Ursun takin Martyrs Day (silver Jubilee) Hmar nau haiin Delhi khawpuiah an hmang

New Delhi, May 16, 2015: May 16, 2015, zantieng dar 4 khan Srimanta Sankardeva Bhawan, New Delhi hmunah Hmarnau haiin Ram le Hnam ta dinga Thlunglu lo chan ta popo hai hrietzingna Martyrs Day ursuk takin an hmang. Pastor Lalditsak Inbuon in hun hawngna a nei zovin Mipui hlasak nei zawm peiin programme hi tan a nih. Hi huna hin thu tha tak tak ngaithlak ani bakah Hnam hla mawi tak tak hai ngaithlak ani bawk. Tulai hnai ela ram le hnam ta dinga hringna inhlan Pu Malsawmkim Hmar ralna hunser khawm hmang ani bawk.

Martyrs Day programme hi Pu Lalchungsiem Thlawngate le Nk. Daisy D Sinate haiin hnesaw takin an keihruoi a. DHWA Secretary Pu Malsawmthang Keivom in hnesaw takin "Hmar Hnam hi Pathien mi pek lieu lieu a ni a, Ram le hnam hmangainaw tu chun Siemtu a hmangaina a famkim naw' tiin Pathienthu le inmil, Israel hnam thuoitu ropui Mosie chanchin besan in thuhrilna a nei.

Dimasa hai le ei buoi laia hnam ta dinga hringna lo inhlan tah (Late)Tv. Hmangneilien a pa Upa CN Vura khawm hun pek ani a, a naupa chanchin a hrilna ah chun,a naupa hin inhawk taka ram ta dinga pensuok le hringna chen chan ani thu a hril chun mipui lungril a tawk hle. HPC Movement hun laia fam tah (Late) Pu Lalbieklien Hrangchal naupa Hrangchal Pattie Apparently Dahmars khawm hun pek a ni a, ama lem hi chu Kumthum ani lai chaua a pa hin a maksan ani leiin apa chanchin hril rawn taluo ding a hriet naw a chu, a pa hi ram le hnam hmangai tak tak, HPC hunlai khawma Commander fel le tha an hril hlak thu a hril a, ei hnam inthanglienna ding chun Hmarbiela inthawka Politics remfuk a pawimaw thu a hrilsa bawk.

Thuhril dinga ruot, HPC member hlui Pu Zarzolien Keivom a inthawkin Martyrs Day intan dan le hung suok dan kimchang le fumfe taka ngaithlak a nih. "Hmar hai hin Kohran, Politics le Ramhnuoia um hai laiah inthuruolna ei nei hma chu ei movement hin hma sawn thei tak tak nawng a ta, mi hnung ei hnawt pei ei ta. Pasaltha tamtak thisen a thlawnin ei inliemtir mei mei ding ani leiin Thangthar hai hi inngaituo chieng a kawng iengkimah pumkhat a ngir tlata hma ei lak a pawimaw em em", tiin thiem takin thuhrilna a nei.

Thusam le hlasam nei nuom hai ta dinga hun hawngna a chun Pu Jim Greene le Pu Phirthangsei Varte haia inthawkin inthuruol a pawimaw zie ngaithlak ani a, chu zova chun Ram le hnam ta dinga tawngtairuolna hun nei a nih. Thuhril karlak a hai hin ei hlasakthiem Pi Roselyn Lalumpui, Tv. Lalhrietsung Sanate, Nk. Mercy Lalumpui le Tv. Kaka Khawzawl haia inthawkin Martyrs Day hla ngaithlak pei a nih.

DHWA Chairman Pu C Hrangthang Vunga in lawmthu hrilna a nei zovin Pastor Lal Siesang Zote in tawngtaina neiin Martyrs Day programme chu ditkhawplo taka suktawp a lo ni tah.

Fak le dawn iengkhawm buoipui an naw a, ursun taka inser a nih. Hienga mipui pungkhawmna ni-a fak le dawn thang lo hi Delhia dingin a vawikhatna khawm a ni hiel.

*Reported by Nick Inbuon Lùngtau
May 16, 2015.