hai Rev. John Pudaite chun hi huna hin a hril.

Hi X-Ray machine thar hi Mr. Joseph Sangzuala Khawbung @Johnny B. Sc, Radio Imaging Technology (RIT); RIPANS, Aizawl, Mizoram a incuk zo le Internship, RIMS, Imphal, Manipur hmuna kum 4 lai lo thaw tah chun a enkawl ding a nih.

Sielmat Christian Hospital hi mi tamtak ta dinga malsawmna niin rawng a bawl mek a. Tuta hma khawm khan natna chi tum tum a hmang ding machine thar iemanizat an lo nei tah a. Lawmpui an um tak zet.

Photograph: Muona Infimate
Don't Miss
© all rights reserved
made with by Simon L Infimate