Local:
Students hai tha taka inchuktir theina dingin
training a pawimaw: DC
CCPur: SSARTE CCPur hnuoia 5 Day Refresher inservice
teacher training 201415 chu zani
10:30AM khan Synod Hall, IB Roadah hawng a nih. Hi huna hin Mr Lunminthang
Haokip, IAS, DC, CCPur khuollienin a thang a, G. Goukhomang, ZEO/CCPur le S. Khaikhopau Ngaihte, BO/HQ DC Office hai
functional president le guest of honour in an thang.
Tuta
hma le tulai hun nasa taka an dang ta leiin, tulai chu teachers han students
hai tha taka lekha an inchuktir theina
dingin an khat tawka training an nei a
pawimaw ta a, technology skills khawm
teachers han an nei a pawimaw tah. Teacher han student hai lekha an
inchuktir huna eye contact an nei a pawimaw thu, teachers han student hai lai question an indawn hlak a pawimaw tak.
Tulai khawvela dingin teachers hai technology skills le an inthuo naw chun khawvel hmasawnna in a tlansan ding a nih
tiin DC, CCPur chun hi huna thu a
hrilna huna a hril.
BO
HQ chun, govt. Teachers hai chu quality education a um theina dingin a ruk taka private school hai elna an nei a pawimaw thu, DC, ZEO, District administration chun mani
thawkna hmuna um ngei ngei dingin tukhawm a thawlui (force) thei tak tak nawna thuah school haiah sawrkarin biometric machine
sie a tum a, electric um nawna haia Solar light sie tum a ni thu a hril
a. Chu thila dingin teacher hai inbuotsai dingin an hriettir.
ZEO
chun, quality education a um theina
dingin teacher hai chunga mawphurna lien tak a um a, student hai tha taka an
hril theina dingin teacher han inbuotsaina tha tak an nei a pawimaw thu,
teaching technique inthleng pei a ni
leiin teacher hai an khat tawka training
pek hlak an nih tiin a hril.
CCPur: April 4, 2015 zana ruopui vanawn, thlipui
hrat tak le riel hai inthuoa a sur, a hrang le a tlak lei khan Churachandpur le
Kakching biel electric meivar petu Kakwa Ward No. 8, Bishnupur districta
132/33 KV SubStations a Transmission Towers pahni a mut thluk leiin power
supply a pangngaiin pek thei ni naw nih. Transmission towers pahni siem that
nawkna ding hin ni 7-10 inkar sung a tul
ding a nih tiin Manipur State Power
Company Limited chun inhriettirna a siem. Hieng a ni lei hin CCPur le Kakching
biela cheng han ni 7-10 sung electric meivar
hmu lovin ei um ding niin an lang.
“Mission Indradhanush” hawng ding
CCPur: Dist Task Force Immunisation /CCPur
huoihawtnain vawisun 2:00PM hin YPA Hall, Hiangtam Lamka hmuna “Mission Indradhanush”program hawngna um a ta, Health Minister Phungzathang Tonsing khuolliena thangin
hawng a tih. Hi huna hin Functional President in Dr Chaltonlien Amo, Chairman,
HAC; Guest of honour in Lunminthang Haokip, IAS, DC/CCPur; Chief Hosts in Dr. O
Ibomcha Singh, Director Health Services, Manipur le Dr. K. Rajo Singh,
Director Family Welfare Services hai thang an tih.
CCPur: April
3, 2014, 8:15AM vel khan 25Madras Regiment han M. Muallum, Sangaikot Villagea
Army Check pointah KCP (MTF) cadre Lourembam Tomba @ Suresh (28) s/o Ibotombi
Singh of Mayang Imphal West chu China siem hand grenade 1 le demand letter 1 leh an man
niin Police thusuok chun a hril.
Imphal Police kuta an pek hnungin CCPur Police chun case hi lasawngin
FIR No. 28(4) 2015 CCPPS U/S 17/20 UA(p) Act. & 5 Explosive Sub. Act
registered an registered.
HPC(D) in thusuok an siem
CCPur: Elkan Darngawn Hmar in zanita (April 6,
2015) Press Statement an suo a chun
hieng a hnuoia ang hin ziek a nih.
Hmar People’s Convention (Democratic) chun
kan aihnaphapui le Hnam Pasaltha Pu Ralkapthuom @KT Hmarin hunlo taka April
1, 2015 nia hmelma nunrawng kut tuora muol ami liemsanna chungah hin kan inroin
kan sûn tak zet. A mâksan a sûnglekuo hai LALPA’N thlamuon dingin kan tawngtaipui
zing a ni ti kan puong.
Pu
Ralkapthuom @KT Hmar kha mi taima le tiktlai, hnam hmangaina inthûktak a nei
leia mihuoisen a ni leiin inza a um tak zet a, Hmar movement le inzawma hnam
pasaltha le mihuoisen hming hril a nina taphawt ah a hming lamsa pei ni hlak a
tih.
Nunrâwng
taka Pu Ralkapthuom @KT Hmar thattuhai hin Hmar Hnam Sipai HPC(D) pawi lientak
an tawk a nih ti inmansuoka tarik 10/4/2015 bo hma ngei inpuong suok dingin
kanin hriettir a. Hi hun tiemchin sunga a thawtu inpuong nuom loa kâwmaw an
bâwl tlat a ni chun Hmar Hnam sipai, Pu Ralkapthuom @KT Hmar chunga kutthlâktu
le inhnamhnawina nei taphawthai chungah HPC(D) in kut a thlak lêt ve a lo ni
khawma tu HNAM/PAWL khawmin sawisel thei
naw ni hai ti kan puong tiin an ziek.
CCPur: National Legal Services Authority, New Delhi le Manipur State Legal
Services Authority hai ditna le enkainain Churachandpur District Legal Services Authority
huoihawtnain April 11, 2015, 10:30AM a inthawk khin District & Session
Court Compound, Tuibuong, CCPurah Lok Adalat buotsai ning a tih. Insung thu
buoi le labour thu buoi nei le nei thei
hai hi Lok Adalat a thang seng
dingin Secretary, Churachandpur District Legal Services Authority chun ngenna le inhriettirna a siem.
Saikawtah tawngtairuol inkhawm
CCPur: April 7, 2015 (vawizan) 7:00PM hin Saikawt hmunah Saikawt khawsunga hartharna a tlung theina dinga Pathien kuoma tawngtairuolna hun pawimaw tak hmang nawk ning a tih. Hi
huna hin Manthlalien chu inkhawm conduct tu ning a ta, Miss May
Rose chu tawngtai inkhawm thuoitu ning a ta, Dr J. Huoplien (EFCI) in Pathien thucha hril bawk a tih. Hi huna hin inhnikna nei taphawt thang dinga
fiel an nih.
Rukru han dawr an rawk
CCPur: Zani zingkar 2:30AM vel khan rukru han ICI
Road, Tiddim Road a G. Krishna Kumar Sharma (26) s/o (L) G. Nandalal Sharma dawr ‘Anil
Enterprises” chu a shutter suksiein an rawk a, Dawr sunga um Mobile hmangruo chi tum tum Rs. 2.5 lakh manhu vel
ding le sumfai Rs. 5,000/ an inruk hmang. Hi thua hin Dawr neitu in report a
pek angin CCPur Police chun FIR No. 29
(4) 2015 CCPPS U/S 457/380/34 IPC an
registered.
CCPur: April 10, 2015, 11:00AM1:30PM inkar sung
khin District Police, CCPur huoihawtinain
DTC hall, DC Office, CCPurah
First Security Public Leaders Interface, CCPur District, Manipur um a
tih. Hi huna hin Public leaders tum tum
hai thang dinga ti an nih.
Thlalak pelut dingin
CCPur: Tulaia
Ruosur le thli hrang le inzawma
mimal chengna in a suksiet hai chun a
thla laa concerned SDO hai kuoma a thlalak le report pelut thei an tih. SDO tinin report an dawng hai DC/CCPur kuomah pelut an ta, District tina thli le ruo in In a suksiet hai chu sawrkara inthawk fund um hun huna
District Management Authority, CCPur in thangpuina a pek thei ding niin BO HQ.
DC Office a inthawk ei thu dawngna chun a hril.
CCPur: April 3, 2015 chawhnungtieng khan Mualkoi khuo a Mafu herna khawl (machne)
hmanga Mafu hera fakzawng, Mr Damru (45), h/o Anjana chun a mafu hernaah a
vawitieng kutpar a lo rawllut pal a, khawlin a kutpar 4 a her tan a, District
Hospital, CCPur panpui a nih.
----------------------------------------------
Headline:
India hmarsak bielah ruopui vanawn le thlipui
hrangin nundan pangngai a sukbuoi pha, Tripuraah In 1,000 a suksiet
Agartala: Zani hmasa le zani zingkara ruopui vanawn le
thlipui inthuo a a sur le hrang lei khan India Hmarsak bielah nundan
pangani nasa takin a sukbuoi in a suk
harsa pha. A bikin Assam, Tripura, Manipur le Mizoram haiah harsatna nasa tak a siem a, mihriem chengna
in hai a mut siet el chau ni lovin bu le thlai, electric ban le thil dang dang
nasa takin a suksiet a, a bikin electric
hrui, ban le towerhai a suksiet leiin mi tam takin electric meivar nei lova umin an inthim mup pha.
Tripura State a chun
bu, thlai, theira le inlirthei hai bakah mihriem chengna in 1,000 lai
zet a suksiet a, mi 15 lai zetin hliemna
an tuok pha. Tripura state a chun zanikhan |ek tlain nuhmei kum 54 mi Sushanti Reang chu a deng
hlum. Hi thil hi Belonia subdivisiona
Tripurakhola Reangpara hmuna tlung a nih.
Thil a sukseit hai lai electric
ban 1,400; power transmission lines km. 800 sunga mi le power distribution
stations 100 a thangsa. Tripura pana fe
inlirthei 1,200 chuong fe thleng thei lovin Karimganj district, Assam ah an
intang pha. Mimkei rapthlak tak a tlung leiin motor a infepawna lamlien hai a
dang leia inlirtheihai hi fe thleng thei lova intang an nih.
Manipur
a khawm mihriem chengna in, electric ban le tower hai a mut sit a, CCPur le Bishnupur district hai thangsain hmun tam tak hai chu electric var nei lovin
an um pha. Chandel le Tamenglong district haia khawm thil tam tak a suksiet
niin ei thu dawngna chun a hril.
Imphal:
Kabir Puruskar Award, 2015
Imphal: Kabir Puruskar Award, 2015 hni nuomhai ta
dingin mani umna District senga DCs/ADCs hai kuomah May 15, 2015 chenin hnina
lekha peklut thei ning a tih tiin Joint Secretary (Home), Govt. of Manipur chun
inhriettirna a siem. Hi Award hi category pathuma the a ni a, category I ah Rs.
2,00,000; CategoryII ah Rs. 1,00,000 le categoryIII ah Rs. 50,000 sumfaiin lawmman pek ning an tih.
JNIMS Paramedics han an sin suknghet dingin
Imphal: JNIMS, Porompat a 455 Paramedics Staff han an
sin suknghet dingin zanikhan an Director fe thlengin CM kuomah Memorandum an
pek. April 12, 2015 chena an ngenna sukpuitling pek an ninaw chun a dodalnain
black badge bel, an sinthaw chawlsana nuorna, darkar 24 General Strike le
Hunger Strike hai April 13, 2015 a inthawk thaw an tum niin JNIMS Paramedics
staff han reporterhai kuoma an hril.
Zawng kap hlumtu mi 2 lunginah
Imphal: March 30, 2015 a Paomai Colony, Imphal a
Double barrel hmanga Zawng kap hlumtu mi 2, AS Mahai le K. Andrew Kom of Imphal
hai chu April 4, 2015 khan Chief Judicial Magistrate, Imphal East chun ni 5
sung lungin intang dig le Rs. 10,000 ve
ve thawi dinga thiemnaw an changtir angin lunginah khum an nih. Zawng kap
hlumtu hai a hun taka mantu Police Officer chu lawmman Rs. 5,000 pek dingin
Court chun a puong. Hi hma khawm hin ramsa bung thenkhat le man P.Open of Moreh chu
CJM, Chandel in Rs. 10,000 chawi dingin a chungthu a lo rel
ta bawk.
Darkar 48 General Strike thaw an tum
Imphal: Lakshmi Phaomei of Gaipuinam village, Imphal thuoihmang
a nina le inzawma JAC indina um chun April 7, 2015 zanrila inthawk darkar 48
sung General Strike thaw an tum. General Strike
sunga an thil ngen sawrkarin a la
sukpuitling pek naw rawp chun NH37 ah hun tiemchin um lova Blockade an thaw
ding thu JAC a Convenor, Kakomlunglu Kamei chun a hril. JAC chun hi thua hin
Lamphel Police station OC, Dorendro chunga action la ding le thuoihmanga um hai
sansuok dingin an ngen a nih.
Ganja kg. 1432.5 le mi 2 man
Imphal: Narcotics and
Affairs of Border Police team chun Aprl 1, 2015 khan Salan Road le Paonam Leirak lamthe,
Khurai Lairikyengbam Leikai, Imphal east district ah Tata Truck MN02A/7244 (fake registration) a
phur Ganja Kg. 1432.5 leh Harjinder
Singh of Sarangwal village, Hoshiarpur, Punjab (Truck driver) le Yengkokpam
Jiten Singh of Thoubal Khekman
Makha Leikai hai chu an man. Ganja hi Rs. 13,00,000 manhu vel niin PRO, Police Department, Manipur thusuok chun a
hril. Hi thil le inzawm hin NAB PS, Manipur in case an registered.
Tekin Bawngpui a deng hlum
Imphal: April 5, 2015 chawhnung dar 1:15 vel khan
Kshetri Leikai, Thoubal District ah Mr Thokchom Surmangol of Kshetri Leikai Bawngpui chu Tekin a deng a, a hmuna a thi nghal. Bawngpui hi a taksa an dar hne hle a hril
a nih.
Others:
NLFT han inbiek an nuom
Agartala: National Liberation Front of Tripura (NLFT)
pawl chun India sawrkar leh inbiek an nuom a, inbiekna a um theina dinga
indawrtuona meeting hmasa tak chu April 2, 2015 khan Shillongah nei a nih. Hi
meeting a hin Tripura Tribal Welfare
Secretary L. Darlong, K. Nagaraj, DGP Tripura, Intelligence Bureau of Senior officials 2 le NLFT thuoitu 3, Utpal
Debbarma, Kajal Debbarma le Karna Debbarma hai an thang. NLFT hi kum 1989 a
indin tan a ni a, inbiekna chu Shillong a nei tha an ti a, inbiekna nei hun
ding ruok chu bituk a la ni nawh.
Case rel fel lo vaibelsie 3 deuthaw
New Delhi: Zani hmasaa New Delhi a Chief Justices
Conference kharna huna thu a hrilnaah
Chief Justice of India H.L. Dattu chun, case rel fel lo (pending
cases) po po tuta inthawk kum 5 sungin
rel fel ning a tih tiin a hril. India rama Court tum tum haia case la rel
fel lo hi vaibelsie 3 deuthaw nia hril a nih. Hi Conferencea hin High Courts 24 a Chief Justices le Chief Ministers hai an thang
tawl.
Mizoram sawrkarin disturbed areaa puong a tum
Aizawl: Zanikhan Mizoram
Home Department le Police hotu lien han Home Minister R. Lalzirliana inrawinain meeting an nei a. Manipur le
inrina Mizoram huop sung chu
‘disturbed” area a puong le
HPC(D) hai chu danpuoa hnawl (unlawful organisation) a puong nisien tiin an rel a. Hi thil hi March 28, 2015 nia MLA pathum hai vengtu Police 3 kap hlum le an ralthuom hai lakpek
an nina le inzawma hung um a nih. MLA
convoy lambuntu kha Mizoram sawrkar chun Zosangber thuoi HPC(D) hai thaw niin
an tum a nih. Mizoram sawrkar chun demand area a hin venghimna sukhau zuol le
Sakawrdaiah ‘advanced tactical headquarters’ indin ni dingin Parliamentary
Secy. for Home Lt. Col (retd) ZS Zuala chun a hril.
Jammu: Jammu & Kashmir Statea state anawleh
sawrkar thlungpui hnuoia thawkna nei ni si lo, vengtu nei bik mi 1,270 lai an
um a, hiengang mihai venghimna sin le a tul dang danga dingin J&K sawrkarin
thla tin Rs. 10,88,460.75 a seng hlak tiin zanita Congress MLA R.S. Pathania
indawnna siem chu J&K CM, Mufti
Mohammad Sayeed in J&K Assemblyah
dawnin a hril.
Tribes 6 ST listah zieklut ding
Guwahati: Assam
state a tribe chi tum tum um hai laia Tribes 6, KochRajbongshis Tea (tribe),
Tai Ahoms, Morans, Motoks le Chutiyas hai
chu Schedule Tribe list ah zieklut vat ni tang an tih tiin Union Tribal Welfare Minsiter Jual Oram in zani
hmasaa Kokrajhar a BTC election um dinga
BJP Candidatehai ta dinga vote campaign a neina huna a hril.
New Delhiah SAARC Health Ministers meeting
NEw Delhi: SAARC
Health Ministers Meeting a vawingana chu April 9, 2015 a inthawk khin tan ning
a tih. Hi meeting a hin SAARC rambung
tum tum hai inlaichinna siem that dan ding, HIV/AIDS, Health le Technical
Committee on Health & Population
chungthu hai hriltlang ning a tih. SAARC rambunghai chu, India, Afghanistan,
Bangladesh, Bhutan, Maldives, Nepal, Pakistan le Sri Lanka hai an nih.
Iengleia Bawng that chau khap am
Mumbai: Zanikhan Mumbai High Court chun, ‘Iengleia
bawng that chau Maharashtra sawrkarin a
khap? Iengleia ran dan, Kel le a dang
dang hai khawm that khap an ninaw? tiin Maharashtra sawrkar an dawn. Maharashtra sawrakrin an
state a bawng that a khap, a sa zawr le fak a khap a, state danga inthawka
bawngsa laklut iengleia an phal bik? tiin indawnna Mumbai High Court chun a
siem.
Meerut a kangmei a suok, mi 6 a kang hlum
Meerut: Zani zingkar dar 6:30 vel khan Meerut khawpui
huop sunga Kashiram Yojana, Lohia Nagar ah kangmei rapthlak takel a suok a, mi
6 a kang hlum a, hliemna tuok mi 2 hai chu Lala Lajpar Rai Memorial Medical College panpui an nih. Kangmei suokna
san hriet a ni nawh. Kangmei hi Flat No. KG221, Mr Perves umnaa inthawka suok tan a nih.
Mizoram Synod in Rs. 1,52,34,70,532 an hmu
Aizawl: Mizoram Synod chun Financial Year 201415
sungin thlawlawmin Rs. 1,52,34,79,532 zet an hmu. Kum 201314 sung khan Rs. 1,
32,98,36,769 an hmu a, kum 201314 neka 201415 sunga thawlawm sum an hmu
tam lemna chu Rs. 19,36,33,736 a ni a, a
pungna 14.56% a nih tiin Mizoram Synod thusuok chun a hril.
Motors 4,552 zet inrutu man
Guwahati: April
3, 2015 khan Assam Poice han Azara hmuna motor inrua zawr hlaktu, Anil Chauhan an man. India ram hmun hran hranah
motors 4,552 inruknaah a thang ta niin Police hai kuomah an puong. New Delhi a ringawt khawm Car
inrukna cases 400 lai a nei. India ram pumpuia motor inruk cases a nei chu
3,355 a tling phak. Motor inruk leia case a neina state hai chu, Assam, Maharashtra le New
Delhi hai an nih.
Canberra: Prince
Harry chu Australian Armya Army sin
thaw dingin zanikhan Australia ram a tlung tah. Army training haptakar 4 lai a neizo pha British Royal Armya
a sipai thang hun (term) ding a zo ta ding a nih. Prince Harry hi Army Uniform
leh Sydney International Airportah a tum
a, mipui ennuom a hlaw hle.
Bangladesh ah thlipui leiin mi 28 an thi
Dhaka: April 4, 2015 nia inthawka thlipui hrang chun
Bangladesh a Bogra, Rajshahi, Pabna, Naogaon le Siraganj district hai nasa takin a nuoi a, mihriem chengna in
28,600 zet hluo thei ta lo ding khawpin a mut siet a, Inchuknain 250 vel a
suksiet bakah mi 28 zetin thina an tuok
pha a, mi 200 velin hliemna an tuok
bawk. Mithi le hliem hai hi in chim, thingkung tlu, bang chim le tek tla leia
thi le hliemna tuok an nih tiin official thusuok chun a hril.
------------------------------------------------------------------------------------------------------------------------------------------
VAWISUN
THUPUI
Nauhai, thu chauin inhmangai nawm ei niu, lei
chauin inhmangai naw bawk ei tiu; thilthaw le titakzetin ni lem raw se.
1 Johan 3:18
Editorial:
Fakrukna, thamna le suol hai hi ei theida tak
tak am?
Sawrkarin mithiem filawr le mi var hai rawnin
budget, scheme, project, programme, mission le plan chi tum tum hai siemin an
duong a. Hieng thil hai po po hi ram le mipui ta dinga a tha ding ti an hriet leia an siem a ni a. A tak taka
thaw, sukpuitling le sum hmang indik a ni phawt chun a hlawsam ding hi a um
nawh. Amiruokchu, a enkaitu ding state
sawrkar, state sawrkar hnuoia thawktuhai le a ram mipui haiin an mawphurna
indik taka an thaw seng a tul. Chuong a ninaw chun sawrkar thlungpui le state
sawrkar han ienganga tha schemes le projects khawm siem hlak hai sienkhawm
hlawtling thei tak tak ngai naw nih.
Sawrkarin
mi rethei dawmsangna ding le vantlang hmasawnna dinga Scheme, project,
programme, mission le plan a siem hai hi, ei hril ta ang khan mithiem filawr le
thil chinchang hre mi han an ngaituona po po senga an siem le an induong a ni
leiin a tha naw tak tak a um der nawh. A ni dan ding ang takin sin thaw inla,
sum le pai a mi pek hai hi a hmangna ding indik takah hmang inla chu ei thatpui vawng ding a nih. Sawrkar thlungpuia inthawka
thangpuina ei hmu zozai hai le state budget sunga ei insiem ve hai hi kum 10
sung chau khawm indik taka hmang ni ta
sienla chu, ei ram hmel hi a danglam ngei ngei ring a um.
Fakrukna
(corruption) thamna, le suol hai hi ei
theida tak tak am? Hi indawnna hi ei
dawn dan inang naw nih. nangni laia suol neinaw takin deng hmasa tak raw seh’
tia nuhmei uire lai mantuhai kuoma Isu’n a hril huna pakhat khata an inrel hmang vawng ang khan hi indawnna
dawnlet ngam lova tlanse, dawn thei lo
le dawn lova um el mi iengzam ning ei ta ti hi ngaituo tham tak a nih. A thu le
a hrila hril chun Corruption, thamna le suol hai chu ei theida seng an nawm.
Amiruokchu, a tak taka theida hi chu ei tamnaw hle niin an lang. Hi lei tak hin
suol theida hi ei lan chuk le ei lan hril hriet tak tak a tul a nih.
Mipui
sum, mipuihai ta dinga hung hi mi tu hai in amani an ni phingpui suksipna ding
le hausakna dingin an lo hmang hlak a. Chuongang thil indiklo chu Media
hmangin tarlang a ni hlak a, Vigilance
annawleh ACB han an suizui rawp hlak a, sienkhawm hrem tak tak hi an um khawm
ei hriet ngai meu nawh. Suolna le indiknawna hai hi ei vai ngam a, ei vai lien
a ni deu tak ta an naw mani ti theiin a um.
Manipur
hi India rama Corruption hluorna takhai
lai ei thang niin an hril hlak a, finfiena tak tak a um nawa chu ei mita ei hmu
le ei nakawra ei hriet haia inthawk el khawmin ei nei naw hle ti an hriet thei.
Sawrkar sinthaw le Politicians hai hausakna ram taphawt chu Corruption hluorna nia hril a
nih. Sumdawng hausa tlawmte le
contractor lien tlawmte ti lo, ei rama in tha le ropui, huon le ram lien tak
tak neihai hi sawrkar sinthaw le Politicians vawng an ni tawl tlat el chu tie!
Hiengang
mihai hi hausa dinga riruong le ruot an ni nawh. An ngirhmun an sang ang peiin an khawsakna
an sang tung pei a, a hun laia thil man insang dan ang peia sutin hlaw
sawrkarin a siem le hlaw a pek an nih. An thla tin hlaw le dan anga sawrkara
inthawka hamthatna an dawng thei hai
khawm hi an insung khawsak inrelbawlna le an nauhai lekha inchukna hai le chun
hausakna ding an dai thei naw hrim hrim. Sawrkar chun hausak thur thurna ding khawpin hlaw le
hamthatna chi tum tum a siem pek si naw laia a la hausa thur thur an um, an
hlaw le hamthatna bak hmu an nei a ni el naw ding?