Hmasawnna Thar | 14 July, 2015

Tuolsung

Mi 24 in MDC dinga intiemkamna an nei

CCPUR: June 1, 2015 nia Manipur­a ADCs 6 haia MDC dinga thlangtling thar hai chun July 13, 2015 khan MDC dinga intiemkamna an nei tawl. Autonomous DistrictCouncil, Churachandpur­a MDC dinga thlangtling thar mi 24 hai chun zani 11:00AM khan District Council Hall, Tuibuong, CCPur hmunah intiemkamna an nei a, Pu Lunminthang Haokip, IAS, DC, CCPur chun MDC dinga intiemkamna an neitir tawl.

    

Mr Lunminthang Haokip, DC, CCPur chun MDCs 24 hai laia Mr Langkhanpau Guite chu in­charge Chairman dingin intiemkamna an neitir hmasa taka, hi zo Demmang Haokip, Genneikhup, Lalhossan, Gouzamang Guite, Paokholal Haokip, Lalhmangpui Fimate, Lalditsang, G. Suanchinpau, Khaipao Haokip, Ngamhao Touthang, V. Khaikhanmung, Lalhrillien @ Hrila, Zamneiching @ Grace Zamnu, Seilenmang, T. Paukhanlian,T. Khaikhomang, G. Thangkhosuanmung, Chintwahlian @ CT Lian, KC. Chonsei, Pumtulthang Lianzaw, T. Kamkholal le Hausuanthang han intiemkamna an nei tawl.

     

DC, CCPur chun, MDCs hai chu an term sunga district hmasawnna dinga theitawp suo dingin a ngen tawl a, tukum sung ngeia mipui han Khuga Dam pipeline connection thaw ding le mipui hriet le hmu thei dinga an thil thaw hai district website haia sielut (upload) pei dingin a ngen bawk.

    

Ms Mannuamching,CEO/ADCC chun, District Council hnuoiah tuhin Department 6­ Education, PWD, Agriculture, Veterinary, Medical le Town Department a um a; Education hnuoiah Schools 170, Veterinary hnuoiah Dispensary 3 le Medical Department hnuoiah OPD 1 le Dispensary 8 a um mek tiin hi huna hin a hril.

    

MDC hai oath taking Ceremony­a hi SP/CCPur le SDOs/ROs hai khawmin an uop ve.

Hindi Exam July 23, 2015­ah

CCPUR: Hindi School, Lalbahadur Shastri Hindi Maha  Bidyalaya­a exam form fill up hai ta dingin July 23, 2015 khin Rengkai Government Higher Secondary School­ah exam nei ning a tih. Zingkar hun (morning shift) a mi chu 9:00AM ah tan ning a ta, Evening shift chu 1:00PM a inthawk tan ning a tih. Exam form fill up hai po po exam­a thangkim seng dingin Principal chun inhriettirna a siem.

Loneituhai kuomah Hnuoithatna sem

CCPUR: District Agriculture Office, Churachandpur chun July 13, 2015 khan Loneitu hai kuomah Hnuoi­thatna Urea Fertilizer bag 660 (kg. 50 peia rik) a sem. Hnuoithatna hi bag 1­ah Rs. 304 rate peia Loneituhai kuoma a sem a nih.

    

July 15, 2015 khin District Agriculture Office chun loneitu hai kuomah hnuoi­thatna (Urea) bags 600 a sem nawk ding niin ei thu dawngna chun a hril.

Tuithapui vadung­a tuitla nuhmeite sansuok

CCPUR: July 11, 2015 zantieng khan Taingaihchoi Gangte (7) d/o of Lalminthang Gangte (CRPF) of Hmarveng, CCPur, Sielmat Christian Hr. Sec. School­a Class II inchuklai chu Tuithapui vadung­ah a tla a, Mr Mangzoulal Minlun (15) s/o M. Khamzalam of  New Zoveng, CCPur, Soikholal Ideal H/S a Class IX inchuklai chun dam takin a sansuok.

    

Ei thu dawngnain a hril danin Taingaihchoi hi a sangpa le a ruol pakhat hai le a nu hai bazar kai kara Tuithapui vadunga va fe an ni a, a slipper bal sawpfai a tumnaah changsuola Tui­thapui vadunga tlalut niin a hril. Ms Taingaihchoi hi Tuithapui vadung in a tlaknaa inthawk metres 80 vela hla a fen hmang a, sansuoktu ding nei lova a um laiin Mr Mangzoulal hin tui inhlieu thiem beknaw sienkhawm a hringna chen chan huomin Ms Taingaihchoi hi hnawtzuiin damin a sansuok a nih.

    

Village Authority Secretary chun, tui inhlieu thiem khawm ni lo, mi hringna sanna dinga Mangzoulal Minlun inpekzona chu inpakum a ti thu le ropui a ti thu a hril a, hringna hiel chan huom a tui tla sansuoktu a ninaah District el chau ni lovin sawrkar thuneitu han hre a, a huoisenna leia Award an inhlan ngei a nuompui thu a hril. “A student saved a student’s life from the deadliest river of Manipur’’ tiin a hril.

    

Ms Taingaihchoi Gangte nu le pa hai chun an naunu Tuia tla hlum ding sansuoktu Mr Mangzoulal chunga Chanchinbu hai fethlengin lawmthu an hril.

H. Basulal Singh in SDPO CCPur

CCPUR: SDPO/CCPur thar dinga hung sawn Mr H. Basulal Singh, MPS chun zanikhan Mr Emmanuel Fimate, MPS kuta inthawk SDPO/CCPur chel dingin charge a lak a, zani ma khan a sin a thaw tan nghal.

Headline

Manipur Assembly Emergency sikking July 15­ah;

JCILPS in darkar 14 General Strike an thaw ding

IMPHAL: Zani zing dar 10 a inthawk khan Chief Minister’s Secretariat, Imphal­ah CM O.Ibobi Singh inrawinain CAbinet meeting nei a ni a, Cabinet meeting chun Inner Line Permit thu le inzawmin July 15, 2015 khin 10th Manipur Legislative Assembly Emergency Sitting nei dingin an rel. Hi le inzawm hin Secretary, Manipur Legislative Assembly khawma Emergency Session July 15, 2015 a nei dinga kona Official Notification an suo ve nghal. Vawisun hin Business Advisory Committee, Manipur Assembly chun Assembly Secretariat, Imphal­ah meeting nei an ta, Emergency session huna an thu rel ding hai rel fel an tih.

    

Manipur Assembly Emergency Sitting chun Manipur Regulation of Visitors, Tenants and Migrant Workers (MRVTMW) Bill, 2015 an hnukkir ring a nih. July 12, 2015 zantieng khan Inner Line Permit thu le inzawmin Manipur a Congress Legislature party (CLP) chun meeting an nei a, MRVTMW Bill, 2015 chu hnukkir dingin thutlukna an siem. Hi Bill hi March 16, 2015 a Manipur Assembly in a passed le March 19, 2015 a Manipur Governor kuoma peklut le Jun 23, 2015 a Governor in hi Bill hi reserve a sie le India President le inrawntlang a tul ding thu State sawrkar an hriettir a nih. Hi Bill hi All Political Parties Forum on ILPS, Legal le Constitution experts han an draft a nih tiin CM O.Ibobi Singh chun a hril.

            

Hieng laizing hin ILP le inzawmin Joint Committee on Inner Line Permit System (JCILPS) chun Manipur pumpui huopin darkar 14 General Strike vawituk zing dar 5 a inthawk  zan dar 7 chen hin an thaw ding thu an puonglang. General Strike ding lei hin sawrkar chun venghimna sin khau takin a thaw tan. General Strike hin Medical Services, sakhuona thil, electricity, Water supply le Media hai chu huop sa naw nih tiin JCILPS thusuok chun a hril. General Strike zo hin non­local people hai chungah hun tiemchin um lovin Curfew an puong ding niin JCILPS Convenor chun a hril.

Darkar 11 sung Curfew inthlazal

IMPHAL: District Magistrates, Imphal West & East District N Geoffery le Mongjam Joy hai chun vawisun hin, hieng district pahni sungah Curfew darkar 11 sung, zing dar 5 a inthawk zantieng dar 4 chen inthlazal ning a tih tiin thusuok an siem nawk. Zanikhan darkar 9 sung, 5AM­2PM inkar sung Curfew inthlazal a ni a, hi hun sung hin buoina suok hriet a ni naw a, mipui bazar kai an tam hle a, Curfew hun bo tepa chun mani in tieng pan an tam leiin traffic nasa takin a jam pha.

MDCs han sesamna an nei tawl

IMPHAL: Manipur­a ADC 6 haia MDC dinga thlangtling thar hai chun zanikhan sesamna an nei tawl. ADC/CCPur a chun MDC 24 han sesamna an nei seng a. ADC/Ukhrul hnuoia MDC 24 hai laia 22 in sesamna an nei a, Congress MDC 2 hai chu Security suon lamin an thang nawh;  ADC Sadar Hills a MDC 24 um hai chun sesamna an nei seng; ADC/Senapati a chun MDC 24 um laia 23 han sesamna an nei a, Congress MDC pakhat a thang nawh; ADC/Chandel hnuoia MDC 24 um laia 13 in sesamna an nei a, MDC 11 sesamna hunserah an thang naw a, ADC/Tamenglong hnuoia MDCs 24 um laia 13 han sesamna an nei a, Congress MDC 10 le Independent MDC 1, an rengin MDC 11 an thang nawh tiin ei thu dawngna chun a hril.

Education Minister rawiin meeting

IMPHAL: Zanikhan SSA Office, Babupara, Imphal­ah Education Minister M. Okendro Singh in High School le Higher Secondary School haia Headmasters le Principals hai meeting a neipui a, Curfew zamna area sunga School­hai hawng nawk dan ding thu an hriltlang. School­hai chu vawisuna inthawk hawng tan nawk nisienla tiin rawtna an siem niin ei thu dawngna chun a hril.

WY(R­20) Rs. 21.65 lakh manhu an man

IMPHAL: 24 Assam Rifles hai chun July 10, 2015 khan Khudengthabi check post­a Registration number umlo Motorcycle sukchawla an dapnaah drugs WY (R­20) mum 2165, Rs. 21.65 lakh manhu ding leh Mr Jamkhongam Haokip (23) s/o Thangkholet Haokip of Lokchao, Chandel District an man a, a kuta inthawk Mobile phone 1 le Aadhar Card an mansa bawk niin zanita PRO, Assam Rifles thusuok chun a hril. An thil man hai hi Moreh Police station­ah an peklut.

Furniture le Textbook an pek

UKHRUL:  41­Assam Rifles chun July 9, 2015 khan ‘Assam Rifles Military Civic Action programme’ hnuoiah Ukhrul district­a Nariching Living Centre Blind School kuomah furniture le lekhabu an pek niin zanita Assam Rifles thusuok chun a hril.

HI inrawinain Hmarkhawlien­ah inrawnkhawmna  nei

HMARKHAWLIEN: July 13, 2015, 1:30PM khan Hmar Inpui Gen. Hqrts. inrawinain RATARCTraining Hall, Hmarkhawlien, Cachar,Assam­ah Hmar Politics Development/Movement le inzawmin Inrawnkhawmna hun nei a ni a, inkhawm hi Dr John Pulamte, President, HI GHQ in a keithuoi a, Rev. John Zohminglien Zote in hun hawng tawngtaina le hun khar tawngtaina Pu Lalawilien Amo, Vice President, HI GHQ in a nei.

    

Hi huna hin State hran hrana Hmar hnam thuoitu le Politicians hai an thang tawl a, hmalak pei dan ding hai an hriltlang. Hi huna hin Hmar khuo le ram hai venghim dan ding; Jhumland Permit thu, NC Hills le Barak Valley/Cachar laia hnam harsatna chi hran hran haia hmalak dan ding le thu pawimaw tum tum hai hnam thuoitu fekhawm hai chun an hriltlang.

    

Pu Lalawilien Amo chun, boruok suk sosang le mi sukbuoi thei thil thu belchieng dawllo Facebook le Phone haia hril mei mei ding lo dingin mitin a ngen.

AMEF Foreign Secretary man

SHILLONG: July 12, 2015 khan Shillong Police han Achik Matgrik Elite Force (AMEF) self­styled Foreign Secretary, Vincent T. Sangma chu Dangar, East Khasi Hills district­ah an man a, Shillong panpui a ni a, ni 5 sung Police Custody­a sie dinga ti a nih tiin M. Kharkrang, SP, East Khasi Hills chun a hril. Chun, hi ni ma hin Tura Police kutah GNLA cadres pahni, Benjamin R. Marak le Kenny Roger Sangma hai chu .32 Pistol pakhat le a mu 11 leh an inpe.

PM in July 25 ah IIT Patna a hawng ding

PATNA: Prime Minister Narendra Modi chun hungtlung ding July 25, 2015 khin Indian Institute of Technology­Patna (IIT­P) Campus thar hawng a ta, hi zo hin Muzaffarnagar hmuna vantlang inkhawmnaah thu hril a tih tiin official thusuok chun a hril. IIT­P academic session thar hi July 22, 2015 ah tan ning a ta, class chu July 26, 2015 ah tan ning a tih. IIT­Patna hi Patna khawpuia inthawka km. 35 vela hlaa um a nih.

IPS officer in SP President a hek

NEW DELHI: Uttar Pradesh Chief Minister hlui le  Samajwadi party (SP) President Mulayam Singh Yadav chu IPS Officer, IGP rank, Amitabh Thakur chun a thu thu awi ding le a thu a awi naw chun a tuor ding tiin a vau niin Gomti Police Station­ah hekna (FIR) a peklut. Mulayam Singh Yadav chun senior IPS Officer, Amitabh Thakur hi nuhmei suolluituin an tum ve thung. Amitabh Thakur chun a case siem hi CBI in suizui sienla a nuom thu zanikhan a hril. Amitabh Thakur hi 1992 batch IPS Officer a ni a, kum 18 sungin vawi 22 zet transfer a ni tah.

Helicopter a inthawk Anti­Tank missile

JAISALMER: Zani hmasa khan Chandan Firing Range, Jaisalmer, Rajasthan­a inthawk Nag Anti­Tank Guided Missiles (HeliNa) 3 chu Helicopter a inthawk ensinnaa kapsuok a ni a, pahni a hlawtling a, pakhat a hlasam. Nag Missile hi Defence Organisation (DRDO) in Integrated Guided Missile Development Programme hnuoia a siem a ni a, km. 7 a hla a kap phak a nih.

India in indona Lawnglien 6

NEW DELHI: India sawrkar chun indona lawnglien 6, Air Independent Propulsion (AIP) nei ngat 6 inchawk a tum. Indona Lawnglien 6 man dinga riruong chu Rs. 60,000 crore a nih. Hi thil hi Narendra Modi PM a ni hnunga sawrkarin a rawt thar, Make in India Project hnuoia mi a nih.

ITBP SI le Constable thattu man

MUSSOORIE: July 10, 2015 nia IAS Academy, Massoorie a ITBP Sub­Inspector le ITBP Constable kap hlumtu ITBP constable tho Chandra Shekar chu July 11, 2015 khan Police han Murray Pump House bul, Chandigarh hmuna a man. Chun, ralthuom a tlanhmangpui LMG 1 le a mu 100 zet hai khawm hmukir vawng a nih tiin Police thusuok chun a hril.

Tuia tla hlum mi 8 ruong hmu tah

VADODARA: July 12, 2015 nia Nareshwar an ti hmuna Narmada vadunga tui insila fe mi 32 hai laia mi 8 changsuola tuia tla hlum hai ruong chu an rengin zanikhan hmu anni ta tiin National Disaster Response Team (NDRF) thusuok chun a hril. Mi 32 hai hi Ahmedabad khawpuia cheng vawng an nih. Tui hratin a man leia tuia tla hlum an nih tiin NDRF thusuok chun a hril.

CBI in Vyapam Scam suitu dingin member 40

NEW DELHI: Madhya Pradesh state a Vyapam Scam chungthu suizuitu dingin Central Bureau of Investigation (CBI) chun Special Team an din a, hi members ding hin mi 40 a ruot. Members a ruothai hi Joint Director Level officers chin an nih. Special Team hin an sin tan dingin Bhopal an pan. Supreme Court chun CBI chu July 24, 2015 ah an thil suizui le inzawmin report pe dingin an hriettir.

West Bengal­ah JE leia thi mi 21

KOLKATA: Zani hmasa khan North Bengal Medical College & Hospital (NBMCH) a enkawla um Japanese Encephalitis a damnaw pakhat a thi nawk leiin January 21, 2015 a inthawk July 12, 2015 chena West Bengal state a Japanese Encephalitis (JE) natna hri leia thi chu mi 21 an tling ta tiin senior official, Health Department chun a hril. Nikum khan JE leiin West Bengal­ah mi 200 an thi a nih.

Hotel sungah US nupui a thisain hmu

DHARAMSALA: Zanikhan Himachal Pradesh State a Dharamsala a Hotel pakhat sungah US nupui pakhat, kum 67 mi chu a thi saa hmu a nih. A taksaah hliemna be hmu a ni leiin mi that ringhla a ni leiin postmortem thaw dingin Tanda Medical College & Hospital, Kangra Morgue ah sie a nih.

Mexican drug kingpin a tlansuok

ALMOLOYA DE JUAREZ, MEXICO: Mexican Drug kingpin Joaquin “El Chapo” Guzman  chu an tangna jail sunga tunnel (hnuoiver) fethlengin a tlansuok. Guzman hi July 11, 2015 a kha tlansuok a ni a, Mexican security forces hai chun mankir ngei tumin nasa takin an zawng a, sienkhawm an la hmu zo nawh. Guzman tlan suokna le inzawm hin Prosecutors hai chun Jail warden thangin Jail­a thawktu mi 30 vel thu indawna an nei ta a, a tlansuoknaa hin jail­a thawktu hai an inrawl ngei ringhla a nih tiin attorney general office thusuok chun a hril.

    

Guzman hi a hmasa takin kum 1993 khan man niin kum 2001 khan a hmasa takna dingin western Jalisco state jail­a inthawk a tlansuok a. Kum 2014 khan Sinaloa state­a Pacific resort  Mazatlan hmuna US Drug Enforcement Administration thangpuinaa man kir nawk a nih.

    

Guzmen drugs­a a sumdawngna hi Mexico chau ni lovin United states le Europe le Asia khawmuolpui haia chen an darzau a nih. United states chun kum 2014­ a mankir a ni hma khan luman dollar 5 million neia a lo puong ta a nih. A hausakna leiin kum 2013 chen khan Forbes magazine­a billionaires list a khawm lo thang hlak a nih.

    

Kum 2007 khan kum 18 mi beauty queen  Emma Coronel nuhmeiin a nei a, nuhmei dang dang leh nau 10 zet a nei ta a nih. Mexico­a hin kum 2006 a inthawk khan Drugs sumdawngna le inzawma tharum insuona tlungah mi 80,000 chuong an thi ta a nih.

Afghanistan a bomb puokah mi 27 an thi

KABUL: Zani hmasa zantieng khan Afghanistan rama US Military Base bul, Khost Province­ah thichil bomb sukpuok a ni a, mi 27 an thi bakah midang 10 na takin an hliem bawk. US sipai thi le hliem ruok chu an um nawh tiin US Military thusuok chun a hril.

Mi 3 chuongna vuongna an hmang

LOS ANGELES: Vuongna chin chi, Beech 35, mi 3 chuongna, July 11, 2015 zantieng dar 4 vela Washington a inthawka vuong suok chu an hmang a, nasa taka zawng a ni hnung khawmin hmuzo a la ni nawh tiin Washington Department of Transportation thusuok chun a hril. Tulai hin Vuongna le a sunga chuong hai hmuzo ta lova inhmang an um rawp ta a nih.

---------------------------------------------------------------------------------------------------------

VAWISUN THUPUI

Ka hril cheu hi, chuong ang bawk chun, mi fel sawmkuo le pakuo sim chuong ding nei nawhai chunga nekin mi suol pakhat sim chunga hin vana lawmman um lem a tih. ~ Luka 15:7

Editorial:Se lut hnunga sedai khar

July 12, 2015 nia Manipur Congress Legislature Party (CLP) meeting chun Manipur Regulation of Visitors, Tenants and Migrant Workers (MRVTMW) Bill, 2015 chu lakkir dingin an rel nawk der tah. Better late than never’ ti ang deuin lakkir lo le thaw lo hrim hrim nek chun a la tha tho tho, lo inhnu deu ta sienkhawm. Hi le inzawm hin vawisun hin State Cabinet meeting nei ning a ta, chu huna chun hi Bill hi hlip dingin thutlukna siem an ta, hi thutlukna hi a tak taka lakkirna dingin Manipur Assembly Special Session nei dingin Cabinet meeting chun a rel ding niin an lang. Chik taka ei sut chun sawrkar tha thil thaw dan chu niin an lang nawh. Sawrkar tha chu nisienla lakkir nawk ding bill hi Assembly Session ah pasi dingin a putlut ring a um nawh.

    

MRVTMW Bill, 2015 lei hin Manipur phairam biel chu chappui kang ang elin a kang dur dur a, harsatna le buoina tam tak an tlun bakah mihriem thina le hliemna chen an tlun pha a nih. Chu el chu a la ni le, haptakar khat deuthaw Impha East le Imphal West districts haiah Curfew puongin a um a, nundan pangngai nasa takin a sukbuoi a, inchuknainhai khar a ni a, student han  an lekha inchukna kawngah an bahla pha a, nitina fakfawm zawnga sinthawtu le mirethei hai ta ding lem chun harsatna hril ruollo, hremhmun intemlawkna a ni ringawt el. Hi Bill dodalnaa hin mi tam takin tha le zung, sum le pai bakah an hun tam tak an hmang a, hieng thil hai po po leia inhmangna hi a renga belkahwm chun cheng vaibelsie tel a tling phak ring a um.

    

Thil a ni ding ang ang a ni vawng ta a; a se ding po po a se zo ta a, an hmang ding po po an hmang ta bawk. Hi hnunga ‘se lut hnunga sedai khar’ ei state sawrkarin a hung thaw nawk el hi chu hrietthiem a harsa hle. Se lut hnunga sedai khar a thaw hi a vawikhatna chau an ta naw a, vawi sangtel a thawna ni ta ngei a nih. Iengleia ei state sawrkar hin se lut hnunga sedai khar a thaw rawp el? Sawrkar tha, sawrkar fel le indika roreltu sawrkar a ninaw lei a nih. Sawrkar tha nisienla hiengang hi tlung ngainaw nih.

    

Sawrkar thuneituhai hin thutlukna an siem ding hin ngunthluk takin, kil hran hran hrut kuolin, ti takzetin ngaituona seng hlak hai sienla, Order chu Order a ni anga zui le zawm ngei dinga fethlengpui thei dingin Order le Bill siem hmain a kakhawk ding, a sie le a tha chik takin ngaituo hlak sienla chu hiengang thil hi a thaw tul naw nih. Order le Notifications an suo zung zung a, nisienlakhawm a nina anga hmang le a lekkaw nawk ngai si naw leiin mipui han sawrkar Orders le notifications hai hi inzana chang an hriet tanaw a nih. Order le Notification insuo tasa le Bill siem tasa hai hlip le lakkir a ni pei chun sawrkarin umzie a nei nawh, ti hi state sawrkarin a hriet a tul a nih.

    

Sawrkarna cheltu le ei ram thuoituhai hin thudik  dam, thu tha tak dam, thu inzaum le awm fut fut an hril rawn hle hlak. Amiruokchu, an thuhril hai laia zaah sawm khawm an sukpuitling ngai nawh. Heingang bawk hin an Order le Notification insuohai khawmin zui le zawm a hlaw ngai nawh. Hi hi ei culture pakhat a ni der ta a, hiengang kalphung hin thiltha intlun ngainaw nih.

            

A san chu, Politician­hai hin inlalna an dit taluo leiin an dik le an diknaw khawm ngaituo  chet chet lovin, nakie hnunga a tha ding le ding naw sut chieng thei lovin, nunghakin tlangval a thlem a, tlangvalin ngaituo chieng mang lova a “aw” liem put a, a hnungah thil a hung fe pei a, “sawn man” a chawi tawk ang el hin, an inhril ang le an rel anga thil an thaw thei tanaw annawleh a hung ni thei ta hlak leia ei state sawrkar hin se lut hnunga sedai khar hi a thaw nawk el hlak niin an lang.