Responsive Ad Slot

Presidential Address delivered by Dr. John Pulamte on the 8th Hmar Inpui Assembly

Monday, February 15, 2016

/ Published by VIRTHLI
PRESIDENTIAL ADDRESS DELIVERED BY DR. JOHN PULAMTE, PRESIDENT OF HMAR INPUI ON THE 8th HMAR INPUI ASSEMBLY, RENGKAI, CHURACHANDPUR ON 12&13 FEBRUARY, 2016


Pu Speaker,

8th Hmar Inpui Assembly huna Presidential Address pe thei dinga ka um hi vângnei chungchuong kan tih a; hun pêka ka um leiin ka lâwm takzet a nih. State le region tum tuma inthawka Palai hung hai ka lâwmlûtna thu ka puong.

Hmar Inpui thuoitu term khat, kei le ka thawpuihaiin kan chel sûng khan Hmar Inpui Region-hai po le ei chêng bubitna deuhai kan sirsuok phuor a, hmu thar le inchûk ding tamtak kan nei pha niin ka hriet. State le biel hran hrana chêng ei ni ang ngeiin ei chêngna le ei kâwl-le-kienga hnamhai thlêk zâwnga lungril ngaituona putin ei thu fepui nuom dân khawm an ang naw nuoi. NC Hills tieng, a pâwlpuia hnam hmakhuo ngaina a la’n sâng bîk deuin ka hmu a; Cachar biel lai inchûkna tienga hma thar dawm nuomna lungril a pieng nasa lem deu niin ka hmu bawk. Capital cities-a um haiin sawrkar hmunpui an nina changchawiin Hmar hnam pumpui ro-le-râng, zuk rêl khum el tumna lungril a um met niin ka hmu bawk. Tuithaphai lai hnam invawina le hnam ta dinga pênsuokna lungril a tlawma, a thang a kin thawkhat khawm a ang lai zingin Hmar hnam pumpui headquarter bîk anga inngaina lungril chu a la da chuong nawk naw anglawi niin anlang bawk. Hi lai biela hin hnam pumpui âiaw theia inngaina a la lien hlea; pâwl pakhat indin a ni chun Hmar hnam pumpui âiawtu anga ngaina a um leiin, ‘General Headquarters’ zuk inti pawngchawr el hlakna biel a nih.

Mizoram tienghaiin Hmar political movement hmunpui anga inngaina a la um zinga, inthuruola hma thar dawm dân ding ruohmanna le a taka pênsuokna nêkin a thua hril inzuom a um lem zie ei hmu chieng seng lei mani ding hnam thila hmasâwnna hril ding a tam naw hle. Biel tin a hai hin Pathien ram nêkin ‘kohran ram’ ngaisâng le chawisâng tumna lungril a lien lemin an lang a; hnam ta dinga tha-le- zung, sum-le-pai pesuok nuomtu chu a taka thawtu nêkin a thua hril inhawiti an tam lem bawk. Sienkhawm, hieng bielhaia Hmar mimir lungril rûk taka chu hnam anga damkhawsuokna ding chun inpumkhatna a pawimaw zie le pawlitiks tienga ei ngîrhmuna ningintelna ansâng vieu a; thangtharhai lai ‘Cachar, Haflong, Aizawl, Manipur, Meghalaya, Tripura, etc hai inpumkhata ngîra’ inzawmkhâwmna pâwl lien le nghet nei nuomna lungril a pieng nasa hle niin ka hmu bawk.

Hmar Inpui 6th Assembly resolution laia pawimaw pâwl tak, ‘Hmar Inpui Inawpdân (Constitution) a pumpuia ennawn (review) ding’ ti kha tuta term-a á¹­huoituhaiin theitâwp suoin kan bawzui a. Draft Review entlâng dinga Special Assembly vawi 3 zet nei a ni bâkah Hmarkhawlien le Muolhoi a hai a hranpa lieua inrâwnkhâwmna (consultation meeting) fumfe taka nei a ni bawk. Chu zo a chun Nov. 2, 2014 khan Rengkai-ah Special Assembly nei a ni nâwk a; chu hun a chun Hmar Inpui Inawpdân siem le remthara um chu a thua (in principle-in) rem ti a ni a. A tâwp a tâwpah May 15, 2015 khan Hmar Inpui Assembly vawi 7-na Hmarkhawlien-ah neiin tuta ei Inawpdân (Constitution) hi hmang le zâwm nghâl dinga namde-ta a nia, a bu-a siem khawm a tak ngeia hmu theiin a um ta leiin lâwmum ka ti hlea; hi sina dinga a kul-a-taia hma mi nawrpuitu, Prof. Vanlalnghak le Pu Lalthalien-hai chungah Hmar Inpui Executive Committee hmingin lâwmthu ka hril ni raw seh.

Ei Dân bu, Article 8 (Clause IV) chun, Hmar Inpui hnuoia inkhâi or hnam hminga pâwl, Hmar Inpui hrietpui chu ‘Inpui General Assembly hrietpui’ a ti kher leiin chuong pâwlhai chu vawisûna ei Assembly Agenda pawimawtak dinga thurdawk a ni a nih. Hi hi official taka ei namdet naw chun a hnung peiah ei lan palbuoi thei dân ding a um tlat zie a hretu seng ei ni ring a um. Vawisûna ‘hnam hminga pâwl/organisation’ anga ei pawm hai hi Hmar Inpui election nuhnungtaka palai neia vote neihai po kha an nih.

Ei Dân hlui a khan Hmar Inpui Region-hai hming inchuon a nia; a thara ruok chu ‘by Assembly Resolution’ in sie remchâng lem dinga ei ngai leiin vawisun hin chu chu sie ei tum ding nisien. Chuong lai zing chun a bîktakin Manipur state sûnga ‘Region’ hran hran ei neihai hi remkhâwm thei a ni di’m tiin ‘agenda’ dang pakhatah ei sie a nih. Hieng ang hin: Imphal le Hmarram region-hai hi Headquarter a’nthawka direct-a enkai nisien; Jiribam le Vangai Region-hai hi a hran hrana um ta lovin pakhata sungkhâwm ni ta lem sien. Chu chie chu a thei naw khawma Jiribam le Vangai bielhai hi region anga um ta lovin a hmaa hnam hminga pâwl lo um tasahai enkaitu dingin Hmar Inpui Co-ordination Committee (body) pakhat an ni lai insiem lem el hai sien. Hmar Inpui hi kum 15 nêka tam met liem ta khan hnamin ei tûl hle anga ei hriet leiin ei indin a; a ni ding ang le fe dân ding angtaka ei beisei dân inangnaw nuol a ta chu tu chena a ngîrhmun a hin ei lung a awitâwk zo naw seng ring a um. Chu chu lungrila hre zing pumin Hmar Inpui region inthe dân chite tea siemthat le suk danglam dinga rawtna hi palai inzaumtakhaiin uluk taka ei chaih tlânga thuthlûkna ei siem nuom a um hle.

A hmaa Hmar Inpui election a hai khan Tuithaphaia Hmar khuo 16 haiin an population (in um zât) a zirin vote an nei a; tuta tum ruok chu a hmaa Region hrana um, Imphal, Hmarram, Jiribam le Vangai Region-hai khawm inthlang tharna nei pui dinga hma lâkna hmasa a uma chu remchâng nawna thenkhat leia thul a ni bâkah ei Constitution thar hi la zuk siemrêl hmasa phawt inla tia ngaidân a um leiin tuta term sûng chu headquarter in a enkai sa tlat leiin Tuithaphaia Hmar khuohai ang bawkin an population (in um zât) a zirin vote ei inneitir a; hilai biel a hin In 300 chuong umna khuo 2 (pahni) tihai naw chun ‘palai/vote 2’ an nei seng el ding a nih. 

Ei Dân hlui a khan Hmar Inpui Assembly Palai dingin, ‘Hmar khuo, In (household) 50 hnuoi tiengin palai pakhat, In 50 dang peiah palai dang pakhat’ a ni hlaka. Hi hi ei Constitution thara chu chitea sukdanglamin, ‘In (house) 100 chen a’nthawka palai 2 (pahni) le a chung tieng In 200 dang peia palai 1 (pakhat)’ tia thlakdanglam a nih. Hi hi ei thawna san tak chu khuo chin le khuo lien-hai hlut dân le palai nei zât an ang deu phuor nuomna a um lei a nih. Chuong a ni naw chun policy thar zam le inthlang nikhuoah khuo lien lem haiin ‘advantage’ an hau bîk taluo hlak a, khuo chîn le mihriem tlâwmna a’nthok thuoitu ding an suok thei naw el theina a um lei khawm a nih. Hienga ei thaw tak lei hin tuta inthawk chu Hmar Inpui Assembly le inthlangnaa hai In (house) 100 hnuoi umna le 299 chen umna hai hlut dân le vote nei zât an ang rawng ta ding a nih. Tha lema anlang chun sunzawm pei ei ta, ni thei ngang loa ei ngai chun ei thlakdanglam nâwk el ding ni raw se.

Inpui Assembly-a ‘palai’ nei thei ding khuohai chu, ‘Hmar Welfare Fund pe’ ti a nia; Tuithaphai le Imphal biela dâwl dinga hma lâk tan a ni laiin buoina lien dangin a mi hung nang thut leiin sunzawm mumal thei a ni naw leiin, hi condition hi za-ah za (100 percent) sukpuitling khuo pakhat khawm ei um nawa; iemani chen ei relax el a nih. Hmarram, Vangai le Jiribam biel le Manipur puo tienga Hmar Inpui region danghaiah a thara Hmar Welfare Fund dâwlna sin la tan lo a nia, hilai biel a hai hin chu a hmaa ei lo thaw hlak angin, Hmar In (household) tin a’nthawk Annual Fund (In khatah ` 50/- pei) kha ei phut lem a nih. Hi khawm hi ieng chen am ei inphutlui thei ding hril a harsaa, Constitution ei siemthat hnunga ei Assembly hmasatak a hin ei rênga ei thang kim ei nuom tlat si leiin iemani chen chu ei relax tum el a nih. 

Ei kâwl le kienga hnam lien le chinhaiin an hnam hminga prokram lien, an hnam nunphung le niphung humhalna le chawisangna dinga an huoihawt inzawmzut lai Hmar hai chun hril le thaw ei nei ve meuh nawh. Khuo (abîkin khawpui/cities) haia Sikpui Ruoi hmang ri ei hriet a; Tuithaphai lai mi tlawmngai fal thenkhatin Hmar Martyrs’ Day le inzawmin Hmar hai ta ding bîk ni lovin football tournament an huoihawt bawk. Kum 2015-a Hmar Inpui, Barak Valley Region huoihawt, Hmarkhawliena Martyrs’ Day inserna prokrama ka thang ve thei kha chu vangnei kan ti hlea, ka lawm hle. Vawisûna ei agenda dang pakhatah, “Hmar hnam nunphung (culture) vawngzingna le suk hmasâwnna dingin Sikpui Ruoi hi December 5 a ni kher naw khawmin December chawhma tieng Hmar khuo tin annaw khawma Regional Headquarters a hai bêk inser/hmang a ni theina dingin Hmar Inpui (Headquarters le Regional Headquarters) haiin hma la raw se” ti bâka, “Inkhêlna (Games & Sports) tienga Hmar thalaihai châwisangna pakhat a ni ve leiin Hmar Martyrs’ Day (May 16) inserna le inzawmin Games & Sports Hmar khuo tin annaw khawmin Regional Headquarters a hai ‘Games & Sports Meet’ huoihawt a ni theina dingin Hmar Inpui-in hma la raw se” ti a um bawk. A pahnina bîk hi HYA GHQ khawma thlawpin, ‘Hmar Martyrs Day hi Hmar hnam pumpuiin inkhuongruoltaka ei hmang thei dân ding le a huoihawtna sin Hmar Inpuiin la raw se’ tiin agenda an hung putlût ve chie bawk a nih. Thutlûkna chu ‘Assembly Palaihai’ kuta um ni raw se.

Hnam hminga ram le hmun neia project lien neiin centre ropui tak tak an indin inzawm ut laiin eini chun a hnam pumpui hmingin ‘ar hmai tiet’ khawm ram ei la nei nawh. Kum 50 lai liemtah a thuoitu hmasahaiin Rengkai Road le Nehru Marg intuokna lai hmun chite an lo min din pêk ei neia; insekhekna’n ei hmang vâng vâng a, ei hmang tangkai le tangkai naw dân chu a hmu le hrietu seng ei nih.

Hmar hnam pumpui ta dinga tangkai a ni beiseiin Hmar Welfare Fund dâwl dingin hma lak tan a nia chu a mumal tak tak thei nawh. Hi Fund hin Hmar Inpui office inrêlbâwlna le Inpui hminga hma lâknaa hmang bâkah Inpui hnuoia Affiliated Body-hai ta dingin ei dawlsuok a’nthawka ‘zaah sawmthum’ (30 percent) siedawk dinga ruohman a nia; chu chun ei hnam sûnga pâwl lienhaiin a hrana pawisa sum zawng rak ngai lovin iemani chena an budget a phuhruk ei beisei a nih. Chu khêlah chun Welfare Fund dinga ei pawisa dâwlsuok a inthawk hin a dâwltu khuoa Village Authority/ HYA/ HWA hai chan ding riruong a ni bawk. Chu pawisa sum a’nthawk bawk chun Hmar a khawphêkin kum khatah vawikhat bêk prokram (Sikpui Ruoi, Annual Meet, Games & Sports, Literary Meet, etc) an huoihawt thei beisei le phût nîng an ta; chuong ang puipunna hun hai chun khawsûnga in unauna le inpumkhatna a suk that pha sawt beisei a nih. Hi project hi term thar a’nthawk chun ra tha ansuo ngei beisei ei tiu.

Hmar Inpui Assembly vawi 8-na palaihai kuoma chona (challenge) ka pêk nuom tak chu Hmar hnam thuoitu a tu el khawma ‘Pan Hmar Feeling’ neia, mâni region/biel le state issue le problem in a mi daidanna hmukhêla Hmar hnam pumpui hmakhuo le hmasuon ngaituo seng hi a nih. Chu chu hnam anga ei damkhawsuokna dinga mâkmaw a nih. State le region tum tumin a mi dâidan a, sawrkâr bupang intawmpui thei tak takna ei nei naw ti ei hriet sa zing hnunga eini le eini insukmuka ei hmadawm le hmathlîr ei inzauh naw chun thang khat dang hnungah HMAR anga ei damkhawsuok hawphur a um tieng a ni tah. University 2 hnuoiah Hmar MIL Graduate level chen ei nei lei ela ei tawng, ei nunphung le niphung hi hring zing ta dinga ei ngaia, ei kam sukdêna, ngaingam muta ei um chun indik naw tawp a tih. Ei Hmar hlasakthiem (artiste) hai le lekha ziektuhai ngîrhmun hi mimal tak khawma ka’n vawi êm êma chu thaw thei ka nei mawl si nawh. Music Album pakhat suolsuok dingin kumpui linglet an buoipuia; hnam lienlem le changkâng lemhai thaw dân an hmu tlat leiin pawisa sum tamtak sêngin professional dang danghai an hang ruoisâwng nâwk a ngai bawk. Sienkhawm, copy sâng khat zawrsuok ding chun an bei fet a ngai a; pirated copy lo siema, lo faru nuom tâwk hlak bo lo. Lekhabu ziek le buotsaituhai ngirhmun khawm a tha chuong der nawh. Anni hai dâm hi a hnam ang zâwnga pawisa sum tlâwmte bêka thangpuina le sawmdâwlna sin Hmar Inpui a’nthawka ei nei thei kâr nghâkhla um ka ti ngawt el.

Pu Speaker, a tâwpna dinga vawisûna palaihai hmabula ka hril nuom chu, hnam thuoituhai hin Hmar hnam pumpui hmakhuo ngaituo sa-in ei lungril le ngaituonahai sukzauh-in hma la thar ei tiu, ti hi a nih. State hrang hrang le Region tum tuma thedar eini hi pawi ei tia chu tu hri hin chu ‘administrative unit’ pakhat hnuoia um nâwk chu beiseina khêltieng rama mi a ni tah. Chuleiin, theitâwp suoin political integration nêkin Cultural & Emotional Integration tieng hi ei hmadawmna tieng a ni a tul a nih. Hmar Inpui hi ‘hnam organization’ pakhat ni lovin Hmar Parliament a ni theina dingin buoipui ei tiu a. Parliament le State Assembly session a um hlakin kum tin Hmar Inpui Assembly nei ei tiu a; a kârlaka state le region tinhai thang ngeiin Executive Council-hai neiin ei hnam pumpui issue ei bawhrawn dinghai ei riruong hlak ding ni raw se. Chuong lai zing chun local issue thenkhat khat khawm ‘private member’s resolution’ angin ei Inpui a hin mimal le region haiin an putlût a chei tlang thei tho ding a nih.   

Hmar mipui lai inunauna le inpumkhatna tha a suok theina dingin ei Pathienin mi vêngin mi kan thar mawl raw se.

Ka lawm ie.  






Don't Miss
© all rights reserved
made with by Simon L Infimate