Responsive Ad Slot

Hmasawnna Thar | 02 March, 2016

Wednesday, March 2, 2016

/ Published by VIRTHLI
DK Thangboi MCS coumpuond­ah Bomb deng puok
CCPUR: February 29, 2016, zan dar 11:25 vel khan hmelhrietlo han K. Salbung­a D.K. Thangboi s/o (L) Jangkhojam chengna in compound sungah Grenade ni dinga ringhla bomb pakhat an dengpuok. Bomb puok hi an ring hle leiin a puokna hmun hi a bul vela cheng hai chun an zuk hriet el thei naw a, zan dar 12:30 vel khan DK Thangboi in Compound a nih ti hrietsuok a nih.


DK. Thangboi chengna in campus sunga um Bolero MN03A­2274 ke (tyre) inthlathep saa hmu le Chevrolet motor MN01W­5201 tyre khawm inthlathep sa le a hnungtieng glass kawi saa hmu a nih. Bomb puok in a suksiet a ni le ninaw ruok chu hrietchiengna a la um nawh.

Hi thil tlung an hriet le inruolin Khaipao Haokip, MDC inrawinain tlawmngaipawl thenkaht chun thil tlungna hmun hi pan nghalin zan khawvarin an umchil a. Zani zingkar khan L. Mangkhogin Haokip, IPS, SP/CCPur le OC/CCPur han hi thil tlungna hmun panin thil umdan an suizui bakah 7­Assam Rifles khawmin a hmuna an va enfel. Mi thenkhat chun hi  bomb puok zo hin DK Thangboi gate chu inhawngsaa hmu le Lamka tieng panin Bike pakhat hrat taka a tlan an hriet thu an hril.

DK Thangboi, MCS hi Kangpokpi/Sadar Hills­a Additional Deputy Commissioner (ADC) le CEO sin chel lai mek a ni a; Feb. 28, 2016 (Pathienni) khan a nuhmei le a nauhai a hung kan zo hnungin Feb. 29, 2016 khan Kangpokpi tieng a fe nawk ta niin D.K. Thangboi nuhmei chun a hril.

CCPur Police chun Grenade ni dinga ring bomb hlek um hai rut khawmin an suizui mek a, hi thil tlung le inzawm hin FIR No.12 (3) 2016 CCP­PS u/S 427/34 IPC & 3 Explosive Substances Act an registered bawk.

HSLC Exam, 2016 tan a nih
CCPUR: Board of Secondary Education Manipur (BSEM) huoihawtnain zanikhan High School Leaving Certificate (HSLC) Examination, 2016 tan a nih. CCPur Private Centre hnuoia chun Exam Centre pahni­ Main Centre Ebenezer Academy le Sub­Centre Don Bosco Hr. Sec. School hai Exam centre­a hmang an ni a, School tu m tum 74 haia inthawk  regular candidates 3093 le External candidates 415 han zanikhan English subject an in exam.


CCPur Exam centre pahni hai hi Micro Ob server 1 ve vein an thung ngha a, exam a thienghlim. Main Centre Ebenezer Academy­ah Roll no.16812­18028 inkar candidates 1216 le Sub­Centre Don Bosco School­ah Roll no.18029­19490 inkar candidates 1462 bakah  external candidate Roll no.1039­14533 inkar candidate 415 an inthung.

31st HYA Founding Day puithu taka inser tumin inbuotsaina ngawr taka fepui mek a nih
CCPUR: 31st HYA Founding Day Celebration Committee a inthawka thu ei dawng danin 31st HYA Founding Day chu ursun le phuisui takin March 7, 2016 khin Saikawt Playgound, Saikawt, Churachandpur ah hmang dingin an buotsai mek. Zingkar dar 8Am in Flag Hoisting ceremony um a ta, zantieng dar 6pm a inthawk Open Air Musical Night hmang ning a tih. Musical Night hmang huna hin Hmar, Mizo, Zomi le Kuki laia Artist inlar tak tak haiin hla sak an ta, HYA Muolvaiphei Branch a inthawk HYA Hlapui “Pu­Pa khan a tui ang kan laksa tlawmngaina hlu” Pu James Songrolal in kum 1993­a a phuok sakna nei bawk an tih. Hmar Art & Culture mawi tak tak suklang ning a ta, Sound, Light le stage hai khawm a tha thei ang tak hmang dinga inbuotsai a nih. 31st HYA Founding Day hin inunauna thalem hung rasuok a, hnam tlawmngaina ziemawi indiktak a hung parsuok nawk ngei theina ding beiseia sum le pai, tha le zung tam tak senga inbuotsai a ni a, a thei hram chun 31st HYA Founding Day committee chun tlawmngaina sina hmang ding le Tuithaphai a sie ding Ambulance a suolsuok tum nghal bawk a nih. Hi programme hmang ding hin 31st Founding Day Celebration Committee chun mitin a fiel a, hlawtling taka hmang a ni ngei theina dingin mitinin tawngtaina a lo san dingin a ngen nghal bawk a nih.


HI President in khuolliena thangin tournament a uop
CCPUR: Zanikhan Lukhumbi Youth Devpt. Organisation (LYDO) le Sangang Area United Club Assn. (SAUCA) hai huoihawtnain Lukhumbi Village, CCPur, Manipur­ah 14th LYDO, Annual Sports Meet closing ­cum­final match nei a ni a, hi huna hin Pu Joseph Lalrothang, President, Hmar Inpui GHQ khuollienin a thang a, Pu Mangkhokam Changsan, Khongsai Inpi thuoitu le Pu S. Kula Luwang, President, CCPur United Club Orgn. hai Guest of honour le functional president in an thang.


Pu Lalrothang chun, final inkhel ding hai chu hrat le hratnaw a umdan thiem dingin an fui a, mi thenkhatin lawmman lawmnaa zu an dawn inrui hlak chu  Setan hnungzuina a ni thu hrilin khawlai hmuna khawm um inla, ‘ka nu in mi hmu sien a lawm tim? “tiin inngaituo hlak ei tiu;  20th Centrury ah ei chuongkai ta a, sienkhawm ei la rethei hle. Pawisa a inchawk thei  ei ni sung chun changkang ngai nawng ei ta, hnam changkang ni ngai nawng ei tih tiin a hril.

HI President hi HI Executive member thenkhat; a nuhmei Pi Thangngei hai bakah Hmar Artiste Assn. a inthawk John L. Varte, Lalvengvari Sinate le Emma L. Pachuau  han zuiin hla an sak.

Football final­ah Sagang YOuth Club (SYC) chun  LYDO) chu full time­a 1­1­a an indraw hnungin  Penalty­ah 6­5 in an hne a lawmmanin 15,000/­ le runnerup in Rs. 10,000 an dawng a, Best Goal keeper, Best player, Best discipline le Top scoer hai kuoma lawmman pek an ni bawk. (LRS Puruolte)

Private school­a thawk an um le umnaw enfel dingin
CCPUR: Mr Kaikhanlian Guite, DI of School, CCPur inrawinain zanikhan AI of Schools le staff han  meeting an nei a, ZEO/CCPur hnuoia Govt. Teacher mi iemanizat Private School a teacher sin thaw an um nia report um leiin enfel dingin meeting chun an rel. Hi le inzawm hin CCPur Block hnuoia Private Schools haia Govt. teacher sin thaw hai particular kimchang tak, private school han thla khatah hlaw iengzam an pek? ti suizui an ta, an thil hmu an gang ZEO/CCPur kuoma pelut an ta, ZEO/CCPur in Higher Authority kuomah report a pek ding tiin hi meeting­a thang hai chun an rel.

Food items sem
CCPUR: District Social Welfare Office (DSWO), CCPur Office­ah zanikhan ICDS Project hnuoia Anganwadi Centres 181 hai kuomah naupang kum 6 le a hnuoitieng hai kuoma pek ding Nutrition Food items tum tum pekdawk an nih. Centre pakhat kuomah Bufai bag 1, Chi kg. 2; Antam thau litres 3; Dal kg. 4; Kangtak kg. 4.5 le Chana kg. 2.5 senga sem a nih.

IUCD Insertion training
CCPUR: Zanikhan DFWO Conference Hall­ah PHCs le CHCs haia Medical Officer hai ta dingin IUCD Insertion Training tan a nih. Hi huna hin Dr V.C Pau, DFWO/CCPur in projector le slide hmangin training a pek a, medical officer hai an thang tawl. Training hi March 5, 2016 chen aw ding a nih.

Fresh Gun license/renewal la chawlsan hri ding
CCPUR: Churachandpur district sunga Gun License neitu le new applicants hai Armes License details MHA­NDAL Portal Generation of Unique Identification Number uploading thaw mek a ni a, sin tam leiin tu hri hin chu Gun licence thar pekdawk, renewal le retainership etc hai chu March 1, 2016 a inthawk thuthar um nawk hma po la chawlsan hri ning a tih tiin District Magistrate, CCPur chun zanikhan inhriettirna a siem. Chun, CCPur district sunga Gun license nei hai chu MHA­NDAL portal a upload dingin detail particulars pelut dingin an hriettir bawk.

Sit­in­protest sunzawm pei a nih
CCPUR:  JAC against Anti­Tribal Bills inrawinaa January 26, 2016 a inthawk CCPur Police Station tuola Anti­Tribal Bills 3 hai dodalnaa sit in protest nei tana um chu sunzawm p ei a ni a, March 2 &3, 2016 in Rengkai, Kawnpui le College Veng, New Lamka hai inthung an ta, March 4 & 5, 2016 in Kamdou Veng, Nghathal, B.Vengnuom le  Kaanan Veng, New Lamka hai inthung an tih.

JNIMS­a MBBS inchuk theina seats 100 um mek hi seats 150 dingin state sawrkarin hma a lak mek: O.Ibobi Singh
IMPHAL: Zanita Manipur Assembly­a Medical Health & Family Welfare Department sum hmang ding hriltlang a ni laia hi department cheltu minister Phungzathang Tonsing in thu a hrilnaah, Community Health Centres (CHCs) 8, Primary Health Centres (PHCs)12 le Primary Health Sub­Centres (PHSCs) 155 indin belsa a ni ding thu; hi thil thawna ding hin sawrkar thlungpuiin sum a hung sanctioned ta thu; District Hospital tinah damnaw khum 100 pei sie a ni ding thu; Kangpokpi le Jiribam CHC haiah damnaw khum 50 pei sie a ni ding thu le sawrkar thlungpuiin Homeopathy Hospital indinna dingin Rs. 10 crore a hung sanctioned ta thu hai Inpuiah a hrillang.

Medical Health & Family Welfare Department sum hmang ding hriltlang a ni lai hin CM a hung inrawl ve a, Jawaharlal Nehru Institute of Medical Sciences (JNIMS), Porompat a MBBS inchuk theina seats 100 um mek chu seats 150 a sukpung dingin state sawrkar chun a buoipui mek a nih tiin Inpui an hriettir. Chun, JNIMS a hin Dental College khawm hawng belsa tum a ni thu le JNIMS hi Medical Council of India (MCI) in permanent recognition a pek tasa a ni thu le MBBS seat khat pei inchukna ding hin sawrkar thlungpui chun Rs. 2 crore pei hung pek a remti ta bawk tiin CM chun inpuiah a hril sa bawk.

Manipur Assembly chun zanikhan Demands 7 an hriltlang hnungin lungruol takin an passed.   Demand an passed hai chu­ Medical, Health & Family Welfare Rs 528,93,32,000; Labour & Employment Rs 18,53,16,000; Horticulture & Soil Conservation  Rs 88,62,16,000; Community & Rural Development Rs. Rs 643,48,86,000; PHED Rs. 245,87,83,000; Panchayat Rs 69,90,52,000/­; Environment and Forest, Rs.171,76,64,000/­hai an nih. Demand 7 passed­a um hai hi a rengin Rs. 1, 697, 21,97,000/­ a nih.

Minister ruol an tho hnungin an thung nawk
IMPHAL: Zanita Manipur Assembly a question hour zo a n le inruolin ministers ruol chu puotienga suok tumin an thungna haia inthawk an ngir sup a. Amiruokchu, CM O.I bobi Singh chu hriltlang dinga demands for Grants phar a tum lai a ni leiin, Minsiter­hai suok tum a hmu chun a lawmnaw zie le a lungsenna a hei suklang leiin minister ruol chu an seat sengah an thung nawk sap sap tawl.

Dy. CM in a sunpui thu a hrillang
IMPHAL: Nunrang taka vuok hlum Thongkhogin Haokip (54) Headmaster, Molnom Junior High School, Chandel District le nunrawng taka suolluia a umna tuorzo lova thi nuhmei naupang kum 6 mi, Chinikon, Bishnupur District a um sunghai chu an lusunna a sunpui le a tuorpui zanikhan Dy.CM Gaikhangam in Manipur Assembly­ah a hrillang. Chun, Gaikangam hin Nilakuthi a Food Park hmuna state sawrakrin Cold Storage a bawl tum thu zanikhan inpui an hriettir bawk.

Manipur­ah sin zawng 7,47,401
IMPHAL: January, 2016 chen khan Manipur­a Employment Exchange haiah sin dita hming zieklut, Live register­a um chu mi 7,47,401 an tling. Sin ruok 90263 a um a hienghai laia sin ruok 66528 chu sukbit a ni ta a, sin ruok 25329 a la u m tiin zanikhan Labour & Employment Minister Irengbam Hemochandra Singh in Manipur Assembly­ah LJP MLA Karam Shyam indawnna dawnin a hril.

Barak le Maru Leilak hai RCC in
IMPHAL: NH­37 (Imphal­Jiribam Road) a Barak le Makru Vadung chunga Bailey Suspension Bridge hai chu RCC a inlettir dingin Ministry of Road Transport and Highways chun thutlukna a siem tah tiin Manipur Chief Secretary O. Nabakishore chun zanita Imphal­a Chanchinbumihai an hmupui huna a h ril. Chun, hi leilak dawna ding hin e­tender thaw tum a ni ta a, sum seng dinga riruong chu Rs. 80 crore a nih tiin a hril.

NH siem thatnain Rs. 19.99 crore
IMPHAL: Kum 2012­15 inkar khan National Highway (NH) siem thatnain State sawrkarin Rs. 19.99 crore a hmang a, sienkhawm sum a hmukir (re­imbursed) chu Rs. 3.80 crore chau a nih tiin zanita Works Minister Kh. Ratan Kumar in BJP MLA Kh. Joykishan indawnna dawnin inpuiah a dawnlet.

Sharmila in a nuorna a la sunzawm
IMPHAL: Irom Sharmila Chanu chun AFSPA hlip dinga a ngenna le inzawma bungheia nuorna a nei chu a la sunzawm nawk pei. Bu ngheia nuorna hi  B.T. Park, Imphal­ah a nei a, a thlawptu mi tlawmte chauvin tuta tum hin chu an thungpui ta niin ei thu dawngna chun a hril.

Education Dept. ah thawktu 19487
IMPHAL: Manipur sawrkar hnuoia Education Department­ah thawktu 19487 an um a, hienghai laia 12000 hai chu Zirtirtu an ni a, Zirtirtu 203 hai MGL sukfel lo a la nih. Zirtirtuhai ta dingin transfer & posting policy siem a ni a, an hmatiengin hi policy hi siemrem le hmang ni tang a tih tiin BJP MLA Th. Biswajit Singh indawnna dawnin Education Minister M. Okendro Singh in zanikhan Manipur Assembly­ah a hril.

Union minister hlui kum 3 jail intang dingin
NEW DELHI: Fakrukna thila thiemnaw inchangtir le Tihar Jail­a intang mek Union Minister hlui P.K. Thungon chu kum 3 le a chanve sung jail intang dingin zanikhan Delhi Court in thiemnaw an changtir. Hi baka hin Special CBI judge Sanjeev Aggarwal chun fine Rs. 1 lakh chawi dingin a chungthu a rel bawk. Mr Thungon hi Arunachal Pradesh Chief Minister khawm lo ni ta a ni bawk.

PV Narasimha Rao India Prime Minister a ni lai khan Minister of State for Urban Affairs and Employment a chel a, hi huna corruption hi a thaw nia intum a nih.

ZNP Vice President in MNF a zawm
AIZAWL: Mizoram­a chun ZNP Vice President K. Liantlinga le a hnungzuitu thenkhat han zani hmasa khan ZNP suoksanin MNF party an zawm. Lawmlutna inkhawm hi Mizo Hnam Runah nei a ni a, hi huna K. Liantlinga in thu a hrilnaah, Mizo Nationalism sukpuitlingna dingin inpuiah kan hung inlawi a nih tiin a hril. K. Liantlinga chun ZNP President le inremnawna iengkhawm an neinaw thu hrilin, ram le hnam ta dinga sin thaw ding le ram humhim dingin MNF zawm tul makmawa a hriet leia MNF zawm niin an hril.

LS le RS inthung sukchawl ve ve
NEW DELHI:  Home Minister hlui P. Chidambaram naupa Karti in London, Dubai, Sri Lanka, France le USA hai thangin rambung dang dangah real estate  investment a thaw tia intumna le inzawma AIADMK in Lok Sabha le Rajya Sabha haia risie nasa taka an siem leiin LS le RS inthung vawi tam tak sukchawl an ni hnungin zanita dingin  hieng Inpui pahni hai inthung chu sukchawl a nih. Rajya Sabha inthung vawi 6 le Lok Sabha inthung vawi 4 sukchawl lailawk a ni hnunga RS le LS inthung hai hi zanita dinga sukchawl an nih.

DoPT in draft policy thar an duong
NEW DELHI: India hmarsak biela IAS le IPS officer tlaksamna sukbo a ni theina dingin services dang danga officers hai NE biela an um theina dingin Department of Personnel and Training (DoPT) chun draft policy thar a siem. Hi draft policy dungzui hin Cenral Service le Central Secretariat Service officer, NE biela sin thaw nuom hai ta dingin states secretariat haiah non­cadre post in an lut thei ding bakah India hmarsakbiel mi all India services­ Indian Administrative Service (IAS), Indian Police Service (IPS) le Indian Forest Service (IFoS) hai chu NE­ah inter­cadre deputation in an insawn thei ding a nih.

NIA in ISIS le inzawmna nei ringhla 24 an man
NEW DELHI: Minister of State for Home Haribhai Parathibhai Chaudhary chun, tuchena hin ISIS terrorist hai le inzawmna nei ringhla mi 24  National Investigation Agency (NIA) in an man tah tiin zanikhan Lok Sabha­ah a hril.  NIA in mi 24 an man hai lai hin Jammu and Kashmir –ah 1, Karnataka ­ 7, Madhya Pradesh ­ 1, Maharashtra ­ 7, Tamil Nadu ­ 1, Telangana ­ 4 and Uttar Pradesh – 3 an ni a, NIA in thu indawnna neiin an suizui mek tiin  Mr Chaudhary chun Lok  Sabha­ah a hril bawk.

VAWISUN THUPUI
In bawsietnahai chu s<m sâmup sukboin ka sukbo tah a, in suolhai chu s<m sukbo angin ka sukbo ta bawk a; ka kuomah hung kir nawk ro, kan tlan ta si cheu a. ­ Isai 44:22

Editorial: Budget hi

Hun iemani chen sunga sum laklut le hmangralna ding riruong hi budget chu a ni deu tak a. Mimal le sungkuo tin khawmin budget ei nei tawl seng ring a um. Budget tha taka nei thei hai chu a neinaw hai nekin a zie an um deu ngei ring a um. Mithiem le thil chinchang hrie hai chun budget hi nei ngei a that thu hi an hril hlak. Amiruokchu, ei ni rawi hin chu budget siem hi ei ngaipawimaw tawk naw niin an lang. Hi lei hi mani ding sungkuo tin elin thlatin ei indai naw zie hi ei hril seng hlak. Hnam var le changkang lem hai chun budget hi an ngaipawimaw a, budget hi an siem a, an budget siem angin sum an hmang hlak. Hi lei hin ei ni rawi nek chun an changkang lem niin an lang. Hieng a ni lei hin  ei ni rawi khawm budget siemin  nei inla chu tu ta nek hin ei khawsakna hi a hung inhawi le a hung changkang pha lem ngei ring a um.

Budget tha tak siema zui ei ni ngai naw leiin sungkuo tinin sum le pai hmangna kawngah inret harsa  ei ti hle. Sungkuoin budget ei nei naw a, ei nuom dan dana sum le pai ei hmang el hlak leiin bat neinaw ding hai khawmin bat ei nei pha hlak. Budget tha tak nei inla chu sa dam hi batin ei hme ngam ring a um nawh. Budget ei nei tawl naw leiin bat ei huoisen pha a, ei mamaw ngawi ngawi ni lo, ei thil dit le ieng bara ei hmang tangkai ding khawm ni lo thil ei inchawk hlak. Secondhand thuomhnaw inchawk lem hi chu ei nupui han awlsam an ti taluo a, hak senglo ei nei tawl ring a um. Sum hmangna kawngah ei insum theina ding le mani seng ei inthunun theina dingin budget hi neia zui ding a nih.

Hnam var le changkang lem Vaihai hin budget tha takin an siem a, indik taka an zui bawk leiin sum hi an inkhawl thei tawl hle. Hi lei hin inren an thiem ei ti hlak. Inren thiemna ding chun budget nei le indik taka zui a tul. Ei ni rawi chu ei hmu tam leh ei hmang tam a, vaihai ruok chu an hmu tam khawma an hmang tam deu chuong naw a, an budget a sum hmang zat dinga an bituk ang zat char thoin sum an hmang hlak. Ei ni rawi angin sum hi a tul lovah an hmang liem puot puot ngai nawh. Ei ni rawi chu budget bova khawsa ei ni leiin ei hmu rawn leh ei hmang rawn a, ei hmu tlawm leh ei hmang tlawm a, a chang lem chun ei bat sa lem hlak. Hi lei hin ei khawsakna hi hmasawn tieng nekin an phet lem hlak. Budget neia khawsak hi tum ngei ngei dinga tha a nih.

Churachandpur town sunga Kuli ei ti hai hi budget thua hin entawn tlak takel an nih. An timakna, an titakna le tumruna hai bakah budget tha taka nei le zui hlak an ni leiin an ni tawkah an intodel a, ruolhai ta an ban naw a, tlasam lo le nghei lova an khawsa thei zing bakah an rama an nuhmei le an nauhai chu thlatin sangtel an thawn thei zing a nih. An inlang danin hmusit um hle hai sienkhawm hmusit le en hnuoi el chi an ni nawh. Hienga ei  rama an hung khawsak el theina san hi an budget nei that lei le inren an thiem lei a nih. Vaihai chun sa le Nga hme hun annei a, an sa hme naw ding nia chun iengangin sum hmu tam hai sienkhawm an hme pangngai an hme hlak. Eini rawi ruok chun sa hme ni le ninaw ei nei hran chuong naw a, ei sum tlaksam le neinaw lai taka sa  hmin sa zawr ei inah an hung lut chun bata hme ei ngam hlak. Hi lei hin ei budget a hlawsam rawp hlak.

Mimal le sungkuo chau ni lovin khawtlang, kohran, pawl hran hran, state sawrkar le sawrkar thlungpui hai khawmin budget an nei seng a, chu budget dungzui chun sin an thaw a, hma an lak hlak. Budget nei sa an ni leiin mimal le sungkuo hai angin sum le pai hmangna haiah an buoi naw a, an hmasawp tluong takin an thaw thei pha hlak. Budget hi a tul le a pawimaw em leia ei ram sawrkar khawmin a siem hlak a nih. Sawrkarin Budget a ngaitha pha pha mipui le ramin nasa takin a tuor pha hlak.

Sawrkar thlungpui le ei state sawrkar hai khawmin budget session an nei lai tak a ni a, tuhin budget chungchang chu mipui aiawa rorel dinga thlangtling han an hriltlang mek a nih. Mipui han iengang budget am ei nei a ti hi ngaitha chi a ni naw a, mipuihai hin ei ngaiven hle ding a nih; A san chu mipui sum hmang dan ding le hmu dan ding riruongna a ni mieu leiin. State danga chun Union  Budget  le state budget hai phar a ni changin mipui ngaiven a hlaw hle a, hun dang le ni danghai ang lo takin TV le Radio haiah uluk em ema enin an ngaituo hlak bakah Chanchinbu han tiem a hlaw bik pha hle hlak. Ei ni rama ruok chun budget hin mipui ngaiven le ngaipawimaw a hlaw meu ngai nawh. Union Budget le state budget hai hin iengangin am nghawng a nei ding ti  hi ei ram mipui khawmin ngaivenin ngaipawimaw hle inla nuom a  um.

Don't Miss
© all rights reserved
made with by Simon L Infimate