Hmasawnna Thar | 20 May, 2015

Tuolsung

Essay writing le painting competition result

CCPUR: Southern Forest Division, CCPur hnuoia May 9, 2015 a Vimala Raina H/S­a CCPur district state level Essay writing le Painting competition result puong a ni ta a. Position (prize) dawng dinga thlang hai chun May 22, 2015, 10:00AM­ a Manipur Film Development Corporation Hall, Palace Gate, Imphal hmuna International Day of  Biological Diversity, 2015’ hmangna huna an Principal/staff hai le va dawng dingin DFEO, Southern Divn. CCPur chun inhriettirna a siem.

Category tum tuma lawmman dawngtu dinghai chu­ Category­A Essay (Class IX to XII) ah 2nd­  Letginthang Baite of  St. Mary’s H/S; 3rd Teresa Nianghoikhim of Donbosco Hr. Sec. School; 5th Genlalzui of Rayburn H/S.

Category ­B Painting (Cl. VI to X) ah 1st prize Kamlianding of Hermon English  School; 4th prize Lunjalenpao of Greenwood Academy.         

Category­ C Painting ( Cl I to V)­ah 1st prize  Freda Haokip of Greenwood Academy le 5th Prize  Lammuanthang of Vimala Raina H/S hai an nih.

Nurses Association in election an nei

CCPUR: Churachandpur Nurses Association (Administration) chun zani zantieng 2:00PM khan MS Conference Hall, District Hospital­ah an pawl thuoitu thar ding thlangna (election) an nei. Hi huna hin  President dingin Chingliankim; Vice President dingin Florence Niangsuankim; Secretary in Niangneihoih; Asst. Secretary in Margret Thongngaihmawi; Fin. Secretary in Niangneikim le Treasurer in Niangneilam hai thlang an nih. Thlang thar hai hi Medial Superintendent, Dist. Hospital Dr J. Son Gokham in tawngtaipeina a nei.

HSA GHQ in inhriettirna le ngenna an siem

CCPUR: Hmar Students’ Association (HSA) GHQ chun, June 1, 2015 nia Manipur­a MDC election hung um ding le inzawmin Election code of conduct inza le zawm seng dingin canidate le mipui hai an ngen a, election fel le thienghlim taka nei a ni theina dingin Hmar mipui hai thangtlang dingin an ngen. Chun, Election le inzawmin Hmar umna khuo haiah tharum insuo, ralthuom chelek le mimal zalenna sirde zawnga chetna um lova mitinin mani vote ngei thlak seng ding le, mi aia vote thlak, sum le paia inzawrna le booth capture hai um lo dingin an ngen. Chun, HSA Jt. Hqrts le GHQ a nina nei hai hrim hrim vote campaign­a inhnamhnawi lo dingin an inhriettir bawk.

Gen. Tunkhopum Baite lim inthut ding

CCPUR: Hiangtam Lamka Community Hall campus­a chun Gen.Tunkhopum Baite lim (statue) inthut tum a ni a. Hi le inzawm hin zani zingkar 7:00AM khan Pu Hangsyanthang, Secy., GAD ; Coordinator, ZRO Hqrts chun statue inthutna ding ribbon cheptanna a nei a, Rev. Khen P. Tombing, Chief­Coordinator, PCI(F) chun ground breaking le tawngtaina a nei.

   

Ex­ CLA cadre han Gen. Tunkhopum ru rawl hai an hung phurtlung chu lawmum a ti thu ZRO aiawin Pu Hangsyanthang chun a hril. Gen. Tunkhopum hi ram le hnam ta dinga hringna inhlantu a ni thu, Manipur chau ni lova NE chena hril kai mi ropui tak a ni thu a hril. Gen. Tunkhopum Baite lim inthutna ding hin Rs. 1 lakh vel  a lut ding nia hril a nih.

Hmar mipui kuoma inhriettirna an siem

CCPUR:  May 19, 1015 nia  John F. Hmar, Secretary, Information & Publicity, HPC(D), Gen. Hqrts., Sinlung inhhriettirna a siema chun hieng a hnuoia thu hai hi zieklang a nih:

   

1. Candidate mi tuelkhawm mani hlutna kengkaw zing puma vote zawng seng ding.; 2. Candidate­hai chu mipuitling hawp le hmuom, inruithei, nuhmei­pasal kawnga khawm inthierfihlim le hmingsietna nei ngailo a ni ding a nih; 3. Vote zawngna le a thlakna kawnga “Free & Fair” ning a ta, tu Pawl le Organisation hming khawm hmang phal ninaw nih. Phaw le tawngsan a vote zawngna a hmang phal ni bawk naw nih.; 4. HPC(D) mi­le­sa tuelkhawm nisien, candidate tan bik nei le Hotu (Organisation Officer) a inthawk a chin tak chenin inrawl phal a ni nawh.; 5. Mitinin mani vote seng thlak ding le mithi tahnung vote thlak phal ninaw nih.; 6. A um naw hai aia vote thlak thu ah chun candidate Agent tinhai inbetuoin, an inbiekremna dungzuiin in siemrem thei an tih.

           

Ei ram le hnam siem that hi mimal tin mawphurna a ni ang hrimin, ei Pi­le­pu haia inthawka ei hnam rohlu le ei hnam sukmawitu hieng­ ringumna, indikna, taimakna le tlawmngaina nei mi ngei thlangsuok le thlangtling ngei tumin hma la seng ei tiu. Chuongang tak chu a hung ni ngei theina dingin ei Pathien kuoma ei tawngtaina a hai lo intlun seng dingin mitin ei in ngen a nih.

Election Office an hawng tawl

CCPUR: Zani 11AM khan  Rock of Ages Cottage, Tuibuong, CCPur­ah S. Ibohal Singh, Ex­Minister le spokesperson, BJP Manipur state chun 14­Tuibuong a BJP candidate Ngulkhothang Haokip election Rt. Rev. Dr. Ginkhanmung Zou chun Ngulkhothang Haokip le a sinthawpui hai ta dinga tawngtaipekna a nei. Hi huna hin T. Hangkhanpau, Ex­Minister le state BJP member baka mi tum tumin thu an hril. Hangkhanpau chun, state cabinet in delay policy thawin November/December a ADC election huoihawt a tum a, sienkhawm UPF le KNO han MLA le minister (hills) hai an nawr leia June 1, 2015 a election nei dinga cabinet in a rel thar a ni thu a hril. Ngulkhothang Haokip chun  Politics hi ‘dirty games’a ninaw a, ‘mission’ a nih tiin a hril.

   

Chun zani 7:30AM khan 14­Tuibuong biela Independent candidate Paokholal Haokip chengnainah election office hawngna flag keipharna le election committee indinna nei a ni bawk.

Banquet

CCPUR: Rengkai ICI Nuhmei Pawl chun Building Fund a dingin May 21, 2015 zantieng 1­5PM inkar sung khin Banquet buotsai an tih. Pathien rama rawngbawlnaa ngaia mitin bu va fa pek dingin   Rengkai ICI Nuhmei Pawl chun ngenna an siem.

Class X pass hai lawmpuina

CCPUR: North Eastern Childrens Academy (NECA), Bethlehem Veng, Rengkai, CCPur chun vawisun 11:00AM hin an school campus­ah tukum BSEM huoihawtna hnuoia HSLC exam­a Class X passed hai lawmpuina hun hmang an tih.Tukum HSLC Exam­a khan NECA student hai chu an passed vawng a nih.

HMARTOB in lawmthu a hril

CCPUR: Hmar Martyrs’ Trophy Organising Board (HMARTOB), Manipur chun, Manipur puol bika  May 16, 2015 nia  25th Hmar Martyrs’ Day inserna le 12th  State Level Hmar Martyrs’ Football Tournament, 2015 Saikawt playground­a nei a ni le inzawma team/clubs participants 34 hai, venghimna sin thawtu, volunteers, Traffic, Dist. Police, HPC Returnee, Media, medical duty thaw tuhai, Lawmman tumtuhai, playground in hmangtirtu Saikawt Youth Club le thangpuina dang dang petu le tha le zung inro lova thawtu hai po po chung a lawmthu a hril.

Hmarbiel region in Parbung­ah Martyrs Day an hmang

Hi huna hin (L) Malsawmkim Hmar ralna sum chawikhawm Thangsuo Puon 17 le sum iemanizat lakkhawm a nih. May ni 16 Martyrs Day ti hla siemtu Upa Lalthlansang, Parbung kuomah Parbung V/A, Hnam sipai & Org committee hai chawimawina thuziek le thangsuopuon insiltir an nih.

PARBUNG: Hmarbiel region chun May 16, 2015 khan kum dang anga a hrana hmang lovin   Parbung khuoah hnam ta dinga fam lo chang tahai hrietzingna Hmar Martyrs day puithu takin  Parbung khuoah an hmang. Hi huna hin Martyrs Trophy football  final Mr (L) Malsawmkim Hmar team le Bungkhawpui Convention Team in final an khel a, Mr Malsamkim Hmar Team in Martyrs  Trophy le Rs. 10,000/­ an dawng a, Convention team in trophy le Rs. 10,000 an dawng a, third place Rawvakawt team in Rs. 5000 an dawng. Parbung  Sieli Association (nungak) pawlin hnam ta dinga hringna lo inhlantuhai an ngaihlut inentirnain indawi takin playground­ah Kuong an zawn lut a, par inhlanna le inzana pek a nih.

   

Hi huna hin Pu Lalnunthang Songate khuollienin a thang a, mani sin hriechienga thawtu han chawimawina le hlawtlingna an chang hlak thu, martyrs umzie, thangruol a pawimaw zie hai a hril a,  Parbung H/S ni hlak Hr. Secondary a hlangkai, bank, HSLC exam centre Parbunga um le Novadaya Exam Centre, Hospital extension, Ambulance le a dang dang hai nei le hmang meka um hai chu inthuruolna lei a ni thu a hril.

Headline:

Imphal­Ukhrul  road­ah Bandh a la fe pei; May 22 a khawm bandh a um ding

IMPHAL: Manipur Police Commando han Konsam Korounganba an kap hlumna le inzawma JAC indina umin Imphal­Ukhrul Road­a bandh an thaw chu a la fe pei a, Khurai Lamlong a inthawka Heikrumakhong inkarah chun Dawr, Bazar, Schools le Colleges hai khar an la nih. Hi inthatna dodalnain mipui han zanikhan lampui  an dang a, Police hai mi man Chandam Premananda le Chabungbam Manoj Singh hai thuhnung le thuhma um ta lova insuo ding, thina tuok sunghai sawrkar sin pakhat pek ding le hi tuolthatnaa thang Police Commando­hai an sina inthawk ban ding tihai chu sawrkar kuoma an thil ngen a nih.

   

Hieng laizing hin Mao Council chun, Nagaland Dzziiko (Dzuko) vally a hung lak le hluo luina hi sarwkarin a chingfel vat naw a ni chun May 22, 2015 zanrila inthawk Manipur pumpui huopin darkar 24 Bandh kan thaw ding a nih tiin A.Athili, General Secretary, Mao Council chun thusuok a siem. Hi bandh hi an thlawp ding thu Maoist Communisty Party, Manipur (MCPM) chun an puonglang.

           

Chun, Kuki Chief Association (KCA), Tengnoupal Block le Kuki Students Organisation (KSO), Tengnoupal Block hai khawmin May 22, 2015 zing dar 6 a inthawk NH­102 ah hun tiemchin um lovin bandh kan thaw ding a nih tiin thusuok an siem. Hi thil hi KNO/KNLF camp Simol a um Chellep Camp a sawn dinga state sawrkarin hma a lak dodalnaa  thaw an tum niin an hril.  KNO/KNLF camp hi sawn lo dingin Home Minister kuoma khawm ngenna lekha (Memoandum) an peklut ta niin KCA, Tengnoupal Block le KSO, Tengnoupal Block thusuok chun a hril.

ADC election ralmuong taka nei ding

IMPHAL: Manipur tlangram biela ADC 6 haia inthlangna hi thienghlim le ralmuong taka nei a ni theina dingin State Election Commission chun hma a lak. ADC election huna hin venghimna sin uluk le khau takin Home Department in a thaw ding a ni leiin ADC election hi ralmuong taka  nei ning a tih tiin Th. Chitra  Devi, Secretary, State  Election Commission, Manipur chun a hril. Chun, inthlangna thienghlim tak le ralmuong taka nei a ni ngei theina dingin voter­hai khawmin venghimna  kawnga sawrkar thlawp dingin a ngen.

Ukhrul Town hall­ah vote campaign

IMPHAL: Zanikhan BJP chun ADC Election hung u m dinga BJP candidate­hai ta dingin Ukhrul Town  hall­ah vote campaign an nei. Hi huna hin Union Minister of Tribal Affairs, Jual Oram le BJP Manipur President Th. Chaoba hai khawm an thang. Manipur a hmasawnna sin a fe hrat thei nawna san chu sawrkarna cheltu Congress sawrkarin sawrkar thlungpuia inthawka hung pawisa an hmang indiknaw lei a nih tiin Jual Oram chun thu a hrilna huna a hril.

CRPF AC silaimu leh man

IMPHAL: Zanikhan Tulihal Airport, Imphal­a Indigo Airlines Staff han Raj Bhavan, Imphal­a Assistant Commandant (AC), CRPF sinthaw lai mek chu INSAS silaimu pakhat leh an man. Mana um CRPF Assistant Commandant hi Manish Godara niin New Delhi fe tum a nih. Hi thua hin Singjamei Police han case an siem khum. A hnungah Manish Godara hi New Delhi an zin remti pek a nih.

Sanjenthong leilak July a zo fel beisei

IMPHAL: Bawla um mek Sanjenthong leilak hi July haptakar hmasa takna vela zo fel theia a u m beisei a nih tiin O. Nabakishore, Principal Secretary (Works), Govt. of  Manipur chun zanikhan a hril. Sanjenthong leilak siem lai mek hi zanikhan Works Minister Dr Kh. Ratan Kumar le O. Nabakishore han a hmuna an va en a, hi zova O. Nabakishore in Chanchinbumihai an hmupui huna a hril a nih.

Others:

Mizoram thlipui  le ruo in a nuoi el thei

AIZAWL: National Disaster Management Authority, Govt. of India in alert/warning an suo dungzuiin May 19­20 inkarin Mizoram hmun thenkhatah  thlipui le ruopui hrang le sur dinga an ring a ni leiin lo invenglawk dingin alert/warning District Disaster Management Authority chun mipui fimkhura inveng dingin an hriettir. Chun, May 21­22, 2015 sungin ruo nasa taka a sur ring a nih tiin ei thu dawngna chun a hril.

JCP Chairman dingin Ahluwalia

NEW DELHI: BJP MP S.S. Ahluwalia chu Chairman, Joint Committee of Parliament dinga ruot a nih. Hi Committee­a hin members 30 an um a, hi laia 20 chu Lok Sabha le 10 hai chu Rajya Sabha  a mi an nih. Hi Committee chun Land Acquisition Bill thua report  monsoon session ni khat niin peng an tih. Land Acquisition Bill hi Parliament session huna khan NDA sawrkar­a thang Shiv Sena thangin Opposition parties han nasa taka an sawisel le siemtha dinga an nawr leia hi committee in chai ding a nih. Hi bill hi LS a chun passed a ni tah.

IAF vuongna a tla thla, Pilot  hai an him

NEW DELHI: Zanikhan Tezpur airbase, Assam­a inthawka vuongsuok IAF vuongna Sukhoi­30MKI chu a khawl siet leiin  a tla thla a, a pilot pahni hai ruok chu him le damin an inkapdawk hman. Hi thil hi zani 12:30PM a kha tlung a ni a, IAF chun Court of inquiry thaw dingin order an suo. Vuongna tla thla hlek hin pasal pahni le nuhmei pakhat a deng hliem. Defence PRO group Captain Amir Mahajan chun IAF vuongna hi dan pangngai anga vuongsuok a ni thu a hril. A khawl siet leia pilot pahni hai hi vuongnaa inthawka inkapdawk, chu hnunga vuongna Tezpur ramhnuoia tla thla a nih.

KPLT area commander kap hlum

GUWAHATI: Zani hmasaa Army le Assam Police thangruol han Karbi Anglong district sunga Bhelughat hmuna dappui an thawnaah Karbi People’s Liberation Tigers (KPLT) hai le an inkaptuonaah KPLT area commander Seme Kro chu an kap hlum a, inkaptuona hmuna hin Security forces han 7.65mm Pistol le magazine, a mu 1 le lekhapawimaw thenkhat  an man. Chun hi ni ma hin Army le Assam Police han dappui an thawnaah National Santhal Liberation Army (NSLA) cadre pakhat chu Silaimatha, Kokrajhar district­ah an man bawk. NSLA cadre mana um hi Sarkar Hasda a ni a, a kuta inthawk 7.65mm Pistol  (factory made) 1 le a mu hai an mansa.

PM in India ram a hung pan tah

NEW DELHI: Rambung pathum­ China, Mongolia le South Korea hai sira inzin Prime Minister  Narendra Modi chun zanikhan Gimhae Airport, South Korea suoksanin New Delhi a hung pan nawk tah. PM ni 6 sung thang dinga inzin a ni a, South Korea le thawtlangna ding agreements 7 an ziek bakah hieng rambung pathum hai le inlaichinna siemthatna dingin thawtlangna ding  pact iemanizat an ziek a nih.

Siehlaw nuhmei  a suollui leiin Principal man

AURANGABAD: Arabic residential school All Women’s Residential Madrassa­a Principal sinthaw  Rafiq Qureshi (55) of Padegaon chun Madrassa Rabiya Basariya Lilbanat hmuna thlaisuongtu sinthaw kum 35 mi hmeithai thla 3 sung zet inneipui dinga a tiem leia a lo zalpui leiin Cantonment Police han nuhmei suolluina case­ah an man. Hmeithainu hi a pasalin kum 3 liemtaa kha a thisan ta a ni a, school campus sunga principal hin in an hluotir a nih. Rafiq Qureshi hi nuhmei 2 nei laizing nia hril a ni bawk.

Minister car in a baw professor a thi

ALAPUZHA: Kerala Social Welfare Minister Dr MK Munner motor chun zani hmasa zan khan Kayamkulam hmuna Scooter­a chuong NSS College­a  HoD Malayalam Professor Shashi Kumar chu a baw a, Shashi Kumar hi damzo lovin a thi. Prof. Shashi Kumar hi College­a inthawk In pana a fe mek laia hi thil hi a tuok a ni a, minister driver chungah Police han case an registered.

A ngaizawng a nei theina dingin a naupa kum 3 mi a that

BHOPAL: Nuhmei kum 25 mi Uma Saket of Satna district chun a ngaizawngpa Dilip Saket (20) le an innei theina dingin a naupa kum 3 mi chu thatin Silpara vilalge, Rewa district­a Canal­ah a dehawn. A naupa hi a pasal thar in a thuoi le a enkawlpui theinaw ding thu a hril leia  inthuruola May 17, 2015 nia kha a rek hlum a nih. Uma Saket hi pasal pakhat Raghuveer Saket le innei, an innei lai zinga Dilip le hi inngaizawnga May 16, 2015­a kha a pasal tlansana innei an nih. Amiruokchu, Dilip hin Uma chu a naupa hi a thuoi theinaw ding thu a hril leia an that el nia hril a nih. Uma le Dilip innei thu hi Uma pasal hmasa in a hriet le inruola a naupa a ngaiven huna a hmuzonaw leia Police­ah report a pek hnunga hi thil hi hung inlang a nih.

Meghalaya le Tripura Governor dinga sesamna

SHILLONG/AGARTALA: BJP leader V. Shanmuganthan chun vawisun (May 20, 2015) 11:00AM hin  Raj Bhavan­ah Meghalaya Governor thar dingin sesamna nei a tih. Chun, vawisun ma hin Tathagata Roy chun Raj Bhavan­ah Tripura Governor thar dingin sesamna nei a tih.

Student suolluia intumin mi 3 man

JOWAI: May 17, 2015 khan East Jaintia Hills district­a  Khliehriat hmuna student kum 14 mi suollui a ni a. Hi le inzawm hin a suolluitua intum pasal pahni ­Phaibiang Shylla of Rymbai village le Injarul Hussien hai bakah a thangpuitua intum nuhmei pakhat man an nih. Student hi Pathienni inkhawm tin In pana a fe mek lai pasal pahni hai hin motor sungah keiluta mi umnawna hmun pakhata an suollui niin ei thu dawngna chun a hril.

Colombia­ah mimkei leiin mi 52 an thi

ANTIOQUIA: Colombia rama Antioquia province a chun mimkei nasa tak tlung leiin mi 52 an thi bakah midang tam takin hliemna an tuok. Ruo nasa taka a sur leiin Salgar khawpuia vadung chu a luongliem leiin tui nasa takin a let a, mimkei an tlun bawk leia mi 52 hai hin thina an tuok pha a nih. Mi iemanizat an inhmang bawk leiin mithi hi tuta nek hin an la tam lem el thei nia hril a nih.

Afghan police 11 hai kum 1 intang ding

KABUL: Afghanistan­a Court Judge Safiullah Mojadedi chun tukum March ni 19­a Kabul hmuna muslim hai sakhuoin pakhata Quran a raw tia indiklo taka intumna leia nuhmei kum 27 mi Farkhunda mipuiin an vuok hlum na le inzawmin inrawlna nei vea intumin kum1 sung jail intang dingin an chungthu a rel. Hi tuolthatnaa intum chu an rengin mi 49 an ni a, anni laia 19 chu Police an ni a, Police dang 8 hai chu thiem inchangtir an nih. Tuta hma khan h thua hin mi 4 thi dinga thiemnaw inchangtir, mi 8 hai chu kum 16 jail intang dinga an chungthu rel le midang 18 hai chu insuo zalen an lo ni tah.

----------------------------------------------------------------------------------------------------------------

VAWISUN THUPUI

Pathien chu khel inhlip mihriem el a ni nawh, Inkir hmang mihriem naupa a ni bawk nawh a, A hril ta chu a thaw naw ding am a nih? A lo hril ta chu a sukpuitling naw ding am a nih. ­~ Number 23:19

Editorial:

A man ei pek a ngai

Pathien meu  khawmin mihriem suola thi ding hai a mi hmangai leiin a naupa neisun Isu Krista  khawvela hung tirin Suol leia thi ding hai  chu Kraws lerah thiin a min tlansuok a, chuleiin mihriem hai chu Krista thisena inchawksa, Isu Krista thisen man ei nih. Hi thil hin ei thil dit hai nei theina dingin chan ei nei a ngai ti chieng takin a suklang awm ie. Thuom incheina khawm a style thar amani annawleh a dang lam deu a um a, ei dit chun a man  pein ei inchawk hlak. Dit lei ni lo, mamaw leiin a man pein thil ei inchawk hlak bawk. Ei thil dit le mamaw hai neina ding hin a man pek lova a thlawna  nei thei iengkhawm a um nawh. Thil thenkhat chu mi’n a thlawna an mi pek khawm a lo ni thei, sienkhawm a mipetu hai khan a thlawna an hmu nilo,  mipek an nuom leia a man pea an inchawk a ni  ngei hlak. Chuleiin, thil iengkim, ei dit le ei mamaw hai neina ding chun a man peka ei inchawk a ngai ti chu a chieng tawk hle.

Mobile phone, Motor, In, ram le insung mamaw thil dang dang hai khawm a man pein ei inchawk hlak a. Chuong ei thil dit le mamaw hai neina ding chun eini tieng hekna annawleh channa um der lo chun nei thei a ni nawh. Mi thenkhat lem chun motor dit leiin mani inhmun le ram hai zawr thlawngin ei inchawk rawp hlak. Chu leiin ei thil dit le mamaw inchawkna ding annnawleh nei theina ding chun iemani bek ei chan a ngai tina a nih.

Tulai khawvel a thiem le tling tlinghai hlawtlingna khawvel a nita  leiin lekha inchuk ei uor nasa hle. Nu le pa han nau hai lekha inchukna ding hin  theitawp tak meu ei suo chit a. Thenkhat lem chun mani nei bak, fairel inkhup thak khawpin nau hai lekha inchukna dinga thang ei lak hlak. Chuongang bawkin lekha inchuktu hai khawmin hlawtlingna an chang theina ding chun chan an nei a ngai. Chan nei ngam lo lekha inchuktu chun hlawtlingna ditum a chang ngai nawh. Thil iengkimah hlawtling ding chun theitawp tak meu suo a ngai ang bawkin. Lekha inchuktu hai khawmin, an hlawtlingna ding chun huntawite inhawitirna hnawlin, ruol le pai hai imu inhnik taka an in bur bur lai khawmin, imu suokin hang zal hadam vawng vawng nuom chang um sienkhawm hlawtlingna chang an nuom leiin chuong inhawitirna hai chu chan/ annawleh a man pein an bei tang tang a, a tawpa hlawtlingna ditum tak an chang hlak a nih.

Pungkhawm nikhuo haia chun Zohnathlak hnam tum tum, tawng dang dang nei hai hih sulkhat kuol,  unau vawng ei ni leiin inthuruol le inrem taka uma thangruol ding ei nizie ei hril uor vieu hlak. Sienkhawm tuchen hin a la hlawtling naw a, hlawtling nekin mani hnam bing zawnga thang lain inenhrangna a na deu deu. Khawvel rambung tum tum han ralthuom tium sukbo dinga an rel, an ram chit an tlung pha theitawp suo ralthuom tium siemna tienga  hma an lak hlak ang elin fekhawm nikhuoa inthuruolna, inhmangaituona neia thangruol ding ei nizie zer far hluoma hrilmawi hlak hai khan Zohnathlak hnam tin hai inthuruolna ding nekin mani hnam bing chit ta dinga thang lain hma ei dawm hlak ni lo am a nih. A man pe si lova nei ei tum leiin a neituin a mi pek phal naw a nih.

Inremna, hmangaina le inthuruolna ei dit maw! A man ei pek a ngai an nawm. Kohran hai inthuruolna le thawtlangna ei dit maw! A man ei pek a ngai. Anleh, chuong inremna, hmangaina, inthuruolna le  kohran hai inthuruolna le thawtlangna tha tak ei nei theina dinga a man chu iem ning a ta? ‘mani nina le ngirhmuna inthawk inban  ngamna dam, mani hmasielna peihmangna dam, fakrukna le indiklo taka sum laklut hnawl ngamna dam; mani phingpui hmakhuo chau ngaia sinthawna dam; tlawm lem inchu ngamna dam le a dang dang ning a tih. Pathien khawmin a mihriem siem hai a mi hmangai leiin a min tlansuoktu dingin a naupa khawvela a hung tir ang khan, ei thil dit hmu le chang theina ding chun chan ei nei a ngai a, a man ei pek a tul a nih. Kohran hai meu khawmin inhmangaituona, inremna le inthuruolna hai hi ei dit thu ei hril rawp hlak. Sienkhawm  chan ngamlo ei nei tlat seng leiin tu ngirhmuna hin ei um a nih.

Hieng a ni lei hin hnam sunga inthuruolna ei dit a ni chun, a man khawm ei pek ngam ding a nih. Kohran hai khawma a man ei pek ngam ding a nih. A man pe ngam si lova hril hril hin umzie a nei nawh. Khawvela  rambung tum tum hai khawm hi a man neia suolsuok vawng an nih. Chu leiin, inthuruolna khawm hin man a nei a, inremna khawmin man a nei. Man bo le a thlawna nei  le hmu thei phawt hmu le chang ei tum khawm hi ei innennawn a tul. Hnam thuoitu, hnam hmangaia inpe hai khawmin a man ei pek nuom sinaw (chan ei nei ngam sinaw chun), inthuruolna, inremna hril hril inla khawm hmu ngainaw manih.

Thiltha ei dit chun a man ei pek ngam a tul. Hnam thuoitu, kohran thuoitu le pawl tum tuma thuoituhai khawmin thil tha ei dita, inthuruolna, inremna le inhmangaina ei dit tak tak a ni chun chan ngama a man ei pek a ngai a nih ti hi hrie a, chan ngam nei dinga ei lungril ei siem nuom a um takzet. Chan nei ngam khawpa ei thil dit a man ei pek nuom a, ei pek hun huna ei hnam le ei ram sunga inthuruolna, inhmangaina le inremna um a tih. Ei dit si chun A MAN EI PEK NGEI  A NGAI A NIH.