Responsive Ad Slot

Hmasawnna Thar | 2 April, 2015

Thursday, April 2, 2015

/ Posted by VIRTHLI HMAR
Local News
ZC Chairman dingin LB Sona bawk
CCPur: Zomi Council (ZC) chun zani 11:00AM khan ZC Veng, New Lamka, Zomi Innpi-ah  General Assembly-cum- Election of ZC nei a nih. Zomi Council Chairman ding hin   Chairman ni lai LB Sona chau in Nomination paper a file leiin  Election Commission  chun  kum 2015-2018 sunga  ZC Chairman dingin LB Sona  bawk  tlingin an puong a, ZC Speaker K. William chun Chairman hi intiemkamna an neitir a, Rev. T. Kamgin in Pathien kuoma tawngtaipekna a nei a,  memento an inhlan nghal bawk.
      
      
ZC Assembly a hin Pu L.B. Sona chun kum 3 sunga ZC hmalakna hai  hrilin, UPF in  Central sawrkar kuoma Autonomous Hill State an ngenna ZC in bawzuiin sawrkar thlungpui kuoma khawm memorandum an pek thu, Meitei han ST status an ngenna thuah ZC convenor na hnuoiah KIM, HI, MPC, UNC le ATSUM han an inrawnkhawm hnungin Centre-ah memorandum pek, International Level 3rd World Zomi Convention nei zo a ni thu le ZC hmalakna tum tum hai a hril.
            
Business session huna chun 2015-18 ZC budget dingin Rs. 85 lakh hriltlang a ni a, ZC VC Khatkhotong Baite chun UPF thil ngen Autonomous Hill State a putlut a, member hai khawma thlawpin ei ram le leilung humhalna dingin 6th Schedule ngenna hi an thlawp. Chun, MDC election ding chungthu le agenda dang dang hi huna hin putlut le hriltlang a nih.

Bank PO sin hmu thar
CCPur: Nk. Debora L Buongpui d/o Ramnghinglo, Muolvaiphei chun Institute of Banking Personnel Selection (IBPS) huoihawtna hnuoia CWE PO/MT-III 2014 exam-a hlawtlingna changin  Probationary Officer dingin Punjab National Bank (PNB) ah allotment a lo hmu tah. (Virthli)

Mi bawtu han Rs. 60,000 an pek
CCPur: March 10, 2015 nia Torbung Bangla hmuna Bike le Mahindra Duro inbaw huna  hliemna tuok Joseph R. Hmar (Assembly Speaker, HSA GHQ) chu April 1, 2015 zantieng khan HSA le TKSU hrietpuinain a bawtu Lalkholien sunghan HSA Campus, Rengkai, CCPur-ah  Mr Joseph R. Hmar kuomah Rs. 60,000/- an inhlan. (LRS)

Lawmthu hrilnaain bu an fakpui
Tuithaphai: March 31, 2015; 5PM khan Parbung Hostel, Rengkai hmunah Bungkhawpui Education Upliftment Society hai chun ICI KTP, Tuithaiphai Presbytery thuoituhai kuomah lawmthu hrilna thlaithleng an kilpui. Parbung Hostel in tukuma Class-X le Class-XII exam hai tadinga study camp a buotsai  huna  khan an ring bakin inchuklai an hau a. Hostel an intar leia study hall dinga an Thalai In ICI KTP Tuithaphai Presbytery haiin an rawngbawlna  anga ngaia a thlawn tawpa an inhmangtir lawmthu hrilnaa bu an fakpui a nih. Parbung hostel enkawltuhai chun hma tieng peia khawm mi hai ta dinga malsawmna ni pei dingin an ditsakna insang tak an inhlan.

Pasal pakhat a thisaa hmu
CCPur: Zani (April 1, 2015), 7:00PM vel khan Pangzawl le Thingkangphai khuo inkar Cemetry Road-ah pasal pakhat a thisaa hmu a nih. Mithi hi zani zan 9:30PM vel khan CCPur Police han an va lak a, District Hospital Morgue-ah an sie. Hi thu ei sut chena hin tu’m a nih ti hriet a la ni nawh.
            
Ei thu dawngna in a hril danin Zani zan dar 7 vel ruosur lai  tak khan Maruti Car a chuong han hi lai hmuna an hung sie niin tuolsung mihai chun an hril a. Tuolsung mi han an va enfel huna a thisaain an va hmu a, Police-a report an pek hnunga CCPur Police han a ruong hi an va lak a nih. An lang danin Chem hmanga that ni dingin an lang tiin ei thu dawngna chun a hril a, a ruong sietu hai hi Pangzawl tieng panin an tlan pei niin mita hmutu hai chun an hril.

ADC Chairman in Office a hawng
CCPur: Mr Langkhanpau Guite, Chairman, ADCC chun zani 7:00AM khan Tiddim Road, N. Lamka (G) hmuna Zomi Football Club (ZFC) working office a hawng a, Pastor Rev. H. Soichinthang, NTBC in tawng-tainain an hlan. Chairman chun ZC working office  thla khat hluo man  Rs. 1500/- chu  kum khat hluoman ding a tum pek. H. Mangchinkhup EM chun steel Almirah 1, MLA Nominee Sonmuan le N. Mangpu han Plastic chairs 20 le dustbin an pek bakah G. Suanchinpau MDC chun steel table 1 le CT Lian in Centre table 1 a pek bawk.


Police-ah report a pek
CCPur: Hill Areas Committee (HAC), Govt. Of Manipur Chairman le Tipaimukh MLA Dr Chaltonlien Amo chun March 27, 2015, 3:00AM vela Senvawn khuoa a motor le Escort motor hai tyres 7 zet sakawrbakchep le tubo hmanga sukthep pek a nina thuah March 31, 2015 khan Police –ah report a pek a, hi thua hin Police chun FIR No. 1 (3) 2015 PBG-PS U/S 427/34IPC an  registered.

Maintaining Books Trg.
CCPur:SSA/CCPur hmalaknain April 10 & 11, 2015 hai khin School Management Development Committee (SMDC) hai ta dingin Maintaining Books of Account thuah Synod Hall, IB  Road-ah training/workshop um a tih. April 10, 2015, 10AM khin program hawng ning a tih. Block Mission Coordinator/DI of Schools hai chu an hnuoia SMDC hai training-a thang dinga thu pe dinga inhriettir an nih.

Imphal:
Headline:
BJP thuoitu han Joint Press Conference an buotsai;
Union Home Minister le BJP President hai an hung inzin ding
Imphal: Zani zingkar khan BJP Manipur Pradesh Office, Nityapat Chuthek, Imphal-ah  BJP  Manipur President Th. Chaoba Singh le BJP Manipur President lo ni ta hlak, Meinam Bhorot, Haobam Borobabu le Sh. Shantikumar Sharma han Joint Press Conference an ko a, May 30, 2015 a Manipur tlangram biel huop sunga Autonomous District Councils (ADCs) 6, ADC, CCPur; ADC Chandel; ADC Senapati; ADC Tamenglong; ADC Ukhrul le Sadar Hills ADC haia Election hung um dinga an hmalak dan ding thu hai an hriltlang. An party constitution  dungzuiin members 7 umna State Coordination Committee indin a ni thu le ADCs 6 haia inthlangnaa hin BJP Manipur an hrat filawr ngei an ring le beisei thu BJP, Manipur Pradesh thuoituhai hin Joint Press Conference  a hin an hril. BJP Manipur Pradesh chun ADC election ding le inzawma member 7 umna Co-Ordination Committee a lu tak chu State President Th. Chaoba Singh a ni a, hi Committee-a Convenor chu State BJP General Secretary (administration) Asnikumar Singh a nih.
            
Th. Chaoba Singh thangsain BJP Manipur Pradesh thuoituhai chun Manipur a sawrkarna cheltu Congress Party chu nasa taka demin an sawisel. Sawrkar thlungpuiin tlangram biel sukhmasawnna dinga fund a hung pekhai  a tlungna ding  hmun intlungtir  lo, in nei lo  hai in bawl pek dinga ti khawm thaw lo, tlangram biel lampui hlak tha lo em em, PDS thil khawm intlungtir lo, tui le electric khawm ngaisak lo tiin  Manipur Congress sawrkar nasa takin an sawisel.
            
ADC Election le inzawmin Union Home Minister Rajnath Singh le BJP National President, Amit Sha hai chu April 16, 2015 khin ni 2 sung cham dingin Imphal-ah  an hung inzin ding niin BJP  State Unit General Secretary M. Asn nikumar chun a hril. ADC election hung um dinga BJP ticket dithai chun April 15, 2015 chena an bio-data hai pelut dinga inhriettirna siem a ni ta bakah final draft Manifesto chu April 10, 2015 a puong hman a ni ding thu le ADCs 6 um haia seats um po poah candidates an nei vawng ding thu BJP Manipur chun thusuok an siem ta bawk.

A Changtieng kutpha a vuong dar vawng
Imphal: March 31, 2015 khan Dangaolou Patrick (18), s/o Ngaopunii of Chingmai Khullen, Senapati chu vadunga Nga manna dinga bomb (Dynamite) a deng tum naah  bomb hi a chawi laiin a puok a, a changtieng kutpha (a kutparhai) a vuong dar vawng bakah a vawitieng mitah hliemna a tuok a, JNIMS, Porompat panpui a nih. A bula um Ngaopulou of Phaibung Khunou khawm a hmaiah hliemna a tuok. patrick hi ni kuma Kathmandu, Nepal-a South Asian Martial Arts Games a Bronze Medal lo la tah a nih.

Thoubal Bazar ah inselbuoina
Imphal: Zani hmasa zantieng khan Thoubal Bazar a naga zawrtu Nupui ruol le Thoubal Municipal Council Chairman, Y. Bijen Singh hai chu nasa takin an insel buoi a, Y. Bijen in tawngbau mawi lo taka a biek tawl leiin Nupui ruol an lung a sen hle a, zanikhan Thoubal bazar-ah a dodalnain thungbuma nuorna an nei. Bazar hi siem that mek a ni a, Nga zawrhai hi lo insawn dinga a ngen hnung khawma an insawn naw leia inselbuoina hi suok nia hril a nih.

Sharmila Court hmaa inlangtir
Imphal: Zanikhan Irom  Sharmila Chanu  chu Cheirap Court, Imphal hmaah inlangtir nawk a ni a, Court hun ni 15 sung lungina khum nawk dingin a rel. Sharmila hi kum 14 neka tam Manipur a inthawk Armed Forces Special Power Act hlip dinga ngennaa bungheia nuorna nei a ni tah.

PLA in an ni pawl thaw niin an hril
Imphal: March 31, 2015 nia Ukhrul District a Kamjong le Kongkan inkara 44 Assam Rifles lambuntu kha kei ni pawl kan nih tiin PLA chun an hril. Kha huna inkaptuonaa khan an ruolpa Okram Pari a thi bakah AR 4 an thi a, iemanizat an hliem tiin PLA/RPF chun thusuok an siem.

Bomb puokin Car a suksiet
Imphal: Zani hmasa zantieng khan Thokchom Dojendro, s/o Thokchom Maimu of Kyamngei Maning Leikai in Gate bulah bomb a puok a, a bul hnaia um Car a suksiet a, mihriem thi le hliem chu an um nawh.

Arts and Culture sukhmasawn
Imphal: Jawaharlal Nehru Manipur Dance Academy yearlong diamond jubilee closing function zanikhan hi Academy Auditorium hmuna nei a nih. Hi huna khuolliena thang Manipur  CM O.Ibobi Singh chun, Manipur-a lampawl le artist hai sukphurna dingin Arts and culture sukhmasawnna dinga state sawrkarin a tul le pawimaw anga hma a lak ding thu a hril.

Others
April 4-ah Tripathi Mizoram Governor dingin
New Delhi:  West Bengal Governor, Keshari Nath Tripathi chu Mizoram Governor  thar ding  ruot a ni hmapo a Mizoram Governor sin lo chelsa dinga ruot a ni angin April 4, 2015  zantieng dar 4 khin Raj Bhavan, Aizawlah Mizoram  Governor dingin sesamna nei a tih tiin David L. Pachuau, State Protocol  Officer chun a hril. India President Pranab Mukherjee chu Mizoram University Convocation a thang dingin April 9, 2015 khin Aizawlah an zin ding a ni a, chu hma ngeia Governor thar hi sesamna lo inneitir tum a nih. April 4, 2015 ni hin Mizoram Governor a inthawka ban tah Aziz Qureshi chun Aizawl suoksanin an ram a pan ve ta ding a nih.

Petrol le Diesel man sukhnuoi
New Delhi:  A zawna tum hni lai Petrol le Diesel man sukpung a ni hnungin zanikhan Petrol litre khatah 49 paise le Diesel man litre 1 ah  Rs. 1.21 a sukhnuoi nawk a ni chu sawrkarin a puong.  Petrol le Diesel man thar hi April 1, 2015 zanrila inthawka hmang tan nawk ning a tih. April 2, 2015 a inthawk Delhi a chun Petrol man litre 1 ah Rs. 60 ni tang a tih. A hma chun Rs. 60.49 a nih. Diesel litre 1 ah Rs. 49.71 ni hlak chu Rs. 48.50 a hung ni ta ding a nih.

Kum 5 sungin phone bills Rs. 35 lakh
Guwahati:  Assam CM Tarun Gogoi, a ministers le Parliamentary Secretaries han kum 5 (2011-2015) sungin Telephone hmang man  (Telephone Bills) Rs. 35 lakh le an state a IAS Officers han telephone hmang man Rs. 20,29,423 an hmang tiin Assam Parliamentary Minister Rockybul Hussain in zani hmasa khan Assam Assembly an hriettir.

Bru hai thuoikirna dingin Rs. 4.7 crore
Agartala:  North Tripura District a Relief camps 6 haia Mizoram Bru sungkuo 3,000 hai thuoikirnaa hmang dingin sawrkar thlungpui chun Rs. 4.7 crore a hung peksuok nawk tiin Lalbiakzama, Additional Secretary (Home), Govt. of Mizoram chun a hril. Bru hai thuoikirna ding hin Road Map-IV state sawrkar chun  a siem tiin Lalbiakzama chun a hril.

Supreme Court in a cheltang
New Delhi: Special CBI Court in Coal Block allocation case (Talabari-II) a India Prime Minsiter hlui Dr Manmohan Singh a taksa ngeia Court hmaa inlang dinga a kona thuah, inlang lo dinga Supreme Court a ngenna a  siem chu  Supreme Court in  aremti pek a, Court hmaa inlang dinga a kona chu zanikhan a sukchawl. Dr Singh hi CBI Special Court in April 8, 2015 a Court hmaa inlang dinga a lo ko a nih.

Tripura sawrkarin Central Pay scale
Agartala:  Tripura state sawrkar chun an state sawrkar hnuoia thawktuhai chu Cenral Pay (6th Central Pay Commission Recommendations) ang pek an ni ta ding thu March 31, 2015 khan a puonglang. Hi Central Pay  hi April 1, 2015 a inthawka hmang tan le  State sawrkar hnuoia thawktu mi 1.60 lakh le pensioners 52,000 han an sawr tangkai pha ding a nih. Central pay pek ding lei hin an state sawrkarin 2015-16 ah  Rs. 338.75 crore, 2017-18 ah Rs. 487.80 crore, 2018-19 ah Rs. 560.97 crore le 2019-20 ah Rs. 645.12 crore a seng belsa pha ding a nih.

J&K ah Medical College thar 5
Srinagar: Sawrkar thlungpui chun Jammu & Kashmir ah Medical College thar 5 indin a remti tiin zani hmasa khan J&K Health & Medical Education Minister Chaudhary Lal Singh chun National Conference MLA, Devender Rana indawnna an state assembly-ah a dawn. Medical Council of India (MCI) guidelines angin Detailed Project Report (DPR) peklut le state le sawrkar thlungpui han Memorandum of Understanding an ziek zo ta tiin a hril bawk.

Narasimha Rao hrietzingna ding
New Delhi: NDA sawrkar chun India Prime Minister hlui Narasimha Rao hrietzingna ding “Samadhi” Yamuna vadung kamah bawl dingin thutlukna a siem tah. Congress thuoina hnuoia UPA sawrkar chun Rao Samadhi ding indin hi an lo remtinaw nia hril a nih. Rao hin kum 1991 a inthawk 1996 inkar khan PM sin a chel a, kum 2004 a kha lo thi ta a nih.

J&K Jails ah intang 2,315 an um: Mufti
Srinagar:  Jammu and Kashmir Chief Minister Mufti Mohammad Sayeed chun, Jammu & Kashmir Jail haia chun Political prisioners, helpawl, lung dengtu le ramdang mi  hai thangin intang mi 2,315 an um mek niin zanikhan ziekin J&K Assembly an hriettir. Mufti hin Home portfolio khawm a chelsa a nih. J&K Jails haia intang 2,315 hai laia 105 hai chu ramdangmi (foreigners) an ni a; 36 hai chu Public Safety Act hnuoia hrentang, chu laia 20 hai ramdang mi, le 16 chu tuolsungmi an nih tiin Mufti chun a hril.

Khawvela mi upa tak a thi
Tokyo: Tulai khawvela damsawt tak le khawvela mi upa taka record Misao Okawa chu zanikhan Osaka, Japan rama Nursing Home-a a umna hmunah a thi. March 5, 2015  khan kum 117 a tling ta a nih. Pi Okawa hi March 5, 1898 a pieng niin Guiness of World Records chun a zieklang. Tuta hring le dama la um hai laia upa tak chu US mi Gertrude Weaver a ni a, kum 116 mi a ni tah.

IAS Offiers 4 PMO a thawk dingin
New Delhi: Zanikhan Prime Minister’s Office (PMO), New Delhi a thawk dingin IAS Officer 4 ruot le sin pek an nih. Department of Personnel and Training (DoPT) a Director ni lai, 1999 batch IAS Officer, Andhra Pradech chu Director, PMO dinga ruot a ni a, IAS Officer dang 3-  Brijesh Pandey, 2004 batch IAS Officer Manipur-Tripura cadre; Mayur Maheshwari,  2003 batch IAS Officer, Uttar Pradesh cadre le Shrikar Keshav Pardeshi, 2001 batch IAS Officer, Maharashtra cadre hai chu Deputy Secretary, PMO dinga ruot an nih.

Solar Impulse-2 in China a tlung tah
Shanghai:  Myanmar a inthawka vuongsuok Solar Impulse-2 vuongna chu him takin March 31, 2015, 1:35AM (local time) khan Chongqing Airport, China-ah a tum. Myanmar a inthawka Chongqing Airport inkara hin darkar 22 an vuong. Hi vuongna khaltu chu Bertrand Piccard a ni a, Mission Engineer chu Michael Anger a nih.

Draft National Ceasefire agreement
Yangon:  Myanmar rama helpawl group tum tum 16 hai le Myanmar President, Thein Sein hai chun March 31, 2015 khan Draft National Ceasefire agreement an ziek. Inbiekna vawi 7 lai zet an nei hnunga Ceasefire agreement hi an ziek thei a nih. Tuta inthawka thla khat hnung velah full agreement an ziek thei beisei a nih. Draft ceasefire agreement ziek theia a um hi UN chun a lawmpui a, Myanmar rama inremna le muongna tluontling hung inumtirtu a ni ngei a beisei thu UN chun a hril.
-----------------------
VAWISUN THUPUI
Eini mi tamtak hi, bei tlang khat, taksa pumkhat ei ni hi, ei rengin bei tlang khata inthawkin ei chang seng sih a.  - 1 Korinth 10:17

Editorial
BPL le Manipur

Below Poverty Line (BPL) ei ti el hi miretheiah khawm a rethei nawk zuol  tak tak, khawsak harsa em em, nitina fakfawm zawnga inhlawfa el khawm ni lo, ni khata bu vawikhat fak ding khawm hmu mumal lohai sawmdawlna dinga sawrkar thlungpuiin  an duong a nih. Tuhin India ramah BPL sungkuo nuoi 4,072.2 chuong zet ei um mek a nih. BPL sungkuo ni hi chak um lo takel a nih. Amiruokchu, ei state a chun BPL sungkuo ni  ei nuom seng an naw mani ti theiin a um. BPL sungkuo ni chu inzakuma khawm ei ngai nawh. Hi thil hi BPL umzie ei hriet naw lei chu ninaw ni a, indikna le ringumna ei nei naw lei a ni ngei ring a um.
            
India ram pumpuiah BPL sungkuo an tlak hnuoi tiel tiel laiin Manipur a ruok chun ei pung tuol tuol a ni awm ie. Kum 2013 a Union Minister of State for  Planning,  Rajeev Shukla in Parliament House a hril danin India rama BPL sungkuo pungna state le UT hai lai Mizoram, Assam, Bihar, Chhattisgarh, Delhi, Manipur, Meghalaya  hai an thang. BPL sungkuo pungna state hai lai hin Uttar Pradesh le Bihar hai chau hi ziek le tiem thiemlo tamna an ni a, a dang po hi chu ziek le tiem thiem tamna state an nih. BPL pungna state hai laia ei thang ve hi chu lawm a um fahran nawh.
            
India President hlui Dr APJ Abdul Kalam in mak a ti em em chu ziek le tiem thiem tamna state a BPL sungkuo an tam em em el hi a nih. Lekhathiem tamna ramah chun a sukzieum dan a um naw mani? tiin a hril hlak.
            
India ram state dang BPL sungkuoa inziek luthai hi chu BPL awm hlie hlie an ni ring a um. Kan unaupa Chennai a lekha inchuka um zing chun, “Chennai-a chun BLP sungkuohai chun mi lai ‘ ka ngaidan chun..” tia hril ringawt khawm an ngam nawh, an remti naw a, an hril ve a thieng naw a ni deu tak, an rethei tlawk tlawk a nih” tiin a hril. Manipur le chun inpersan tak ei nih. Ei ni rama chun BPL sungkuohai hi ruol pawl ni khuo le puipung khawmnaah khawm a tawng tam le a tawng thei  theiah ei thang tawl an naw maw?
            
Manipur a chun BPL ni hi inzakumah ei ngai naw a, hi hi BPL umzie le nina tak ei hriet chieng tawk naw lei khawm a ni el thei. BPL hai ta dingin  sawrkarah a thlawna dawng le hmu thei ang chi hai hi, BPL ni ve lo hai  neka  tlawm lema inchawk thei le  fee thenkhat  chawi tlawm lem nahai  dam a um hlak a. Chuonghai chu ei inchu lui lui a ni deu takin an lang a, hmun thenkhatah hlak Politics khelnaa hmang a ni rawp hlak.

State danga BPL hai chu in le lo nei lo chu hril lo, ni khata bu vawikhat el khawm khawp tawka fak ding nei lo le hmu lo an ni laiin; Manipur a chun  khawsa  thei ve tak tak le In le Lo nei ei um nuk a, thenkhatin Computer dam, Refrigerator dam, inlirthei ke pahni nei chau khawm ni lovin motor lien  le manto tak tak le Cell Phone chenin ei nei a, ei chawi fer fur el a ni hi! BPL Guidelines indik tak angin minkhi tahai sienla, Manipur a hin BPL sungkuo ni thei ding khawpa khawsak harsa chu veng tin le khaw tina hin ei um pheu pheu chau ring a um.
            
A thuhrimah BPL sungkuohai hi ei rethei tak tak am annawleh retheiah ei inngai el ti khawm hi ngaituo tham a tling awm ie.  Ei sum laklut le inphu lova khawsak insang ei tum a, a thang lova ei um thei lo chau ngaipawimaw lovin, a thang lova ei um thei khawm an chawkna ding ei nei chun nei ve pei ei tum hlak. Thalai  han thawsuok nei der si lovin Two wheelers le Mobile phone manto ei nei fur a, petrol thunna le top up thunna ding sunghai  ei la hni fawm hlak.

            
Ei thalaihai hi sap le Korean hai inthuomna changkang tak tak vawngin an inthuom a, thienghlimna dam, taimak le sin thaw inrimna kawngah ei entawn nawk der si nawh. Ei incheina le ei  khawsak phung hrim hrim enin Manipur ang tluka rethei changkang tamna ram hi khawvelah a vang hle ring a um. BPL family inzakuma ngaina chang hre lo hai hmakhuo ding hi ngaituo chet chet a tulin an lang.
Don't Miss
© all rights reserved
made with by Simon L Infimate