Responsive Ad Slot

Hmasawnna Thar | 23 September, 2015

Wednesday, September 23, 2015

/ Published by VIRTHLI
Headline
Central palai Ashok Prasad CCPur-ah a hung; Manipur tlangmi hai harsatna chingfel a ni theina dinga Centre an tlun ding thu a hril
CCPur: Manipur Assembly in  Bills 3 a passed hai leia Manipur tlangram district haia buoina le thina tlung leia a hmuna thil umdan enfel dinga sawrkar thlungpuiin Observer­a a hung tir  Ministry of Home Affairs a, Secretary (Internal Security) Mr Ashok Prasad, IPS chu zanikhan CCPur­ah a hung inzin a, Kangvai hmuna JAC thuoituhai, Lal hai le Kangvai le a sevela mipui han Kangvai hmuna tuokin an lo lawmlut a, zani 9:50AM khan Public Ground a hungtlung a. JAC Against Anti­Tribal Policies of Manipur Govt. inrawinain public meeting­ah a thang.
   

Ashok Prasad lawmlutnain mipui chun ‘Go back Manipur govt, Welcome Indian Govt, we want Separate Administration’ tiin an khek a. Rev. Chinzathang in tawngtainaa hun hawngin H. Mangchinkhup, Chief Convenor, JAC chun lawmlutna thucha a hril. Manipur­ah hills district 5 le valley district 4 a um a, sawrkar office pawimaw le institution pawimaw popo phairam (valley) ah a um vawng thu, Manipur Assembly in bill 3 a passed leia tlangram biel haia buoina suok a ni thu, state force hai silai kap leiin CCPur district ah mi 9 a thi a, tam tak an hliem. Manipur tlangmi hai haratna, a bikin CCPur dist. harsatna enfel dinga Central­in palai a hung tirna thuah mipui an lawm hle thu; Manipur tlangmi hai phairam mi haileh an chengtlang thei tanaw leia roinrelna hran (Separate administration) pe dinga sawrkar thlungpui pe dingin a ngen a, SoO group hnuoia tlangmihai leh a an hma tienga political talk nei ding in a ngen bawk. Live bullet kan ti naw a, kan rights humhalna dingin hma kan lak pei ding a nih tiin a hril.
   
Mr Ashok Prasad chun, Thina tuok sungkuo hai a tuorpui thu hrilin, thina hi mihriem ta dinga beidawngna tawp khawk a ni a, hi lei hin in nuorna le helna leia thi mi 9 sungkuo hai lusun ka tuorpui hle a nih. Tutum buoina suoka mob violence sukbona dinga nuhmei hai hmalakna chu lawmum le inpakum a ti thu hrilin, hmatieng peia khawm nuhmei hai chu hma la pei dingin a ngen a. Public leaders le thuoitu dang dang han fel le tha taka rorel pei dingin a ngen. Mi tinin ei dit tak chu lungmuong taka um le khawsak a ni a, chu dinga hma a lak ding thu, chu thila dinga mipui thangpuina a mamaw thu hrilin  buoina hung suok le inzawma District le state­a thil tlung hai mipui haia inthawk ngaidan le thil tum tum a lakhawm hnungah, an rang thei anga sukfel a ni theina dinga hma a lak ding thu; Central in Manipur tlangmi hai harsatna chingfel a nuom ruol ruolin, chingfel a ni leia buoina dan intlun nawk a ditnaw a, Separate administatio thua inbiekna  neia chingfel ngai a ni leiin inrang taka sukfel thei a ninaw thu hrilin in thil in thil ngen hai  Central govt. kuoma hung intlun ka tih tiin a hril.
   
Inpui 3 hai aiawa LB Sona, Chairman, ZC chun Memorandum pein Aug. 31, 2015 nia inthawk Manipur Govt. official tukhawm CCPur­a hung an um naw a, Ashok Prasad in a hung sirna thuah lawmthu a hrilin phaimi hai le an chengkhawm thei tanaw leia tlangmi hai roinrelna hran pe dingin a ngen. JAC khawmin Mr Ashok Prasad kuoma hin Memorandum an pek bawk.
           
Public meeting nei zo 10:30 khan Mr Ashok Prasad hi District Hospital­a a pan a, hi huna hin Tribal Martyrs 9 sungkuohai chun puon lo inbattirin an lo tap khum a, victims family han  Memorandum an pek a, an memorandum a chun, mi kap hlumtu hai na taka hremna pe dinga an ngenna thu an zieklang. Mr Prasad hin Morgue­ sunga mithi 9 hai enin a kut changtieng pang a awma siein hun iemanichen zet inzana a pek a, ‘Its a great tragedy’ tiin comment a pek. Hi zo 10:45AM khan Mr Prasad chun KKL Complex, IB Road­ah tribe leaders, student leaders le JAC thuoituhai closed door meeting a neipui. Hi huna hin Manipur tlangmi hai harsatna sutkieng a ni thei dan ding ngaidan tum tum hai an hriltlang. Mi 9 thina le mipui hai nuorna video en pui a ni bawk.   

JAC in HM kuomah memorandum an pek
CCPur: JAC chun Union Home Minister Rajnath Singh kuomah Mr Ashok Prasad fethlengin Memorandum an pek a, an memorandum a chun An memorandum a chun Indian constitution hnuoia seprate political administrative arrangement siem pek anni theina dinga an hmatienga  KNO­UPF leaders hai inbiekpui ding le Manipur Assembly in Bills 3 a passed hai lakkir dinga an ngenna hai an ziek lang a,Central sawrkarin an thil ngen hai sukpuitling pek dinga intiemkamna (assurance) ziek ngeia a pek hma chu mithi 9 hai ruong lak le vuiliem a ninaw ding thu an zieklang.
             
Chun, memorandum a hin tribal movement hung in­tan dan; Bills 3 passed a um hai constitution kal a ni dan le Tribal hai ta dinga kakhawk a nei ding hai an zieklang bawk.

Nundan pangngaia um theina dinga inbiekna nei a pawimaw: Ashok Prasad
CCPur: Central Observer­a CCPur­a hung Mr Ashok Prasad, IPS, Secretary (Internal Security), MHA hin zani sun dar 11:45 khan Press/Media hai an hmupui a. Chanchinbumi hai indawnna siem tum tum hai dawnin, thil tlung hi communication gap khawm a ni thei a, communication gap a ni khawmin mipuiin nundan pangngai an hmang nawk theina dingin inbiekna nei a pawimaw tiin a hril. Table pakhat awt tlanga inbiekna a um naw chun buoina sukfel thei ni ngai naw nih. Delhi­a inthawk mipui harsatna le tuorna hai enfel dinga hung a ni thu hrilin buoina chungthuah ama mimalin comment a pek theinaw ding thu; a thil hmu ang ang, mipi harsatna, mipui thil dit hai Delhi­a sawrkar thlungpui kuoma an tlun ding thu; mipui harsatna sutkieng le an thil dit pek an ni theina dinga nasa taka hma a lak ding thu (assurance) a hril.

Ralna le thangpuina Rs. 3,45,691/­ hmu
CCPur: District Hospital campus­a JPO kuta le gate bula donation/receiption a chun zanikhan mithi hai ralna le hliem hai thangpuina dingin Rs. 3,45,691/­ hmu a ni a, tuchena ralna le thangpuina sum hmusuok chu Rs. 39,73,892/­ a tling tah. Zanita ralna le thanpuina petu hai lai hin KBC Canan Veng, Imphal Rs. 10,000; Upper and Lower Komkeirap Women Society Rs.9,000/­; Simte Baptist Church Assn.Women Dept Puon 9 le Rs.5,000/; Khaikholien Haokip, Chief of Geljang Rs.1,111; Harmon Tlang Baptist Church Rs.2,000/; T. Khuangkhai Village, EBCC Tualsung Baptist Dorcas Pawl Rs.1,000/­; UBC Nambilong, Kanglatombi Rs.3,000/; Naga Peoples; Front Puon 9 le Rs.2,00,000/­; Longmei Area Church Fellowship Rs.1,00,300/; Palace Gate Home Church, Imphal Rs.4,000/; Manaseh Cultural Troupe puon 9 le Rs.3,000/­ le Gate  donation ah Rs.7,280/­  a nih.
   
Chun, JPO  in  zani chen khan expenditure­ah mithi 9 sung hai kuomah Rs. 50,000/­ seng a rengin Rs. 4,50,000; Hliem hai pakhat peiah Rs. 5,000/­ seng a rengin Rs. 50,000/­; Medical re­imbursement Rs. 2,20,299/­ Morgue­a sum seng Rs. 31,085/­; Refreshment Rs. 5,335/­; stationary (Printing) Rs. 5,254/­; kuong Rs. 48,335/­; Ice & transportation Rs. 32,940 a rengin Rs. 8,43,248/­ an hmang tah.

Tribal rights humhalna dingin NPF in hma la pei a tih: NPF President
CCPur: Mr Awanpo Niangmei, President, Naga Peoples Front (NPF) inrawinain NPF leaders hai chu zanikhan CCPur­a hungin KKL Complex, IB Road/CCPur­ah JAC le Tribe leaders hai an inhmupui a. August 31, 2015 nia CCPur District sunga thil tlung an tuornat le tuorpui hle thu hrilin Tribal Rights le le ram humhimna dinga Martyrs 9 hai thisen a thlawna a luong naw ding thu NPF thuoitu hai chun an hril.
   

Assembly­a Anti­tribal bills 3 passed hai NPF chun nasa taka an dodal leiin NPF MLA 4 hai chun Bill passed ni August 31, 2015 zantieng khan Speaker kuomah resignation pek an tum a, sienkhawm effective lem nuomna leiin Union Home Minister Rajnath Singh le Kiren Rijiju hai inhmupuia Memorandum an pek zo Sept. 4, 2015 ni khan inbanna an pek niin Awangbo Niangmai chun mipui hriet dingin a puong.
   
Manipur Assembly­a Anti­-Tribal Bills 3 hai tricky tak el a ni lai zingin zani le vawisun chen khawm hin Dy. CM Gaikhangam chun Tribal hai tawkpawinaw nih tiin a la hril zing a. NPF chun iengtik lai khawm tribal hai rights (dikna) humhalna dingin hma la zing a ta, hun remcahng hmasa tak ah Prime Minister le Union Minister tum tum hai inhmupuiin anti­tribal bill re­peal a nina dinga Memorandum an pek ding thu Niangmai chun a hril.
   
NPF leader han JAC le Tribe Leaders hai an inpawlpui zo hin Chanchinbumi hai an inhupui a, Tribal MLA inti han tribal hai tapri le an lungril natna hrie a, MLA a inthawk an inban ngei ding a nih tiin Awangbo Niangmei chun a hril a. Anti­tribal bill 3 hai repeal a ni theina dingin NPF chun theitawp suoin hma la pei a tih. Vawisuna tribal hai buoina Bill 3 hai hi Naga le Non­Naga ti um loin tribal tin a mi tawk vawng thu hrilin hringna chan hai thisen a thlawna a luong naw ding thu a hril.

Zu dapdawkin an bunthlak
CCPur: Zanikhan CCPur Police station tuola duty Nuhmei Pawl han Zenhang bazaar Supermarket laia Zu zawrna hmun hai an dap a, polythene a inthun Zu fun 7 le bottle 15 dapdawkin zani zantieng khan Nulla kuoah an bunthlak. Hi laia duty Nuhmei Pawl hai chun, an  nau le te han Zu an dawn ding an ditnaw thu hrilin Zu zawr ta lo dinga inhriettirin, an dap hun huna Zu an dapdawk h ai chu an bunthlak pei ta din thu an hril.


Bandh volunteers han motor an suksiet
Imphal: September 21, 2015 a inthawk darkar 96 aw dinga bandh thawtu volunteers hai chun zani hmasa zantieng khan Tamenglong district­a Noney hmunah motor pakhat an sukseit niin ei thu dawngna chun a hril. Bandh hi Joint Forum of Transport Welfare Association, Tamenglong in Km. 39.5 a sei Tamenglong Khongsai Road siemthat dinga an ngenna sawrkarin a ngaisaknaw dodalnaa an thaw a nih. Bandh lei hin nitin mamaw phurtu motor tam tak Jiribam le Tamenglong haiah an intang.

NPF MLAs 4 inban hai an hmupui
Imphal: Mr Ashok Prasad, Secretary (Internal Security), MHA chun Imphal hmunah Naga Peoples Front (NPF) MLAs 4 inban tahai an hmupui tawl a, ieng thu am an hril ti ruok chu hriet a ni nawh. NPF MLAs 4 hai inbanna hi Speaker, Manipur Legislative Assembly chun a la pawmpek naw zing niin ei thu dawngna chun a hril.

Bills 3 President kuma thawn
Imphal: ILP le inzawma August 31, 2015 a Bills 3 a passed hai chu Manipur Governor, Dr Syed Ahmed in India President, Pranab Mukherjee remtipuina lak dingin a thawn ta niin Raj Bhavan, Imphal thusuok chun a hril. (DD, Imphal)

MJS Written Exam thul
Imphal: High Court of Manipur in Manipur Judicial Service Grade­I sin lakna dinga written Examination October 17& 18, 2015 haia nei dinga a lo ruot chu Order um nawk hmapo a dinga thul a nih tiin Registrat, High Court of Manipur chun inhriettirna a siem.

Helpawl 3 kap hlum, 40 man
Imphal: HQ IGAR(South) hnuoia Assam Rifles le state Police thangruol han Manipur state hmun tum tum haia dappui an thawnaah Aug. 1­ September 15, 2015 inkar sung khan helpawl 40 le overground workers (OWGs) 3 an man bakah ralthuom tam tak an man a, PLA cadre 3 an kap hlum bawk niin zanita Assam Rifles thusuok chun a hril. Helpawl an man hai lai UNLF cadre 7, NSCN(K) cadres 7, PREPAK (Pro) cadres 5, PREPAK cadre 6, PLA cadre 4, KUKL cadre 8, ZUF 1, KCP 1, PREPAK (VC) 1 le OWBs an man hai chu UNLF, PREPAK le KYKL a inthawk pakhat seng an ni a. Ralthuom an man hai lai AK­47 1, 7.62mm A­1 Rifle 2, 9mm  Carbine Machine Gun 1, 9mm Pistol 4, Lathod Gun 1 le Lathod shelles 3, Country made 12 bore single barrel 1, IEDs 8, China siem Hand Grenade 1, silaimu tam tak le thil dang dang a thang niin AR thusuok chun a hril.

CO ban dinga ngennain protest an nei
Imphal: 9th IRB a nuhmei personnel 200 vel hai chun an Commanding Officer (CO) Mamata  ban dinga ngennain zanikhan an sinthaw chawlsanin Khuman Lampak main stadium hmuna  protest an nei. 9th IRB women battalion­a hin personnel 600 vel an um a, hieng hai hi CCPur, Imphal East, Imphal West le Maphou Dam hai­ah posting pek an nih. An CO W. Mamata hin nasa takin a suknawmna hlak niin an intum a, ban a ni hma chu protest an sunzawm pei ding thu an hril.

Misuol thenkhatin School Van an raw
Imphal: September 21, 2015 zan sawt hnung khan Thoubal district­a Pallel hmuna a ke kawi (puncture) leia innghat Tata Magic School van MN 05C 1922 chu tu ti hrietlo han an raw. Van ke kawi leia Cherith Foundation tuol, Aimol road hmuna Van hi innghat le maksan niin ei thu dawngna chun a hril. Hi Van neitu chu Takhellambam Mukta @Tombi (40) s/o (L) Budhachandra of Pallel Bazar a nih.

Pawisa dit leiin thla 6 sungin nau vawi 85 a pai
Guwahati: Assam rama Karimganj district sunga nuhmei pakhat Lily Begam Laskar chun sawrkar scheme hnuoia nuhmei naunei hai kuoma Rs. 500/­ pei a pek hlak thlakhla leiin thla 6 sungin vawi 85 zet nau nei angin an siem ti hrietsuok a nih. Begam Laskar hi government hospital­a thawk niin khel hril a thla 6 sunga nau vawi 85 neia an hrilnaa sum a hmu hi Rs. 40,000 a tling phak. Hi thil hi hospital a thawk pakhatin a report leia hriet suoka hung um a nih. Ms Laskar chun Nurses sin hi sawl a um a, hlaw a tlawm si leia nau pai anga inhril a ni thu hrilin ngaidam an hni.


Assam CM in ministry a suklien
Guwahati: Assam CM Tarun Gogoi chun a minister hlui pahni Siddique Ahmed le Gautom Roy hai lalutin zanikhan a cabinet a suklien a, zani ma khan Governor PB Acharya hmaah minister dinga sesamna an nei. Anni le hin Assam ministry a chun minister 17 an um ta a nih.  Tuta hma khan Parliamentary Secretaries in 12 ruot an lo ni ta a, ministry a hin MLA 2 laklut an la ni nawk dinga hril a nih.

Mizoram in ft. 6 tling chin Police 20 lak a tum
Aizawl: Mizoram sawrkar chun Mizoram Police Manual one­time relaxation hmanga a phal angin Mizoram Police Constable (unarmed) ft. 6 chena dung insang hai mi 20 lak a tum. Police constable 20 lak dinga hin Feet 6 chen tling phak chin lak phawt ning a ta, ft. 6 chin tling in a dai naw chun ft. 5’10 chin lak nawk ni dingin Police PRO thusuok chun a hril. Anni hi khawpui sunga duty bik ding le a tul chun hmun danga khawm duty dinga ti an nih.

Somnath Bharti bail ngenna HC in a hnawl
New Delhi: A nuhmei in a chunga hekna a siem leia man Aam Aadmi Party MLA Somnath Bharti in anticipatory bail a ngenna chu Delhi High Court in zanikhan a hnawl pek. Trial Court in anticipatory bail a ngenna a hnawlpek hnunga Mr Bharti hin Delhi High Court­a ngenna a siem nawk a nih. A nuhmei Lipika Mitra chun, a pasal Mr Bharti hin a suknawmna hlak bakah tuolthat tumna case a siemkhum leia court in bail thei lo dinga manna ding order a lo insuo khum ta a nih.

Award sum mi pasie damnaw hai enkawlna dingin a pek
New Delhi: IFS Officer, tulai hnaia Ramon Magsaysay Award dawng Sanjiv Chaturvedi chun award a dawngnaa pawisa a dawng hai po po AIIMS, New Delhi­a mi pasie damnaw hai enkawlnaa hmang dingin a pek vawng. Mr Chaturvedi chun, pawisa hi AIIMS hospitala damnaw mi pasie enkawla um hai, a bik takin cancer natna hran hrana neihai enkawlnaa hmang dingin AIIMS director lekha thawnin an hriettir. Chaturvedi award­a sum a dawng hi Rs. 19.85 lakh a ni a, hi laia Rs. 5.63 chu advance tax a deposit ding a nih. Mr Chaturvedi chun pawisa sum a pek haia inthawka enkawl damnaw hai chanchin kimchang inlangtlang le tha taka record siem dingin medical superintendent chu a ngen bawk. Mr Chaturvedi hi 2002 batch Indian Forest Officer (IFS), Haryana cadre a niin tuta AIIMS a deputy Secretary sin chel lai mek a nih.

Modi le Sharif hai NY a Hotel pakhatah an innghat ding
New York: Tuta kar sunga  New York khawpuia 70th UN General Assembly session um  dinga hin India PM Narendra Modi le Pakistan PM Nawaz Sharif hai chu an thang ding bakah New York khawpuia iconic Waldorf Astoria Hotel pakhatah an innghat ve ve ding a nih. Pu Modi hi Sept. 23, 2015 zantieng hin New York tlung a ta, Sharif hi Sept. 25, 2015 in New York a tlung ve dinga ti a nih. An ram pahni hai chungthua inbiekna an nei ding le dingnaw official­a puonglangna um nawh. Pu Modi hin Sept. 25, 2015 in UN Secy. General Ban Ki­moon in a buotsai Sustainable Development Summit­ah thu a hril ding a ni a, Sharif chun Sept. 27, 2015 khin high­level meeting huna thu a hril ve ding a nih. Pu Modi hi Sept. 26 le 27 haiah California hmuna cham a ta, US President Barack Obama an hmupui ding bakah UN Headquarters a high level peacekeeping Summit­ah thang bawk a tih.
------------------------------------------------------------------------------------------
VAWISUN THUPUI
Lalpa chun ama kotuhai po po chu a hnai hlak a, Titakzeta ama kotu po pohai chu. Ama tituhai dit chu inhlawtlingtir a ta, An khekri chu hrieng a ta, anni sandam a tih.- Sâm 145:18­19

Editorial
Inthuruolna tha nei zing a pawimaw ding

Manipur Assembly in August 31, 2015 nia Bills pathum­ PMP) Bill, 2015; MLR&R (7th Amendment) Bill 2015 le MS&E (2nd Amendment) Bill 2015 a passed leia Manipur tlangram district haia dodalna nasa tak a tlung le a bik takin Churachandpur district­a buoina suoka mi 9 zetin thina an tuok phana le inzawma Bills 3 hai lakkir dinga nawrna chu la fe peiin Separate Administration ngenna chen a hung intlun a. Thil umdan a hmun ngeia enfel dingin Centre chun Ministry of Home Affairs (MHA) a senior IPS Officer le Secretary, Internal Security Division chu Manipur­ah hung tir a. Ei thil dit le ngen haiah beiseina insang tak neiin ropui takin ei lo tuok  a ni a, ei beisei le duthusam angin thil a hung um dim ti ruok chu hun in a la hung hril ding a nih. Mr Ashok Prasad hi 1979 batch IPS Officer, Andhra Pradesh cadre niin December 31, 2014 a kha Home Ministry­a Special Secretary (Internal Security) dinga ruot niin Special Director, Intelligence Bureau sin lo chel tah a ni a, tuta a sin hi January 31, 2016 chen ding a nih.
   
Pu Ashok in Public Ground hmuna mipui hmaa thu a hril huna Home Ministry in thil umdan enfel dinga a hung tir a ni leia thutlukna ama siem ding a ninaw thu le a thil hmudan hai Central a report petu ding a ni thu hrilin, sawrkar thlungpuiin Manipur a tlangmi hai harsatna sukfel a nuom ruol ruolin buoina dang a hung rasuok nawk a nuom naw a, hi lei hin Separate Administration thuah inbiekna neia sukfel a tul ding leiin hun a lak sawt ding thu a hril. A ni dan ding hrim a nih. Separate Administration annawleh Political demand hrim hrimin Constitution siemthat le thil dang dang a tawk hlak leiin hun tawite sunga sukfel el thei a ninaw ding a nih ti hi mitinin ei hriet a, chu le inruola ei hma dawm dan le thil thaw dan hai khawm ei thlakthleng  tul a ta, ei thil dit ei hmu theina ding chun tlangmi hnam tum tum han tuta ang zinga  a tawp chena ke ei pen tlang zing a tul ding a nih  hi ei hriet tlat a tul.
   
Pu Ashok Prasad chun Manipur­a tlangmi hai harsatna sukfel a hung ni theina dinga ei thil ngen le inzawma thil tul le pawimaw hai baka bakah Political demand ni lo thil dang hai bakah thil ngen dng hai sukpuitling a ni theina dinga theitawpa hma a lak ding thu a hril a. Lawm a um hle. District Hospital Morgue­a Tribal hai humhimna dinga hringna lo chan tah pasaltha hai ruong/kuong a en huna mithi sung han mithli le insawp ela ditsakna puon an lo inbattir huna ama ngei khawm insum zo lovin a mithli a thla ve hiel a hril a ni a, hi lei hin ei thil tawng le harsatna hin a lungril a tawk ve hle niin an lang a. Ama khawmin theitawpa hma a mi hung lakpui ring a  um leiin Manipur­a tlangmi hai chun a chungah beiseina insang tak ei nei a nih.
   
Hieng laizing hin a lo hril angin tuta ei issue fepui tak hi sensitive takel a ni a. Khing khata buoina sukfel a ni laiin kawng khatah buoina intlun thei zing ngirhmuna um a ni leiin thil awlsam chu a ninaw ding a ni a, Ei ta dinga  harsatna le buoina nasa lem hung suok thei a ni naah fimkhur taka hmadawm a tul thu le hmalak dan ding thuah thurawn a pek theinaw thu Mr Ashok Prasad chun hrilin Central khawma hmawsaruma thil a thaw theinaw ding leia nundan pangngai inumtir nawk  phawt ding chu a thurawn pek thei sun a ni thu a hril a nih.
   
Pu Ashok Prasad in a hril angin ei thil phut tak Separate Administration annawleh poltical demand ei nei chu thawk le khata sukpuitling thei a ninaw ding ti a chieng a. Hi le inzawm hin tuta ei nuorna ang hin chu ei fe zing theinaw ding a ni a, hi thila hin thuoitu le hotu han nundan pangngai tak ei hmang nawk theina dinga hma an hung lak chu thil tul hmasa tak a hung ni ding a nih. Ei thil tum le thil ngiet ei hlawtling theina ding hin thuoitu hai chau ni loin mipui hai khawmin mawphurna insang tak ei nei a, chu chu inthuruolna sukse thei ding lakah tawngkam le thil thaw kawnga fimkhur a nih. 
           

Chuongang bawkin hotu hai khawmin ei movement le inzawma politics an lo khel a ni chun ei thil ngen hi a takchang naw ding ding a nih ti hriein Pu Gandhi anga mani mimal hamthatna hnawtnaw hram dingin hotu hai ei ngen. Pu Gandhi khan Bristish awbetnaa inthawk India  mipui han zalenna an hmu theina dingin theitawp suoin hma a lak a. India ramin zalenna a hung hmu hnung khan Prime Minister amanih annawleh President khawm inchu sienla tukhawmin  kal naw ni hai. Sienkhawm a tum tak British sawrkara inthawk India mipui ta dinga zalenna a suoldawk hnung khan an thier fihlim nghal a nih. PM, President le Ministers a hung chel naw lei khan India ram  ta dinga a hlutna a kiem chuong naw a, ngaisang a umin a ropui lem hman hman a nih. Hi lei hin ei hotu hai hin Pu Gandhi lungril put ngei hai sien nuom a um. Chuong ang bawkin Tlangmi han zalenna ei dit tak tak a ni chun inthuruol taka kal ei pen zing a tul ding a nih. Tuta ei nuorna fepui mek hi a that zing laiin a pawimaw tak chu inthuruolna tha nei zing hi a nih. Chu ruol ruol chun ei thil ngiet tak ei hlawtling theina dinga sawrkar thlungpui tieng ei nawr hrat vieu a tul ding niin an lang.
Don't Miss
© all rights reserved
made with by Simon L Infimate