Responsive Ad Slot

Hmasawnna Thar | 01 December, 2015

Tuesday, December 1, 2015

/ Published by VIRTHLI
Tuolsung
Dec. 1 a inthawk nundan pangngaiin
CCPUR: Zanikhan Joint Action Committee (JAC) Against Anti­-Tribl Bills chun JAC Information Centre, KKL Complex, CCPur­ah Gangte Tribe Council, Hmar Inpui, Kuki Inpi/CCPur, Mate Tribe Council, Mizo People Convention, Simte Tribe Council, Tidim Chin Union, United Zou Organisation le Vaiphei Peoples Council han CCPur khawpui sunga nundan pangngai a um nawk theina dinga hma la dinga an ngenna chungthu hriltlang a nih.
            

Hi chungthu hriltlang a ni hnungin JAC chun December 1, 2015 a inthawk chun Schools, Dawr le Govt. offices hai thangin Establishments hai po po a hma ang bawka nundan pangngai taka hawng le kai nawk ta dingin thutlukna an siem. Amiruokchu, District Hospital­a tribal Martyrs hai ruong nghakna lengkhawm fe mek ruok chu Joint Philanthropic Organisation le JAC:Women Wing hai hmalaknain ruong hai vui an ni hma po la sunzawm pei ning a tih tiin JAC thusuok chun a hril.

Blessed Choir Krismas Album
CCPUR: Nov. 30, 2015 zan 7:00 PM khan Blessed Choir chun an Office, Venglai, Rengkai, CCPur (Manipur) –ah Music Video Album Vol­VI “Hlimna Krismas” tlangzarna an nei. Hi Album hi Hmar laia Krismas Hlapawl Album la umsun a hriet le a hmasatak a nih. Album Tlangzarna Rev. S.K. Songate Moderator, I.C.I in a nei. Copy khat ah Rs. 150/­ a zawr ning a ta, Choir han Tuithaphai lai chun invakpuiin an zawr bawk ding thu an hril. Hi Album a hla hai chu Rev. Zothanghrim, (L) Pastor Thangngur le (L) Pu Buonglienkung hai Pathien­in Krismas hla mawi tak tak a pek hai an ni tawl. Album hi ZRS, Lengtonghoih, Rengkai Ice cream dawr, Vakaria, Nehru Marg le Blessed Pharmacy, Saikawt haia hmu thei ning a tih.


Achievement Survey thaw ding
CCPUR: ZEO/CCPur  staff hai chun tuta inthawk sawtnawte hnungah CCPur District­a Govt. Schools 24 haia Class III, Class V le Class VIII student hai lai State Learning Achievement Survey thawng an tih. Class III student 20, Class V student 30 le Class VIII student 40 han December, 2015 thla sungin test nei an tih. State Learning Achievemtn Survey thawna ding CCPur block ah Govt. school 14, Samulamlan block­ah 4, Singngat Block­ah 1, Thanlon block 1, Tipaimukh block­ah 1 le Henglep block­ah 2 ning an tih.

Martyrs ralna
CCPUR: Zanikhan JPO Information Centre, Dist. Hospital­ah Tribal Martyrs hai ralna dingin mi 3 in ralna Rs. 500/­ an pek. Zanita ralna petu hai chu Jesse of V. Munhoih, New Lamka Rs. 100; Chinlianlal of Pearsonmun Rs. 100/­ le Khummuanthang of Pearsonmun Rs. 300/­ hai an nih.

HWA Sielmat in Annual meet le Scientist thar Rose El Rothangmawi lawmpuina hun an hmang
SIELMAT/CCPUR:  November 30, 2015, 6PM khan Hmar Women Association (HWA), Sielmat chun HYA Hall, Sielmat­ah Annual Day le UPSC hnuoia Scientist tling thar Nk. Rose El Rothangmawi d/o Lalkhawmawi Khawzawl, Sielmat lawmpuina hun an hmang.
            
Nk. Rose El hi Union Public Service Commission (UPSC) huoihawtna hnuoia Group ‘A’ posts Geologists, Geophysicist le Geological Survey of India hnuoia Chemist le Jr. Hydrogeologists (Scientist B), Group ‘A’ lakna dinga Combined Geo­Scientist and Geologist Examination­2014 a kha hlawtlingna chang niin All India (Geologist Group A) mi 150 lak hai lai a 11­nain a thang phak a nih.Training ding hin December 9, 2015 khin Hyderabad pan a tih
            
Nk. Rose El chun, hiengang chawimawina hun siem pektu Sielmat HWA chunga lawmthu a hril a, inchuklai hai sukphurtu le keithuoitu ni pei dingin HWA sielmat ditsakna an hlan. Pathien thangpuina leia hiengang hlawtlingna chang thei a ni thu hrilin; thaw thei la nei hri naw sien khawm sin a zawm hnungah khawtlang le a bikin HWA ta dinga kut rawl theina a nei chun theinghil lo dingin a ngen a; Student sin zawng mek hai khawm amaa inthawk thil hriet le indawn nuom nei han inphalam lo taka indawn zing thei a ni thu le, iengtiklai khawm a thei ang anga thangpui dinga an pei zing thu a hril.
            
Chun, a lo seilienna Sielmat Chr. Hr. Sec. Principal hlui Rohminglien Pakhuongte le Principal ni lai mek Isaac Pakhuongte; teaching le non­teaching staff hai; Pathien thu le hlaa lampui indik kawk hmutu kohran, thalai le tawngtainaa lo santu hai le thangpuituhai popo chunga lawmthu a hril.

Rukru han In an rawk
CCPUR: Zani hmasa zan khan Down Town Valley, Tuibuong a Mr Lunkam Haokip s/o Letsat chengna in rukru han an rawk a, Set­top Box 1 le Woofer speaker 1 an inrukhmang. Tuta hma khawm khan Hi ina inthawk hin Syntex 300 litres 1, Laptop 1, Samsung Mobile phone 1 le sum iemanizat inruk a lo ni tah.

Bungheia tawngtaina
CCPUR:  Halleluyah Prayer Band chun December 3, 2015, 8:00AM a inthawk khin Molnom Christian Church ah Bungheia tawngtairuolna le Revival programme hmang an tih. Hun khatna 8AM­11:30 sung hmang ning a ta, hun hnina chu 12:00­2:00PM inkar sung hmang ning a tih.

MHJU Press Club Chowkidar quarter hawng
CCPUR:  Zani zingkar 8:00AM khan MHJU Press Club, Chowkidar quarter Ribbon cutting neiin Mr Lalhmingliana Torell, Former Editor, Sikni­Eng in hawngna a nei a, Pastor Kamchinmang, EBCC, Hiangtam Lamka in Pathien kuoma tawngtainain Chowkidar quarter hi an hlan.
            

Press Club Chowkidar quarter hawng na huna chanchinbumi hai chu ram hmasawn western country­a journalist hai anga thudik tan a, thiltha hai phosuok dingin an fui.
            
Bieltu MDC Thangkhosuanmung Guite chun, Press Club enkawlna kawnga a tul anga thangpuina a pek ding thu le a tlanse naw ding thu a hril a, Press Club district in nei theia ei um hi ei hamtha hle a nih tiin a hril a.Tuta ei buoina Anti­Tribal Bills thuah press/Media hai an pawimaw zie, a bikin social networking site haia thuthang dang dang (rumours) inleng vel hai sukchiengna (proof/confirmation) thawtu khawm an ni thu a hril bawk. 
            
MHJU General Secretary, S. Nengkhanlun chun, August 31, 2015 a inthawk ei rama buoina leia Chowkidar quarter hi a hun taka hawng thei lova um a ni thu hrilin ei ram buoina leia lusuntu sungkuo hai MHJU in a sunpuinain kum tina September 7 zata hmang hlak MHJU Anniversary programme khawm tukum 2015 chu kansel a ni thu a hril. Chowkidar quarter hawng a ni ta le inzawmin social, students le Philanthropic Organisations han MHJU Press Club inzaum taka a fe pei theina dinga thlawp dingin a ngen.
            
Chowkidar quarter hawngna prog. hi Timothy Z. Zote, Editor Manmasi in a keihruoi a, Th. Thangzalian, Editor, Lamka Post in lawmlutna thucha hrilin L. Chinkhanlian, Editor, Manipur Express in vote of thanks a hril.

KNO le UPF in thusuok :Pawl thar indin an do tlat ding
CCPUR: Mr Calvin H, Convenor, KNO/UPF le T.S. Haokip, Co­-Convenor, KNO/UPF chun zani hmasa khan joint press release an siema, KNO le UPF chu mipui ta dinga political thiltum hmuna dinga committee an ni thu; peaceful political process tan a ni theina dinga sawrkar le SoO ziek an ni thu; Anti­Tribal Bills thuah dodalna leia tribal martyrs 9 zetin hringna an inhlan na chu inzaum an ti thu, an maksan an sung le kuo hai an sunpui thu an puong. Bills 3 hai leia Tribal hai ta dinga hun tha ropui takel a hung inhawng hi KNO le UPF khawma hmang tangkaiin  thiltum thuhmun nei ding le ‘State status’ neka inhnuoi lo ngen dingin thutlukna an siem thu;  Joint Delegation New Delhi­a tirin Nov. 25, 2015 nia ‘common political road map siem a ni thu; Bills pathum hai le inzawma JAC indina um, Inpui hai, Church leaders, JPO, khawpui tum tuma indin pawl Manipur Tribal Forum hai an thlawp pei ding thu; Ei inthuruolna suksiet zawng  ni lova ei thil tum buoipui lem dingin ngenna siemin thurawn tha hai an lawmlut zing thu an hril. Hieng laizing hin buoina siem tum mi thenkhat hmalak dan an ditnaw thu puongin, an rang thei anga tawpsan dingin an ngen a, suonlam siema pawl thar indin hrim hrim KNO le UPF in an do tlat ding thu an zieklang bawk.

France khawpuiah ‘World Conference on Climate Change’ tan a nih; PM in pavilion a hawng
PARIS: Zanikhan France khawpui  Paris­ah ‘ World Conference on Climate Changes’ tan a nih. Hi inkhawm hi ‘Conference of Party CUP21’tia inbuk a ni bawk. Conference a hin khawvel rambung tum tum 150 haia Presidents, Prime Minister bakah ram thuoitu hai an thang. Conference thupui le thiltum tak chu  khawvela boruok sik le sa nasa taka an thlak danglam hrat (climate change) le inzawma boruok suksetu tak ‘green house gas emmission’ suksuok tlawm a ni theina dinga hmalak dan ngaituo tlang a nih.
           
 Hi Conference­a hin Prime Minister Narendra Modi khawm thangin zanikhan India ramin khawvela boruok sik le sa nasa taka an thlakdanglam hrat dona kawnga a hmalak dan, thing le ruo, ramsa le thilhring hai le mipui inrem taka an khawsak dan suklangna Pavilion a hawng . PM Narendra Modi in thu a hrilnaa chun, Climate Change hi khawvel lumna zuol pei in a hung intlun, khawvel pumpui ta dinga chona a ni thu, dang a ni theina dinga inrang taka hma lak a tul thu; ram hmasawn/changkang (developed countries) han carbon emission inrang taka sukhnuoi a ni theina dinga  insiemrema hma an lak nasat zuol a tul thu, Climate Change leia India ram khawmin a bik takin loneitu han harsatna nasa tak an tuok dan hai a hrillang. PM hin zani hmasaa zana radio­a Mann Ki Baat programmea thu a hrilnaah khawvel boruok hung lum zuol pei dona dinga pawimaw tak chu energy khawlkhawm a nih tiin a hril.

Manipur Sangai Festival a tawp tah
IMPHAL: November 21, 2015 a inthawka ta Manipur Sangai Festival tana um chu zanikhan zo a ni tah. Sangai Festival kharna JN Manipur Dance Academy­ah hmang a nih. Sangai festival hmangna hmunpui tak lutna dingin zanikhan tickets 70000 chuong zawr a ni a, sienkhawm organising Committee hai thurawn angin mi 30000 chau inluttir an nih.

Magisterial Enquiry thaw dingin
IMPHAL: January 19, 2009 a Manipur Police Commandos le 21­Assam Rifles thangruol han Wabagai Leirak achouba, Thoubal district­a  Kh. Thoiba Singh @ Karung (44) s/o (L) Sanahongba of Kakching Khunou Umathel, an kap hlumna le inzawmin Manipur sawrkar chun magisterial enquiry thaw dingin order an suo.

Sharmila Court hmaah inlangtir nawk
IMPHAL:  Manipur­a inthawk AFSPA hlip dinga ngennaa bungheia nuorna kum 15 chuong zet nei tah Irom Chanu Sharmila chu zani zantieng 1:50PM khan dan pangngai angin Chief Judicial Magistrate, Imphal West A. Nouteneshori hmah inlangtir nawk a ni a, December 19, 2015 in hearing nei nawk dinga rel a nih. Hi hma po chu judicial custody­a la um nawk dinga ti a ni bawk.

Hmun hran hranah bomb 2 hmu
IMPHAL: Zani zingkar 7:45AM vel khan Imphal East District sunga Tumukhong Moirangpurel lai 39­BSF han bomb an hmu a, zani sun dar 12:20 vel khan Manipur Police­a bomb expert han puok thei lo dingin an suksiet. Chun, zani ma 6:00AM vel khan Koirengei, CMC Hospital bul hnai laia Ms Atim (46) w/o Akhom of Koirengei chengna in bul lai bomb pakhat hmu a ni bawk.

Nurses recruitment test a thang han protest
IMPHAL: August 1, 2013 nia Health Department hnuoia ANM/GNM lakna dinga recruitment test neia um le inzawma indin All Manipur ANM/GNM appeared Candidate pawl chun zani 11AM khan Medical Directorate Office tuolah protest neiin Director kuomah an result puong dinga ngenna Memorandum pek an tum a, protest hi zantieng 3 PM chen khan an nei a, sienkhawm Director hi zantieng dar 3 chen khan office a hin a fe nawh. Association hi kum 2014 a indin ta a ni a, tuta hma khawmin Manipur CM, Dy. CM le Medical Director hai kuoma khawm thawk hni lai zet memorandum an lo pek ta a nih.
            
GNM/ANM lakna dinga recruitment exam­a khan candidates 6,000 vel chun fees Rs. 600/­ pei pein written exam­a khan an thang a, sienkhawm tuchen hin result puong a la ninaw a nih.

In kangah mi 3 a kang hlum
AIZAWL: Zani hmasa zan khan Mizoram­a Champhai hmuna In pakhata inthawk kangmei a suok a, sungkhata mi pathum a kang hlum. Kangmei suokin a kang hlum hai chu Gongaihhluni (65) le a tu hai Alex Ngozasuana (5) le Cindy Lalmuanzovi (2) hai an nih. Kangmei hi zani zing dar 1:20 vel kha niin Police chun an hril a, hi kangmei suok le inzawm hin ringhla mi pakhat Police han an man.

Youth Congress in protest an nei
NEW DELHI:  Youth Congress chun zanikhan New Delhi­a Jantar Mantar hmuna India rama intolerance (sakhuo thila inngaitheinawna) pung pei dodalnain protest an nei. Hi huna hin Mahila Congress President Shobha Ojha le Youth Congress President (Uttarakhand le Himachal Pradesh) hai khawm thangin thuhrilna hun an hmang.

Lok Sabha inthung sunzawm Intolerance thuah debate
NEW DELHI:  Parliament Winter Session inthung chu zanikhan sunzawm nawk a ni a, Lok Sabha a chun ‘intolerance’ (midang/sakhuo dang ngaitheinawna) chungchang hriltlangna nei a ni a, inselna rihau siet leiin vawi iemanizat sukchawl pha a nih. CPI(M) Member Mohammad Salim chun Home Minister Rajnath Singh in Prime Minister  Narendra Modi chu kum tam tak liemtaa sawrkar thlungpuia Hindu sawrkarna thuoitu hmasa tak a nih tia a hril magazine­a insuo a nih tia a hrilna thuah Home minister chun, chuongang thil a hril naw thu hrilin a hniel a, Mr Salim in an tumna chu a tuorna hle thu hrilin Inpuiah ngaidam inhni dingin a ngen. Minister of State for Parliamentary Affairs Rajiv Pratap Rudy chun, Home Minister chunga in intumna a siem hi an dik ngei ti finfie a ni hma chu la hnukkir dingin a ti a, sienkhawm  Mr Salim hin Home Minister thuhril inziekna magazine Lok Sabha­ah a phawrdawk leia rihau nasa tak a siem leiin Lok Sabha inthung hi iemanichen sukchawl pha a ni bawk.
             
Lok Sabha Speaker Sumitra Mahajan chun zanikhan MP hai ta dinga health check­up thawna ding Parliament campus sungah helth check up camp a hawng a, MP hai chu hi hmuna health check up va thaw hlak dingin a ngen. 

Mizoram in Zu a inthawk tax Rs. 19.44 crore
AIZAWL: Mizoram sawrkar chun Mizoram Liquor Prohibition & Control (MPLC) Act, 2014 a hmang hnungin January 16, 2015 a inthawk tuchena hin Zu a inthawk tax (sie) Rs. 19.44 crores a hmu tah. MLPC Act hnuoia hin mi 56,631 hai kuoma Zu zawr phalna permit pek an ni ta a, Mizoram districts 5 haia chun retail wine shop 22 a um ta bawk. Chun, permit peknaa inthawk Mizoram sawrkar chun revenue Rs. 24.82 crore a hmu ta bawk niin ei thu dawngna chun a hril. Chun MLPC Act bawsetu mi 1,495 hai case siem khum le permit hmangsuol mi 507 man an ni ta bawk. MLPC Act hmang a ni hnung hin Zu thalo dawntu an tlawm pha hle a hril a ni bawk.

Suu Kyi le Myanmar top leader han inbiekna
YANGON: Myanmar General Election November 8, 2015 nia nei huna National League for Democracy (NLD) in seats 80 percent deuthaw laa hrat filawrna an chang le inzawmin NLD hotu Aung San Suu Kyi le Myanmar sipai sawrkar thuoitu hai chun tuta kar sung hin inbiekna an nei ding niin zanita official thusuok chun a hril. Myanmar sawrkar thar hi January 2016 hnungtienga siem hman beisei a ni a, President thar ding chun March thla velah oath taking a nei hman beisei a nih. Thuneina inpeksawngna ding chungchanga hin Suu Kyi chun tha taka inpeksawng a ni theina dingin President ni lai mek Thein Sein le army Chief General Min Aung Hlaing hai chu national reconciliation discussion neipui dingin a ngen a, a ngenna hi  pawmpek a ni ta a. Hi le inzawm hin Dec. 2, 2015 khin President chun Suu Kyi an hmupui ding niin presidential spokesperson Zaw Htay chun a hril bakah Army Chief  chun Dec. 2, 2015, 2PM khin Naypyidaw hmuna Suu Kyi hi an hmupui bawk ding nia hril a nih.

VAWISUN THUPUI
Chuleiin, in lungril dier keiin, ngaiven unla, Isu Krista inlar pha chun lunginsietna a hung chawipek ding cheu chu beidawng loin beisei tlat ro.  1 Peter 1:13

Editorial
Bawlhlo ei thlak suol deu mani

Hme inhnik tak suong ding chun a maru­marang a hun taka thlak, fimkhur taka enkai zing a tul hlak.  Vawksa, Bawngsa, Uisa le sa dang dang hai khawm hi hme inhnik tak a ni theina ding chun a maru­marang thlak hmasak ding le a nuhnung ding a um vawng a. A ni ding ang taka ei thlak phawt chun hme inhnik tak a ni hlak a, thlak fuknaw ruok chun hme tlak lo an chang hlak.
           
Manipur Assembly in August 31, 2015 nia Anti Tribal Bills 3 a passed hai leiin Manipur­a tlangmi hai po po thawk –le­khata inthuruolin hma ei lak tlang a, inthuruol tak le lungruol taka kal pentlang dinga ei inring laiin a maru­marang ei thlak suol deu lei amani ding tuhin Martyrs hai ruong vui nuom pawl le la vui nuom lo pawl ei um leiin JAC inrawina hnuoia Inpui, Philanthropic Organisations le Kohran thuoitu han November 30, 2015 a Martyrs hai ruong vui dinga thutlukna an lo siem ta khawm sut um chuong lovin Martyrs hai ruong ropui taka vui dinga programme induong ta chu hmang lovin totawkin zâni khan a lo liempui tah.
            
Mihriem  seng seng le  in sungkhata ngei khawm nundan inang lo tak tak ei um hlak a; thenkhat thil phal tak, then tikse tak ei ni a; mi zaidam tak tak ei um ang bawkin mi thinse tak tak ei um bawk; Thenkhat tawng rawn tak ei ni laiin thenkhat chu tawng tlawm em em ei ni thung. Hieng mizie le nunchang inang lo tak tak hai hin  pawimaw le tul hun an nei chit­a; a hun taka hmang thiem chun an nina chitah an tha vawng. Zaidaw tul hun a um ang bawkin thinse taka  chet  tul hun a um a; tawng tlawm a tul hun a um ang bawkin tawng rawn tul hun khawm a um. Zohnathlak hai hi unau sulkhat suok ni inla khawm tawng dang dang hmang le khawsak dan nunphung khawm inanglo hret hret vawng ei ni leiin ngaidan le ditdan khawm inpersan hret hret chang chu um lo thei lo ding a nih. Sienkhawm, a hun le hmun izira ei inpawm thiemnaw chun ‘Unity’ ei hril hin sawt dai ngainaw nih.
            
Inthuruol thei ngai der lo hai Anti­Tribal Bills pathum hai leia thawk­le­khata inthuruol taka ei hang um phut kha thil mak takel chu a nih. Amiruokchu, Inthuruolna ra hlimum le inhnik tak kiltlang dinga ei inbeisei lai zingin thli thalo dang dang hung hrangin, thiltha dit seng, ei himna ding dita hmalatu seng seng hai khan a maru­marang/bawlhlo inbuk tawka ei thlak thiemnaw lei am, annawleh ei thlak suol deu lei mani ding ei hmepawk suong a fuknaw tan tlat el ruok hi chu a pawi takzet.
            
Hme an hnik theina dinga a bawlhlo/maru­marang infuk taka chawkpawl thiem a tul ang hin thil tinrengah, inbuk tawka ei hriet chin­a lungawi dan ei inchuk naw a ni chun tlangmi  hai lai hin inthuruolna (Unity) ei ti hi um tak tak thei ngainaw nih. Mother Teresa chun ‘Unau ei nih ti ei theinghil chun inremna hi a um thei nawh’ a lo ti a, inrem mumal thei lova ei um hlak nasan hi unau ei nina sukhring tum neka, thlierkar lungril puta ‘nangni­keini’ tia inenhranna bansan thei lova ei um tlat lei ni takin an lang. Sungkuoa inpumkhatna a um theina dingin lungril tienga inpumkhat hmasak a tul ang bawkin, inthuruolna indik tak le inpumkhatna tak tak a um theina ding chun a thu le tawngkam chau ni lova lungril tiengpanga ei inpumkhat hmasak phawt a tul a nih.
            
Zohnathlak hnam hran hran han ei ngaituo dinga pawimaw chu ‘inthuruol taka kal pen tlanga  ei renga damkhawsuok am ei thlang ding, mani hma chit siela boral seng” ti hi a nih. Thlierkar lungril puta mani hnam bing annawleh mani mimal hma chau siela kal ei pen seng a ni chun tukhawm a dam khawsuok ding ei um nawh. Ei tawpna chu boralna la hung ni ngei a tih. Chu hun a tlung nawna dingin hnam tin hin ei ngirhmun le nina chit hriein, hme inhnik tak suong dinga a bawlhlo a hunbi le hun chita thlak le chawkpawl a tul ang hin mani ngaidan le ditdan chau fepui ngur ngur tum lova ei inchawkpawl thiem a ngai. Chuonga ei um theinaw a ni chun ei ri hi mi ri ei la sawn hun la tlung ngei a tih. Mi var chun a ngaidan annawleh a ngirna a tul dan izirin a thlakthleng thei a, mi invet ruok chun a thlakthleng thei ngai nawh. Thiem le var ei inti tawl ta bawk a, a tul dan izirin mi invet uma um lovin, mi var uma um tum seng ei tiu.


Don't Miss
© all rights reserved
made with by Simon L Infimate