Tuolsung
Sitin protest fepui zing ; Bill 3 hai raw le peace rally an nei
CCPur: Manipur Assembly in Bills 3 an passed hai dodalna leia buoina suoka mi 9 zetin thina an tuokna le inzawm le tlangmi hai hmakhuo ngainaa indin JAC in Sept. 10, 2015 chen aw dinga darkar 60 total bandh an puong chu buoina um lovin a fe pei a. Khuo tum tumah nuhmei duty (volunteers) han sitin protest neiin, khuo thenkhat haia chun protesta thang nupui han tlangmi hai humhalna ding, Manipur Assembly in Bill 3 a passed hai hmang lova sut a ni theina dingin Pathien kuomah tawngtaina an nei tawl. Khuo thenkhata duty hai chu an strick hle a, zingkar inhmataka khawlaia suok hai khawm ina tirkir an nih.
 |
| Bill an raw lai |
Dorcas road Awnsuak Road Junction, New Lamkaa sitin protest nei nuhmei pawl hai chun Sept. 9, 2015, 1:00PM khan Manipur Assembly in Bill 3 a passed hai chu Pathien hmingin an raw hmang. Hi huna hin slogan in Manipur roinrelna an dit tanaw thu, Centre hnuoia rorelna an dit thu, Tribal hai Pathien pathien hai Pathien ti le a dang dang haiin an khek tawl.
Rayburn College tuola duty le sitin protesta thang hai chun zanikhan peace rally neiin Tiddim Road zuiin CCPur Police station chen zuiin lamhrawna an nei a, Police stationa inthawk Tipaimukh Road zuiin rally hi an nei nawk. Hi huna hin mipui han mania roinrelna hran an dit thu; Tlangmi MLA hai inban raw hai seh; suolna neilo tuolthattu mi hung pedawk ro; Police station – thisena kan inchawksa a nih tiin an khek.
CCPur Police station tuolah iemanichen nuhmei ruol hi an khek a, hi lai hmuna sitin protest a thang hai khawmin an lo thlawp bawk.
ADC member hai Delhiah an inzin
CCPur: Mr Langkhanpau Guite, Chairman, ADC/CCPur inrawinain Mr Genneikhup, EM; M. Gouzamang Guite, EM; Ms Zamneiching @ Grace Zamnu, EM; Lalhrillien @ Hrila, MDC le Khaipao, MDC hai chu zanikhan CCPur suoksanin New Delhiah an inzin. New Delhia an cham sungin Manipur Assembly in Bills 3 a passed hai leia tulaia Manipura tlangmi hai buoina chungthuah PM Narendra Modi bakah Centrala thuoitu tum tum hai inhmupui an tum. Chun, Delhia an cham sungin tribal leaders tum tum hai inhmupuina le inpawlpuina nei an tum bawk niin ei thu dawngna chun a hril.
HYA GHQ le Hmarveng HWA in ralna
CCPur: HYA Gen. Hqrts. chun zanikhan Tribal Martyrs hai ralnain zanikhan JPO kuomah Rs. 4,000/ an inhlan nawk a, tuchena HYA in Tribal Martyrs 9 hai ralna dinga sum an pek chu Rs. 1.5 lakh a ni tah.
Chun, zanikhan HWA Hmarveng chun mithihai ralna dingin Rs. 2,000/ an inhlan bawk.
JPO donation boxah Rs. 5,15,740 a lut tah
CCPur: August 31, 2015 nia Bills 3 Assembly in an passed dodalnaa Churachandpur districta mipui helna nasa tak tlung leia mi 9 in thina an tuok bakah mi 30 chuongin hliemna an tuok le inzawmin Sept. 1, 2015 a inthawk khan thangpuina pe nuom hai ta dingin District Hospital campus, CCPurah Joint Philanthropic Organisation (JPO) chun donation box siemin an inthungpui a. September 18, 2015 chen khan JPO donation boxa mimal le pawl tum tum han sum an pek chu Rs. 5,15,740 a tling tah. Hieng sum hai hi damnaw hai enkawlna le thil tum tum thawna haia khawm hmang a nih tiin ei thu dawngna chun a hril.
Malaria Positive 35
CCPur: District Malaria Department/CCPur chun August, 2015 thla sung khan damnaw mi 2656 hai thisen laa an enfelnaah Malaria Positive pai 35 an hmu. Hienghai laia 24 hai chu Malaria PF le 11 hai chu Malaria PV an nih. Official recordah August, 2015 sungin CCPur districtah Malaria leia thi an um nawh.
Tawngtaia thang dinga fielna
CCPur: Tulaia ei rama buoina le harsatna ei tuok mek le inzawma inremna le muongna a um theina dingin “ Kei le ka Pa sunghan I dan kan lo bawsiet tah” ti thupuia hmangin Sept. 10, 2015 (vawisun) 10AM12:00Noon inkar sung hin Rengkai Cemetry hlui hmunah Pathien kuoma tlukluta tawngtairuolna nei rawt a nih. Hi huna thang ding hin Ms May Rose le Rev Lalngailien Joute han inhnikna nei taphawt thang dingin an fiel.
Headline:
October le November thla sung thawkngain Bihar Assembly Election nei ning a tih
new Delhi: Assembly seats 243 umna Bihar Assembly election chu October le November thla sungin thawknga (5 phases) a nei ning a tih tiin zanita New Delhi hmuna Press Conferenceah Chief Election Commissioner Nasim Zaidi chun a puong. Bihar a hin vote nei mi 6.68 crore an um a, paramilitary forces han polling stationhai veng an tih tiin Nasim Zaidi chun a hril. Tuta Bihar Assembly fe mek hun (term) hi November 29, 2015 a tawp ding a nih. Assembly Constituencies 243 hai laia Assembly Constituencies 47 hai chu Leftwing Extremist hai chetna a nih.
Bihar Assembly Election Notification chu September 16, 2015 a insuo ning a ta, hi election a ngir nuomhai chun September 21, 2015 chenin nomination paper file thei an ta, Nomination paper file a um hai chu September 24, 2015 in endik ning a ta, candidates inhnukdawk nuomhai ta dingin September 26, 2015 chenin inhnukdawk thei an ta, inthlang a thawkkhatna October 12, 2015, a thawkhnina October 16,2015, a thawkthumna October 28, 2015, a thawklina November 1, 2015 le a thawkngana November 5, 2015 haia nei ning a ta, votes tla hai chu November 8, 2015 in tiem ning a ta, model code of conduct chu hmang tan nghal ning a tih tiin Nasim Zaidi chun a hril.
Inthlang a thawkkhatnaah seats 49, thawkhninaah seats 32, thawkthumnaah seats 50, thawklinaah seats 55 le a thawkngana seats 57 haiah election nei ning a tih. Polling stations 62,779 hawng ning a tih.
Assembly seats 243 hai laia seats 38 hai chu Scheduled caste le seat 2 chu Scheduled Tribe hai ta dinga huol a nih. Bihar Assembly election a hin Electonic Voting Machines (EVM) hmang ning a ta, India rama a hmasa takna dingin EVM a hin candidate hai thlalak chuong a tih tiin Nasim Zaidi chun a hril.
Bills 3 hnukkir ninaw nih: Gaikhangam
Imphal: Zanita Hafiz Hatta, Imphal East a Echel Express Daily Newspaper a hawngna Manipur Dy. CM Gaikhangam in thu a hrilnaa chun, Goverment Bills 3 passed a um hai hnukkir ninaw nih tiin a hril. Bills haia hin tribal hai sietna ding a um naw a, Inban hi a solution a ni nawh tiin a hril bawk.
PMGSY lampui le leilak 296 suksiet
Imphal: Manipur Rural Development & Panchayati Raj Minister Francis Ngajokpa chun New Delhiah Union Minister of state Kiren Rijiju an hmupui a, tulai hnaia ruosur nasat leia tuilienin Manipur a PMGSY lampui le leilak 296 bakah thlai, bu le thil tam tak a suksiet a, siem thatna ding sum hung pe dingin a ngen niin zanita New Delhia Manipur Information Centre thusuok chun a hril.
Sept. 20 a inthawk BJP election
Imphal: September 20, 2015 a inthawk BJP Manipur State Unit election tan ning a ta, October 10, 2015 ah District Committee election le November 20, 2015 ah BJP Manipur State Unit President election nei ning a tih. BJP Manipur State Unit President election a hin tuta an President Th. Chaoba, Manipur Assembly Speaker hlui Dr H. Borobabu Singh le BJP Manipur State Unit President hlui Meinam Bhorot han an inchu el theia hril a nih.
Trucks 221 in Imphal an hung pan
Imphal: NH37 (ImphalJiribam Road) a Tuiruong leilak (Barak Bridge) siem zo a ni ta leiin zani zingkar khan Security escort in Trucks 221 hai chun Jiribam suoksanin Imphal an hung pan a, hienghai lai hin Oil tankers 22, LPG Bullet tanker 37 le thil dang dang phur Trucks 162 an thang niin ei thu dawngna chun a hril. Chun, Truck ruok tam takel chu thil phur dingin zanikhan Imphal suoksanin Jiribm an pan niin ei thu dawngna chun a hril.
AR han helpawl 2 an man
Imphal: 16Assam Rifles han zanikhan Pangaltabi ah PREPAK cadre pakhat L/cpl. Nawas Khan @ Waiba (19) of Pangalthabi an man a, Sagolmang PS ah an peklut. Chun, Sept. 8, 2015 in 22Assam Rifles han Hiyanglam Tera Pishak ah UNLF cadre SS Pvt. W. Premjit @ Peirabi Meitei (35) of Wabagai Tera Pishak an man a, Lakching PS ah an peklut. Chun, Sept. 8, 2015 in 20Assam Rifles han Moreh pana fe Maruti Van pakhat Bongyang, Chandel Districtah sukchawla an dapnaah Atao (33) of Lilong chu Khaini bur 540, Sajan Packet 1760, Dilbag Talab 4200, dumhmuom packets 4680 le Driving Licence pakhat leh an man a, Food Safety Officer, Chandel kutah an pek niin HQ IGAR (S) thusuok chun a hril.
Luikham Manipurah a hung inzin ding
Imphal: Ameishing Luikham, Secretary, Department of Public Enterprises & Ministry of Heavy Industries, Govt. of India chu September 1521, 2015 inkar sung khin Manipurah hung inzin a ta, Chief Secretary le Department tum tuma Secretaryhai Sept. 15, 2015 in inhmupui a ta, Sept. 16, 2015 in Tadubi le Senapati, Sept. 17, 2015 in Kangpokpi ah inzin a ta, Sept. 18, 2015 in CSR Conclave ah thang a ta, Sept. 19, 2015 in Ukhrul ah inzin a ta, September 20, 2015 in Imphal hungtlung nawk a ta, September 21, 2015 in Imphal suoksanin New Delhi pan nawk a tih tiin ei thu dawngna chun a hril.
Prof. Gangmumei Kamei a hung inzin ding
Imphal: Member, North Eastern Council (NEC) Prof. Gangmumei Kamei chu Manipura ni 12 lai cham dingin September 10, 2015 a inthawk hin Imphalah a hung inzin ding a nih. A cham sungin Manipur Governor, CM, Chief Secretary le Civil Society Organisations a thuoituhai le Public leaders hai inhmupui a ta, September 22, 2015 in Imphal suoksanin Shillong a pan nawk ding niin ei thu dawngna chun a hril.
JAC Sadar Hills in darkar 24 bandh
Imphal: Joint Action Committee (JAC), Sadar Hills chun Manipur Assembly in Bills 3 a passed hai leia buoina suoka mi 9 zetin hringna an channa thuah September 10, 2015 zanrila inthawk Sept. 11, 2015 zanril chen Sadar Hills areaa NH2 (ImphalMao road) inkarah bandh an thaw ding thu an puong.
ADC, Chandel le Tamenglong siem
Imphal: Zanikhan ADC, Chandel le ADC, Tamenglong hai siem an ni a, ADC Chandel Chairman in KSM Mathew thlang a ni a, ADC Tamenglong Chairman in N. Panmei le Vice Chairman in Guisinnung thlang niin ei thu dawngna chun a hril. Ei thu dawngna thenkhat ruok chun ADCs pahni siemna hi thul le ADC, Chandel siemna chu pawmlo niin a hril. (DD, Imphal Kendra & AIR, Imphal)
Sawrkar thlungpui hnuoia thawktu hai DA 6% in
New Delhi: Zanita Union Cabinet meeting chun sawrkar thlungpui hnuoia thawktuhai chu an Dearness Allowance (DA) 6% a sukpung dingin a rel. DA an hmu mek chu 113% a ni a, 6% a sukpung ding an ta leiin an DA hmu ding hi 119% a hung tling phak ta ding a nih. DA sukpunga um hi July 1, 2015 a inthawka hmang tan ding ti a ni a, thawktu nuoi 48 le pensioners nuoi 55 han an sawr tangkai ding a nih. April, 2014 khan DA hi 6% a sukpung niin 113% a kai phak a, DA pung hi January, 2015 a intahwka hmang tan a nih. 7th Pay Commission hun ruok chu Union Cabinet meeting in August thla khan thla 4 dang, December, 2015 chena dingin a suksei a nih.
Mizoram Governor kuomah memorandum
Aizawl: August 31, 2015 a Manipur Assembly in Bills 3 a passed dodalnain zanikhan Raj Bhavan, Aizawl tuolah HSA, SSPP, MSU, TKSU, MHWC le ZORO han protest an nei a, Mizoram Governor Nirbhay Sharma fe thlengin India President kuoma thawn ding Memorandum an pek. An Memorandum a hin Bills 3 passed a ninaa thua inrawl dinga an ngenna an zieklang. (Virthli news)
Maoist thlawptu 150 vel an inpe
Malkangiri: Zani hmasa khan Maoist thlawptu mi 150 vel hai chu Odisha state a Malkangiri district Police kutah an inpe a, hienghai lai hin village Committee members 2 le Naxalite cadres 4 an thangsa a, Odisha state sawrkarin surrender policy le Rehabilitation package policy a siem dungzuiin pawisafaia thangpuina pek ning an tih. August 31, 2015 khawm khan Malkangiri District sunga Silakota khuoah Maoist thlawptu mi 127 an lo inpe ta bawk tiin Mitrabhamu Mahapatra, SP, Malkangiri chun zanikhan Chanchinbumihai a hril.
Loneitu pakhat an khai hlum
Hyderabad: Zani zingkar khan Telangana state a Lower Tank Bund an ti hmuna loneitu kum 45 mi, Limbaiah B an tipa chu electric banah inkhai hlum saa hmu a nih. Limaiah B hi ni 3 liemtaa kha Hyderabad khawpuia inzin, a naupa damnaw private hospital, Chanderghat a admit le an khai hlum hma deu a temple pakhata fe a, thiempu pakhat kuoma Rs. 10,000 a va pek zo hnunga inkhai hlum a nih tiin A. Sanjeeva Rao, Inspector, Gandhi Nagar Police Station chun a hril. Telangana state a hin beidawng leia loneitu mani le mani inthat 43 an tling tah.
Chief Secretaries 5 inhriettirna pek
New Delhi: Acid Attack cases ah zanikhan Supreme Court chun Karnataka, Mizoram, Kerala, Madhya Pradesh le Jammu & Kashmir Chief Secretaries hai chu iengleiin am an chungah Court inzanawna case siem khum ni nawng an ta tiin inhriettirna a pek tawl a, dawnna hi haptakar hni sung ngeia pe dingin hun a pek. A hma khawmin hrilfiena pe dinga inhriettir an ni ta a, sienkhawm hrilfiena an pek naw leia inhriettirna hi pek nawn nawk an nih.
Antiterror Squad indin dingin
Ranchi: Jharkhand state sawrkar chun an state a helpawlhai do le tukdawltu dingin Anti Terror Squad (ATS) indin dingin a rel. An state Cabinet meeting chun ATS hnuoia thawk dingin post 283 a sangsawn nghal. ATS thawktuhai lai hin SP level officer 1, DSP 6 le Inspectors 11 thangsang an tih tiin official thusuok chun a hril. Ranchi hmuna RBI, IIT le CBI Office bawlna ding ram pek ni bawk a tih tiin Cabinet minister Raghuwar Das chun a hril.
Dimapur Smart City list a inthangtir dingin
Kohima: September 5, 2015 khan Nagaland CM T.R. Zeliang chun New Delhiah Union Urban Development Minister, Venkaiah Naidu an hmupui a, Dimapur chu Smart City list a inthangsatir dingin a ngen. Chun, September 6, 2015 khan Union Home Minister Rajnath Singh New Delhia a chengna inah an hmupui nawk a, mimkeiin Phesama hmuna lampui a suksiet chu an rang thei anga hung siem tha dingin T.R. Zeliang chun ngenna a siem. Hi lampui siet hin Nagaland le Manipur mipuihai ta dingin harsatna lien tak an tlun a nih tiin a hril.
Cheques 900 zet a neituhai kuom tlung lo
Jhansi: Uttar Pradesh state a khuo inthal leia loneitu harsatna tuorhai thangpuina dinga peksuok Cheques 900 zet el, Rs. 18 lakh chuong zet chu a neitu le a hmutu ding hai kutah tlung lova lak hmang a nih. Hieng cheques hai hi loneituhai suoi tehlem le Tehsilder hlui Durgesh Yadav hai suoi hmanga laksuok a nih ti suisuok a nih. Cheques hi loneitu mi 162 hai hminga ziek le peksuoka um a nih. Police in hi thu le inzawm hin case an registered.
Nuhmeihai ta dingin 100 ah 33%
Hyderabad: Central Industrial Security Force (CISF) thangsain Central Paramilitary Forces lakna haiah nuhmeihai ta dingin 100 ah 33% huol pek ning a tih tiin zani hmasaa CISF han National Industrial Security Academy (NISA) hmaa thu a hril huna a hrillang. Central Paramilitary Forces ah sipai 1.36 an um mek a, nuoi 2 intlingtir tum a nih tiin a hril bawk.
SPOs 2 silai leh an tlan hmang
Srinagar: Zani hmasa khan Jammu & Kashmir state a Doda districta Special Police Officers (SPOs) 2 hai chu INSAS Rifle 1, AK47 Rifle 1 le magazines hai leh an tlan hmang a, Army le Police han mankir tumin an zawng zing. SPOs 2 ralthuom le tlanhmang hai hi helpawl, Police kuta inpe anni a, an thangna hluia bawk an kir nawk a nih.
Pasal 2 pawisa lem Rs. 3.75 lakh leh man
Thane: Zanikhan Thane Police han Abdul Hamid Abdul Jappar Sheikh (32) le Sahid Shamsul Momin (24) hai chu India pawisa note tehlem, Rs. 1,000 note vawng Rs. 3.75 lakh zet le man an nih ti in N.T. Kadam, AntiExtorsion Cell (AEC), Thane Police chun a hril. Rs. 1,00,000 note tehlem hi pawisa note indik Rs. 30,000 peia zawr an tum niin Police chun an hril.
Rajasthanah Swine Flu leiin mi 3 an thi nawk
Jaipur: Rajasthana chun H1N1 (Swine Flu) leiin nuhmei pahni thangin mi 3 an thi belsa nawk bakah hi natna invawi thar 7 hmu belsa an nih. Hi lei hin tukum January thlaa inthawk Rajasthan state sunga Swine Flu leia mihriem thi chu 438 an tling tah. Hieng hai lai hin Jaipur khawpuia inthawk mi 87, Ajmer ah 48, Jodhpur ah 33, Nagpur ah 31, Barmer ah 23, Kota ah 22, Udaipurah 15, Chittorgarh ah 14, Sikar, Bhilwara le Tonk haiah 13 seng, Paliah 12, Jhunjhunu ah 11, Churu ah 10 hai an thang.
ISRO in Gandhi Peace Prize an dawng
New Delhi: Indian Space Research Organisation (ISRO) chu Gandhi Peace Prize, 2014 dawng dinga thlang a ni angin zanikhan President Pranab Mukherjee in Gandhi Peace Prize, 2014 chu ISRO kutah an hlan. Hi prize hi kum 1995 a inthawka indin tan le pek tan (Mahatma Gandhi 125th birth anniversary) lo um ta a nih. Award a hin sumfai Rs. 1 crore bakah citation a thang.
AAPSU in Ravi kuomah Memorandum
NEw Delhi: September 8, 2015 khan All Arunachal Pradesh Students Union (AAPSU) thuoitu han Naga Peace Accord a Interlocutor Ram Narayan Ravi New Delhiah an inhmupui a, Memorandum an pek. An memorandum a chun, August 3, 2015 a India sawrkar le NSCN(IM) han “Naga Peace Accord” an zieka hin Arunachal Pradesh a bikin Tirap, Changlang le Longding district hai inhuomsatir ninaw raw seh tia an ngenna an zieklang sa.
-----------------------------------------------------------------------------------------------------------------
VAWISUN THUPUI
Lalpa chu a hnai a, ienga khawm lunginzien naw ro. Iengkimah tawngtai le hniin lawmthu hrilsa peiin in dithai chu Pathien kuomah inhriettirin um lem raw se. Philippi 4:56
Editorial
Thurawn tha petu ding
August 31, 2015 nia Manipur Assembly in Inner Line Permit System (ILPS) le inzawma bills 3 a passed le inawma Tribal mipuihai thil ngen chun ra an suo tan mek a, ei thangruol pei chun ra tha a hung insuo pei ring a um. Hi thu ei ziek lai chena Manipura tribal MLAs 20 umhai laia 6 chun MLA an ninaa intahwka an inbanna an pek ta a, hienghai lai hin Naga Peoples Front (NPF) MLA 4, Nationalist Congress Party (NCP) MLA 1 le Indian National Congress Party (INC) MLA 1 an thang. Manipur tribal mipui hmakhuo ngaina leia an nina haiah inthawka an inban ngamna le an inpekzona hi a ropui a, Maniupr a tribal mipuihai ta ding chun inza a um a, chawimawi khawm an phu hlie hlie a nih.
Manipura tribal mipuihai hi ei dit dan le tha ti zawng chau ni lova Pathien hriezing pum le ti dek puma thil ei thaw a, ei thangruol a, ei insuikhawm thei a ni phwt chun ei thil ngena hin hlawtlingna changin a ra tha tak el ei la sik thei ngei beisei a um. Ei state sawrkar khawm a lungril a hung innem pei ding niin an lang. Tulaia Manipur a tribal mihai thil ngen le hmalakna le inzawmin State Cabinet meeting zani (992015) a nei a ni a, ieng am an hung rel ding ti chu tribal mipuihai hreit nuom a ni leiin tlumte thlirin an lo thlir a nih.
Upa han pasal tam le lungvar tam an lo ti angin mimal annawleh pasal pakhat chau ngaituona, thiemna le varna ringawt hin chu thiltha ding hi hriet suok a harsa hlak. Hi lei hin thurawn tha le ngaidan tha mi hrilpui theitu ding hi mimal le pawl tum tum hai hin ei mamaw takzet el a nih. Minister, MP, MLA, MDC, officer lien le lekhathiem khawm ni inla thurawn tha petu hi ei mamaw seng a nih. Ei MP, ei CM, ei ministers, ei MLAs, ei MDCs, ei officer le lekhathiem, mi chung ena ei ngaihai hin thurawn tha petu (adviser) an mimalin an nei tawl dim chu maw? Ei state sawrkar khawm hin Group of Advisers a nei dim chu maw? A la neinaw chun a nei vat a tul a nih. Group of Advisers a hin hnam tina mihai an thangkim ngei ding anih. Ei state sawrkar hin thurawn tha petu ding Group of Advisers hi a mamaw hle niin an lang.
A hmaa ei hril ta angin sawiselna tha theida ding a ni naw a, thurawn tha a ei pawm lem ding a nih. Tulaia JAC indin a um hi ieng JAC am a na tia indawnna um khawm hi JAC thuoituhai ta ding chun thurawn tha niin an lang. Mi han JAC (Joint Action Committee) an indin chun kawk a nei hlak. Entirnain Mr Thanga thi dan pangngai lo le ringhla um takin a thi a, hi thina thu le inzawm hin JAC ti ringawt indin nisienla chu mi han a umzie hrie ngainaw nihai. Amiruokchu, “JAC Against the killing of Thanga” ti hung nisienla chu hrilfie ngai kher naw nih. Hi lei hin JAC ti ringawt nek chun JAC Against AntiTribal Bills passed by Manipur Assembly, Or JAC for Separate Administration in the Hill Areas or a dang dang ti inla chu umzie nei deu a ta, hrilfie khawm tul naw nih.
Thurawn tha le ngaidan tha neihai chun ip lova tlang rawnga hrillang ding a nih. Thil hrim hrim a ruk, an diklo, a thienghlim lo, hmu le fe tlang thei lo a hung um pha leh mimal, pawl le kohran hai lai khawm buoina a hung suok hlak a nih. Hieng a ni lei hin Manipura tribal mipuihai thangruola ei hmalakna le inzawma thurawn tha neihai chun ei hotuhai kuomah insum lo le inphalam der lova hril ve el ding a nih.
Ei thiemna, ei varna , ei hrietna le ei lungvar tha hai po po hi ei thawkhawm a hun lai tak a nih. Tha le zung, sum le pai hai chau hi ei mamaw a ninaw a, thurawn tha le ngaidan tha hai hi ei inhriltuo mawl mawl a tul bek bek el a nih. Tuta JAC ei ti khawm hin Inpuihai le tlawmngai Pawl le CSO hai bakah Adviser in dan hrie mihai, upahai, Constitutional expert le mithiemhai Group of Advisera a siem le a nei ve thiltha a ni ring a um. Chun, nitina sum hmuzat le hmangzat hai hi mipui hriet dingin media hai hmangin puonglang thei sienla chu ei hmalakna le inthuruolna sukhrattu a hung ni ngei ring a um.
