Responsive Ad Slot

Hmasawnna Thar | 19 September, 2015

Saturday, September 19, 2015

/ Published by VIRTHLI
Tuolsung
Thangpuina sum Rs. 31,49,816  hmu a ni tah
CCPur: Manipur Assembly in Bills 3 a passed hai dodalna le inzawma tribal movement fe meka Tribal Martyrs 9 hai ralna le hliem hai thangpuina dinga JPO in Distr. Hospital­a donation box a daw a chun mimal le pawl tum tum han thawlawm an pek zing a, zanita JPO donation box­a thawlawm hmua um chu Rs. 1,62,820 /­ a ni a, Donation Box daw a nia inthawka tuchena JPO kuta thangpuina sum lut chu Rs. 31,49,816 a tling tah.
   

Zanita thangpuina le ralna petu hai chu­ KBC Gambih No. 1 Imphal area Rs. 10,100/­; All Pensioner Welfare Council, CCPur Rs. 10,000/­; Upa Henzagen Vaiphei, Mantripukhri Imphal Rs. 1,000/­; Khuptinlal, Chief of Ningthiching Rs. 500/­;  ECA Church, New Ningthiching Rs. 2,000/­; ZCBC Zoutuinuam Church /VA  Rs. 2,000/­; YPA Imphal Block Rs. 20,000/ le puon 9­; L. Kanan VA Rs. 1,450/­; Behiang Christian Fellowship Rs. 740/­; Presbyterian Church of India@ PWF, Daijang Rs. 1,500/­; S. Lungin Gangte, Tamenglong MDC Rs. 9,000/­; V. Munhoih  Nuhmei Pawl Rs. 11,520/­; EFCI Saikawt Dist Presbytery Nuhmei Pawl Rs. 25,000/­ le tuomna Thangsuopuon 9; Chiru Tribe Com. Manipur Rs. 47,150/­; TSA Sadar Hills Rs. 3,000/­; Lonpi Area Chief Assn. Nungba  Divn. Rs. 10,000/­ le Gate donation­ah Rs. 7,960/­ a nih.

Dr L. Fimate in Morgue a sir; Thangpuina an pek
CCPur:  RIMS, Imphal Director hlui le tuta Head of Department, Forensic, JNIMS sin chel lai mek Prof. Dr L. Fimate chu zanikhan Churachandpur­ah hungin District Hospital Morgue­a tribal movement leia hringna lo chan ta hai ruong an zalna hmun chitah a hung en. Dr Fimate chun, ni 18 zet ruong hai rimse lova enkawl a nina thuah Doctors le JPO hai chungah lawmthu a hril a, Morgue temperature below 9 vela sie thei nisien tia thurawn a pek le inzawmin a sukdeina ding  air conditioner inbuk belsa dinga hma lak nghal a nih tiin ei thu dawngna chun a hril.
           

Chun, Prof. Dr L. Fimate hin JAC thangpuina dingin Rs. 3000/­ JAC kutah an hlan bakah Pu Lalhosan,Vice Chairman, ADCC in JAC kuoma Rs. 2000/­ le Thado Students Association (TSA) Sadars Hills han JAC kutah Rs. 2000/­ an inhlan bawk. Dr Fimate hin hliem District Hospital­a enkawl mek hai khawm an zalna khum chita a va kan tawl. (with input from Alan Famhoite)

“Sixth Schedule le District Council Hmelhmang” ti Lekhabu tlangzar a ni tah
­LRS Puruolte
CCPUR:  Mi tam tak nghakhla “Sixth Schedule le District Council Hmelhmang” (Modality of Sixth Schedule and District Council) ti Lekhabu Pu Timothy Z. Zote in a Ziek le Pu Lalthawmlien Hmar Chairman, Barak Valley Hill­tribes’ Development Council (BVHTDC) in a Published; Rs. 100/­ man chu Sept. 18, 2015­a inthawk inchâwk thei a lo ni tah. A Copy dithai chun Pu Rohlun Zote, Ramthar, Tv. LRS Puruolte, Rengkai le A Tha Bek Bek Store, Rengkai, CCPur haia inchâwk thei ning a tih . Thuchieng hrie nuomhai chun 08794202329 ah indawn thei ning a tih tiin buotsaitu chun a hril.
   
Hi lekhabu Tlangzarna le Pathien kuoma tawngtaia  inhlanna Rev. Lalngailien Puruolte, Assoc. Evan­at­Large, RPC (NEI) vawituk (18/9/2015) khan Pu Timothy chengna In, Saikot ah a nei a. Hi lekhabu a inthawk Political thila based ding ei nei ta chu lawmum a ti hle thu hrilin mi tamtakin hlawkpui ngei dingin a ditsakna an hlan. Hun khar tawngtaina chu Pi Vanlalhriati, (L) Pu Chawilien (Saikot khuo a tawngtai hlawtling le hril huoi huoi) hun laia Pathien mi hmang ve chun a nei bawk. Hi hun hi The Saikot Post Editor Lalramthar Famhoite khawmin a uop. Hiengang lekhabu hi Tlangmi tawnga dinga a hmasa pawl tak ni a hriet a nih.
   
Lekhabu Tlangzar a ni dan ah Chief Guest nei amani Tlangzar­tu dinga Officer lien hmang a ninaw nasan le Pathien hriek nal hmang a ni kherna hin Pathien chu ei Lalpa le kawng iengkima ei hlawtlingna bulpui ding a ni leia ei ngaihlut zie suklangna a nih tiin Pu Timothy chun ei inpawlpui hun a chun a hril bawk.

Malaysia jail­a intang hung insuo hai lawmlutna hun hmang
CCPur: Zani sun dar 12:30 khan Manipur­a inthawk khawsakna harsa leia Malaysia rama inhlaw dinga fe CCPur district mi 3 Malaysia jail­a intang hung insuo zalen ta hai lawmlutna hun Zoveng­a K. Zou chengnain­ah nei a nih.
   

Malaysia jail­a zun tang hung insuo mi 3 hai chu David Lianmuanpau (26) s/o (L) Khupsuanhau of Singheu, Thanglianpau (25) s/o Khaikhankhup of Zomi Colony le Chinminlun Valte (24) s/o Douchinkhup of PCI Compound, Zenhang Lamka hai an ni a, Rt. Rev. Hangminthang, Bishop, MELC chun tawngtaipekna a nei zovin an sung hai kutah an hlan tawl.
   
David Lianmuanpau hi Nov. 13, 2014 a Malaysia Police han a thawkna hmun Kuala Lumpur hmuna an man, Langkap detention camp, Thanglianpau hi Thailand a inthawk Malaysia rama lut, Jan. 1, 2015 a Malaysia Police han an man le Malacca Detention Camp­a an sie a ni a, Chinminlun Valte hi Malaysia sum 600 fine chawi ding a neinaw leia Feb. 29, 2015 a   Malaysia Police han a thawka hmuna an man le KLIA detention Camp­a an sie a nih.
   
Mr K. Zou chun Malaysia Jaila intang hai chanchin phone fethlengin July 3, 2015 khan a dawng a, India le Malaysia embassy hai fethlenga sansuok an ni theina dingin hma a lak a, Aug. 15, 2015 Independence Day ni khan India ram hung phurtlung ding ti an ni a, sienkhawm Malaysia embassy thawktu mi 15 han chawl an lak leia sukfel thei lova u m a nih. India hung phurtlung an ni huna Lamlal le Ginsuanhau Khuptong han Kolkata Airport­ah an va tuok a, Imphal Airport­ah Dr. Dongkhanlal le a nuhmei bakah P. Tongthang in CCpur chen an hungtlungna ding a buoipui a nih.
   
K Zou inrawinaa Human Rights and Empowerment of Indigent People of North East India (HEINEI) le Zo Peoples for Human Rights International (ZPHRI) chun Malaysia jail­a lan tang mek 7 hai sansuokna dingin hma an lak zing thu Lamsianmuan Taithul, Coortinator ZPHRI chun a hril.  

Headline
6th Pay pek vat ni tang an tih: CM O.Ibobi Singh
Imphal: Zanita City Convention Centre, Imphal­a State Level Consultative Municipal Resource Mobilization nei a ni huna Manipur CM O.Ibobi Singh in thu a hrilnaa chun, All Manipur Municipality Employee Workers Union ngenna angin hi Union hnuoia thawktuhai chu 6th Pay pek vat ni tang an tih tiin a hril. AMTUC le AMGEO hnuoia JAC in an hlaw 29 percent­a sukpung dinga an ngen khawm hih State sawrkar chun pek tha a ti bakah pek nghal khawm a nuom a, sienkhawm state sawrkarin sum harsatna a tuok leiin tuel hin chu a la pek thei hri naw a nih tia hrilin hun iemanichen la nghak dingin a ngen. Sawrkar thlungpuiin a hnuoia sawrkar thawktuhai hlaw a sukpung zatin state sawrkar chun harsatna nasa tak a tuok hlak. A san chu sawrkar thlungpuiin state sawrkar hnuoia thawktuhai hlaw sukpungna ding additional fund a hung sanction ngainaw lei a nih tiin O.Ibobi Singh chun a hril. JAC in Central Pay, DA le a dang dang an ngen hai khawm hi thil awm le an thil ngen hi an dik (genuine) a nih tiin CM chun a hril bawk. Sawrkar thlungpui chun tulai hnai el khan a hnuoia thawktuhai hlaw chu 29 percent in a sukpung pek a nih.
           
Chun, O.Ibobi Singh in thu a hril peinaah, Imphal Municipality chun hi Municipality area sunga hin properties tax a lak taan ta ding a nih. Properties tax lak a ni theina dinga Notification insuo tuma hma lak mek a ni a. Municipality Corporation tin, Council le Nagar Panchayat tin haia khawm properties tax hi lak ning a tih. Hi thil hi Municipality Corporation, Council le Nagar Panchayat hai sin a ni ve a, an ngaipawimaw hle a tul a nih tiin CM chun a hril.

China siem Grenades 4 le WW­II bomb 1
imphal: Zani zingkar dar 6 vel khan Imphal West District a Sekmai Police Station huop sunga Nilakuthi leilak bulah China siem Hand Grenades 4 le World War­II bomb 1 hmu nawk a nih. Bomb­hai hi polythene bag sunga inthun an ni a, zanikhan pawitawk lo dingin Pangei Firing Range­ah sukpuok a nih. Zani hmasa khawm khan Kangla Moat ah hand grenade 6 hmu a lo ni ta bawk a nih.

AR han thilpuokthei an dapdawk
imphal: September 19, 2015 zingkar dar 4:30 vel khan Koirengei leilai bulah China siem Hand Grenade tuiek tah 1, No. 36 Hand Grenades 3, tuiek tah shell kg. 5 vel le industrial detonator 1 45­Assam Rifles han an dapdawk a, Police Bomb Disposal team kutah an pek niin Assam Rifles thusuok chun a hril.

Rul chuk mi 2 AR han an sanhim
imphal: Sept. 17, 2015 khan Bibi Devi (26) of Wangjing, Thoubal District le Mr S.K. Mongaon (21) of  Chandel hai chu rulin a chuk a, 2­Assam  Rifles le 20­Assam Rifles han an tuokfuk leiin a tur thatna pein an sanhim ve ve niin Assam Rifles thusuok chun a hril.

UNLF cadre 1 le OGW 1 man
imphal: September 18, 2015 khan 2­Assam Rifles le Thoubal Police Commandos thangruol han Langathel Area sunga dappui an thawnaah UNLF cadre pakhat, SS L/Cpl. Satrukhon Meitei alias Panshemba alias Khon (25) of Moreh Ward No. 7 le UNLF Over Ground Worker (OGW) Smt. Soibam (O) Sagolsem (N) Nanao alias Naobi (22) of Moreh Ward No. 7 hai an man a, Thoubal Police Station­ah an peklut nin AR thusuok chun a hril.

Naxalites han Forest office an raw
Nagpur: September 16, 2015 zan khan Maharashtra State a Gadchiroli district sunga Range  Forest Office (RFO) an raw a, a sunga um furnitures, office documents le thil dang dang hai a kang vam vawng. Hi office compound sunga um motor pakhat an raw siet bawk. Maoist Communist Party chun September 21­25, 2015 inkar sungin “Operation Green Hunt” an thaw ding niin an puonglang. Hi hma khawm hin Aheri a Forest Office le Panchayat Office an lo raw ta bawk.

NE Women Entrepreneur Award
Guwahati: Vawisun hin 2nd Vasundhara ­NE Women Entrepreneur of the Year 2013-­14 Award semna Shillong­ah um a tih. State winner category a Award dawng dinga thlang hai chu, Lata Lepcha (Sikkim), Tokho Likha Yaram (Arunachal Pradesh);T. Jemima Achumi (Nagaland); Moirangthem Mukhtamani Devi (Manipur); Lalhlimpui Hmar (Mizoram); Sukla Rani  Debbarma (Tripura), Queency Thangkhiew (Meghalaya) le  Kanta Dey, (Assam) hai an nih. Hi Award a hin pawisafai Rs. 10,000, Trophy, Citation le Shawl a thang.

Paresh Baruah in a hnawl
Guwahati:  Assam CM Tarun Gogoi in United Liberation Front of Assam (Independent) Comamnder ­in­ Chief, Paresh Baruah a nu damnaw hung kan theina dinga phalna (save passage) a pek chu Paresh Baruah in a hnawl. A nu enkawlna ding (financial assistance) Rs. 1,00,000 pek a tiem khawm a hnawl. Unau pasal 3 ka nei a, ka nu damnaw hi an enkawl zo a, a nuom leh Rs. 1 lakh hi tuilien tuorhai thangpuinain pe lem raw seh tiin Paresh Baruah chun a hril. Mihriemna thilah Tarun Gogoi hi a lunglut tak zet a ni chun ULFA member­hai po po save passage pe sienla, an nu le pahai inhmutir sienla, an thi ni haiah khawm an kan phal raw seh tiin Baruah chun a hril bawk.

President Pranab Mukherjee inTourism Award a sem
New Delhi: Zanikhan Delhi­ah National Tourism Award, 2013­14 President Pranab Mukherjee in a sem. Comprehensive Development of Tourism Category ah Gujarat in pakhatna, Madhya Pradesh in pahnina le Rajasthan in pathumna an lak a, President in Awards hai inhlanna a nei tawl. National Tourism Awards hi kum tina sem hlak a nih.

BSF han heroin 23kg zet an man
Amritsar: Zanikhan BSF han Punjab state a Amritsar Sector a Indo­-Pakistan international border ah heroin 23 kg zet an man. Heroin mana um hi international market rate a chun Rs. 115 crore manhu vel a nih. Tuta kum fe mek sunga BSF han India le Pakistan ramri zula heroin an man hi 191 kg zet a tling ta tiin BSF thusuok chun a hril. September thla bul khawm khan Ferozpur Sector ah heroin kg. 14, Rs. 70 crore manhu le Amritsar sector­ah heroin kg. 1 an lo man ta a nih.

Sawrkar thawktuhai thang lo dingin
Aizawl: Mizorama Zu (IMFL) donaah sawrkar thawktuhai thang lo dingin Mizoram sawrkarin an hriettir. Lalrinliana Fanai, Secretary, General Administration Department in September 14, 2015 nia Office Memorandum an suo a chun Mizoram sawrkar hnuoia thawktu Zu (IMFL) donaa thanghai chungah action lak ning a tih tiin a zieklang a nih. Mizoram Kohran Pawl tum tum le NGOs thenkhtin Zu zawr hi an la dodal zing a nih.

Japan khuolzin mi Taj Mahal­ah a tla hlum
Agra: Japan mi India rama hung inzin H. Ueda (66) chu zani hmasa khan Taj Mahal sunga  step a inthawk a tla thla a, a lu a tet leiin Taj Ganj Police station official han inrang takin private nursing home an panpui a, sienkhawm a hliemna tuorzo lovin a thi. Taj Mahal hi a ruoldang pakhat le an va sir a ni a, Taj mahal an sir hma hin Agra Fort le Fatehpur Sikri hmun hai an lo sir tah. HI thil tlung hi Tourist Police official hai chun New Delhi­a Japanese embassy an inhriettir tah.

India le Laos han MoU 2 an ziek
Vientiane: Zanikhan India le Laos han Memorandum of Understanding (MoU) pahni an ziek a, hienghai laia pakhat chu Air Service agreement le pakhat dang chu Mekhong Ganga Cooperation project a nih. MoU ziek huna hin India Vice President Hamid Ansari, Union Minister of State for Water Resources Sanwar Lal Jat hai khawm an thang.

Arun Jaitley in Singapore a pan
New Delhi: Union Finance Minister Arun Jaitley chu ni 4 sung Singapore le Hong Kong hai sir dingin zanikhan Singapore a pan. Singapor PM Lee Hsien Loong inhmupui a ta, “India: A heaven of opportunity in globally challenging Times’ ti thupui hmanga Summit nei huna Mr Jaitley hin thu hril a tih.

Helpawl 13 thangin mi 30 an thi
Peshawar:  Zani zingkar khan Pakistan a Tehrieek­i­Taliban Pakistan (TTP) helpawl han Pakistan rama Peshawar khawpui sunga Inqalab road a Paksitan Air Force (PAF) camp an va run a, inkaptuona nasa tak a tlung a, helpawl 13 thangsain mi 30 lai zetin thina an tuok pha tiin Major General Asim Bejwa, Director General Inter­Services Public Relations chun a hril.

Oil Tanker puokdarah mi 85 an thi
Juba: September 16, 2015 khan South Sudan ah Oil tanker pakhat a puokdar a, mi 85 zetin thina an tuok pha niin Presidential spokesman chun a hril. Mipuihai thautui la dinga an pungkhawm rawn lai hun tak Oil tanker hi eksidenin lampuiah an let thal a, chu taka hung puokdar nia hril a nih. Hliem khawm mi 50 lai zet an um a hril a nih.
---------------------------------------------------------------------------------------------------------------------
VAWISUN THUPUI
Mihriem ring  nek chun Lalpaa ringna innghat hi a tha lem a nih. Lalhai ring nek chun, Lalpaa ringna innghat hi a thalem a nih.  Sâm 118:8­9

Editorial
Sawrkar le Political party han inenfienain hmang hai sienla

Ei hriet seng angin India ram chu Democracy ram a ni a. Ei ni Manipur khawm India rama um a ni leiin democracy hnuoia mi ei ni ve bawk. Democracy ramah chun ram sukhmasawn ding le mipui nun thuoi ngil dingin roreltu ei thlang a, roreltu chu mipui ta dinga mipui thlang an nih. Sawrkar a hung ngir khawmin party sawrkar ni lovin, mipui sawrkar, mipui ta an ni ta a. Ram le mipui hmangai ding le development siem dingin Political party a um a thieng. Chuong mihai chun party an indin san chu ram le mipui an hmangai lei a ni ding a nih. Hi lai taka hin ei Political party­hai hi an inenfie a ngai hle. Mipui le ram am an hmangai an party le an sawrkar ti hi. Nunghak i ngaizawng kha midangin intawmpui ve ta sienla che, ngaithei naw hleng i tih. Nunghak hmangaitu? Ram le mipui am i hmangai, I party le sawrkar inenfie raw leh. I party le i sawrkar i hmangai lem chun mipui le ram chu ngaisak ngai nawng i tih.
   
Inner Line Permit le inzawmin JCILPS hmalakna leiin Manipur Assembly chun August 31, 2015 khan Government Bills 3 a passed a, hieng bills 3 passed a um hin Manipur­a tribal hai lungril a khei a, NPF MLAs 4 an inban pha a, Manipur tlangram district hai po poah bills 3 dodalnain lampui hraw a ni a, nuorna chi hran hran le bandh hai chen thaw a nih. Churachandpur District a lem  chu hi movement hi a nasa zuol a, mi 9 zetin thina an tuok pha ta bakah mi 30 chuong an hliem pha ta a nih. Tribal mipuihai chun santu ding koin an khek inrum a, an MLA­hai, an minister­hai, an state sawrkar le sawrkar thlungpui hai chu an harsatna le an thil ngen hai ngaivenpui a, sansuok dingin an khek a. Amiruokchu, santu dinga an ngen hai chun tuchen hin u ve, au ve ti pakhat khawm an la um nawh. State le Central a sawrkar cheltuhai chau ni lovin Political Party tum tum hai chu hi buoina hin a la keihar zo nawh. Ieng invawi le ieng hmangai am an ni ding chu maw!
   
MP or MLA election tawm annawleh election lai nisienla chu India rama Political party tum tum hai chu tulaia Manipur tlangram biel, a bik takin Churachandpur district buoina chungthua hin kut an hung rawl le rawl an hung insuo ta ngei ring a um. Amiruokchu, MP annawleh MLA election hun ding a la hla deu leiin sawrkar chau ni lovin Political party tum tum hai chu Ui hmur vuok an hril ang elin an la to tawk tawk el a nih. Political party hai hi ram le hnam hmangaitu ni lovin an party le an sawrkar chau hmangaitu an ni tawl a ni? Ei ram sawrkar hi mipui sawrkar le mipui ta a ni tanaw a ni? ti hai hi mipui indawnna a nih.
   
Khawvela democracy ram puitling ta, entawntlak tak US khu hang hrillang inla. Jimmy Carter  President hun lai khan Iran sarwkar chun a san hriet lovin US mi 100 chuong a man a, an chanchin hriet lovin, an thi am ti le an dam am ti khawm hriet a ninaw a. Inthlang a hang zo khan President thar dingin Ronald Reagan thlangtling a hung ni ta a. Ronald  Reagan khan inthlang laiin Iran sawrkar chu a vau a, “Lal­thungpha a ka thung hmaa Iran in US mi a hrentang hai dam taka hung insuo an ninaw chun an tuor ding thu le an ngirhmun ding chu la hrie el an tih” a hang ti a. Iran chun a tuor ngam naw a, USA mi a hrentanghai po po chu a bo le an hmang um der lovin a hung insuo a nih.
           

Ronald Reagan hi Lalthungpha el chau dit le inchu a ninaw a, USA mipui le ram a hmangai takzet leia khau taka a vau ngam a nih. Hiengang thuoitu tha hi Manipur­a tribal­hai khawmin ei mamaw a nih. Tuhin chu ei tribal thuoituhai a tawng puok ngam le tribal mipuihai sansuokna dinga tawngbau saksuok ngam, inban ngam le hma la tum el khawm an um naw a nih. Political party tum tum, state le Centre a sawrkarna cheltu han ei buoina hi inenfiena a hmangin, Manipur a tribal mihai thil ngen hi hung ngaisak hai sienla nuom a um ngei el.
Don't Miss
© all rights reserved
made with by Simon L Infimate