Responsive Ad Slot

Mizoram-a selkaltu pawl ha’n Congress chanchinbu an raw

Monday, July 20, 2015

/ by VIRTHLI HMAR
Congress sawrkar chu puithiem hmusittu tiin nastakin an dem
Aizawl, 20 July, 2015 (Virthli News)Mizoram a selkaltu pawlhai chun Congress Chanchinbu a ‘questionnaire’ insuoa um chu Pastor hai hmusitna a nih tiin an ditnaw zie in entirna’n vawisun khan Vanapa Hall tuolah a copy an rawh.


Mizoram Pradesh Congress Committee (MPCC), Media Department in thlatina ansuo “Congress Thlifim’ (July Issue) chun “Tunge Sawrkar Policy Do” ti thupuia hmangin questionnaire mak tak el a siema. Questionnaire ah an ziek dan chun Mizoram Liquor Prohibition & Control (MLPC) Act hmang a ni hnunga Congress sawrkar thilthaw a ni leia nasataka sawisela, dodal dinga mipui inchuktir hlaktu pastor hming, Biel hming le ieng hun am a sawisel hlak ti hai zieklanga, MPCC, Deptt or “Congress Thlifim’ Editor kuomah thelut dingin tiemtu hai chu ngen an nih a. 

Hieng anga zawhna dengkhawng tak siema, Congress sawrkarin Pastor hai chunchangah mipui ngaidan lâkkhawm tuma hma a lakna hi Thiempu/ Pastor hai hmusitna a ngaiin vawisun khan Mizoram-a selkaltu/eptu pawl- MNF, MPC, BJP le ZNP ṭhalai hai chun MNYF Gen. Hqrs inrawina hnuoiah ‘Congress Thlifim’- (July Issue) copy hi an raw a nih.

Selkaltu pawl ṭhalai (youth wing) ṭhuoitu hai hril danin “CONGRESS THLIFIM” July, 2015 Issue ah ‘questionnaire’ suksuok a ni hma khan MPCC, Media Department-a mi ṭhenkhat chu an hotuha’n an tir leiin Mizoram Presbyterian Synod Office-ah “Presbyterian Pastor hai hming list’ an hni suok ti hriet a ni a. Hienga Pastorhai hming list ‘Kristian Thalai Pawl’ (KTP) hming meua la suoka an thil thaw dan hi a rapthlakin, pawisak an nei naw hle a nih, an ti bawk

Selkaltu pawl hai hin Joint Resolution siemin Congress sawrkar chu nasataka an demthu an puonga. India ramah BJP le Congress sorkar hnuoiah Sakhuo dang betu ha’n harsatna tam tak an tuok hlaka. Sienkhawm hi hi chu Sakhuo le Sakhuo inkar, mani sakhuo chawikang tumna le sakhuo dang sirde tumna a ni a. Hieng hi ni lova, Kristien sakhuo zuitu hai laiah mani Kohran inlawina Berampu(Pastor)- hai insui zuina le indiknaw taka sawisak nuoma le tuma hi khawvel ram danga thil la tlung ngai lo a ni leiin opposition party hai chun Congress Party thilthaw dan hi an demin to pui ṭawk ṭawk an tumnaw thu an khek suok pui bawk a nih.

Kha hma met khan Congress sawrkar chun thusuok siemin an chanchinbu- Congress Thlifim a ‘Questionnaire’ siem le inzawmin kohran le Mizoram mipuihai kuomah thupha a lo chawi taha, CM Lal Thanhawla khawmin mimal inhnina lei chaua questionnaire chu siem a ni thu le Party hrietpui a ninaw thu a lo hril tah a nih. Hi baka hin July ni 16 khan Congress Thlifim publisher pahni, hi thila inhnamhnawi ni dinga ngai hai chu publisher an nina a inthawkin an lo inban ta bawk
Don't Miss
© all rights reserved
made with by Simon L Infimate