Tuolsung
HI inawinain Dr Rochunga Pudaite sunna hun an hmang
CCPur: Hmar Inpui (HI) General Headquarters inrawinain October 12, 2015 khan HSA Campus, Rengkaiah HYA GHQ; HSA Tuithaphai Jt. Hqrts le HWA chun special meeting neiin October 10, 2015, 2:30 vela Chatuon ram lo inlawi tah Rev. Dr Rochunga Pudaite sunna hunser an hmang. Hmar Inpui President, Dr John Pulamte chun, Dr Pudaite in chatuonram a mi lo inlawisanna hi hnam ta dinga channa nasa tak a ni thu hrilin a sunnain minute 2 sung totawka hun hmang a ni bakah Rev. Ruolhlei Pakhuongte, HI member le HYA GHQ adviser chun lusun sungkuo hai ta dinga tawngtaipekna neiin silent prayer hi a khar.
Hi baka hin special meeting chun Pu Rochunga Pudaite ruong hi Inpui, HYA GHQ, HWA le HSA haiin Thangsuo puonin special taka tuom ni raw seh tiin an rel a, Pu Rochung ruong a hungtlung pha ni 2 bek zantieng bandh hi relax dinga thuneitu hai kuoma ngenna (request) siem ding tiin an rel bawk.
Hienghai baka hin Hmar Inpui GHQ in zanita thupuong a siema chun Dr Pudaite hi ‘Hmar Pasaltha Thangsuo’ indik taka puongin, a thi sunnain a ruong vuiliem a ni hmakhat chu tukhawma hlimhlawp thil, hnam le khawtlang huopa huoihawt lo dingin an ngen.
JPO kutah ralna sum Rs. 34,000/ a lut
CCPur: Zanikhan District Hospitala JPO donation centreah mimal le organisations 9 han Tribal martyrs hai ralna dingin Rs. 34,000/ bakah Maibal pum 7 le puon 27 an pek. Zanita JPO kuta ralna petuhai chu Chinkhohoih of Bangpimual Maibal pum 7, Theiyang Village, Sadar Hills Puon 9; Parbung mipui Puon 9; Presbyterian Women Fellowship, V. Munhoih, New Lamka Rs. 3000/; Ruth Prayer Hall Hmeithai Pawl, T. Khupluai Veng, Hiangtam Lamka Rs. 2,000/; Tipaimukh Area Village Authority puon 9; Rev. T. Kampu & Hoiphal, Asia Antioch Seminary, Guwahati Rs. 9,000/; EBC Vangai Division Rs. 10,000/ le Hmar Christian Fellowship, Bengalore Rs. 10,000/ a nih.
HYA GHQ in an sun thu an puong
CCPur: Hmar Youth Association (HYA) GHQ chun October 10, 2015 nia Colorado Springs, US a fam lo chang tah Rev. Dr. Rochunga Pudaite an sun thu le lusun sungkuo hai an tuorpui thu an puong a, khawvel huopa chanchintha puongdarna, rethei le fahra hai sawmdawlna le dawmkangna dam, thiemna le varna inchukna le damnawhai ta dinga damna intluntu a ni a, sawrkar mi hriet ei ni ve theina dinga tlangmi le a chipui hai laia a rawngbawlna thangthar chenin hril la ni pei raw seh tiin sunna thupuong ah an ziek.
Dist. Hospitala OST centre rawk
CCPur: October 4&5, 2015 inkar zan khan tu ti hrietlo rukru han District Hospital/CCPura OST Centre an rawk a, a chabi suksein Steel Almirah sunga damdawi Bupremorphine 20Mg tablets 5396 le Computer UPS pakhat an inrukhmang niin OST Centrea inthawk ei thu dawngna chun a hril. Thil inrukhmanga um hi bazar rate a chun Rs. 13,49,000/ manhu vel nia hril a ni a, Police a khawm report pek a nitah.
AIFF U17 Preliminary Trial a dingin mi 9
CCPur: October 1416, 2015, 8:00AM sungin Turf Ground, Khuman Lampak, Imphalah All Manipur Football Association (AMFA) chun AIFF U17 World Cup Academy preliminary trialcumselection buotsai a tih. Hi taka thang dinga CCPur districta inthawka thlangsuok players 9 hai chun October 13, 2015, 7:30AM khin CDSA Officea in report seng dingin CDSA chun an hriettir. Players thlangsuok hai chu; DefendersJackson, Peter Khumrolien, Lunkhosem Haokip; Midfielders Thuambiaklal, Jangminln, Tongminsei Kipgen; Forward/strikers Thangkholal Haokip, Khaiminthang le Lalsiem hai an nih.
Awareness on W.A.S.H nei
CCPur: October 10 le 11, 2015 hai khan FNS/ICDP(CCPur) Development Department, Reformed Presbyterian church (DDRPC) NEI chun Joljam le L. Molvom haiah tulai natna hrileng laka inveng dan ding thuah Awareness Campaign on Water, Sanitation & Health (WASH) a buotsai. Invawngfai dan ding, tui hmang dan, khawsunga nulla hai fai taka enkawl a pawimaw dan; a bikin Malaria le Dengue natna laka himna dinga Thokang laka inveng a pawimawna uor takin mipui hai hrilhrietna nei a ni.
Awareness nei hun haia hin District Health Society a inthawk nurses Hohoih & Polly, Social Activist Mr. Haopu Gangte MSW le Mr. S. Muana FNS/DDRPC NEI han thuhrilna an nei.
JAC kutah Rs. 77,600/
CCPur: JAC hnuoia Finance SubCommittee kutah zanikhan Tribal martyrs hai ralna dinga in tina Rs. 100/ le a chungtieng dawla um Rs. 77,700/ a lut belsa nawk. Zanita Finance SubCommittee kuta pawisa pelut tu hai chu HYA Imphal Jt. HQ. Rs. 29,200/; Singngat Blocka Hiangtam (V&B) Rs. 1,600 le Tipaimukh Blocka inthawk Parbung in Rs. 46,800/ a nih.
DYSO football coach Pu Lalkham a thi
CCPur: District Youth Affairs & Sports (DYASO) NIS football coach ni lai mek Pu Vanlalkham Joute @ Lalkham (50) h/o Lalfamkim of Saikawt chu Oct. 11, 2015, 1:00PM khan Hepatitis C natna leiin chatuon ram a lo inlawi tah. A ruong hi zanikhan vuiliem a nih. Pu Lalkham hi CCPura Hmar hnam ta dinga sports tieng thaw hlawk takel a ni a, kum 1982 khan All India School Games, Maharashtraah champion teama thangin Gold Medal khawm lo awr ta a nih. Hriselna tha raknaw sienkhawm Subroto International Under 14 New Delhiah inkhel ding naupang hai a zu fepui zo a hungkir tieng damnawna leiin enkawl nghal a ni a, sienkhawm that tieng pan thei ta lovin a chatuon ram a lo inlawi ta a nih.
CMO rawiin RBSK thuah meeting nei
CCPur: Zani 10:30AM khan CMO Conference Hall, District Hospital, CCPurah Dr Thangchinkhup Guite, CMO/District Mission Director,District Health Society/CCPur inrawinain Rashtriya Bal Swasthya Karyakaram (RBSK) thuah meeting nei a nih. Hi huna hin CMO bakah Seiboi Mate, District. Data Manager; Dr Robinson han RBSK hnuoia Ayush Doctors, Pharmacist le Nurses han Aganwadi Centre le School hai visit ding thu, micro plan le hmatienga hmalak pei dan ding hai an hriltlang. Hi meetinga hin DHS CCPur hnuoia Blocks 6, CCPur, Thanlon, Samulamlan, Singngat, Henglep le Tipaimukh haia inthawk Ayush Doctor 2 seng, Pharmacist 1 seng le Nurse 1 seng an thang bawk.
Headline
Bihar First Phase Electionah votes 57% a tla
NDA an hrat chun Dr Prem Kumar CM ning a tih: Hussain
Patna: Bihar Assembly seats 243 um haia inthlangna phase 5a nei dinga phase 1na chu venghimna khautak hnuoiah zanikhan Assembly Constituencies 49 haia vote thlakna nei a ni a, votes 57 percent a tla niin Election Commission report chun a hril. Kum 2010 Assembly eletiona khan votes 50.85% a tla. Zanita election neinaa hin Naxalites hai hratna constituencies 13 a thang a, election a tlangpuiin a muongum tiin Dy. Election Commissioner Umesh Sinha chun a hril.
Hieng laizing hin zanita First phase election nei a ni le inruol hin BJP star campaigner Shanawaj Hussain chun BJP inrawinaa NDA in Bihara sawrkar siem thei khawpa hratna an hung chang a ni chun Gaya hmuna an party senior MLA Dr Prem Kumar chu Bihar Chief Minister a ni ding thu zanikhan a puong. Hi thu hi zanita Gaya hmuna BJP ta dinga campaign a nei huna Mr Hussain in a puong a nih. Mr Hussain hi senior leader le Union Minister hlui a ni a, Gaya mipui hai chu NDA in hratna an chang chun an MLA Prem Kumar chu Chief Minister a ni ding thu hrilin voters hai chu ama hi vote seng dingin a ngen.
BJP hin Chief Ministerial candidate ding puonglawk lovin tuta hma po khan chu PM Narendra Modi development programme thangsana campaign nei a ni a. Jharkhand, Haryana le Maharashtra Assembly election haia khawm khan BJP chun hratna an lo chang a, sienkhawm Chief Minister ding result hriet hnungah an puong chau a nih. CM candidate an puong hin NDA le Nitish Kumar inrawi Grand Alliance chu an inbeitawk hle ding ti an lang tiin report chun a hril.
Seats 49 a inthlangnaa hin Grand Alliancea JD(U) seats 24, RJD seat 17 le Congress 8 ah an ngir a, BJP seat 27, LJP seat 13 ah an ngir a nih. Rajya Sabhaah minority an ni leiin Centrea BJP sawrkar chu Parliamentah duthusamin a hrat theinaw a. Bihar Election result hin kum thara Assembly Election nei ding West Bengal, Kerala, Assam le Tamil Naduah kakhawk nei a ngei ngei dinga ngai a ni leiin Bihar Assembly election hi BJP ta dinga a pawimaw a nih.
CM in Thoubalah ITI building thar a hawng
Imphal: Manipur CM O.Ibobi Singh chun zanikhan Thoubal districta Lilong Mairenkhul villageah Industrial Training Institute (ITI) building a hawng. Hi huna hin Labour & Employment and PHED minister I. Hemochandra le Md. Abdul Nasir, Minister, Agri & Fisheries hai khawm an thang. ITI building bawlna dinga lungphumna hi kum 7/8 vel liemtaa kha Union Minister le Minorities Affairs incharge Md. Salman Khursid in a lo nei ta a nih.
Manipur CM in hi huna thu a hrilnaa chun field tum tuma inchukna insang lem sunzawm thei lo hai ta dinga lampui siem pek chu sawrkar mawphurna a nih tiin a hril. Building quality le enkawl danah a lungawitawk naw thu a hril a, hi ITI facility hmasawn thei lova a um hnunga state sawrkarin Public Private Partnership (PPP) model hnuoia tukum March thlaa inthawka kha HASK Skill Development Centre Pvt. Ltd. (HSDC) kuta a pekdawk a ni thu a hril. HSDC hi Singapore based HASK group companies hmalakna niin a neitu chu niin a neitu chu K. Herojit a nih.
Hi group thiltum chu harsatna leia lekha inchuk zawm thei ta lova class VIII annawleh X zova inchukna chawlsan thalai hai skill training pek a nih. Sienkhawm pawimaw le tul dan izirin qualification hi a danglam thei. Hi centre hi South East Asia Singapore, Malaysia, Indonesia le Middle east countries haia Oil and Gas industrya sin petu a ni ding a nih.
HSDC chun state sunga ITI dang dang haia khawm khawvel hmun tum tuma thalai han sin an zawn theina dingin hi hmuna skill training model ang hi thaw pei a tum a nih.
Assam Rifles han NRFM cadre 2 an man
Imphal: October 11, 2015 khan 45Assam Rifles han Pangei hmuna motor inlawn hai an dapnaah NRFM cadre pahni Ninthoujam Jibam Meitei @ Punshiba (40) s/o N. Garani Meitei of Laphupat Tera Ningolkhong Mapal, Thoubal district le Houbijam Ibomcha @ Angou (31) s/o H. Heramani Singh of Lamsang Khunou, Imphal West hai an man. An kuta inthawk Criminal Investigation Department (Special Branch), Govt. of Manipur Identity Card; KCP (MC) pass out card 8; NRFM demand notes 10 le Activa MN01U/ 3136 an man a, Heingang Police station kutah an peklut niin zanita Assam Rifles thusuok chun a hril.
Rukru han UCO Bank an rawk
Imphal: Rukru han zani zingkar inhma tak khan Mantripukhria UCO bank an rawk a, Computer set le CCTV recorder inbuka um hai an inrukhmang a. Table, chair le thil dang dang hai khawm suksiet a nih. Police chun hi thil hi zani zingkar inhma taka kha tlung ni dinga an ring thu an hril.
BJP in Loktak scam a inrawl hai man dingin
Imphal: BJP Manipur chun Rs. 224 crore Loktak Lake scama inrawlna neituhai an rang thei an rang thei anga man dingin hi scam suizuituhai an ngen. BJP spokesman M. Hemanta Singh chun, Loktak Lake hi CM O.Ibobi inrawinaa Congress sawrkar chun sum hmuna hmunin a hmang a nih tiin an tum. Loktak Lake sukfaina dinga hin Planning Commission chun SPA in Rs. 224 crore a hung sanction niin a hril.
RIMS a staff Nurse Admit Card
Imphal: RIMS Imphal hnuoia Staff Nurses lakna dinga Admit Card siemzo a ni ta a. Application petu hai chun October 1217, 2015 inkar sungin Admit Card hi ngaiven le lak thei ning a tih tiin ei thu dawngna chun a hril.
Sharmila in enkawl a ni danah a lawm nawh
Imphal: Manipura inthawk AFSPA lakdawk dinga ngenaa kum tam takel bungheia nuorna lo nei tah Irom Chanu Sharmila chun tu lai h naia Delhi Metropolitan Court hmaa inlang dinga Delhi an zin huna enkawl a ni danah a lungawinaw thu zanita Imphal West CJM hmaa inlangtir a ni huna reporter hai kuoma a hril. Ms. Sharmila chun official hai thuoi ding nghakin Delhi Airportah darkar 3 lai zet a nghak niin a hril.
AIOCD in Oct. 14 ah Nationwide bandh
New Delhi/Dimapur: All India Organization of Chemist and Druggist (AIOCD) chun October 14, 2015 (6 a.m. to 6 p.m.) inkar sung khin India ram pumpui huopin bandh thaw an tum. AIOCD bandh hi Nagaland Medicine Dealers Association (NMDA) khawmin an thlawp ding thu an puong. Sawrkar thlungpuiin emarketing/online sales thaw a tum chu medical ethos le drugs controlling norms kal a nih tia a dodalnaa bandh hi thaw an tum a nih.
DHD(J) Chairman hlui Garlosa man
Guwahati: Tulai hnai ela Bharatiya Janata Party (BJP) zawm DHD(J) Chairman hlui Jewel Garlosa chu kum 2008a Haflong hmuna tuolthatna case siem khum a nei leiin Police han an man. Mr Garlosa hi NC Hills Autonomous Council member niin party thila Council member dang thenkhat hai le Guwhatia cham mek niin Governor PB Acharya khawm lo inhmupui ta a nih. Mr Garlosa man a nina hi BJP chun an sawisel.
Pawl 8 leMyanmar in NCA an ziek ding
Dimapur: Myanmar rama inremna le muongna a hung um theina dingin October 15, 2015 khin helpawl groups 8 hai le Myanmar sawrkar chun Nationwide Ceasefire Agreement (NCA) an ziek ding niin ei thu dawngna chun a hril. Myanmar Peace Cenre (MPC) a U Hla Maung Shwe chun, NCA hi Nay Pyi Taw a Myanmar International Convention Centre2 a ziek ni dingin a hril. Myanmar sawrkar chun NCA ziek ding hin NSCN(K) thangin helpawl groups 15 a fiel a, sienkhawm pawl 8 chauin NCA hi ziek an nuom niin a hril. Political thil leiin NSCN(K) chu NCA zieknaa hin thang an tum naw a nih. Myanmar sawrkar chun tuta hma khan NSCN (K) hai hi NCA zieknaa an thangnaw chun unlawful group lista inthangtir an ni ding thu an lo inhriettir ta a nih.
Bihar CM in Excise Minister a ban
Patna: Bihar Chief Minister Nitish Kumar chun a Excise minister Awadhesh Prasad Kushwaha chu thamna Rs. 4 lakh a lak lai video thedar a ni le inzawmin minister a ninaa inthawk zani hmasa zan khan a ban. JD(U) national President Sharad Yadav chun Mr Kushwaha inbanna lekha Governor pawmpui dinga thawn ta thu a hril bawk. Mr Kushwah chu East Champaran districta Pipra A/C a JD(U) candidate ni tanaw ni a, ama aiin midang party in ruot an tih tiin a hril bawk.
Hieng laizing hin minister hlui le Bihara RJD principal general secrtary Mudrika Singh Yadav le Madhumpur constituency (Jehanabad district) party candidate Subedar Dass hai chu thamna pawisa an lak laiin man an nih.
Sudheendra a hmaia pentui the
New Delhi: Senior BJP leader L.K. Advani chun Shiv Sena han Sudheendra Kulkarni hmaia pentui an thekhum chu nasa taka a dem thu puongin BJP le an thlawppui hai chu hiengang thila inrawl lo dingin a ngen. Congress khawmin Shiv Sena thilthaw hi a dem hle thu a puong a. Congress party spokesman Tom Vadakkan chun Maharashtra Chief Minister chu hi thil tlung le inzawma Shiv Sena chunga action na tak la dingin a phut. Shiv Sena activist hai chun zani zingkar khan Observer and Research Foundation (ORF Chairman Sudheendra Kulkarni chu Pakistan Foreign minister Khurshid Mahmud Kasuri in Mumbai hmuna lekhabu a tlangzarna programme a buotsai pek tiin a hmaiah pentui an thekhum nia hril a nih.
Dimapurah Dengue invawi 62 hmu
Dimapur: Nagaland state sunga Dimapur khawpui sunga chun September – October 11, 2015 sung khan Dengue invawi (positive) 62 hmu a ni tah. Dengue leia thi ruok chu official recordah a la um nawh. Nuhmei naupai, naupang, kum upa tieng hai bakah natna dang hieng Asthma, diebetes le natna dang dang nei han mi hrisel pangngai hai nekin an kai awlsam lem nia hril a nih. Manipur a chun Dengue positive 17 vel an um ta niin Manipur health officials hai chun an hril.
MQM chief kum 81 jail intang dingin
Islamabad: Pakistana Antiterrorisn Court (ATC) Judge Raja Shahbaz Khan chun, Muttahida Qaumi Movement (MQM) Chief Altaf Hussain chu kum 81 jail intang dingin thiemnaw an changtir bakah fine Rs. 2.4 million chawi dingin a rel. Hussain (64) hi kum 1992 a inthawk tlanhmang le Londona um a nih. Sawrkar dodal zawng le buoina suksuok thei thil hai a hril leia thiemnaw inchangtir a nih. MQM hi Karachi thangsana um Urdu tawng hmang hai political party a nih.
Nobel Prize Economics dawng dingin Angus Deaton
Stockholm: Britistborn Scottist economist Angus Deaton chu Nobel Prize Economics 2015 dawng dinga thlang a nih tiin Royal Swedish Academy of Sciences chun zanikhan a puong. Deaton hi kum 1945a Edingurg hmuna pieng tuta United Statesa Princeton University a thawk lai mek a nih. Award hi December 10, 2015 khin Stockholm le Oslo hmun haiah Nobel Prize dang hai leh a ruola inhlan ning an tih.
---------------------------------------------------------------------------------------------------------
Hmar Inpui
Press Release
REVEREND & DR. ROCHUNGA PUDAITE SUNNA THUPUONG
Tuithaphai: October 12, 2015
Rev. & Dr Rochunga Pudaite (88) President, Bibles for the World in Oct. 10, 2015 chawhnung dar 2:50 (IST)a Colorado Springs, Colorado, USA hmuna a sunglekuo le hnam chanpuihai muol a mi lo liemsan el ta hi Hmar Inpui chun hun a la tinaw a, a’n pamin, lungriltakin a sun hle; a i maksan a nuhmei le nauhai a sunpuiin a tuorpui takzet. Rev. Pudaite hi mi tam tak ta dinga taksa le thlaraua Pa (Father) le rethei le fahrahai “sandamtu’ a tling takzet a; Hnam pasalthain fam a mi lo chang san hi hnamin ro hlutak ei chan a nih.
Tlangmi haiin khawvel var ei hmu chieng zuol theina dingin Rev. & Dr Pudaite hi Pathienin hmangruoa hmangin Chanchintha le inchukna tieng hma lientak an dawmtir a, chu ra chu ei ram le ei hnamin sik tawp ngainawng ei tih. Ei ram, ei hnamin tlawmngaina kengkawa ram ei inzau zawmpei a tulzie a nunin a mi lo inchuktir chu thang thar peihai khawmin nunpui pei ei tiu.
Ei ram, ei hnamin hmasawnna lampui ei hraw ve theina dinga hma a lo kaknahai po po chu lungruoltakin sunzawm pei ei tiu. Ei khawvel hluo an ruol tanaw leiin ei ram ei hnam liengkoa hmabak lientak inbat chu hre zing pumin Dr Pudaite hi innghil ngai nawng ei tiu.
A thina hi Hmar hnam ta ding chau ni lovin hnam hnuoihnung tlangmi, hnam tum tumhai ta ding bakah khawvel hnam tum tum, ama zar zotu taphawt le la hung sawr pei dinghai ta dinga channa ropuitak a nih. Mi tam tak ta dinga malsawmna a lo nina, ramlehnam, mipui ta dinga an pumpeknahai kha nghilni hrim um thei ta ngai naw nih a; ama hi ‘Hmar Pasaltha Thangsuo’ indiktakin Hmar Inpui chun a puong a nih. Ama thi sunnain a ruong vuiliem a ni hmakhat chu tukhawma hlimhlawp thil, hnam le khawtlang huopa huoihawt lo dingin ei in ngen bawk.
Lusun sungkuohai ei Pathien iengkim thawtheiin thlamuongna’n umpui mawl raw se.
Sd/ Dr John Pulamte Sd/ David Buhril
President Secretary
---------------------------------------------------------------------------------------------------------------------
VAWISUN THUPUI
Kei ruok hi chu Aigupta rama inthawk tah a, Lalpa i Pathien chu ka na, Kei ti naw chu Pathien dang i hriet ngai nawh a; Kei naw hi chu sandamtu dang an um nawh. Hosea 12:4
Editorial
Inthlakdanglam ei mamaw
Ram inhawi, ram ralmuong, ram fai, thienghlim le boruok sik le sa inhawina ram hai chu ei inhnar a, um le cheng ve ei chak ngawi ngawi hlak. Tulaia Zohnathlak hai a bik takin thalai ei thlir nghawk lo chu Korea ram le an movie/serial hai an nih ti inla ei hril suol ring a um nawh. Hi hi ienglei am ei ti chun an ram le leilung a faiin boruok an thieng bakah a mihriem cheng hai khawm an faiin an thienghlim lei a nih ti inla ei hril suol taluo ring a um nawh. A film le a thu fepui iengangin tha sienkhawm a scenea thil inlang hai a bal in tawp sien chu hieng ti tak hin Korea film inhnikna ei nei ring a um nawh. A story chau el khelah a changtu hai an faiin an thienghlim bakah a scenary inlang hai hrim hrim khawm en a hadam leiin en inhawi ei ti a nih. Korea chau ni lovin khawvela ram fai le thienghlimna hmun hai chu hmu inhawi ei ti le ei inzin annawleh ei cheng chakna hmun an nih. Khawvel rambung tum tum haia inzin khawm ei inkat nuk ta a, ei ram ei hung tlung pha an ram fai le thienghlimna ei inhnar le inhawi ei ti thu ei hril rawp hlak a; ei ram thienghlim le faina dinga hmalatu ruok chu ei um ngai meu nawh.
Singapore amani annawleh Tokyo khawpuia in zin chun khawlai dungah i thil fakna kawr annawleh i dumziel bawng lampuiah i dengthang ngainaw el khelah chil sak thang mei mei ngainaw ti nih. A san iengdang lei a ni naw a, an thienghlim lei a nih. An ram fai le thienghlim nasan chu mitinin thienghlimna an ngaipawimaw a, an mawphurnaa ngaia an vawng thienghlim lei a nih. Ram changkang le hnam var lem hai thil ching le umdan entawn hrat vieu siin eini zohnathlak hai hi thienghlimna kawnga ram changkang hai thienghlimna nekin an mizie laia a thalo hai entawn ei ching hi ei thangmawbawk chu a nih. Mi rama ei inzin huna hmunhnawk deng thang mei mei ngam si lovin mani rama ei um pha ruok chun intimna nei der lovin hmunhnawk ei dengthangin chil ei sak thang hlak. Ei ram a tawp, a thienghlim nawh tiin ei chier a, a sukhnawk le suktawptu chu mani seng ei nih. Hi lei hin ei lungril puthmang ei thlakdanglam a tul a nih.
Mi rama dan le dun zama um hai zawma thuawi taka um hlak ni si khan mani rama ruok chun dan inzana hi a lien taka inthawk ei tlasam em em. Ei inthlakdanglam a ngai. Sawrkar chun dan le dun annawleh system/policy hai induongin a siem a, mipui han ei zawm ngai sinaw leiin umzie nei lo an chang a, sawrkar policy le system siem hai chu iengma lo inchang hlak. Ei ram le hmun hai fai le thienghlimna ding hi sawrkar mawphurna chaua ei ngai sung chun ei ram hi ram inhawiin siem ngainaw mani. Ei nuomna hmun hmuna hmunhnawk ei dengthang a, thuneitu han khawlai dunga hmunhnawk dengthang khapna thupek an insuo hnung khawma zawm chuong lo hai ei ni leiin ei nundan le khawsak danah, thuawina kawnga dam, thuzawmna kawnga dam ei insiemthar a, ei inthlakdanglam a ngai a nih.
