Hmar Martyrs’ Day vawi-25na Aizawlah inser a nih

“Sawrkarin Council a sukpuitling a ni phawt chun inngaituo lawk lo in ka chairman nina inkiên nghal ka tih”: Hmingchunghnung

Aizawl, 16 May, 2015 (Virthli News): Hmar hnam ta dinga hringna lo inhlantu pasalṭhahai ni ‘Hmar Maryrs’ Day’ vawi-25na chu hmun danga danga Hmar nauhai hmang ruolin vawisun khan I & PR Auditorium, Treasury Square, Aizawl ah Sinlung Hills Development Council (SHDC) huoihawtna hnuoiah ursun taka inser a nia, mipui ṭhahnem tak fekhawmin palsalṭha hai sunna le inzana hun hmang a nih.

Pu. Hmingchunghnung, Chairman SHDC in mipui fekhawmhai hmaah thu hril in, “Mizoram sawrkarin Council a sukpuitling ding a ni phawt chun inngaituo lawkna um ṭhak loin ka Chairman nina hi ramhnuoi tienga ei hotuhai khawm nisien inkien nghal ka tih”, a ti a, SHDC chu ADC putling a hlangkai a ni ngei theina ding chun a hmasa takah elected Council ei nei phawt a ngai a, hi ding hin electoral roll khawm boutsai mek a ni thu le ‘free and fair’ election nei thei ding a ni phawt chun sawrkar khawm election huoihawt dingin an pei zing thu a hril.

Pu. Hmingchunghnung chun Hmar hnam sunga innghirnhona le impumkhat nawna um chu pawi a ti thu a hrila, Martyrs’Day chau hin Hmar nauhai chu inthuruol thei le inrem theiin a mi siem a nih a tih.

Hmar political movement chungchang hrilin SHDC Chairman chun, ram le hnam ta dinga kal lo pen tah pasalṭha hai chu an nuom reng leia ramhnuoi lût an ni naw thu a hril a, kum 1988, March le April thla khan Mizoram hmar tlangdungah peaceful bandh huoihawt a ni a, sienkhawm sawrkarin police tha hratna a hmang leiin tharum thawna a tlunga, chuleiin Volunteer (HPC/HVC) mi iemanizat chu 1989 khan ramhnuoi lutin pasalṭha tamtakin ram le hnam ta dingin hringna an lo chan pha tah a nih, a ti a, Congress sawrkarin July 27, 1994 khan HPC chu MoS lo ziekpuiin Sinlung Hills mipui lakah intiemkamna a lo nei ta leiin ieng sawrkar khawm ngir sien Council chu a sukpuitling tho tho ding a nih a ti bawk.

A hril peina ah Pu. Hmingchunghnung chun a Hmar hnam ngawr ngawr a movement ei fe pui hin mipui lungril a hne thei naw bakah ṭan a hlaw nawa, chuleiin lungril lientak putin Sinlung takin movement hi fepui nisien a nuom thu a hril bawk.

Pu. J.Laldinlina, HPC Founding President khawmin thu hrilin Mizoram sawrkarin Hmar hnam inlungruol nawna chu remchanga lain kum 2 interim period ding ti a ni laiin kum 20 hiel a lo invawi el ta chu pawi a ti thu a hrila. Pasalṭha martyr lo changta hai thisen in Hmar hnam chu insuikhawmtir nawk sien a nuom thu uor takin a hril.

Vawisuna Martyrs’Day inserna hun hi Pu. John L.T. Sanga, Secretary, SHDC in keihruoiin, hun hni a ṭhe a ni a. Hun khatna a hin Martyr hai sunna le inzana hun nei a ni baka thuhril ngai thlak a ni a, mipuiin ram le hnam ta dinga intiemkamna nei a ni bawk. Hun hnina a hin “Martyr hai sulhnung sukpuitlingna dingin iem ei mamaw a’’ ti thupui hmangin sharing and discussion nei a ni a, hnam ṭhuoituhai a inthawkin thu ṭha tak tak ngai thlak a ni bawk. Hi baka hin hlasakthiem Nk. Margy Lalremruati, Nk. Rosy Vanlalhlani, Nk. Mary Sungte le Pu. Lalrawngbawla Ralte hai in an rawlmawi le thiemna hmangin hnam hla mawi tak takin mipui fekhawmhai an inawi bawk a nih.

Aizawl ah Martyrs’ Day hmang a ni ruol hin vawisun khan SHDC huom sung hmun hrang hrangah local tournament hai boutsaiin ursun taka hmang a ni bawk.