Responsive Ad Slot

Hmasawnna Thar | 22 July, 2015

Wednesday, July 22, 2015

/ by VIRTHLI HMAR
Tuolsung
Hnuoithatna loneituhai kuoma sem
CCPUR: District Agriculture Office, Tuibuong, CCPur - ah zani zingkar khan Hnuoithatna (Urea) bags 350 a hungtlung a. Zani ma khan sawrkar rate (subsidized) in Loneituhai kuomah zawrdawk a nih. Hnuoithatna dit mi an tam leiin a changzo lo khawm loneitu thahnemtawk tak an um. Tuta hma khawm khan sem a lo ni tah.



Exam form fill up hun suksei
CCPUR: Imphal tieng buoina leiin Hindi Exam a thang nuom hai ta dingin Exam form fill up hun July 23, 2015 chena suksei le Exam hun ding khawm July 27, 2015 chen a dinga suksei nawk a nih tiin Principal, Lalbahadur Shastri Mahabidyalaya chun inhriettirna a siem. Exam Centre chu Rengkai Govt. Higher Secondary School ning a ta, Morning shift 9AM le Evening Shift 1PM  haia inthawk tan ning a tih.

Lok Adalat August 8­ah nei a ni ding
CCPUR: Churachandpur District Legal Services Authority chun August 8, 2015, 10:30AM a inthawk khin Chief Judicial Magistrate Court, CCPur hmuna nikhat sung aw LOK ADALAT buotsai a tih. Hi lei inzawm hin Bank (eg) loan le inzawma rel fel ding nei hai chun Chairman/Secretary, Churachandpur Legal Services kuomah ziekin August 1, 2015, 12:00noon chenin pelut thei an tih tiin Secretary, CCPur Legal Services Authority, CCPur, Manipur chun inhriettirna a siem. CJM CCPur hnuoia pending cases nei hai khawm hi huna thang seng dinga inhriettir an nih.

Nationwide Gospel Music Festival
CCPUR: July 27, 2015, 6:30PM (sharp) khin ICI le EFCI Kristien Thalai Pawl, Sielmat Unit hai mikhuolnain Rev. Chawnga Memorial Chapel, Sielmat­ah Nationwide Gospel Music Festival 4th Motivational Program um a tih. Hi huna hin Pu Lunminthang Haokip, IAS, DC, CCPur chun Pathien thu hril a tih.
           
Hi program hmangnaa hin EBC, KBP, MELC, Host Choir, ECA, RPC GBA, ZPCS, Manipur Area Choir Mizoram Synod, Rengkai ICI le EFCI KTP; EOC Central Church Choir le EFCI Central Choir hai bakah hlasakthiem dang dang han hla sak an tih.

Tar pension sum la lalo han lak thei zing
CCPUR: District Social Welfare Office, CCPur in June 24­ July 8, 2015 inkar sunga Indira Gandhi National Old Age Pension Scheme (IGNOAP) hnuoia Red le Blue Card holder hai kuoma pension sum an sem sunga la la hman lo hai ta dingin July 13, 2015 a inthawk khan office hour sungin pension sum hi an sem zing a, zani khawm khan mi iemanizatin an pension sum an lak. Pension sum hi a la lalo hai ta dingin office kai hun sunga lak thei zing ning a tih tiin ei thu dawngna chun a hril.



Competiton­a thang thei a nih
CCPUR:  Kum 2015­16 a dingin Commerce & Industries Department chun State Awards, Merit  Awards le Inspiration Awards/Prizes pekna dingin Competition buotsai a tum a, a thang nuom han 31/7/2015 chenin hnina lekha Directorate of Commerce & Industries, Lamphelpat ah peklut thei ning a tih. Application form le thu chieng lem www.dci.manipur.in ah download thei a nih.

Headline
ILP le inzawmin Drafting Committee indin; thla khat sunga zo dinga ti a nih
IMPHAL: Manipura­a Inner Line Permit (ILP) System hmang nawk dinga ngenna hrat takel a fe mek le inzawma dan le bill thar siem ding le inzawmin State sawrkar chun member 5 umna Drafting Committee an din a, hi Committee Chairman dingin Law & Revenue Minister Th.  Debendra Singh le Convenor dingin Special Secretary (Law) hai ruot an nih. Committee members in MLA pahni ruot anni a, hi hai lai hin Dr Ng. Bijoy a thangsa. Chun, hi Committee  hin JCILP hotuhai khawmin an dit dan, ngaidan le thurawn pe thei an ta, Draft Bill hi thla khat sunga zo fel ding ti a ni bawk.
    
Chun, July 20, 2015 zana Congress Legislature Party (CLP) meeting chun Sapam Robinhood thina chungthu Judicial Inquiry thaw dingin relin an recommended a, hi le inzawma Manipur CM O.Ibobi Singh inrawinaa zanita Cabinet meeting chun  Judicial Inquiry thaw dingin an rel niin Dy. CM Gaikhangam in cabinet meeting zova chanchinbumihai an hmupui huna a hril. Judicial Inquiry thawna hi High Court Judge pension ta inrawi ding le Bill thar draft­na chu thla khat sunga zo fel ding tiin thu tlukna an siem.
            
Hieng laizing hin ILP thua Bill thar hi JCILPS chun ni 15 sunga draft zo le Assembly­a pasi ding tiin thutlukna an siem a, an thutlukna a hin an la ngirzing thu le Bill thar Assembly­a pasi a ni hmakhat chu ILP system ngenna leia thungbuma nuorna, meiser sita lampui hrawna le a dang dang hai chu chawlsan lova la sunzawm pei ni dingin JCILPS thusuok chun a hril.

Curfew darkar 14 inthlazal nawk
IMPHAL: State sawrkar chun vawisun hin Imphal East le West district haiah Curfew darkar 14, zing dar 5 a inthawk zan dar 7 chenin an thlazal nawk. Chun, Imphal West district­a Bank­hai khawm hawng ta dinga thusuok siem dingin an hriettir.

Vantlang thil zawrtu mi 20 man
IMPHAL: July 20, 2015 khan Manipur minister hlui Md. Allauddin Khan naupa Md. Leihauddin Khan thangsain mi 20 hai chu vantlang tuikul (community Pond) zawr leiin Police han an man. Community Pond hi Imphal East district sunga Urup le Keirao inkara um a nih. Community Pond hi Rs. 4,00,000 laa RK (35), s/o Apik of Keirao Makting kuoma an zawr nia hril a nih.

CM in Mobile Application a hawng
IMPHAL: Zanikhan Manipur CM O.Ibobi Singh in Chief Minister’s Secretariat, Imphal­ah Mobile Application­Northeastern State Citizen Security Management System Software a hawng. Hi thil hmang hin Delhi khawpui le India ram khawpui hran hrana um NE mi han harsatna an tuok changin Police­ah report an pek thei ding bakah thlalak le Video online hmangin Police­ah report an pek thei ta ding a nih. Kum 2014 a Delhi a Arunachal Pradesh tlangval Nido Tania (19) that a nia inthawka Bezbaruah Committee Recommentadion dungzuia hi Mobile Application hi hawng tan a nih. Hi mobile application hi Manipur le state puotieng haia khawm a thlawna download thei ning a tih.

Enrolment Form lak thei tah
IMPHAL: Council of Higher Secondary Education, Manipur chun kum 2015­16 a dinga Class X & XII enrolment Form chu vawisuna inthawk hin Council Office, Imphal­ah lak tan thei ni tang a tih tiin inhriettirna a siem.

Marksheet lak thei a ni tah
IMPHAL: Council of Higher Secondary Education, Manipur hnuoia Improvement / Compartmental Examination, 2015 a thang hai ta dingin Original Statement of Subjecwise Performance­cum­Certificate of School, Based Assessment/marksheet Board Office­ah lak thei a ni tah. Compartmental Examination, 2015 result hi insuo a ni tah.

AR personnel silaimu leh man
IMPHAL: Zanikhan Tulihal International Airport, Imphal­ah 8 Assam Rifles a Rifleman Gautam Sudher chu 5.56mm INSAS Rifle mu pakhat leh man a ni a, Singjamei Police station­ah peklut a nih. Gautam Sudher hi Tulihal Airport­a inthawka Indigo Flighta­a Agartala pan tum a nih. Silaimu hi a thuomhnaw sunga hmu a nih.

Mao mihai ta dingin Market shed 2
IMPHAL: Mao mihai ta dingin Manipur sarwkarian Chingmeirong­ah temporary market shed 2 a pek tiin T. Mangibabu, Chairman, PDA chun a hril. CM khawma an hmatienga Mao mihai thil zawrna ding market shed bawl pek dingin Chairman, PDA an hriettir.

Tui tam leiin harsatna an tuok
IMPHAL: Tulaia inzing uta ruot a sur leiin Imphal le phairam biel haia vadung tui an luong liem bakah nullah tui hai an luong liem leiin mipuiin harsatna nasa tak an tuok pha. Ngakul a tui luong liem leiin Nga vai tam tak an suokdawk bakah Bu phun sa tam tak a suksiet bawk.

July 30­ah Yakub Memon khaihlum ding
NEW DELHI: March 12, 1993 a Mumbai khawpuia a zawna bomb vawi 13 zet a puokna thua mawphurtu taka intum Yakub Abdul Razak Menon in Supreme Court­a curative petition a pek chu Chief Justice  H.L. Dutta thuoinaa Judges 3 umna Supreme Court Bench in zanikhan a hnawlpek. Hi lei hin July 30, 2015 khin Yakub Memon chu an tangna Nagpur Jail­ah khai hlum a ni ta ding a nih. Memon hi a birthday ni charin khaihlum a ni ding a nih. July 30, 2015 khin Memon hi kum 53 a tling ta ding nia hril a nih.Mumbai­a bomb puok tum khan mi 350 an thi a, midang 1,200 an hliem a nih.

Nagaland mi foreigner anga ngai
PUNE: Mr P. David Ndang, Paren, Nagaland chu July 19, 2015 khan Raja Kelkar Museum, Pune en tumin a fe a, sienkhawm hi Museum a Gate duty han foreigner anga ngaiin, foreigners han entry fee an pekzat pe dingin an ti tlat a, India mi ngei a nizie fiena a Driving Licence, Govt. of Nagaland in a pek an entir hnung khawma an la phal peknaw leiin hi Museum a hin lut ta lo le en ta lovin a fesan. P. David hi Pune a NGO intern, kum 23 mi, Pune mi Prithviraj Gaikhwad le fe an nih. Prithviraj in Gate duty hai hi a hrilfie ngiel khawma an awi chuong naw a nih.

Pu Ngamrothang Hmar in mipui kuoma thil chi tum tum a sem
HAFLONG: Pu Ngamrothan Hmar, Lower Kharthong Bieltu le Chairman, NCHAC chun July 21, 2015 Dittokcherra hmuna biel mipui hai tading thil chi tum tum a sem. Council a thil iengkhawm a um naw an ti hlak a chu keini Lower Kharthong mipui hai chu kan vangnei bik a nih, dawng hi kan nei deu zing a nih tiin an hril a. Pathien zar le Pu Ngamrothang zarin govt facility kan hmu ngun hle tiin an hril bawk. A thil sem hai chu 1. Blanket 2. Umbrella 3. Torch light 4. Karachi 5. Sauspan 6. Degchi 7. Kettle 8. Filter 9. Cotton 10. Sprayer. Hieng thil hai hi khaw tina sem a nih tiin thu ei dawng. Mipui an lawm hle a. Pu Ngamrothang Hmar bieltu an neina thu ah mipuiin a vel velin lawmthu an hril. Amah in a hma khawmin thil chi tum tum mipui tadingin a lo thaw ta hlak bawk. (LRS Puruolte)

Delhi CM Aug. 8­ah Court a inlang dingin
NEW DELHI: Civil Court, Musafirkhana, Amethi district, Uttar Pradesh chun zanikhan Delhi CM Arvind Kejriwal chunga bail thei manna ding warrant an suo bakah August 8, 2015 a Court hmaa inlang dingin a ko. Arvind Kejriwal chunga hin election laia a vote campaign huna a thuhrilna chungthua defamation case siem khum a nih.

Lalit Modi thuah RS vawi tam tak sukchawl
NEW DELHI: Parliament Monsoon Session chu zanikhan tan a ni a, Lok Sabha chun session nei lo sunga an member chanpui thina tuok Dileep Singh Bagh Bhuria thi sunna an nei a, sunna hunser zova zanita dingin session suktawp a nih. Rajya Sabha a ruok chun Selkaltu Pawl han Lalit Modi thuah buoina an siem leiin Rajya Sabha session vawi tam tak sukcahwl a ni a, rorelna a fe tluong thei nawh.

IIT an zawm ding
NEW DELHI/DIPHU: Tv. Laldawmsang Pulamte (19) s/o Dr Lalsiemlien Pulamte chun CBSE huoihawtnaa National Level Engineering Entrance Exam Joint Entrance Examination (JEE)­ Advance, 2015­ah hlawtlingin IIT­Kanpur ah B.Tech (material Science) seat a hmu bakah Delhi Tech. University a khawm B.Tech (Mechanical Engg.) seat a hmu a, sienkhawm IIT Kanpur­ah an chuk lem ding a nih.
            
Chun, Tv. Theophil Inbuon (19) s/o S. Para Inbuon, Diphu/Muolhoi khawmin IIT­Guwahati­a B.Tech.(Electrical) inchuk dingin seat a hmu ve. Theophil Inbuon hin JEE (Advance) 2015 ah All India ranking ST rank 224 a hmu phak a nih. (Virthli)

Sushma le Raje hai ban an ninaw chun
NEW DELHI: Union External Affairs Minister Sushma Swaraj le Rajasthan CM Vasundhara Raje hai an nina haia inthawk ban an ninaw chun Parliament Session fe tluong thei naw nih tiin Congress Party chun an hril. Sushma Swaraj le Raje hai hi IPL Chief Lalit Modi thangpuituin Congress chun an intum a nih.

An lei tanbawng pek dingin a hril
NAMAKKAL: Tamil Nadu Chief Minister J. Jayalalitha hriselna chungchanga hril neihai chu anlei a tanbawng pek ding niin AIADMK MP P.R. Sundaram chun zani hmasaa Rasipuram hmuna public meeting­a thu a hrilna huna a hril. P.R. Sundaram hi Tamil Nadu a Nammakkal Parliamentary Constituency a AIADMK ticket a thlangtling a nih. DMK Chief M. Karunanidhi le thuoitu dang thenkhatin J. Jayalalitha hriselna a tha naw a, CM a ninaa inthawk inban el sienla tia thurawn an siem a dawnletnaa hi thu hi a hril a nih.

AP Capital thar ding lungphumna
HYDERABAD: October 22, 2015 khin Andhra Pradesh CM N. Chandrababu Naidu chun an state capital thar indinna ding lungphum Amravati ah phun a tih. Andhra Pradesh state capital thar ding hi 16.9 sq. km a lien, Rel station lien takel umna a ni a, kum 2018 ah Capital a hmang le hluo theia a um beisei a nih tiin N. Chandrababu Naidu chun a hril.

Bullet Train Project a dingin Rs. 98,805 crore
NEW DELHI: PM Narendra Modi in Mumbai­ Ahmedabad inkara bullet train project an duonga sum seng zat dinga riruong chu Rs. 98,805 crore a ni ding thu Japan International Cooperation Agency (JICA) thusuok chun report a hung pek. JICA chun hi bullet train project hi hlawtling thei a ni thu report a hung pek bawk. Hi report hi Railway Board in a la enfel dinga ti a nih.

Zu an inrui leiin Doctor 2 man
SHILLONG:  July 19, 2015 zan khan Shillong Civil Hospital a thawk doctor pahni, Dr Pele le Dr Kevin Sangma hai chun zuruiin damnawhai an hal bakah Laban Police an cho leiin Police han an man a, NEIGRIHMS a medical test thaw an ni zovin local Court hmaah inlangtir anni a, Court chun ni 3 sung Police Custody­a um dingin a rel bakah U/S 353, 336 & 506 IPC dungzuia case file khum an nih.

Mamata Banerjee fiel a nih
KOLKATA:  July 29, 2015 khin UK a Industry lien tak tak nei han Asia House, London ah Round table meeting an ko a, hi meeting a hin West Bengal CM Mamata Banerjee khawm fiel a nih. UK a Industiry lien hai chu West Bengal ah hung sumdawng ve an nuom leia hi meeting­a thang dinga fiel a nih. Hi meeting a hin Mongolia President, ASEAN Secretary, Japan Foreign Minister le Thailand Finance Minister hai khawm fiel an nih.

GSLC ­Mark ­III hlawtling taka ensin
MAHENDRAGIRI:  Indian Space and Research Organisation (ISRO) chun zani hmasa khan Geosynchronous Satellite Launch Vehicle (GSLC) Mark­ III hlawtling takin Propulsion Complex, Mahendragiri, Tamil Nadu a inthawk a ensin. Hi thil hi a vawikhat ensinna a ni a, thil tonne 4 a rik a phur thei a nih.

An um thei ding bak um MPs 47
NEW DELHI: Lok Sabha members, State Government Guest house­a an um thei ding chen baka um 47 an tling a, hienghai lai hin Tamil Nadu Lok Sabha members 13 an thangsa. Hieng MP hai hi an um thei ding hun kum khat chuong Govt. Guest House­a an um tawl ta niin S.C. Agrawal in RTI fethelnga indawnna a siem sawrkarin a dawnna chun a hril.
-----------------------------------------------------------------------------------------------------------
VAWISUN THUPUI
I lungril po poin Lalpa chu ring la, Nanga hrietthiemna ringawta chun innghat naw rawh. I lampuihai po poa chun ama hre zing la, Am├ón i lampuihai chu suktluong a tih. -­ Thuvarhai 3:5­6

Editorial: Insiemthatna hun tha ei la nei

Ei um dan hin ei future iemani chen hril sienlakhawm ei hringnun hmawrbawkna a la ni nawh ti ei hriet a pawimaw hle. Thalai lekha thiem tak tak niin, result tha tak tak nei ei ni el thei. Chu taka chun lungawiin dittawk el naw rawh. “Mi hmangtlak ei ni am?” ti hi a pawimaw lem. Mark insang tak hmu, record tha tak nei kha hmangtlak lovin zuiral ei tih ti hi inlau um tak a nih. Naupang laiin ei tum insang ve fu, nisienlakhawm ei inchuk sang tiel tiel a, inchuklai a lo huop lien ta a, chinchang ei hriet chinah chun tum a hung inhnuoi tiel tiel nuom khawp el. Hi hun lai tak hi tumru taka thanglak tak tak hun a nih ti hriet tlat ding a nih.
    
Lekha ei inchuk laia ei en hnuoi em em hlak, eini neka thiemnaw lema ei ngaihai kha an tumru le le a tawp chena teirei pei leia ei ni neka insang  lem lei ei chunga hung um an um thei a, VIP car le an mi tlan pel huna “Kha pa, kha nu kha maw ka hriet taluo, kan classmate hlak a ni kha,  kan lekha inchuk laia a thiem naw thei vei leh” tiin ei la thlir liem vawng vawng el thei ti hi inlau um a nih. Tuta ei result that leia ei kut hi kuongkuoa thung el ding ei ni naw a, a tawp chena thang zing ding ei nih.
    
Chu chau chu a la ni naw a, sin tha tak le inzaum tak ei thaw a ni thei ie, iengtin am chu sin chu ei thaw ti a pawimaw nawk khawp el. Lekha inchuk laia Pathien ti mi tak, sienkhawm officer sin insang tak chel hnunga, mipui chan ai, a bikin mi retheihai chanai fakruk pawiti der si lo ei ni chun ei tawpna chu hmingsietna hung ning a tih. Lekha thiem, mi tium, faru mi le thamna la mi ni lova a tawp chena ringum taka thawktu ni tum seng ei tiu. Chuongang mi ei ni chun mi hmingtha, mihai lawm le inpak, ram le hnam banpui ei hung ni ngei ding a nih.
   
Vawisun hin a tha tak ei ninaw el thei, result tha tak ei neinaw el thei, mi fel tak, mi ringum tak le mi indik tak ei ninaw el thei. Hlawsam chang a hungtlungin, ei nun ah harsatna tuokin beidawng rum rum chang ei nei a ni el thei ie. Ei ruolhai, ei lekha inchukpuihai sin insang tak chelin tluk lo le phakzo lo rieuin ei inhriet annawleh  ei inngai el thei. Chu chun ei nunah beidawngna, tulaia an hril huoi huoi ‘depression’ nasa tak intlunin, mani insitna le lungril sawlna an tlun el thei. Nisienlakhawm, beidawng lovin bei fan fan inla, a tawpah insang takah ei invawr kai thei a nih. Vawisuna ei nina neka tha hi ei hmaah an nghat mek a nih ti hi hriet ding a nih.
   
Abraham Lincoln America President a hung nina dinga a lampui hraw kha a namei naw  hle, hlawsamnain a hne thei nawh, vawi tam tak hlawsam sienkhawm beidawng nuom der lova a beina chun midum/mihang zalenna a hung intlun a, vawisuna US President ngei khawm hi mihang a hung ni ta hiel a nih. Khawvela misuol hmingthang Nicky Cruz ei hriet. Kahwvelah hmangaitu nei lova an hrietna chun a sukbeidawng a, mihriem nun hin umzie neiin a hriet naw a, tuolthat chaknain a sip a, thisen lumin a dang a char a nih. Nisienlakhawm hmangaitu Isu a hung hriet meu chun khawvela Pathien thu hriltu ropui takhai laia mi le a chanchin mihai lungril tawk em em le hnetu a hung ni ta a nih.
           
Suol bawia dam, corruption changa dam, drugs addict le Zu ngawlvawi suoka dam ei intang a ni thei ie, retheina, harsatna chi tum tum, vangduoina, lusunna, tlaksamna, hmusitna le bawrsawmna han mi chim velin, suokah an mi siem el thei bawk. Amiruokchu, Pathienin hun tha takel (chance) a mi la pek a, insiem thatna hun ei la nei seng a nih ti hi hriet el chau ni lova  ngaipawimaw ding ei nih. Pathienin insiem thatna ding chance mi pe naw sienla chu ei hringna hi a nuom hun huna a lak thei a nih. Insiemthatna hun tha ei la nei a nih.
Don't Miss
© all rights reserved
made with by Simon L Infimate