Hmasawnna Thar | 01 August, 2015

ADC/CCPur Chairman dingin  Langkhanpau Guite thlangtling:

Vice  Chairman Election  Aug. 3 a nei ding

CCPur: Autonomous District Council (ADC)/CCPur a  Chairman ding thlangna (Election)  July 31, 2015, 11AM khan Distrit Council Hall, Tuibung, CCPur­ah Secretary/ CEO; DC/CCpur le Presiding Officer Lalhmangpui Fimate, MDC hai inrawinain nei a nih. Chairman election­a ding hin   Langkhanpau  Guite, MDC (10­Tuivai) le Demmang Haokip, MDC (Kholmun) han nomination an file a,  MDCs 24 um hai lai  Presiding Officer in vote a thlaknaw a, Langkhanpau Guite chun votes 16 hmuin Chairman,  ADC, CCPur dinga thlangtling a ni a, an khingpui Demmang Haokkp chun votes 5 a hmu a, vote thi (invalid) 2 a um. Presiding Officer Lalhmangpui chun Chairman thar dinga thlangtling Langkhanpau  Guite chu intiemkamna inneitirin Certificate inhlanna a nei nghal.

   

Mr Langkhanpau Guite chun member MDCs hai thlawpna thua lawmthu a hril a, DC, DLOs le MDCs hai leh \hangruola sin thaw tlang dingin a fiel a, member hai chu Kristien nina chawisang seng dingin an fui. Hi huna hin MDC hai aiawin India President hlui Dr APJ Abdul Kalam sun thu a puong bawk. Chairman dinga thlangtling a ni le inzawmin,  District boundary humhal a ngaithu, term hluia thutlukna siem tasa hai ennawn le 6th Schedule hmu theina dinga member hai le hma lak pei a ni ding thu Langkhanpau chun a hril.

   

Traffic Rule siema  um chu MDC hai chu bawse ngailo dingin a ngen bakah MLA le Ministers hai khawma bawse ta ngailo dingin a ngen bawk. District Council hnuoia staff post ruok 200 chuong um hai sukbit a ni theina dinga hma lak pei a ni ding thu; Centre  Govt. le UPF le KNO han inbiekna an nei theina dinga member hai chu hma la tlang dingin a ngen a, election neia um hin inhmangaina, inremna, inngainatna le district ta dinga damna hung intlun ngei sien a nuom thu a hrila Pathien hre zing puma  mipui rawngbawl dingin MDC hai a fiel.

   

Hi huna hin  Pu Lunminthang Haokip,  DC, CCPur bakah MDC \henkhatin thuhrilna hun an hmang a,   District Council hnuoia thawktu han  Langkhanpau hi lawmpuina thilpek an inhlan tawl.

     

Chairman ding thlangna zo a nita le inzawmin  Vice Chairman ding thlangna (Election) chu August 3, 2015, 1:00PM in District Council Hall, Tuibuong­a nei ning a tih. Hi le inzawma Secy./ CEO/ ADCC in  Electin Notification an suo dungzuiin  Vice Chairman post inchu dinga ngir nuom han  August 3, 2015, 10AM­12:00 inkar sungin  ADC Office­ah nomination file thei an tih. Sun dar 12:30 in  Scrutiny um a ta, Candidate pakhat neka tam an um chun secret ballot hmangin Vice  Chairman ding thlangna (Election) um a tih.

Kohran hai le \hangruola society siem\hat ding

CCPur:   Dr L.S. Gangte,  Adviser, Society for Fast Justice (SFJ), CCPur chun,  mimal le pawl tum tuma indaidanna (Social, Economic, Political & Religious injustice) hai sukbo a ni theina dinga SFJ­CCPur hi indin a ni thu a hril a, SFJ­CCPur thiltum points 22 hai laia \henkhat chu Social reformation; Economics reformation; Political reformation le Kohran hai le \hangruola ei Society siem\hat ding; Christian nina chawisang ding le indiknaa rorel ding; mi rethei hai  a thei chena sawmdawl ding ti hai a ni thu a hril.

    

SFJ­CCPur  hi March 1, 2015 a indin a ni a, tuhin Manipur  Societies  Registration Act, 1989 (Regd. No. 23 of 2015) hnuoia registered a nita thu le Emmanuel House, Bethel­ah Office  hawng a ni thu  L.S. Gangte chun a hril.  Kohran hai chu SFJ hmalakna thlawp dingin a ngen.

Nurses han Orientation training

CCPur: District Health Society/CCPur huoihawtnain zani 11:00AM khan Synod Hall, IB Road, CCPur­ah CHC le PHC haia regular le contract a thawk Nurses hai ta dingin ‘Orientation training on Enhancing Performance of Nurses at Sub­ Centres Level” nei a nih.  Hi huna hin Dr Thangchinkhup Guite, CMO/CCPur in thu a hril bakah Ibomcha Singh, State Data Manager; Nalani Devi.PHN/ CCPur; Vung Mary, DCM/CCpur le  Dr VC Pau, DFWO  hai resource person in an \hang.

MDC lawmpuina  an nei

CCPur: Simte Tribe Council, GHQ chun zanikhan Simte Inn, Simveng­ah 5­Thanlon biela MDC dinga thlangtling Th. Jamchinthang lawmpuina an nei a, Rev. K. Hangnung, Executive  Secy. NTBCA in MDC ta dinga \awng\aipekna a nei a,  thilpek inhlanna hun hmang a ni bawk.

Manmasi Digest a suok nawk tah

CCPur: Manmasi  Digest (June­July, 2015) issue chu a suok nawk tah. A tiem  le an chaw nuom hai ta dingin Agents hai le  a zawrna dawr tum tum haiah inchawk thei ning a tih.

Dist. Orientation on IDCF

CCPur:August 1, 2015, 11:00AM hin District Health Society, CCPur hmalaknain CMO Conference Hall, CCPur­ah  CHC le PHC haia Medical Officer i/c; Block Program Management Unit staff; ASHA  Facilitator hai le District Hospital­a Nurse hai ta dingin  ‘Dist Orientation on Intensified Diarrhoea Control Forthnight (IDCF) program  um a ta,  Intensified Diarrhoea 2015­16 thaw dan ding rel bawk an tih.

Ruotui tam leiin inkhel sukchawl phawt

CCPur:  CDSA huoihawtna hnuoia Public Ground, CCPur­a  (L) Lianboi  Simte Memorial District Super Division League 2015 khel mek chu ruotui tam taluo leiin  thuthar um nawk hmakhata dingin football inkhel sukchawl (postponed) phawt a nih. Inkhel \an nawk hun ding a hnunga ruot nawk ning a tih tiin CDSA thusuok chun a hril.

O.Lukhoi MLA disqualification cheltang; Dr S. Sekharjit,  Director,  RIMS a ruot nawk dingin

Imphal:   Manipur Legislative  Assembly Speaker in Wangoi  A/C MLA O. Lukhoi a disqualified­na Order chu zanikhan Manipur  High Court in a cheltang (stayed). Stay Order hi Manipur High Court Chief Justice Lakshmi Kanta Mahatpatra in an suo. HI thua hearing chu August 19, 2015 a nei dingin Court chun a ruot.  O. Lukhoi in a biela repoll neina ding thua khawm Manipur High Court inrawl dingin a ngen a, sienkhawm Court thuneinain a huopsa nawh tiin a hril.  O. Lukhoi hi May 27, 2015 a Speaker in Kh. Joykishan le Th. Bishwajit hai le a disqualified an nih.

            

Manipur High Court chun tu ta inthawk haptakar 3 sungin  Dr  S. Sikharjit chu RIMS, Imphal a ruot nawk (re­appoint) dingin Board of  Governors, RIMS, Imphal an hriettir. Tuhin Dr Rita in Director, RIMS  in­charge in a chel mek a nih. Hi Order hi zanita Manipur High Court  Chief Justice Lakshmi Kanta Mahaptra in an suo a nih.

Tuilien leiin harsatna nasa tak an tuok; Chakpi leilak a chim

Imphal: Tulaia ruo a sur zing leiin Thoubal,  Bishnupur le Chandel District haia  tui nasa takin a lien a, mi sang telin harsatna  nasa tak an tuok pha.  Tuilien hi  Thoubal District sunga Heirok, Wangbal, Wangjing, Wangjing Tentha, Selungpham le Kakching haiah a zuolkai bik a, Relief Camps  hawng a nih. Wangjing­Tentha A/C MLA, P. Brojen chun tuilien leia harsatna tuortu hai \hangpuina  a pek tawl.  Chandel District sunga  Chakpi leilak chu tuilienin a sukchim bakah Chakpi vadung  bul hnaia In 5 hai chu tuilien hin a lenhmang  bawk niin ei thu dawngna chun a hril.

Members 3 han inbanna an pek

Imphal: ILP le inzawma Manipur sawrkarin members 5 umna  Drafting Committee an din hai  laia members 3,  R.K.   Anand, MLA; N. Biren, MLA le Dr Ng. Bijoy, MLA hai chun zani hmasa khan an Chairman Th. Devendra Singh, Minister (Law &  Revenue) ni bawk kutah an pek nia hril a nih. Hieng laizing hin Kh.  Ratan, JCILPS Convenor­in­charge chun,  State sawrkarin ILP Bill thar siemna ding thua mipui ringzo theia a um hmakhat chu JCILPS in sawrkar inbiekpui naw nih tiin a hril.

Cabinet meeting nei a nih

Imphal: Zani zantieng dar 3 a inthawk khan CM O.Ibobi Singh inrawinain  Cabinet meeting nei a nih. Cabinet meeting a hin Armed Forces Special Powers Act, 1958 dungzuia Manipur­a  Disturbed Area hun suksei nawk ding thu, Manipur  State Scheduled  Tribe  Commission thu, JNIMS a sin lak thar ding thu, MSPCL, MI le IFCD haia AE le SO sin lakna ding thu bakah  VDF hai hun 1­4­2015 a  inthawka kum khat dang  31­03­2016 chena suksei nawk ding thu hai an hriltlang niin ei thu dawngna chun a hril.

Mimkei leiin Imphal­Moreh infepaw thei lo

Imphal: Zanikhan I mphal­Moreh  Road Senam le Tengnoupal inkarah mimkei a tlung a, lamlien a tlahnuoi bakah a chim tla leiin  Imphal­Moreh chu infepaw thei lovin a um. Moreh a inthawka Imphal pana hung motor chi tum tum 100 chuong  Tengnoupal  Bulah an intang. Bongjang le  Senam inkara khawm lamlien a tlahnuoi bakah Tengnoupal le Saivom inkara khawm mimkei a tlung bawk.

Yoga compulsory ninaw nih: Naik

New Delhi: India rama inchuknainhai po poah Yoga hi Compulsory ninaw nih, sawrkarin   Compulsory dingin remruotna (plan) a nei nawh. Amiruokchu, Central Board of Secondary Education  (CBSE) hnuoia affiliated  Schools haia chun  physical le Health Eduation le fekawp dinga ti a nih tiin Urban AYUSH Minister of state Shripad Naik chun zanikhan Rajya  Sabha an hriettir.

Jammu le Srinagar­ah AIIMS

New Delhi: Zani hamsa khan Jammu & Kashmir Deputy CM Nirmal Singh, J&K Health Minister Lal Singh le Jugal Kishore, President  BJP J&K han New Delhi­ah Union Health Minister J.P. Nadda an inhmupui. Hi huna hin Jammu and Kashmir state­a Jammu le Srinagar haiah All India Institute of Medical Sciences (AIIMS) indin a ni ding thu Mr Nadda chun a lo hril.

Bihar­ah thilpuokthei tam tak  dapdawk

Gaya:  Bihar­a Gaya district sunga Chhatarpur village huop sungah zanikhan Bihar Police­a Special Task Fore (STF) han thilpuokthei tam tak dapdawkin an man. Thilpuokthei an dapdawk hai lai  Gelatin tluon 1,000; Cylinder bombs 3, explosive code, detonators le  thil dang dang a \hang tiin  IGP (Operations),  Sushil M. Khpde chun a hril. PM Narendra Modi chu August 9, 2015 khin Bihar­ah an zin ding a ni a, hi lei hin venghimna nasa taka sukkhau a nih.

ULFA VP le JIO an innei

Guwahati: Pro­talks ULFA Vice Chairman Pradip Gogoi (56) chun hun sawt taka  inthawka a lo inngaizawngpui Julie Baruah, Joint Information Officer (JIO), Directorate of Information & Public Relation, Govt. of Assam chu July 30, 2015 khan nuhmeiin a nei. Julie Baruah hi May 13, 2006 a  motor eksiden leia a kut khinghnia tanbawng pek a ni a, tuhin kutlem hmangin thil a la thaw thei a, lekhabu iemanizat a ziek ta a nih. Pasal a neini  kha kahwvela a hlim ni tak a ni thu Julie Baruah chun a hril.

Kum 2013­14 in TB natna leiin mi 41,956 an thi

New Delhi: India ramah Tuberculosis (TB) natna  invawi mi 26 lakh vel an um a, thina tuok ta chu 2.4 lakh vel a riruong a nih tiin zani hmasa khan Union Minister of state for Health, Shripad Naik chun Rajya Sabha an hriettir. WHO chun kum 2013­14 sung khan TB natna leiin mi 41,956 an thi niin a hril. May, 2015 chenin HIV/AIDS invawi  8,69,576 an um niin WHO chun a hril bawk.

SC in a nau sukthlak a remti pek

New Delhi: Gujarat a inthawka nuhmei tleirawl kum 14 mi, suollui a ni leia naupai chu July 28, 2015 khan Supreme Court (Medical Panel) chun a naupai sukthlak a phal pek. Gujarat High Court in a naupai hi sukthlak a phalnaw leia Supreme Court­a nuhmei tleiraw hin ngenna a siem a nih. Dan dungzui chun haptakar 20 chuong a tling ta chun nau sukthlak hi phal lo a nih. Tuta nuhmei tleirawl naupai hi haptakar 25 a tling ta a nih.

Kum 3 sungin IAF vuongna 30 in tuoksiet a tuok

New Delhi: Kum 2012 a inthawk July 27, 2015 inkar sung khan Indian Air Force (IAF) Vuongna 39 in tuoksiet a tuok a, hienghai lai hin Helicopters 14 an \hangsa a, defence personnel 36 an thi bakah civil mi hai thil a suksiet chu Rs. 4,43,800 manhu vela riruong a nih tiin Union Defence Minister Manohar Parrikar chun zanikhan Lok Sabha  an hriettir.

Ruolbanlohai ta dingin sin ruok 14,267

New Delhi: Sawrkar thlungpui hnuoia Ministries tum tum, Banks, PSUs haiah piengphunga ruolbanlohai ta dingin Sin Ruok post 14,267 a um a, hienghai laia post 2,990 chu Gruop ‘A’ an nih tiin Union Minister of state for Personnel Jitendra Singh chun Rajya Sabha an hriettir. Hieng sin ruok hai lakna ding hin Special Recruitment nei ni  dingin Jitendra Singh chun a hril.

Uisa insuongluirtutu pasal 1 man

Lucknow: July 29, 2015 khan Uttar Pradesh state a  Greater Noida huop sunga Officers Colony, Gamma Sector­I a Restaurant “My Spice Cafe” neitu Avinash Kumar chu pasal naupang  kum tlinglo hai Uisa insuongluitir a tum leiin Police han an man. Pasal naupang 3, kum 5­8 inkar mi a umpui a, nasa taka a sukrimsi bakah an thu le hla lovin Uisa an suong tir tum a nih. Uisa hi an suong nuomaw chun electric in a dep  hlak niin naupang 3 hai hin an hril. Ui khawm a restaurant sungah hmu a nih. Uisa hi Nigeria  tlangval, hi lai hmuna cheng han an du hle a, an fak rawp hlak leia Uisa hi a zawr sa hlak a nih. Naupang 3 hai hi Jharkhand State mi anni a, Childrens’ Home ah sie an nih.

Nepal­a mimkei leia thi mi 34

Kathmandu: Zani hmasaa Nepal rama Kaski, Myadi, Baglung le Chitwan district haia mimkei rapthlak takel tlung leia mihriem thina tuok chu 34 an tling ta niin SP, Pal chun a hril. Chun, mi iemanizat an umna chin hriet lovin an inhmang a, zawng mek an nih tiin a hril. Nepal sawrkar chun thina tuok sunghai kuoma zangnadawmna Rs. 140,000 seng pek a ni ding thu a puong.

BSNL in  kum 3 sungin Wi­Fi hotspots 40,000

New Delhi:  Bharat Sanchar Nigam Limited (BSNL) chun tuta inthawk kum 3 sung  Rs. 6,000 crore sengin  India ram hmun tum tum haiah Wi­Fi hotspots 40,000 siem a tum tiin BSNL Chairman­cum­Managing Director Anupam Shrivastava chun zanikhan a hril. Hi thil hi wireless local area network fethelnga mipui han internet an hmang theina ding a nih. BSNL chun tuchena hin India ram hmun 70­75 haiah Wi­Fi hotspots a siem tah. Wi­Fi hotspots pakhat siemnaa sum seng dinga hisap chu Rs. 10 lakh pei a nih.

RBI in Rs. 10 thir thar

New Delhi: International Yoga  Day le inzawmin Reserve Bank of India (RBI) chun  Rs. 10 thir (Coin) thar siem a t um. Rs. 10 thir thara hin International  Day of Yoga ti le Yoga for harmony and peace ti English le Devnagiri script a ziek inchuon ning a tih.

Kum 10 rimsi  taka lungin intang ding

Dimapur: July 30, 2015 khan District & Session Judge, Dimapur chun nuhmei kum 11 mi sulluitu Mithun Prasad chu  rimsi taka kum 10 sung lungin intang dingin thiemnaw an changtir. Mithun Prasad in nuhmei a suollui hi a nauhrawn a nih.

Pak. in Ceasefire vawi 1140  a bawsiet

New Delhi: Kum 2013 a inthawk June 30, 2015 chen khan Pakistan sipai han ramri zulah Ceasefire puonga um vawi 1,140 zet an bawsiet ta a, tuta kum fe mek sung hin vawi 199 an bawsiet ta tiin Union  Defene Minister Manohar Parrikar chun zanikhan Rajya Sabha an hriettir.

--------------------------------------------------------------------------------------------------------------

VAWISUN THUPUI

Chun, Lalpa chun \huoi rawp a ti cheh a, hmun \awla khawm sukkhawp a ti che a, i ruhai khawm sukhrât bawk a tih; chun, huon tuia châwm ang le, tuihnâr kang ngai lo ang ni tâng i tih.  ­Isai 58:11

Editorial

Sawiselna  le a dawngsawng dan

Sawiselna hi mi hran hran han ei lak dan le ngaidan an ang naw hle ring a um. |henkhat chun lungsenna le \henkhat chun insiem\hatnain ei hmang el thei. Mihriem seng ei ni a, sawisel lo ding hiel khawpa fel le \ha famkim chu  um der nawng ei tih. Sawisel lo dinga ei inngaina tak hi sawisel \ul ei nina a ni nuom hlak. Iengti kawng zawng khawmin ei fel famkim naw ding, ei \ha famkim naw ding a nih ti hi ei inhriet tlang a \ul. Pathien naupa Isu meu khawm sawiselin a um a ni kha!   Chuleiin sawiselna hi a lo dawngsawng dan thiem a \ul khawp el.

    

Mi \henkhat chun sawiselna hi lungsen em emin an dawn let nghal hlak. A \hen chun dawnlet der lovin an tosan hlak. A tosan tlat chun an inkar a hung inhla hlak. A \hen chun thiemchang tumin an inhrilfie hlak. |henkhat ruok chun anni le anni an intum a, anni le anni thiemnaw an inchangtir hlak. Sawiselna hi mi tlawmte chau in sawisel an hlawna lai kha an dik ni thei a tih tiin an dawngsawng thei a, insut kirna le insiem\hatnain an hmang hlak.

    

Sawiselna hi sut chieng tum lova a theida  zawng le invet thlak deuva ei lak chun, a tir chun thiem ei  inchang a ni el thei, huoisen khawm ei inti el thei; nisienlakhawm a hnunga chun a mi sawiseltuhai le ei inkar kha kak lien tak ei siemin ei lo suk chat der a ni thei. Chun, a mi sawiseltuhai kha ei hotuhai anni lem chun, ei ta dinga \hatna nekin sietna min tluntu a hung ni ding a nih. Sawiselna hi dawngsawng dan thiem \ul takel a nih.

    

A lunghnuol le a lungsen zawnga a dawnna ei pek a ni khawmin mani le mani ei inhrem thlawn mei mei a ni el thei.  Ei lo dawngsawng dan kha a hriltu tum dan khawm a lo ninaw el thei. Inngamtlak leia a lo hril kha thutak deuin ei lo lak a, ei lo tuorna vieu chun ei tuor thlawn mei mei thei bawk.  A mi sawiseltu le ei ni kar kha ei suk hla sawt lem bawk thei.

    

Sawiselna lawm taka lo dawngsawngtu chun midang ang bawkin a thaw diknaw thei a nih ti an hriet a ni hlak. Mitin hin  fel nawna ei nei seng a, ei fel nawna le tlin nawna tam tak hi mani chun ei inhriet chieng tawk naw rawp hlak. Chuleiin, sawisel ei ni hin ‘ ka lo sukdiknaw amani ding aw” tiin insut let lem hlak inla a \ha lem hlak. Chu bakah a hnunga dingin ei thawfuk lem dai thei a nih.

            

Chuleiin, sawisela ei umna kawnga hin thil tam tak ngaituo hlak ding a nih. A sawiseltu che ngirhmunah hang insie sin ve la, nang le nang inhmu fie thei lem i tih. Mi mi sawiselna hi nun siemna kawnga \hangpuitu \ha tak a nih ti hriet a \ha. Ruol iemanizat laia ei felnawna mi sawisel nuomtu chu  ei lakah an hawng tina a nih. Dawnna innemin lungsen a sukbo hlak an lo ti angin, “ I mi sawiselna chu an dik el awm ie,” annawleh “ Mi \hangpui i nuom ti ka hrietthiem khawpel” ti damin dawn la, in inkarah harsatna umnaw nih.