Hmasawnna Thar | 16 April, 2015

Tuolsung:

Health Minister in mipui hai fimkhur dingin an fui

CCPur: April 15, 2015 khan YMA Golden Jubilee Hall, Ngathal­ah YMA Ngathal Branch 68th Rising Day lawmna nei a nih. Hi huna hin Pu Phungzathang Tonsing, Minister (Health & FW, CADA, GAD) khuolienin a \hang a, B. Zodingliana, MDC le Mangcha Thangjom, President Group YMA Manipur hai chu Guest of honour le Chief Host in an \hang.

    

Hi huna Pu Tonsing in thu a hrilnaa chun, party annawleh mi \hanaw tukhawm ti a neinaw thu hrilin, Election huna mipuihai fimkhur dingin an fui. Party tinin Kohran ang bawkin doctrine an nei a, doctrine ngaipawimaw ding a nih. Sawrkar chun khuo mipui lal le inthuruol taka kalchawi khuo hai chu sawrkar in a ngaisak  bik a, a \hangpui nuom bik a nih tiin Pu Tonsing chun a hril. Hi huna hla sakhai Rs. 1,000/­ seng a pek bakah Cultural Troupe hai Rs. 3,000/­ seng a pek. Hi bakah hin ei hmaa MDC election huna an thaw \hat dan izirin  YMA  Golden Jubilee Hall Ceiling siem pek dingin  a tiem bawk. (input LRS Puruolte)

CCPur­ah JE Campaign thawk 4­a nei ding

CCPur: April 15, 2015 a inthawk khin Churachandpur District sungah thawkli (phases) in JE campaign nei ning a tih tiin Dr V.C. Pau  Tonsing, DFWO/M­Secy. DTF­IM CCPur chun inhriettirna a siem. 1st Phase April 15­25, 2015 inkar sungin Patpuihmun PHC le Sibapurikhal PHC ah nei ning a ta; 2nd Phase April 17­ 25, 2015 inkar sungin Henglep PHC hnuoia um PHSCs hai po poah nei ning a ta, 3rd Phase April 20­29, 2015 inkar sungin Saikawt PHC le Sagang PHC area huop sunga PHSCs hai po poah  nei ning a ta, 4th phase chu  April 27­May 4, 2015 inkar sungin CCPur town sunga PHCs, PHC Singngat, Sinzawl, Thanlon, Senvon le CHC Parbung haiah nei ning a tih.  CHC, PHCs le PHSCs hnuoia thawk Nurses  le staff po po \hang dingin Dr  V.C. Pau Tonsing chun an hriettir.  Hi thil hin naupang 1­15 years inkar hai huom a tih. Chief, Principals, Headmasters, Community le Philanthropic leader­hai khawm lo thlawp le \hangpui seng dinga ngen an nih.

CJWO in bomb puok dodalnain  Sit­in­protest an nei;

Dist. Administration le SP hai  hma la dingin an ngen

CCPur:  Churachandpur  Joint Women Organisation (CJWO) chun  April 12, 2015, 8:30AM vela Light House Cinema Hall­a 54 Bn. BSF G­Company hai duty post bula  tu ti hrietlo han bomb hrat takel an sukpuok an ditnaw le demzie inentirnain zanikhan Old Bazar Bus Parking, Police Station, CCPur tuolah Sit­in­Protest an nei. Protest­a \hang hai chun “We want peace”ti le “Stop attacking Security personnel in public place” ti Placard hai chawiin mipui umna hmuna security hai bei nawk ta lo dingin an khekpui bawk. Protest neina hmuna hin Pu Lunminthang Haokip, IAS, DC CCPur le Pu L. Mangkhogin Haokip, SP, CCPur hai khawm an hang fe. SP, CCPur chun, bomb sukpuoktu hai security forces leh \hangruola an hmatienga man an ni ding thu a hril.

    

CJWO President Pi J.L. Sawmi chun, bomb puok huna khan civil mi 4 in hliemna an tuok bakah BSF duty post le a bul laia SBI ATM booth khawm a suksiet thuhai reporter­hai kuoma a hril a. CJWO chun DC, CCPur kuomah Memorandum an pek bawk. An memorandum­a chun, hiengang thil mipui umna hmuna a tlung nawk ta ngai nawna dinga Security le District Administration hai inralring (alert) zinga um dinga an ngenna, mipui umna, ATM Booth le bazar hmun haia hmelhrietlo han bomb an sukpuok nawk tanawna dinga hma la dinga an ngenna hai  an ziek a, bomb sukpuoktu hai an demna thu an zieklang bawk.

VDF Bandh thaw in nundan pangngai a sukbuoi

CCPur: All Manipur VDF Welfare Association (AMVDFWA) in sawrkar kuoma an thil ngen, sawrkarin a ngaisaknaw leia April 15, 2015 zanrila inthawka Manipur state pumpuia General Strike an thaw leiin CCPur district­a khawm nundan pangngai nasa takin a sukbuoi pha. Bandh thawtu han khawpui sunga Tiddim road hmun tum tum haiah cement bag le thil tum tum hmangin lampui hai dang an ni bakah hmun \henkhatah motor ke (tyre) an raw. Pharmacy ti lo dawr dang inhawng hmu ding a um naw a, inchuknain hai khawm khar vawng an nia, two wheeler \henkhat an tlan zeu zeu tinaw chu motor inlawn an um naw a, Airport  fe ding motor hai chu an tlan phal pek an ni a, CCPur­a chun bandh leia buoina suok hriet ding a um nawh.

     

April 15, 2015  dar 12:00 chena sawrkarin an thil ngen a la ngaisaknaw rawp chun April 15, 2015 a inthawk National Highways haiah darkar 48 sung aw Economic Blockade an thaw zawm ding niin AMVDFWA General Secretary chun ei chanchinbu palai kuoma a hril.

Dawr an rawk, Rs. 2 lakh manhu an inruk

CCPur:  April 13, 2015 zan khan Rengkai Road­a ‘Joy Pan Dukan” chu  tu ti hrietlo rukru han a kawtkhar kalna suksiein an rawk a, Recharge Card, Everyday (bawngnene), Cigarette iemanizat, Inverter le Battery a suma sutin Rs. 2 lakh manhu vel ding bakah sumfaiin Rs. 2,000/­ an inrukhmang niin Police­a inthawk ei thu dawngna chun a hril.  Dawr  neitu in Police­a report a pek dungzuiin CCPur Police chun hi thua hin FIR No. 36 (4) 2015 CCP­PS U/S 457/380/34 IPC an registered­a, dawr rawktu hai hi man tumin an suizui mek

Vangai Range­ah Mobile  Clinic Medical Camp

CCPur: April 17­21, 2015 inkar sung khin District Health Society (DHS)/CCPur chun Vangai Range­ah “5 Days Mobile Clinic Free Medical Camp” huoihawt an tih. Hi ding le inzawm  hin  April 16, 2015, 5:30AM hin Seiboi Mate, Dist Program Manager inrawinain Baryia, Dist Finance Manager; Dr.Dipdeba Singh, MO i/c Patpuihmun PHC; Dr Amit Singh, MO Patpuihmun; Dr Lhingneithem, MO; Lamsanglen Block Program Manager; Birjit Singh, Dist Accountant; Gangmeidum, Block Finance Manager; Saheed Dist Hospital Accountant;Chin Hoih Kim, Pharmacist le Mangaihkim, ANM, PHC Sibapurikhal  han Vangai pan an tih.

Rally nei an tum

CCPur: Joint Students Organisation­ ZSF, KSO, HSA, MZP chun April 17, 2015, khin Public Ground, CCPur­a inthawk DC Office chenin  Peace Rally nei an tum a, DC kuoma memorandum pek an tum bawk. Bomb puok le inzawma rally hi nei tum a nih.

MOAP sum sem zing

CCPur: District  Social Welfare Office, CCPur­a chun Manipur Old Age Pension sum sem zing a ni a, zanikhan Singngat A/C sunga mi hai sem a nih. Amiruokchu, zanita VDF han general strike an thaw leiin nuom anga sem a ninaw a, sienkhawm mi 200 vel kuoma sum sem a nih.  April 16, 2015 in Thanlon A/C a mi hai, April 17, 2015 in Henglep A/C a mi le April 18, 2015 in Tipaimukh A/C sunga mi hai siem an ni ding a nih.

COPS Genneral Body Meeting

CCPur: April 17, 2015 khin Civil Officers Pensioner’s Society (COPS) chun an office­ah 23rd Annual General  Body meeting nei an tih. Member­hai po po hi meeting­a \hang seng dingin Secretary, COPS chun inhriettirna a siem.

Headline:

Political Parties 6 han infinkhawm an remtih; An \huoitu dingin Mulayam  Singh Yadav

New Delhi: Political Parties 6, a hmasaa Janata Parivar inti hlakhai chun zanikhan New Delhi­ah  meeting an nei a, an renga infinkhawm a, National Party indin an remtitlang. Hi meeting a hin Samajwadi Party (SP) President Mulayam Singh Yadav, Janata Dal (U) \huoitu Nitish Kumar; Rashtriya Janata Dal (RJD) \huoitu Lalu Prasad Yadav; PM hlui le Janata Dal (Secular) President H.D. Deve Gowda; Indian Lok Dal (INLD) \huoitu le Samajwadi Janata Party \huoituhai an \hang.

    

Political Parties 6 \huoituhai hi Mulayam Singh Yadav chengna in­a meeting an ni a, an Party­hai  infinkhawm ding thu hi JD(U) \huoitu, Sharad Yadav in a puong a, an Party hming ding le an election symbol ding chu inrawnkhawma an la ngaituo ding thu, an Party thar \huoitu lu tak chu Mulayam Singh Yadav a ni ding thu le Parliamentary Party a lukhaitu tak a ni ding thu hai an hril. Hieng parties 6 infinkhawm hai Party hming ding hin Samajwadi Janata Party or Samajwadi Janata Dal  tia inbuk a ni el theia hril a nih. Hi Party thar hmasuon hmasa tak ding chu Bihar Assembly Election hung ning a tih. Bihar Assembly Election hi tuta fe mek, kum tawp tienga nei ding a ni a, hi inthlangna hin hi Party ding hlimthla a hung inlang ding a nih.

            

Hieng laizing hin BJP chun Bihar Assembly Election hung um ding le inzawmin vote an campaign \an ta a, Bihar Assembly election hung um dinga hin Lalu Yadav le Nitish Kumar hai Zero ning an ta, BJP chu sawrkarna siem le chel thei khawpin an hung hrat ding a nih tiin BJP National President Amit Sha chun a hril. Kum 2014 Lok Sabha Election­a khan   Bihar­a seats 40 um hai laia seats 31 zet BJP in an chang a nih.

Imphal:

Old Age Pension sum la tum lai a thi

Imphal: Zanikhan 1st Manipur Rifles Ground, Imphal­ah Social Welfare Department in Old Age Pension sum an sem a. Hi Old Age Pension sum la dinga intlar ve Mrs Irengbam Purnimashi  (69), w/o (L) Kalachand of Khagempali Panthak Ningom Leirak chu khaw hre lovin a tlu a, a bauva  inthawk thisen a hung suok  leiin  RIMS Casualty panpui a ni a, sienkhawm damzo lovin a thi. Hi thil hi sun dar 12:30 vela tlung nia hril a nih. A tar pension sum a lak hmain a thisan a nih. L. Ibomcha, MLA chun RIMS panin a hmun ngeiah a va kan.

Tamenglong ­ah Truck 2 raw

Imphal: Zani hmasa zan dar 7 vel khan Tamenglong District sung NH­37 (Imphal­Jiribam Road) a hmun pakhatah tu ti hrietlo han Truck pahni an raw. Truck pahni hai hi Jiri­Tupul Rel lampui siemhai hmang lai nia hril a nih.

Toy Gun hmanga mi suomtu man

Imphal: Zani hmasa khan Thoubal College le YVU inkar le Kaprang Hills, Thoubal District haia Toy Gun hmanga mi suomtu Leitanthem Ichamba (36) s/o Leitanthem Biren of Thoubal Wangma Taba Mathak Leikai chu Thoubal Wangma Taba area mipuiin an man  a, Police kutah an pek. A kuta inthawk N­10 mum stripe khat hmu le man a nih.

BJP in HC­ah PIL thelut

Imphal: Minor Irrigation Department, Govt. of Manipur hnuoia sum tam takel sukchingpen a nina thuah BJP  in Public Interest Litigation (PIL) Manipur High Court­ah file a tih tiin Th. Chaoba Singh, President, BJP Manipur in zanita an party office­a  Chanchinbumihai an hmupui huna a hril.

Motor inrutu man le Police kuta pek

Imphal: Zani hmasa zingkar khan Keishamthong Elangbam Leikai mipuiin Saajan Office tuola motor ke pahni nei inrutu Rabi s/o Shabir of Lilong Haoreibi Mayai Leikai an man a, an vuok hrep hnungin Imphal West Police kutah an pek. A rul dang mi pahnihai chu man hman lovin an tlan hmang.

Pasal pakhat a thisaa hmu

Imphal: Zani zingkar inhma tak khan Hidangmayum Amujao of Khongman Zone­II in compound sungah R.K. Diamen (24) s/o Gambhir of Singjamei  Wangmai Kshtri Leikai chu  a thisaa hmu a nih. A luah vuokna be niawm tak hmu a ni leiin mi vuok hlum ni dinga ringhla a nih. Diamen hi zani hmasa zantienga Rocky s/o H. Amujao le an Ina  inthawka suokdawk nia hril a nih.

Others:

Pa hme leiin naupang 3 an thi

Jowai: Smial Muruh of Khanduli, West Jaintia Hills, Meghalaya chun April 11, 2015 khan ramhnuoia mi Pa (Wild Mushroom) hung hawnin hmein a suong a, a zing zantieng (12­4­2015) in an hme a, hi Pa hme leiin sungkhata naupang 3, Muruh nauhai, Meki Dhar (11), Jephin Dhar (8) le Wym Dhar (6) hai chu an damnaw pha leiin Civil Hospital, Jowai panpui an ni a, sienkhawm  damzo lovin an thi pha a, Muruh \hangsain midang 5 hai chu damnaw inrik taka an damnaw leiin April 14, 2015 khan  NEIGRIHMS,  Shillong panpui an nih. Muru nuhmei Brial Dhar chau in Pa hi a hme naw a, ama chau hi damnaw lova um a nih.  Hi hma met khawm khan ramhnuoia thei fak leiin Saipung, East  Jaintia Hills ah mi 14 an lo thi ta a nih.

|huoihmanga um Police a thisaa hmu

Raipur: April 7, 2015 a Maoist helpawl han Awapalli le Bijapur Road inkara an \huoihmang Police Constable Bira Basant of Bijapur thisa ruong  chu zani zingkar khan Gangaloor­Bijapur Road­ah hmu a nih. A ringah Maoist helpawl pamphlets inawrtir a nih. Baster Region, Chattisgarh state sunga ni 4 liemta sunga Police 14 thata an umna a nih.

Mizoram Disturbed Area Bill, 2015

Aizawl: Mizoram Disturbed Areas Bill, 2015 chu induong (draft) mek a ni a, hi Bill hi ni kuma induong \an a ni ta a, Home Department  le Law Department hai chu hi Bill thua hin an inrawn tlang ta a, hmang thei dinga zo fel a ni pha leh Mizorama HPC(D) Demand Areas  sungah hmang ning a tih tiin  Lalbiakzama, Additional  Secretary (Home), Govt. of Mizoram thusuok chun a hril.

Petrol le Diesel man sukhnuoi

New Delhi: Indian Oil Corporation chun zanikhan Petrol man litre khatah paise 80 le Diesel man litre khatah Rs. 1.30 in a sukhnuoi. Hi rate thar hi zani zan zanrila inthawka hmang \an ning a tih tiin Inian Oil Corporation  thusuok chun a hril.

Uttarakhand­ah Congress Candidate a tling

New Delhi: Uttarakhand a Bhagwanpur  A/C byelection a chun Congress canidate, Mamta Rakesh thlangtling a nih. Punjab a Dhuri A/C byelection a chun Shiromani Akali Dal (SAD) candidate,  Gobind Singh Longowal thlangtling a ni a, Uttar Pradesh a Charkhari A/C a chun Samajwadi party candidate Ms Urmila Rajput thlangtling a nih.

Moscow Victory Day lawmnaah

New  Delhi: Hungtlung ding May 9, 2015 khin Red Square, Moscow khawpuiah Moscow Victory Day  parade ropui taka nei ning a tih. Hi Day lawmnaa hin India sipaihai khawm hang \hang an tih. Moscow Victory Day Parade a India sipai hai an \hangna hmasa tak ding a la nih. Hi ni hi  Soviet Union kuta Nazi, Germany an pekna champha a vawi 70­na ding a nih. Kum 1945 khan Nazi hi Soviet Union kuoma an inpe a nih.

China le ramriah Railway station

New Delhi:  Arunachal Pradesh state sung, India le  China ramriah Indian Railways in Rel station a la bawl ding a nih tiin Union Defence Minister Manohar Parrikar chun a hril. Hi thua hin Union Railway Minister, Suresh Prabhu leh Memorandum of Understanding (MoU) khawm induong fel a ni ta  tiin Parrikar chun a hril. Railway station hi Union Defence Ministry le Union Railway Ministry hai \hangruola an siem ding ti a nih.

NCP candidate thlangtling a nih

Sangli: Maharashtra state a Tasgaon­Kavthemahankal A/C a byelection a chun Nationalist  Congress Party (NCP) candidate  Suman Patil thlangtling a nih.  Suman Patil hin votes 112,000 zet a hmu. Bandra East A/C a chun Shiv Sena candidate, Trupt Sawant thlangtling a ni a, Maharashtra  CM hlui le  Congress candidate, Narayan  Rane chu a tlingzo nawh.\

Acre 1 peiah zangnadawmna Rs. 20,000

New Delhi: Tulai hnai ela a hun lo taka ruo a sur leia Delhi sunga bu le bal a suksiet pek loneituhai chu zangnadawmna pek  ning an tih tin Delhi Chief Minister,  Arvind Kejriwal chun a hril. Zangnadawmna pek ding hi lo acre 1 peiah Rs. 20,000 pei ning a tih tiin Arvind Kejriwal  chun a hril. Delhi Assembly election laia AAP in thutiem a nei hai po po sukpuitling ning a tih tiin Kejriwal chun a hril.

Delhi Dy. CM in Principal a suspended

New  Delhi: Zanikhan Delhi Deputy Chief Minister Manish Sisodia in Rajendra Prasad School, President Estate surprise visit a thaw a, sum le pai hmang dan indiklo, cheng sangtel pekna receipts tehlem le Home Science Lab.­a chun Gas cylinder a um naw leia lungsenin hi School principal chu a sina inthawk a suspended.

-----------------------------------------------------------------------------------------

VAWISUN THUPUI

Chu lai tak chun inchuktirhai chu Isu kuomah an hung a, “Van ramah tu am ropuitak a ta?”an ta, Ama chun, naupangte a ko a, anni lai an ngirtir a, “Titakzetin ka ti cheu hi, in inleta naupangte ang in hung ni naw chun van ramah lut naw tawp in tih.  ­Mathai 18:1­3

Editorial:

Inchuknain hai  Free Zone in sie inla nuom a um

Ram changkang taphawtin naupanghai hmakhuo an ngaisak hlak. Hi lei hin naupanghai, a bikin lekha inchuklai naupang  han thiemna thlungpui indik tak an nei theina dingin school \ha an indin a, quality education an ngaipawimaw a, World Class  Education inchuk theina educational Institution an indin a, School kai lo naupang an um ngai nawh. Student­hai ei ngaisak dan le ei enkawl dan hin nakie huna ei insung, ei ram le ei hnam um dan ding a hril  sei em em el a nih. Hi lei hin India sawrkar khawmin education hi a ngaipawimaw a, sum seng khawm rin lovin hma a lak a, Education Policy thar  an duong pei a, lekha inchuk dan khawm thlak danglam pei a hung ni ta a nih.

    

Ei ram, ei hmam \huoituhai, mi chinchang le thil chinchang hre lem, mithiem le mi inrila ngaihai chun, student­hai hi nakie tienga ei ram le hnam \huoitu ding an la ni thu le enkawl uluk an \ulzie an mi hril rawp hlak. Indik khawm an dik vieu a, sienkhawm a thu ringawt hi ei dittawk hlak a, nakie tienga ei ram, ei hnam, ei kohran le ei khawtlang \huoitu ding lekha inchuklai mek naupanghai hmakhuo hi ngaipawimaw tawk lovin an ta dinga harsatna chi tum tum ei siem pek nawk hlak.

    

Ieng pawl  khawmin ei thil thawna  le hmalakna haia hin inchuknainhai hi Free Zone in sie hlak inla nuom a um. Entirnain Bandh ei lo thaw a ni khawmin ei ram le hnam ban pawimaw la hung ni ding student­hai lekha inchukna tawkpawi le suk harsa zawngin thil thaw ngainaw inla nuom a um.  Students le inchuknainhai bandh in a huomsa hlak leiin an lekha inchukna nasa takin an bahla pha hlak. Hi lei hin bandh, blockades, strike le lungawinawna ei inlangtir huna hin student­hai hi chu suksawl lo le in\hang ve tir kher ngainaw inla nuom a um. Lampui hraw a \ul changa student­hai hmathea hmanga sawl em ema lampui hrawnaa ei in\hangtir hlak hi bansan chi niin an lang.

    

Bandh, General Strike le economic blockade ei ti hai hi ei Culture pakhat a hung ni ve ta leiin,  bandh annawleh General strike­in a chang chun Inchuknainhai huomsa naw nih ei ti hlak. Amiruokchu, students a tam lem hai hi kelawnga an school pan le fe an ni ta naw a, school motor  hmanga school fe hlak an ni leiin bandh or General Strike thawtu han School motor hai hi an in\hangsa tirnaw (exempted) a \ul. Bandh or General strike huna hin bandh/general strike thawtu han  School motor­hai hi a huomsa naw thu puonglang sa hai sien nuom a um. Chuong a ninaw chun bandh in inchuknainhai a huomsa nawh ti ringawt khan chu umzie a neinaw a, school motor an service thei naw chun students tam lem an kai theinaw a, school po po khar a \ul ta tho tho hlak.

    

VDF pawlin darkar 24 sung zanita General strike an thaw leiin Churachandpur town le a se vela school­hai chu hrillawk le puonglawk um lovin khar an nih. Hi thil hin student­hai lekha inchukna le school kai a sukbuoiin a sukbahla el chau ni lovin students, nu le pahai nasa takin a sukbuoi pha a nih. Students nu le pa hai chu School chawl ding am, chawl lo ding hre lovin lungawpinkaiin an umtir pha hlak. Hieng a ni lei hin bandh annawleh General strike thawtu han an thil thaw dan ding hi chiengtawk takin puonglang hlak  ta hlak hai sienla nuom a um.

            

Bandh le General Strike chau ni lovin inchuknain haia pawisa dawl le pawisa demand ti hai hi um ngainaw sienla nuom a um. Pawisa demand  lei khawm hin School khar pha a ni rawp hlak. Hi thil hi students han an thawhla hle a nih. A bikin Manipur tlangram district nekin phairam district a cheng student han hieng thil haia hin harsatna namenlo  takel an tuok a, a pawi bek bek el a nih. Ei ram le hnam banpui la hung ni dinghai hmakho suksetu ni neka \hangpuitu ni hi a \ha lem a, ei renga ta dinga \hat tlangna ding a nih. Education sukbuoi le sukbahla zawnga ei chet sung hin chu hmasawn thei tak tak ngai nawng ei tih.