SHAIDC in High Court ah zuolko a tum

AIZAWL, 22 MARCH, 2016 (VIRTHLI NEWS) : Sinlung Hills Accord Implementation Demand Committee (SHAIDC) chun Mizoram sawrkar le Hmar People’s Convention (HPC) Accord sukpuitling ding le an rang thei anga Sinlung Hills Development Council (SHDC) election buotsai dinga Mizoram sawrkar a ngenna chu iengkhawm dawnletna a um naw leiin Guwahati High Court ah zuolko a tum.

SHAIDC chun vawisun khan an president Vanlalsiama keihruoina hnuoiah inṭhungkhawmna neiin hmalak pei dân ding an ngaituo a, tukum February thla a Mizoram Chief Minister Lal Thanhawla kuomah memorandum an peklût chu iengkhawm dawnna a umnaw leiin Guwahati High Court ah intlun an tum thu le a ṭul anga hmalak pei an tum thu, SHAIDC Secretary Lalparkunga chun Virthli palai a hril.

February ni 10 khan Mizoram Chief Minister kuomah an rang thei anga SHDC election buotsai ding le HPC Accord sukpuitling dingin SHAIDC chun ziekin ngenna an theluta, July ni 27, 2016 hma ngeiin an ngenna sukpuitling dingin CM an phûta bakah thlakhat sungin finfiena (assurance) ṭhatak a peknaw chun High Court ah an intlun ding thu an lo hril tah nghe nghe a nih.

Memorandum thelût a nia inthawk thlakhat neka tam an vawi hnung khawma hmalak tumna CM anthawkin iengkhawm a umnaw leiin High Court ah zuolko el an tum thu SHDC ṭhuoituhai hai chun an hrila, March thla sung ngei hin Guwahati Hight Court, Aizawl Bench ah intlun an tum thu an hril bawk.