HT
Sunday Sermon (12 July,2015)
HMUN
MAK DEU AH I UM MAW?
(ARE
YOU IN A STRANGE PLACE?)
“Chun, Jonah chu Nga phing sunga inthawk chun
Lalpa a Pathien kuoma chun a tawngtai a”. Jonah 2:1
~ Rev. HM
Songate
Bible a
tawngtaina a ziek popo ah Jonah tawngtaina hmun hi a damglam el ni lovin a mak
hle a nih. Mihriem hrim hrim hmun danglam deu le mak deu tak, an ni le inhmelo
na hmun ah an um phat chu an um nawna dinga um an ni hlak. Chuong ang mi chu mi
thu awilo, mani in control zo lo, insum theilo dam le mi kawmaw tak an ni nuom
vieu. Imphal ah BA kan inchuklai Hmar company ah kan inkhawm hlak a. Tumkhat
chu pastor in a mi hung kan a, zing inkhawmna ah Holy Communion (sacrament)
rawngbawlna a nei a. Sun hunah thuhril dingin kan lo nghak leh a hung inlawi ta
naw el a. Hun sawt deu hnung chun a thlan khu barin a hung hnak hnak a. “Pu,
khawlam I lo leng hmang leh, sun inkhawm ding ei lo nghak che a” kan lo ti sap
sap a. Ama chun inphalam deu pumin “Inkhawm ding ka hriet naw leiin, to tawkin
cinema kalo va en ani kha tie!” a ti ta ringawt el a. Mak kan ti em em! Pastor
meu Pathienni tuk ‘Holy Communion’ sermon chil inhnak raka a hril hnunga cinema
hall ah a khat chaua thlan khu bara a lova um el khan hril a hai hle el. “Ip
pui seng ei tiu” kan tia, hostel tieng kan kir nawk ringawt el a nih. Cinema
hall kha pastor meu umna ding chun mak kan ti seng. Zan khat chu kan wall clock
(Sanapui) sungah thilhring vuongri kan hriet tlat ela. A thilhring hlak chu kan
hmu thei bawk nawh. A tawpa chun Tuiteng (Dragonfly) kha Sanapui sungah alo
intang zing kha ana. Tuiteng umna ding chun a mak thlawt a nih!
Mizoram ah HIV&AIDS rawngbawlna kan tan
hlim lai nunghak hmeltha fu el, pieng nal tawk taka inchei chu truck driver le
handyman bal le tawp emem haiin an lo riekpui el a. Nunghak hmel feltak,
Christian ni bawk truck ah vai tawp deu pahni in an riekpui el chu awm ka tinaw em em. A um
nawna dinga um a nih. Kohrana rawngbawltu dam, Christian NGO a sinthawtu dam,
dumziel le kuva an fak el chu hrillo, zu an la hei inrui nawk nghal lem hi chu
amak tawp a nih! Seminary suok, bible graduate inti si, zu dawn hai lem hi chu
an um nawna dinga um an ni leiin zu dawn mi vek khawma an hmupei ngai nawh.
Pawl member dit kohran eini tawl leiin chuong ang mi chu ei vai ngam fer fur el
a hawi!! Sawma pakhat fatu ding chun an rapthlak deu chu a nih! Umna hmun
indiklo nana na chun thaw ding indiklo le awmlo an thaw ngei ngei hlak. Prison
Fellowship of India haiin jail ah thuhrilin an mi ko hlak a. Patling pahni
kohrana inhmang em em, zingkar inkhawm chen khawm pel ngai lova an hril hlak
hai chu jail ah kan tuokpui tlat! Drugs leiin! Chuong neka a standard inhnuoi
lem met chu patling zet mani nuhmei, nauhai le tu le tehai thanglova hotel ah
thingpui le puri faka sunni thlaka lengbo el hi mak ka ti ve bawk! Inkhat pa um
rawp nading chu ani in ka hriet nawh. Insung ah nuhmei nauhai leh tu le tehai
leh Thingpui le bei inchawa fellowship nei malam kha a mak naw lemin ka hriet!
Tiemtu, I um nawna ding ah I um am le? I umna kha inhme am? I thil chinghai kha
I nina leh an hme de’m? Ieng ang Ngapui sung am I um a? I ning an ip chang a
tam awm de maw? Mizo hnathlak tamtak hai hi ka hang thlir veng venga, ei umna
hai hi mak tak tak a tam hle. Ei thil Ching tam tak hai khawm hi ei inhme naw
em em in ka hriet hlak! Chu neka rapthlak em em chu ‘Zu suong insung’ hai an
nih. Ieng leia Zu chen ei suong el ta?? Inzak ava um de! Mimal in an um nawna
dinga an um el nita lovin, hnam pumpui le kohran pumpuiin ei homework ei thaw
naw leiin ei um nawna dinga um ei nih! Kohranin hnam le ram sunga issue pawimaw
ei hril naw leh iem thawng ei ta??
Raldo ding tamlai taka Elijah Juniper thing
deihlim hnuoi ah, mihriem inbiekpui ding um der lo na hmun ah Pathien zawlnei a
va tung kâk el kha chu an hme naw tawp a nih! Peter meu Isu an man zana, a
suknawmna tuhai lai a lova tung ve kûk kha chu ava awm naw de aw! A um nawna
ding hmuna um ani kha! Isu hang inphat naw ding ziezang ni nghal lova. I umna
hmun kha inhme am aw? I thil ching zawngsak hai le kha inhme am aw? Mi hausa
nau, nuom nuom nei le fa thei zing, an venghai popo in an inhnar em em, Vawk bu
pea a hang inhlaw el kha chu ‘a umna dinga um’ chu an naw tawp el! Inlamlet
nachang a hriet naw chun a hmabak kha a pik hle ding reng a nih. Khalai hun
taka a tawngtai dan ding a hang hisap kha a hmun khan zir naw hle sienkhawm a
damna ani ringawt el anih. Unau, khawlai hmun am I um a? Tawgtai theina hmun ah
I um am? Vawk bu pekna thleng bul ah I um am? Kohran inti thuoi vieu si’n, zu I
la dawn zing am ie? Kohran thuoitu nina hmun kha I hmun ding an nawh tina a
nih! Pakhat lem lem bansan hmak rawh! Mizo hnathlak laia Duhlian tawng le Hmar tawng
hmanghai hin Zu an du taka an thipui rawn taka, an retheipui rawn tak bawk. An
la chapo kang nawk nghala! A zaia inhril chi khawm eini ta nawh! Har chu a hun
an tah!
Mizoram khawm HIV hrik tamna, Khawvela
cancer hrik tamna tak, suicide tamna tak, speaker tamna tak, choir thiem tamna
tak, soloist top ten thlang dawk ngun tak, kohran pawl khawvela tamna tak,
corruption insang emem, biekin tha tamna tak, thawlawm hratna tak, inchei uor
tak, thuomhnaw le thilthar uor tak, Pathien thu dutak, lengkhawm chak tak,
dumzuol dutak, tibur he tak a tak kaina rama cheng, a tha le thanaw inpawl.
Nun chawkpawl ram ani leiin mani umnawna ding hmuna um an tam tina a nih.
Mizoram puo tienga um Mizo hnathlak hai khawm iengkhawm eini bik nawh! Ei
suolna an sang lem hman hman a nih! Suol sim ding chuong neilo, suolna a khat
si ei ni leiin, thlarau changa ei inngai khawm hi, a tak ram, “SUOL THEIDA NA
RAM” a kai phak nawh.
Thalai nunghak le tlangval hai khawm KTP thuoitu
ni bawk, choir ah thang ve bawk; ler bawk, hur bawk, tha ang reng bawk! I thil
ching rukhai kha I umna ding an nawh. I ban naw ding chun KTP ah nina neinaw
rawh! Africa KTP thenkhat HIV hri pai ang ning I tih. I simnaw chun Pathien ram
rawngbawlna ah inhnamhnawi laklaw naw! Pathien a muolpho nawha, nang kukha I
muolpho lem a nih. Kohran hmusit le Pathien inzalo I ni lem. I sim naw ding leh
kohran ah inban rawh! Kohran thuoitu sum du hai hi an inhme naw bawk. Local sum
tlawmte khawm I lo hlepruk met met hlak ani chun, bang la, sumdawng lem rawh!
Hmingthat nuom leia kohran sin thawding an nawh. I um nawna dinga um I ni lem.
I ditnaw lem lem bansan rawh. Mani umnawna ding ah an um an um ngai nawh! Jonah
tawngtaina hmun amak ang bawkin eini rawi hringna le ei thilthawhai hi an hme
naw taluo. Jonah chu a sim leiin Ngapui phing sunga inthawkin a tawngtaia, nang
sim chuong lovin Zu hmuna inthawk dam, hurna a inthaw dam, sum duna khura
inthawk damin Pathien rawng I bawl kha a thieng nawh! In kohran haiin an remti
khawmin Pathienin a phal nawh. Sim phawt la intangna hmuna inthawk khan suok
la, Lalpa zui lem raw khai! I umna Ngapui phingsung kha thawpikna ram ani kha!!
