Responsive Ad Slot

Hmar hnam puonhai humhal le chawilar dan ding thuah HWA in mipui kuoma inhriettirna le ngenna a siem

Thursday, June 4, 2015

/ Published by Simon L Infimate
HMAR WOMEN ASSOCIATION
General Headquarters

HMAR HNAM PUONHAI HUMHAL LE CHAWILAR DAN DING THUA MIPUI KUOMA INHRIETTIRNA LE NGENNA
Tuithaphai, June 1, 2015


Tarik 23, May 2015-a HWA, HYA, HSA, HNU hai thanga HMAR INPUI Executive Meeting-in Hmar Pasaltha Thangsuopuon le Hmar hnam puon danghai humhal le chawilar dan ding kawnga mawphurna Hmar Women Association kuoma a pek angin hieng a hnuoia ang hin chu thu le inzawm chun rawtna siem a nih. Hi rawtna hin Hmar mipui lunginruolna le lungkimna chuong ngei sien ei nuom leiin sawiselna le thurawn le ngaidan tha pe nuom taphawt hai ta dingin June 2015 sung po hun hawng a nih.

A thei chinah chuong ang ngaidan, thurawn le sawiselnahai chu ziek ngeiin HWA e-mail (hwaghq@gmail.com) le facebook page INBOX-ah mani hming, address le contact details indik tak le ni ngei sien lawmum hle’ng a tih. Tul le pawimawa hriet a ni chun hi thu hi namdet a ni hma-in inrawnkhawmna hun khawm siem nawk la ning a tih.

Hmar Women Association, General Headquarters aiin,


Sd/-    
(JL Sawmi)
President
+91 9612181027

Sd/-
(Chongtuozing)  
Secretary  
+91 9862128099

-------------------------------------------------------------------------------------------------------

HMAR HNAM PUONHAI HUMHAL LE SUKLAR DAN DINGA RAWTNA

PASALTHA THANGSUOPUON

A design:
1. Tuta Hmar Thangsuopuon ei hmang lai mek hi a nuom taphotin inpek/insiltir le mithi ralna pangngaia hmangin mikhuol taphot pek a ni tah. Hi hi zuk khap bur chu thil thei le remchang a ni ta naw ding leiin a design/zie thar hlok phuok chuong lovin tuta mi hi chitea suk danglam (modify) nisien; a hmingah khom ‘Hmar Pasaltha Thangsuopuon’ ti kher ni sien.
2. Hmar Pasaltha Thangsuopuon zie (design) chu tuta Thangsuopuon pangngai lailunga a sen sunga a var sungah hin a zie suk bit vong ning a ta; chu khelah chun a puo/kil tienga a dum lien sunga a var inhmi deua um hi a sen lien sunga a var anga suklienin a sungah a zie zep bit vong ve ning a tih.
3. Hmar Pasaltha Thangsuopuon sei dan hi a tawi takah feet 6 le a chanve (6 ½ feets) ni ngei a ta, kuta khawng ngei le a pat khom ‘four-ply’ hmang a ni ngei ding a nih.

A pe theitu:
1. Village levela Chief/Authority, Hmar hnam hminga organization hai chauh-in mimal/pawl kuomah Hmar Pasaltha Thangsuopuon hi inhlan/pe thei an tih.
2. Village levela Chief/Authority, Hmar hnam hminga organization hai chauh-in mithi ralna/tuomna in Hmar Pasaltha Thangsuopuon hi hmang thei an tih.
3. Hmar Kohran haiin an pawl rorelna insangtak - Assembly/Synod, etc remtina an hmu chun mimal/pawl kuomah Hmar Pasaltha Thangsuopuon hi pe thei an ta; mithi ralna/tuomnain hmang thei bawk an tih.

Pek theihai:
1. Village levela Chief/Authority, HSA/HYA/HWA, etc Unit/Branch/Headquarters le Hmar hnam hminga organization puitling haiin tlin le thlaka an ngaihai chauh kuomah Hmar Pasaltha Thangsuopuon hi pek thei ning a tih.
2. Village levela Chief/Authority, HSA/HYA/HWA, etc Unit/Branch/Hedquarters le Hmar hnam hminga organization puitling haiin tlin le thlaka an ngaihai chauh ralna/tuomna in Hmar Pasaltha Thangsuopuon hi hmang thei an tih.
3. Hmar Kohran haiin an rorelna insangtak - Assembly/Synod, etc-ah an kohran/pawl thuoitu le mikhuoltha pekthlak/inhlanthlaka an ngai hai chu pe/inhlan thei bawk an tih.

Suklar/Sukhlut Dan ding:
1. Hmar Pasaltha Thangsuopuon hi a chunga pesuok theitu dinga riruong hai hin iengtik lai khawm pakhat bek ‘emergency’ huna dingin an nei ngei a poimaw zie hril uor ni sien.
2. Hmar Pasaltha Thangsuopuon hi sumdawngna thila hmang thei a ni naw thu hriluor ni zing a ta; a nina ang taka dong lohai chun khawlaia an sil/bat pawlawt phal ni naw thu hril uor zing ni bawk sien.
3. Indiktaka hmu le donghaiin Hmar Pasaltha Thangsuopuon sil/bata Hmar hnam hminga puipunaa an fe chun prokram huoihottuhaiin chu mipa/minu chu an lo hlutsak ngei ding a ni thu hril uor bawk nisien.

HMAR HNAM PUON DANGHAI SUKLAR DAN DING
1. Hmar Hnam Puon hai laia humhal le chawilar dinga poimaw hmasa zuolhai chu Puonlaisen, Hmar Thangsuopuon, Hmarpuon, Ngotlawng, Ngotekher, Hmar Am, Thlanlampuon hai nisien.
2. Hieng Hmar Hnam Puonhai hi kuta khawng ngei nisien duthusam a nia; handloom hmang hi insukhmu naw hram nisien.
3. Mithi ral nikuo-ah thingpui semtu nunghakhai tiemin nuhmei po poin Thlanlampuon an bi ngeina dingin thu uor taka thedara, ngenna an dar zau thei ang taka siem nisien.
4. Function pangngaiah chu Hmar Thangsuo Puon, Hmar Puon, Ngotlawng, Ngotekher, Hmar Am, Puonlaisen hai bi nisien; Sietni tiengpang (thini, lungdaw, etc) hrim hrimah chu Hmar Thangsuo Puon le Thlanlam Puon bi nisien.
5. Thla khata Pathienni hmasatak (1st Sunday) hi ‘Traditional Sunday’ tia koin hi ni hin nuhmeihaiin Hmar (mani hnam) puon laia pakhat tak an bi ngeina dingin ngenna siem nisien.
6. Khristien sakhuo nipui ni hieng Khrismas, Kum Thar, Palm Sunday, Good Friday, Easter Sunday, Pentecost Day, etc le Kohran Inkhawmpui a hai nuhmeihaiin Hmar (mani hnam) puon laia pakhat tak an bi ngeina dingin ngenna siem nisien.
7. Tawllo Puon or Ngo Tlong design-a Pasal hak ding phuok ni sien, a man tam lo le mitinin an hak/nei thei dingin a simple thei ang tak nisien.
Don't Miss
© all rights reserved
made with by Simon L Infimate