January, 2016 ah Aizawl FC in I-League Mizoram ah ankhel ding

Aizawl, 21 July, 2015 (Virthli news): All India Football Federation (AIFF) official mi pathumhai chun July 20, 2015 khan Rajiv Gandhi Stadium, Mualpui a mi chu a hmunah sirin I League khelna tlak a ni le ninaw an enfie a, vawisun July 21, 2015 chawhma khan Mizoram PWD Minister le Mizoram Football Association (MFA) president ni bawk Pu. Lal Thanzara chu a office-ah hmuin report an pekna ah Rajiv Gandhi Stadium chu rouhmangna an fepui angin I League khelna dingin a tha tawk thu an hril.

     
PWD enkawltu Minister Pu Lal Thanzara chun, "Rajiv Gandhi Stadium hi siem mek a la ni a, siem zo hunah chun changtlung tak a ni ding a nih. Tu ruok hin chu a chanve vel chau siem a la ni a, chulai zing chun January, 2016-a Aizawl FC-in I League an khel theina dingin a tul taphawt thaw kan tuma, kan hlawhtling ngei kan beisei a nih," tiin AIFF hotuhai hi a hril.

AIFF tienga inthawk in Indranil Das, Assistant Manager, Club Licensing & League Operations; Akshay Rohatgi, Manager, I-League le Savio Medeira, Manager Coaching and Academy-hai chu Aizawlah hungin, July 20 (Thawhtanni) khan Rajiv Gandhi Stadium hi a hmunah an endik tah a nih.

Indranil chun, "Tuta ruahmangna anga Rajiv Gandhi Stadium hi siem thei a ni chun I League khelna ding chau ni loin Asian Football Confederations hnuoia inkhelhai khawm tlung thei a ta, international match chenin football inkhelna’n an hmang tlak ding a nih”, tiin a hrila; tukum sung ngei hin Rajiv     Gandhi Stadium chu zo hman a tul ding thu a hril bawk.

     
Harsatna lien tham a um naw chun January, 2016-hin India rama football club hai inelna sang tak I League hi Aizawlah  inkhel thei ding ni’n an lang.