Mizoram MLA le vengtuhai lambunna thua HYA General Headquarters Press Release

MIZORAM MLA LE VENGTUHAI LAMBUNNA THUA

HYA GENERAL HEADQUARTERS PRESS RELEASE:

Rengkai, Churachandpur, Manipur. 31st March, 2015.

Hmar Youth Association (HYA) General Headquarters chun March 28, 2015 ni a Mizoram-a Tinghmun le Zokhawthiang khuo inkâra Mizoram MLA 3 chuongna le anni vêngtu motor lambuna a um leia MAP-3 haiin an hringna an chân baka mi 5 in hliemna an tuokna thu ah pawi a ti tak zet. Thina tuok sungkuohai khawm HYA chun a tuorpuiin hi thiltlung leia hliemhai khawm hung damsuok nawk vat dingin a ditsakna a’n hlân.

Hieng ang thisen insuona hi asan lientak a um a ni ngawt naw chun a thawtuhai khawma an inhawk zawng le an nuom tak ni ring a umnaw leiin Mizoram sawrkâr ngirilâi cheltuhai khawma a san zawngsuoka, helhai le remna dawkân buotsaia, inremna tluontling a um ngei theina dinga ngaitha loa hma lak vat nisien HYA chun a nuom tak zet a nih.

Hieng ang thil a tlung ta hnunga a san zawngsuoka remna dawkân awttlâng nêka a hrâtlem le chunghnunglem inchuna leia intuolthatna a fe pei chun a tuortu ding chu mania insasêng zo lo “Mipuihai” tho an ni ding a ni leiin Muongna le Inremna hlutzie intem tah ei ni el bâk ah ei Kristienna khawma inhmangai ding le inditsak intawn dinga a mi’n chûktir a ni leiin chu kawnga hmalatu ni dingin HYA chu an pei zing a nih.

Chun, hi thil tlung lei hin HYA chun hnam pahni lo intai tulna umin a hriet naw a, Mizoram sawrkâr le a mipuihai khawma an insung thila an nâk khel zawng thil a um met changa a Hmar hnam pum an mawsiet tum el chun thil indiklo tawp ning a ta, Hmar mipuihai khawma Mizo chu a neitutak ei nih ti inhriea mani chipuihai chu do khawm ei la do ngai naw a, do ei tum bawk naw a, do ngai hlak khawm a ni nawh ti hrie seng inla nuom a um tak zet.

Chuleiin Mizoram sawrkar policy le inzawma a insunga ieng thil thil amanih tlung hlakhai leia hnam le hnam lo inhmelmâk tulna a um der naw leiin HYA GHQ chun mitin social network le media ah hai tawng fimkhur seng dingin a hung ngên cheu.
HYA GHQ aiawin,

(UPA LALDAWNLIEN VARTE)
General President, HYA GHQ
(FRANCIS SONGNEILIEN SONGATE)
General Secretary, HYA GHQ