By Eden H Pena.
British awpna laka America ram ta dinga zalenna suoltuhai laia tlangval la naupang tak pakhat Nathan Hale chu a thang vea. Hale hi inchukna hmun tha le hmingthang Yale a inthawka graduate a nia, khâng hun lai khan lekhathiem an la thlawma, ama hi tlangval hmeltha tak el a ni bakah, infiemmi a ni bawka, a ngainatu le ngaizawngtu khawm an tam vieu reng a nih.
Nathan Hale hi sakhaw mi tak khawm a nia, Pastor ni khawm a tum nghe nghe a ni. Sienkhawm zirtirtu sin a thaw ta lem a ni. Inkhâwm taima tak ani bakah, sipai damnaw le hliemhai a tawngtai pek hlak.
Zirtirtua a thang lai chun America haiin British haia inthawk in zalenna an suola, indona (American War of Independence) a hung suok ta a nih. Nathan Hale khawm chun zalenna suoltuhai chu a zawm ve ta a, sawtnawte hnunga Captain ani ta nghe nghe a. Boston khuoa inkul British sipai an inhuol khuma, an hluokhum tum khawm a thang ve a. British sipaihai New York a an insawn tâk hnung chun General Washington in suizui a nuom hlea, Nathan Hale chu British sipaihai enthlatu ding chun an pek ta a nih. Vangduoi thlak takin September 21, 1776 khan British sipai ha'n an mana, an dâwpa, General Washington a ta dinga enthlatu ani thu an puong hnunga British General William Howe chun a zinga Hale khaihlum ani ding ti thupek a siem ta nghala. Chu zan chun Bible tiem ding a ngena an phal pek nawa, pastor hmu a nuom thu a hril khawma an phal pek naw nih. Lekhathawn pahni, a nu le a unaupa ta ding a zieka chu khawm chu an pei pek bawk a nih.
Nathan Hale khaihlum ni ding chu Pathienni a nia, chawhma dar 11 ah chun an hung thuoi suok ta a, an khaihlum hma chun mi tam tak lungril chawktho thei ding thu ropui tak hi a hril suoka- "Ka thilthaw hlak hai kha ka ngaituo kira, pawi tina ka nei naw reng renga, ka lungawi hlie hlie ani, pawi kati tak chu KA RAM TA DINGA INHLAN DING HRINGNA PAKHAT CHAU KA NEI HI A NIH" tiin.
Ama an khaihlum lai thlirtuhai hriet dingin, "Pawi tawklo thisen hi in insuo mek ani hi, hliem natak tuor mek, ka ram sansuokna ding ani phawt chun hringna sang sawma tam khawm nei lang inhlan vawng ka tih" tiin a khek suoka, hi thleirawl Martyr chanchin hin American thalai tam takhai lungril a chawktho hlea, zalenna suoltu dinga pên suokhai lungril ah huoisenna atu bawk a nih.
Hieng ang bawka tawngkam ropuitak hung saksuoktu, Pu Malsawmkima tawngkam kha hrezingin, thang la veng ei tiu khai.
