Beauty ‘N’ Beast (Band) Rs. 5,000/-, Lawmman a inhlan an nih

HOPE in mipui tadinga sin la thaw pei an tum

CCPUR: June 13, 2015 1PM a Tiddim Road, Hmuia Veng, CCPur a HOPE le WAVE JAM ROOM hai thangruol a huoihawt a um First Summer Jam 2015 (A Charity Beat Contest) huna Lawmman latu Beauty ‘N’ Beast (Band) chu June 20, 2015 3:30PM khan VTI Auditorium, Muolhlum, Rengkai, CCPur hmunah First Summer Jam 2015 Lawmman Inhlanna nei a nih. Lawmmanin  ` 5,000/- (India Tangka Sumfaiin Cheng Sangnga) chu Mr. LRS Puruolte Technical Adviser, HOPE le Chief Admin, VIRTHLI (Online News Portal) in inhlanna a nei. Hi hun hi Mr. Rama Ralsun Admin, Virthli le Jt. Editor, Churachandpur Times (Monthly Magazine le Online News Portal) khawmin a tawiawm. Hi hun a hin Mr. JJ, Amber Smile, Beauty ‘N’ Beast chun hnesaw takin an talenthai an suklang a nih.

L to R; Bass Guitar- Lamminlian (Sitting), Drums- Ebenezer (Standing), Guitar/Keyboard- Joe Zosanghlun (Sitting/Middle), Guitar/Keyboard- Joel Lalropui Nehsial (Standing), Vocals- Lalkosuok (Sitting).

Hi Summer Jam thil tum tak chu mihai kuomah thangpui ngaihai thangpuina lungril inputtir dinga rimawi le thalai/tleirawlhai talent hmang thangkaia hmalak a nih. Hi huna Mr. Daniel Traite Director, HOPE in thu a hrilna a chun ‘HOPE’ ti thumal hi ‘Beiseina’ ti a inthawka laksuok a ni thu hrilin, chu beiseina chu an tanna chu Pathien ah an nghat thuhai a hril. HOPE hin hmatienga thil tum tamtak a nei a, tuta inthawka hun sawtnawte ah Rehabilitation Centre tum tum hai kanin thu-le-hla le rimawihai leh hun hmangpui an tih. Chun, Tlangram biel abikin Doctor le Nurse umnawna le damdawi (medical facilities) tlaksamna hmunhai ah Free Medical Camp/Mobile Clinic hai buotsai le Band, Rimawi remthiem, hlasak thiem tum tum hi taka dinga mani theina (talent) tuok nuomhai leh thangruolin hmun tum tum haiah Road Show huoihawt an la tum thu an hril. Hi Road Show huoihawt hun a hin Donation Box sie ning a ta, chu sum chun a mamawtuhai hmang hlak ding Oxygen Cylinder inchawk  a ni ding thu an hrilsa bawk. Hienghai baka hin thil dang dang khawm mipui tadinga sin la thaw pei an tum thu hrilin Pathien kuoma tawngtainaa lo san dingin mitin an fiel.

Mr. CT Lian Social Activist inlar ve tak el le Autonomous District Council CCPur Election 2015 a 16- New Lamka (West) MDC dinga thlang thar chun HOPE hmalakna chu tha tiin, an hnikna zawng tak a ni thu hrilin a hranpa taka a la kan ding thu le a la’n pawlpui nuom thu Officialhai kuomah a lo intlun ta bawk. Chief Admin, Virthli khawmin HOPE hmalakna hai chu ama le Virthli Team ha’n an theitawpa an thlawp hlak ding thu a hril a. A tulna hun haiah Event & Media Partner dinga an inpei zing thuhai a hril. Hienganga kum la naupang tak tak haiin lungril an put chu inpakum le lawmum a ti hle thu a hril. Ramdang (foreign) kut chauh nghakloa mani ngeia ei rama thangpui ngaihai thangpui hi mitin mawphurna a ni hrim a nih. Social Worker le Medical Doctor thangsain WAVE JAM ROOM Rengkai leTleirawl/Thalai rimawi inhnikmi iemanizat chun HOPE hmalakna chu an thlawp ding thu an lo hril ta bawk.

Chief Admin, Virthli khawmin HOPE hmalakna hai chu ama le Virthli Team ha’n an theitawpa an thlawp hlak ding thu a hril a. A tulna hun haiah Event & Media Partner dinga an inpei zing thuhai a hril. Hienganga kum la naupang tak tak haiin lungril an put chu inpakum le lawmum a ti hle thu a hril. Hienganga kum la naupang tak tak haiin lungril an put chu inpakum le lawmum a ti hle thu a hrilsa bawk.

First Summer Jam 2015 hun a khan talent nei tha tak tak el, Beauty ‘N’ Beast, Daffodils Aizawl, Amber Smile, Mr. JJ hai chun an talent hai mipui hmaah an suklang a nih. Kha hun haia mani theina, sum-le-pai ni leh inroloa tuoktuhai kuomah huoihawttuhai chun lawmthu an hril a. Hmatieng peia khawm thangtlangpui pei dingin an ngen. Tuta tuma an hmalakna hi mi thahnemngai tum tumhai leh thawtlanga an huoihawt a nih. Hiengang thil a inhnikna neihai chu an lawmlut zing thu an hril bawk.

Lawmman latu Beauty ‘N’ Beast (Band) hai chu Vocals- Lalkosuok, Guitar/Keyboard- Joel Lalropui Nehsial, Bass Guitar- Lamminlian, Guitar/Keyboard- Joe Zosanghlun le Drums- Ebenezer hai an nih.


-Virthli, Manipur