Responsive Ad Slot

Hmasawnna Thar | 31 July, 2015

Friday, July 31, 2015

/ Published by VIRTHLI
Tuolsung
Fur ruotui tlak rawn leiin khawpui sung a pawr
CCPUR: Tulaia fur ruotui tlak leiin tuiluongkawr (nulla) mumal tak umnaw bakah lampui hai a thatawknaw leiin Churachandpur khawpui sung khawm a pawrin a tawp hle.
           
Rengkai Road
CCPur district­a lampui pengthuom pawimaw pakhat, CCPur Police station, Tiddim Road le junction­a inthawk lunga deng phak chau Rengkai road chu fur le thal huna a thatlai hmel hmu ding um derlo na hmun a ni leiin tulai hin a pawrin a tawp zuol hle. Hi lai lampui hi tulai hnai el khan blacktopping thaw a ni a, sienkhawm fund indainaw lei amani ding ‘ruosur hma po dai ding’ ti ni awm taka Kel vun ang chauva inphân­a siem a ni leiin fur ruotui a hung tla meu chun vadung angin tui an luong hum hum a, Contractor pakhatin tulai hnai el khan pil a sung a, sienkhawm that tieng nekin chirdiek an chang a, mipui ke le motor a inlawn hai ta dingin harsatna namen lo an tlun mek.

DC in quarter hni dingin an hriettir
CCPUR: Tulai hin DC/CCPur Office­a thawktu, district puotienga mi hai chu office kai lova an um hlak leiin District Administration chun a ngaimaw hle a. DC Office staff hai chu regular taka an kai theina dingin district puotieng mi DC Office thawktu hai le District Level Officers hai chu Govt. Quarter ngen (apply) ding annawleh CCPur khawpui sunga In hluo dingin DC CCPur chun an hriettir a, hi thu ngaipawimaw lo le ngaisak lo hai chunga action lak a ni ding thu DC thusuok chun a hril.

Langkhanpau le Khaipao in Nomination an file
CCPUR: July 31, 2015 (vawisun) 11:00AM­ a Autonomous District Council (ADC), CCPur­a Chairman ding thlangna (Election) um ding le inzawmin zanikhan Mr Langkhanpau Guite le Khaipao Haokip han Nomination paper an file. Hi lei in secret ballot hmangin Chairman, ADC/CCPur election vawisun hin nei a ni ding a nih. Langkhanpau Guite hi Lal Hossan in a proposed a, Genneikhup in a seconded. Chun, Khaipao Haokip in nomination a file huna hin Pumtulthang Lianzaw on a proposed­a KC Chongsei in a seconded.

Social Mission Poster Campaign hawng
CCPUR: Mr M. Gouzamang Guite, MDC (New Lamka East) chun zanikhan ZOLLS Office, New Lamka (G) hmuna Zogam Cultural & Film Developement Society hmalakna Social Mission Postar Campaign chu khuolliena thangin a hawng. Hi huna hin C.T. Lian Guite, MDC, New Lamka West functional president in a thang.
   

M. Gouzamang chun, mitinin mani thiemna chit ei thaw khawm pha pha Society ta dinga hmasawnna an tlun hlak tiin a hril.
   
C.T. Lian chun, Poster hrim hrim tawite sunga tiem zo thei le mi lungril tawk zawng a pawimaw thu; eini tlangmi hai mani thil neia  thil thaw tum lo, mani neiloa thil thaw hlak le ei nei baka khawsa hai ei nih tiin a hril a, mani nei anga khawsak a pawimaw tiin a hril.

TIENS New Product Launching­Seminar
CCPUR: TIENS CCPur hmalaknain zanikhan Health & Wealth Centre, B.Aijalon hmuna TIENS New Product Launching­cum­Seminar nei a nih. Hi huna hin Waikhom Suraj Mangan, Santi Lata le Sant Bala hai resource person­a thangin thupui tum tum hmangin thu an hril. Hi hun hmangna hi Khaipao Haokip, MDC khuollienin a thang a, Nehkholal, Social Worker le T. Papao Haokip hai chu functional president le Guest of honour in an thang a, S. Ibomcha Singh, District Cooperative Education Officer, Churachandpur le N. Babamacha Singh, District Cooperative Instructor Officer, Churachandpur  hai  resource person in an thang.

Nurses hai ta dinga One Day training
CCPUR: July 31, 2015, 10:30AM hin District Health Society (NHM),CCPur huoihawtnain Synod Hall, IB Road­ah CHC le PHCs haia Nurses (Regular & Contract) hai ta dingin “One Day Orientation on Enhanching Performance of Nurses at  Sub­Centre Level’ um a tih. Hi program hawngnaah Dr Thanchinkhup Guite, CMO/CCPur in thuhrilna nei a ta, Ibomcha Singh, State Data Manager, Nalani Devi, PHN, Vung Mary, DCM/NHM le  Dr. VC. Pau, DFWO han “RCH Registered”, “Roles of Multi­Purpose Worker”, “Roles of ANM in Community Progress” le “Role & Responsibilities of Nurses” ti thupui hai hmangin thu hril an tih.

3 Days Residential Training prog.
CCPUR: Indo­Global Social Service Society (IGSS), Nehru Yuva Kendra le Vocational Training Institute (VTI) hai thangruola huoihawtnain July 29, 2015 a inthawk khan VTI, Rengkai Muolhlum­ah 3 Days Residential Traning Programme on Entrepreneurship development and Business tanin ZEO T. Goukhomang in a hawng. Zanikhan Resource person in Paolun, Technician Weaker section Development Society (WSDS) chun Solar Lamp repairing chungthu; Dr George Zote in Kel, Varak le Ar vai dan chungthu hai a hril.
   

July 31, 2015 hin Mangboi Vaiphei, Senior Faculty RUSETI chun Bank Linkages chungthu; Suankhanmang Progressive Farmer in Multi Farming  chungthu hril a ta, Pu CT. Lian Guite, Social Activities in Growing Vegetables ti thupui hmangin thu hril a ta, certificate semna um bawk a tih. Training a hin NYK Volunteer, CcPur le Henglep Area a inthawk mi 50 chuong an thang.

Yakub Mamon khaihlum;
SC Judges 3 hai venghimtu pek belsa an nih
NAGPUR/MUMBAI:  March 12, 1993 a Mumbai khawpuia indawt zata bombs vawi 13 zet sukpuok a ni leia mi 257 an thi bakah midang 713 in hliemna an tuokna le inzawma TADA Court in April 30, 2015 a thi dinga thiemnaw a lo inchangtir tahnung Yakub Memon (53) chu zani zingkar dar 7 khan Nagpur Central Jail­ah khai hlum a lo ni tah. India President le Maharashtra Govenor han zangaina, ngaidamna le sukdam dinga a ngenna mercy petition/curative petition hai khawm vawihni ve ve an lo hnawl pek ta a nih. Khai hum a nina ding thu hi Supreme C ourt chun zani zingkar dar 3 chen khan a la rel a nih. Kum 31 zet liem hnunga Nagpur Central Jail­a mi khaihluma a um nawkna hmasa tak a nih.
   
Yakub Memon ruong hi Nagpur a inthawk Mumbai chen Vuongnaa phurtlungin Mahim Area sunga Bada Kabrastan, Marine Lines a phum dinga ti a nih. Memon khai hlumna le inzawm hin buoina suok pal ding laka invengnain Mumbai khawpuiah venghimna sukkhau a nih. Memon hi a birthday, kum 53 a tling ni taka khai hlum a  ni a, ama hi Chartered Accountant zo, lungina khum a ni sung IGNOU hnuoia MA (English Literature) le MA (Political Science) zo hman a nih.
   
Mamon khai hlumna ding le inzawma zani zingkar chena Supreme Court a roreltu Judges 3 hai chu venghimtu pek belsa le venga an umna sukkhau zuol a nih. Mamon thina dinga reltu Supreme Court Judges 3 hai chu Justice Depak Misra, Justice P.C. Pant le Justice Amitava Roy hai an nih.
           
Mamon khaihlumtu hi kum 3 liemtaa Yerwada jail, Pune hmuna Pakistan Terrorist Ajmal Kasap khaihlumtu bawk kha a nih. Security thil leiin mi khaihlumtu (Hangman) hming hi hrillang a ni nawh. Ajmal Kasab kha India Parliament runtu a nih. Ei thu dawngna dang pakhat chun Mamon hi zani 6:43AM a khaihlum niin a hril.

Imphal­ah RAF sie dingin a ngen
IMPHAL: Manipur State sarwkar chun Imphal khawpui sungah Rapid Action Force (RAF) sie dingin Ministry of Home Affair­ah ngenna a siem nia hril a nih. Joint Secretary (NE), Ministry of Home Affairs (MHA), New Delhi­ah State sawrkar chun fax message a thawn a, chu taka chun, ILPS ngenna le inzawma Imphal khawpui sunga nuorna fe meka Law & Order enkaitu dingin RAF hi a ngen niin ei thu dawngna chun a zieklang.

Tuilien leiin harsatna an tuok
IMPHAL: Thoubal District sunga Heirok, Wangjing Tentha, Sekmai; Chandel District a Pallel le Chakpikarong bakah Bishnupur district a Loktak Dil le a se vela cheng hai chun tuilien leiin harsatna nasa tak an tuok mek. In thenkhat tuiin a chim a, Ngakul 2000 vela Nga vai lai hai chu tuilien leiin an suokdawk niin ei thu dawngna chun a hril. Tuilien hin Bu phunsa le thlai nasa takin a suksiet bawk.

General Strike thaw tum an thul
IMPHAL: ILPS le inzawma hmalakna a la fe pei leiin August 1, 2015 nia Maoist Communist Party of Manipur (MCPM) in Manipur pumpui huopa darkar 12 sung General Strike thaw an tu m chu an thul nawk ta thu an puong.

Scholarship ministry website­a enrol a ngai ta ding
IMPHAL: Ministry of Tribal Affairs (GOI) thupek dungzuiin 2015­16 a inthawk chun Scholarship apply ding han Ministry scholarship section website­ah enrol a ngai ta ding a nih tiin S. Minlianthang Vaiphei, IAS, Director, TA/Hills a inthawk ei thu dawngna chun a hril. Student hai fee reimbursement hun thla 8 a inthawk thla 10 a suksei a ni bawk. General, Medical, technical le Theologian students hai scholarship sukpung a ni bawk tiin ei thu dawngna chun a hril.

State Scholarship Exam thul
IMPHAL: Tulaia ILP ngenna le inzawma nuorna le nawrna nasa taka a la fe pei leiin Class VIII & VI hai ta dinga State Scholarship Examination, 2015 nei ding chu tiemchin um lova la thul hri phawt a nih tiin Department of Education (S) thusuok chun a hril.

Dr Kalam ropui taka vuiliem a nih
MAHESWARAM: India President hlui Dr APJ Abdul Kalam ruong chu zanikhan a piengna Maheswaram, Tamil Nadu­a Peikarumbu an ti hmuna sipai chawimawina leh ropui taka vuiliem a lo ni tah. A ruong vuina hunsera hin mi sang tam takel an thang a, hi huna thang hai lai hin PM Narendra Modi; AICC Vice Presideent Rahul Gandhi; Governors of Tamil Nadu, Kerala, Meghalaya; Defence Minister Manohar Parrikar;Urban Development Minister Venkaiah Naidu; Tamil Nadu Finance Minister O. Pannerselvam; Congress thuoitu Gulam Nabi Azad; Karnataka, Kerala le Andhra Pradesh CM­ hai; CPI(M) thuoitu A.S. Achuthanandan le Dr Kalam upa Md. Muthu Meeran Lebbai Maraicker (99) hai an thangsa.

Dr Kalam sunnain LS sukchawl
NEW DELHI: India President hlui Dr APJ Abdul Kalam thi sunnain Lok Sabha Speaker, Sumitra Mahajan chun zanikhan Lok Sabha inthung ni khat sunga dingin a sukchawl bakah an member chanpui thi ta 3 hai le Gurdaspur a helpawlhai chetna leia thina tuokhai sunna thu a hril. Rajya Sabha khawm Dr Kalm thi sunnain zanikhan Chairman Md. Hamid Ansari in zani chawhnung dar 2 chena inthung a sukchawl. Chun, members han Gurdaspur, Punjab a helpawlhai chetna leia thi hai sunnain totawkin minutes 2 sung hun an hmang.

J&K ah Army 1 kap hlum
SRINAGAR: Zani hmasa zan khan Pakistan sipai han Jammu & Kashmir a Poonch district a forward post an hung kap a, Army Jawan pakhat Rachpal Singh chu na taka kap hliem a ni a, theitawp suoin doctors han an enkawl a,sienkhawm a hliemna tuorzo lovin a thi tiin PRO Defence Lt. Col. Manish Mehta chun a hril. Rachpal Singh hi Parvinder post hmuna duty a nih. Tuta thla sunga Pakistan sipai han LoC an hung kap a vawithumna a ni tah.

MH­370 tla thla hlek ni dinga ring hmu
NEW DELHI: Malaysian Airlines vuongna MH­370 a umna chin hriet lova inhmang, tuoksiet tuoka tla thla  hlek ni dinga ring metres 2 vela sei ding Indian Ocean­a La Reunion Island hmuna hmu a ni a, MH­370 vuongna hlek a ni ngei tia sukchiengna ruok chu a la um nawh. Malayasia vuongna Boeing 777 a hin India mi 5 thangin mi 239 an chuong a, March 8, 2014 a Kuala Lumpur a inthawk Beijing pana a vuongsuok hnunga danglam taka a chinchang hriet lova inhmang a nih. Hi vuongna part dang hai chu tuchen hin hmu an la ninaw a nih. French air transport official hai chun vuongna inhmang chungthu hi an suizui mek a nih. 

Mi thuoihmangtu vuok hlum
TURA: Zani hmasa khan North Garo Hills a Upper Manikganj, Meghalaya hmuna pasal pakhat thuoihmangtu mi 4 hai laia pahni, Akin Marak le Sangwan Sangma hai chu mipuiin manin an vuok hlum a, midang 2 hai chu himin an tlanhmang hman. Thuoihmanga um hi Sipai bang Premchand Rabha a ni a, dama sansuok a nih. Vuok hluma um hai hi a hma khawmin ran an inruk leia man lo tuok ta an nih.

Nuhmei naute a nun a fesan
TURA: July 28, 2015 khan Rongkhong Songgitol, Tura, Meghalaya ah nuhmei pakhatin a naute   Auto Rickshaw sungah siein a tlanhmang san. Naute hi a hung tap suok  leia Auto Rickshaw neituin a hriet chau a nih. Tlansana um naute hi nuhmei a ni a, a piengna la sawt lo niin an lang. Police han an lak a, Maternity & Child Hospital ah an va sie a, a hriselna chu a tha tiin a enkawltu Doctor han an hril.

Inhlawfa damsung lungin intang dingin
ERODE: Tamil Nadu state a Erode district huop sunga Pamankattur khuo a cheng, Kali (41), nitina inhlawfaa fakzawng chun a nuhmei chu pasal pakhat leh ringhla leiin bawngtuthlaw in a tuk hlum a. Zani hmasa khan Principal Division Judge, G.P. Elango chun damsung lungin intang dingin thiemnaw an changtir. Hi le inzawm hin Kali hi Coimbatore Central Jail­ah sielut a nih. Tuol a thatna hi December 3, 2013 dai kha a ni tah.

Bihar in Dr Kalam hmingin College
PATNA: Bihar sawrkar chun zanita a ruong vuiliem President hlui Dr APJ Abdul Kalam hming chawiin Kishanganj hmuna Agriculture College chu ‘Dr Kalam Agriculture College’ in a thlakthleng. Hi College Dr Kalam hminga thlakthlengna ding hi Bihar CM Nitish Kumar inrawinaa Cabinet meeting huna an rel a nih. Chun, Patna khawpuia Science City rawtna um khawm Dr APJ Abdul Kalam Science City” ti dingin Cabinet chun an rel bawk niin Coordination Department Principal Secretary Shishir Kumar Sinha chun a hril.

Nitin mi 20,000 fak ding bu le hme
PURI:  Jaganath Temple, Puri, Odisha a pathien bie dinga fe chu mi an la pung pei a, nitin a tlawm takah mi 20,000 vel fak ding siem a ni a, ni pawimaw bik a lem chun mi 50,000 vel fak dingin bu le hme siem a ni hlak a, bu le h me zawrnain ni khtah Rs. 800,000­Rs. 10,00,000 an hmu tlangpui hlak niin Damador Mahasuar, President, Suar Nijog (Temple Cooks) chun a hril. Bu le hme, Mahaprasad an ti chu pil bel le thing hmanga suong, mi pakhat fakman Rs. 50 a inthawk a chungtieng lak le tum khatin buai quintals 40­50 le Dal quintals 20 vel an suong a, thlaisuongtu hi mi 600­700 vel anni zing niin Damador chun a hril.

Election­a thang dingin Suu Kyi
THANLYIN: November, 2015 a Myanmar General Eletion­a thang dingin NLD thuoitu Aung San Suu Kyi chun zani hmasa khan Election Commission­ah an registered. Election­a hin NLD in hratna an chang nawk ring a nih. Aung San Suu Kyi hi Kawhmu biel (Rural Constituency) a ngir dinga in registered a nih.

Mimkei leiin Nepal­ah mi 25 an thi
KATHMANDU: Zanikhan Nepal rama hmun hran hranah mimkei tlung leiin nuhmei 13 thangin mi 25 vel an thi. Tulaia ruosur nasat leia mimkei hi tlung a nih. June thla sung khawm khan Nepal ramah mimkei tlung leiin mi 35 in thina an lo tuok ta a nih. Pokhara an ti hmuna mimkei rapthlak takel a tlung a, School pakhat a vur khum hiel niin Police chief Kerar Rajaura chun a hril. Mimkei tlung hin Pokhara­Baglung Highway nasa takin a kei chim a, sansuokna le sawmdawlna sin thaw dingin Nepal Army le Nepal Police hai mimkei tlungna hmun haia tirlut an ni bakah Nepal Army headquarters chun sansuokna sin thawtu dingin Helicopter a tir bawk.

Khawvela mipui um popo zatve in Facebook
WASHINGTON: Khawvela mipui um popo laia a zatve chun thlakhatah vawikhat bek social networking site Facebook an hmanga hisap a nih tiin company thusuok chun a hril. 65 pecent hai chun nitin Facebook an hmang niin BBC news report chun a hril a, Facebook hmangtu hai laia a tamlem chu Mobile Devices fethelnga Facebook hmang an nih.
-------------------------------------------------------------------------------------------------
VAWISUN THUPUI
Ka tlâng inthienga hrim hrim chun insuknat um ta naw nih a, insuksiet um bawk ta naw ni; tuihai hin tuisuoriet ân khum zing angin, leihnuoi hi Lalpa hrietnain a sip zo vawng ta ding a nih. ­Isai 11:9

Editorial
Beiseina hi

Mihriemhai hi ienganga ropui, inhawitir, hausa, rethei, lekhathiem le var khawm ni inla, ei damsung phurrik hin a min kiengsan ngai naw ding a nih. Hi hi thudik umsa, mihriem a tuel khawma ei tuok hlak a nih. Mi retheihai chun ei retheina hi ei damsung phurrik a ni angin mi hausa hai le inhawitirhai khawmin ei hausakna le ei inhawitirna hai chu ei damsung phurrik a ni tho tho ding a nih. Khawvel mihriemhai lai hin damsung phurrik nei lo der um an tim maw?  An lo um a ni chun khawvela mi vangnei tak ning an tih.
   
Mihriemhai hin damsung phurrik ei nei seng.  Nisienlakhawm thilthlawnpek ropui takel ei nei seng bawk a, chu chu ‘beiseina’ hi a nih. Mihriem nun su khlimtu tak pakhat chu beiseina hi a nih. Ei thil thaw, ei inchuk, sum le pai ei sengna dam, tha le zung ei sengna dam le ei lungrila inhuomna hai dam hi beiseina ei nei lei a nih. Chu beiseina chu a tlangpuiin ei ta dinga thiltha, thil lawmum le ngirhmun tha lem hai anni hlak.
   
Lo le huon ei nei chun fakkhawp bek tharsuok le a ra beiseiin a bul ei tan hlak. Nu le pahai khawmin an nau han mi an ang le an phak vena dingin theitawp chau ni lovin an thei bak an insuo hlak. Hi lei hin lekha an thiem a, an puitling huna kawngro iemani bek an hmu le an sut ve theina dingin Preparatory a inthawkin lekha an inchuktir hlak. Mak takelin nauhai an lo hlawsam a ni khawma nu le pa hai chun tu le te haiah beiseina an la nei rawp hlak. Hi lei tak hin an hmalakna an sukzuol nawk sau hlak. Beiseina hin tawp intai a nei nawh. Tu hai lem chu nauhai nekin ei la duot nawk deu deu pei chu a ni hi!
   
Sumdawngtuhai khawmin sum le pai sukpung beiseiin sum an dawng a, sinthawtu  hran hran hai khawmin thil dang dang tam tak bakah hlaw hmu beiseiin inrim le phur takin sin an thaw hlak. Beiseinain a thuoi a, beiseina neinaw hai sienla chu sin hi thaw pei naw nihai. Beiseina hi mihriem puitlinga siemtu pakhat a nih.
   
Beiseina le thaw chun iengkim el hi inhawi taka thaw thei a nih. Chu beiseina chun nun a suk inhawi a, a suk hadam a, a mi suk taima sawt hlak. Thil harsa tak suttlang ding khawmin beiseinain mi a thuoi hlak. Chau le sawl hai khawm an hung hratin an hung hadam nawk hlak a, ngui le chau ta hnunghai khawm a kei har nawk hlak.
   
Damnawhai khawm hin dam nawk an beisei chun an hung dam pha hlak. Beiseina nei lo hai chun tuorselna le tumruna le hmatieng thlirna an nei naw a, an nun a ngui a, thlakhla khawm an nei pei ta ngai nawh. Chuongchun an  natna in a hung fak chau tiel tiel a, a tawpah an khawvel nun chu a hung bo hlak.
           
Beiseina hi mihriem ziea a ropui tak laia mi a ni awm ie. Hmasawnna min tluntu, hratna thar mi petu a nih. Inchuklaihai ta dinga a tangkai em em ang thovin sin chi hran hran thawnaa khawm a tangkai a nih. Mani ngirhmun pangngai neka insang hret inbeiseina chun phur takin sin a min thawtir thei a, tam lem senglut thei beiseina chun inrim taka thaw a min rintir ngai nawh. Hlim lem ei beisei chun lampui thar a min dapsuoktir hlak. Ei beiseina chu hmasawnna, thiltha le mani ta ding chau ni lovin midanghai ta dinga malsawmna, beiseina thar siemtu a ni ding a nih.


Don't Miss
© all rights reserved
made with by Simon L Infimate