Local:
Headlines
Pu
T.N. Haokip in Primary school building a hawng
CCPur:
Pu T.N. Haokip, MLA chun zani 9:30AM khan ST Chullouphai khuoah khuolliena thangin Bethel Upper Primary
School building thar a hawng. Hi huna
functional president Pu Lunminthang Haokip, DC, CCPur chun school building extention room 2 hai a hawng
a, Guest of Honour T. Goukhomang Simte,
ZEO chun toilet a hawng. Hi huna hin
Special Guests in Khaipao Haokip,MDC le Kaikhanlian Guite, DI of schools/CCpur
hai an thang.
Pu
T.N. Haokip chun, ST Chullouphai khuo hi
National Highway a ni thu, Lekhabu hi a thanaw a um naw a, tiem rawn a tul.
Khawvela mithiem, mivar le ropui tak tak
hai khawm hi school thaa kai le
seilien an ni vawng kher naw a, lekha an tiem rawn leia var, khawvel hrieta
miropui an nih tia hrilin student hai chu lekha tiem
rawn dingin an fui. Nu le pa hai khawm nau hai lekha inchukna ngaipawimaw dingin an fui
bawk.
DC
chun, Lekha inchuk chau hin mihriem a siem tha theinaw a, mihriem siemthatna
dingin spiritual a pawimaw . CCPur district hmingthangna chu education a ni a,
sienkhawm Hindi, Manipuri hrie ei tlawm
tia hrilin thangthar hai chu Hindi le Manipuri hrie le thiem tum
dingin an fui. Pathienin mihriem hai hi talent a mi pek seng a, chu ei talent
chit hmusuok a pawimaw tiin a hril.
ZEO
chun, ZEO hnuoia teacher hai a tul anga sawnkuol an ni theina
dinga thuneina pe dinga MLA iemanizat
kuoma a lo intlun ta thu hrilin teacher indainaw hai semruolna dingin ZEO in thuneina a neinaw
thu a hril.
Actor
Rahul Bose CCPur a hung
CCPur:
Anti-discrimination NGO ‘The Foundation’
indintu ni bawk bollywood actor , screen writer, Rugby player
le social activist Rahul Bose chu
zanikhan Churachandpur-ah a hung inzin a,
ZEO, CCPur Office-ah The Foundation le inzawma Manipur a inthawk mi 6
thlangsuok ding thu an hriltlang. Rahul Bose
hi Imphal-a inthawk The Foundation team mi iemanizatin an hung zui. Rahul Bose
hi Hindi films hieng - Pyaar Ke Side
Effects, Maan Gaye Mughal-e-Azam, Jhankaar Beats, Kucch Luv Jaisaa le Chameli haia lo inchang ta a nih.
ASHA
Convention nei
CCPur: DHS, NHM/CCPur huoihawtnain zani
11:30AM khan Synod Hall, IB Road-ah ASHA
Convention nei a ni a, Pu
Lunminthang Haokip, DC, CCPur; Dr
Thangchinkhup Guite, CMO/CCPr le S. Hangshing, Post Master, CCPur
MDG hai chu khuollien, Guest of honour le
special guest in an thang.
DC
chun, ASHA member hai chu damnaw hai thangpui
le inrawitu ding an ni thu a hril a. CMO
chun, ASHA member han damnaw enkawlna chungthua ngirhmun pawimaw tak an nei a,
damnaw hai an fak ding damdawi hril, health institution a damnaw hai inrawitu ding an ni thu; Malaria thua blood slide
collection 1 pei an peklutnaah Rs. 5/- pei an dawng ding, slide Malaria a ni
chun lawmman Rs. 75/- pei sawrkarin a pek ding thu a hril. Khawsunga ASHA member han meetig
an neina dingin sawrkarin thangpuina a pek thu a hril.
Hi
huna hin PHC wise-a member sin thaw tha
thlangsuok hai kuoma certificate
pek an nih. Chuonghai chu - Best ASHA Singngat PHC ah Niangkhanching of
Sialbu; Thanlon PHC ah Niangzam of Palkhuong, Town ah Chingmuangngai of Zenhang
Lamka; Saikawt PHC ah Chinneilam of
Thenmuol; Sagang PHC ah D. Tanthaului of Thenjang; Behiang PHC ah Ninghauching
of S. Sehken; Henglep PHC ah Ngaizakm of Maumual; Parbung PHC ah Rodingpui
of Tallan; Senvon PHC ah Haungaih of Sitam; Patpuihmun PHC ah Lalthienghlim of
Khangbor le Sinzawl PHC-ah Manhaungai of Khuanggin hai an nih.
Block
10 a MGNREGS ni 2 sin thawna ding
CCPur:
DC, CCPur chun MGNREGS 2014-15 4th Phase-a Block 10 haia ni 2 sin thawna ding a sanctioned. Block 10-a ni 2 sin thawna ding
sanction-a um hai chu- Saikawt, Singngat, Thanlon, Tipaimukh, Lamka, Sangaikot,
Vangai, Henglep, Tuibuong le Samulamlan
Block hai an nih.
Malaria
Positive 6
CCPur: March , 2015 sung khan Malaria
Department chun damnaw mi 817 hai thisen laa an enfelnaah Malaria Positive 6 an
hmu a, hieng hai laia 5 chu Malaria PV le 1 chu PF a nih. March, 2015 thla sungin Malaria leia thi official
record-ah a um nawh.
Imphal:
Headlines
Manipur
Chief Minister in Passport Seva Kendra a hawng
Imphal:
Zanikhan Old Assembly Complex, B.t. Road, Imphal-ah Manipur Chief Minister Pu O.Ibobi Singh in Passport Seva Kendra
(Passport Office) a hawng. Passport dita hni nuom Manipur mi hai ta
dingin Guwahati-ah fe kher ngai ta lovin Imphal-a Passport Office-a
inthawk passport an hmu thei ta ding a
nih. Guwahati fenaa pawisa le hun tam
tak seng tul hlak kha tuhin chu seng a tul tanaw ding a nih tiin hi huna Pu
O.Ibobi Singh in thu a hrilna huna a hril. Manipur hi Myanmar le inri an ni a, Visa on Arival
(VOA) mamawna hi a nasa leiin Imphal Airport le Moreh Custom Office haiah Visa
on Arrival system indin le hawng dingin CM O.Ibobi Singh chun Union Minister le External Affairs
Minister-hai a ngen.
Visa
on Arrival System hi Manipur Tourism
hmasawnna dinga pawimaw em em el a ni leiin sawrkar thlungpuiin a ngaipawimaw ve a tul thu, Tulihal Airport, Imphal hi International
Airport dang hai anga a function thei tak takna dinga hma hung la dingin Pu
O.Iboi Singh chun External Affairs Ministry a ngen.
Passport
Seva Kendra hawngna huna hin Deputy Chief Minister Pu Gaikhangam le Muktesh K.
Pardeshi, Joint Secretary, Passport Seva Project hai khawmin thu an hril. Pu
Gaikhangam chun, Imphal-a Passport Offie hawng a ni hin khawvel rambung dang le
Manipur inkar sukhnai a tih tiin a hril.
Passport Seva Kendra (PSK) hawnga um hin Culture le tradition tiengpang
suklangna tha tak a hung siem pha ding niin a hril bawk. PSK, Imphal hi India
hmarsak biela dinga a pathumna a nih. A
hmain Aizawl le Shillong haiah hawng a lo ni tah tiin Muktesh K. Pardeshi in
thu a hril huna a hril.
Assam Rifles 2 le helpawl 1 an thi
Imphal:
Zani zing dar 6 vel khan UNLF ni
dinga ringhla han 44 Assam Rifles kea
patrolling-a fe hai chu Kamjong le Kongkan village inkar, Kamjong Sub-Division,
Ukhrul District-ah an lambun a, Assam
Rifles 2 le helpawl pakhat an thi nia hril a nih. Assam Rifles thina tuokhai
chu, Havildar N.K. Dolly le Havildar
B.N. Kshetri hai an nih tiin ei thu dawngna chun a hril.
Chun,
hi inlambunnaa hin Assam Rifles a Rifleman pakhat R.B. Shastra a hliem a hril a
ni bawk. Helpawlhai hin IED an sukpuok phawt a, hi zo hin silai tha hmangin an
kapzui a, Assam Rifles hai khawmin an
kap let ve a, helpawlhai hi a hnungin an tlan hmang niin ei thu dawngna chun a
hril. Hi thil tlung an hriet le inruol hin Assam Rifles le Police hai inkaptuona hmuna hin tirlut belsa an ni a, dappui nasa takin an thaw a, mi man
ruok chu an nei thu hriet a ni nawh.
CS
in Photo Gallery a hawng
Imphal:
Zanikhan Jawaharlal Nehru Manipur Dance Academy (JNMDA), Imphal-ah Photo
Gallery chu Pu P.C. Lawmkunga, IAS, Chief Secretary in a hawng. JNMDA chun kum khat aw Diamond Jubilee an lawm
a, hi hun sung hin Manipur le Manipur puotieng programmes 13 an huoihawt niin
L. Upendro chun a hril. An diamon Jubilee lawmna hi vawisun hin an zo ta ding a
nih.
ZUF
in NSCN(IM) cadre 1 an kap hlum
Imphal: March 30, 2015 khan Tamenglong district sunga
Taosang Khunou ah Zeliangrong United Front (ZUF) le NSCN(IM) pawl an inkaptuo
a, NSCN(IM) cadre pakhat kap hlum a nih
tiin L. Longmei, Info. & Publ. Secretary, ZUF chun thusuok a siem. ZUF chun
NSCN(IM) cadres dang khawm an hliem an ring thu le NSCN(IM) le Gurkha Regiment
hai chun Gurkha Regiment Temporary Camp chu intawmnaa hmangin an um tlang a nih
tiin ZUF chun an intum bawk.
Others
Champhai-ah
bomb a puok, silaimu 1,348 man
Champhai: Zani hmasa
zan khan Champhai, Mizoramah bomb a puok a, tawkpawi ruok chu a nei
nawh. Chun, March 29, 2015 zan khan Mizoram Police han Champhai district sunga
Ngaizawl village-ah pasal kum 47 mi
pakhat chu a chengna insunga inthawk AK-47 Rifle mu 1,348 leh an man a,
Khawzawl Police station-ah case an registered.
Samak
72 zetin an pung
Jorhat:
Tulai hnai ela Kaziranga National park a Samak umzat tiemnaa chun a hma
nekin 72 in an pung a, tuchena hmu thei
dan chun Samak 2,401 hi Park-a hin an um
anga ngai a nih tiin S.K. Seal Sarma, KNP Divisional Forest Officer chun a
hril. Tuta Samak um hai lai hin a
puitling ta sa 1,651 ( a chal 663 le a pui 802) an thang. Kum 2013 a inthawk
tuchena Sapeltu han Samak an kap hlum chu 75 an tling ta niin Sarma chun a
hril.
Nagpur
Jail-a inthawk mi 5 an tlan dawk
Raipur:
Zani zingkar inhma tak khan Nagpur Central jail a inthawk mi 5 an tlan
dawk. Hieng mi 5 hai hin an umna barracks a thirtluon hai at bawnga tlandawk an
nih. Mi 5 hai laia pathum Satendra Gupta, Bishan Singh le Salim Khan hai chu
tuolthat leia lungin intang an ni a, pahni dang, Akash Thakur le Prem
Nepali hai chu mi suom le rawk leia
intang an nih.
April
9 hmain Mizoram Governor
Aizawl:
April 9, 2015 khin President Pranab Mukherjee chu Aizawl, Mizoramah an
zin ding a ni leiin Mizoram Governor sin chelsa dinga ruot West Bengal Governor
Keshari Nath Tripathi chun April 9, 2015
hma ngeiin Mizoram Govenor sin a chel ding niin Raj Bhavan, Aizawl thusuok chun
a hril. Mizoram Governor ni lai Aziz Qureshi ban a ni leia Mizoram Governor sin
hi lo chelsa dinga ruot a nih.
Goa
Minister thla 6 lungin intang dingin
New Delhi: Goa Vikas Party (GVP) president le Goa
Archives le Archaelogy minister Francisco alias Micklay Pacheco chu zani hmasa
khan Supreme Court in thla 6 sung lungin intang dingin a chungthu a rel. Kum 9 zet
liemta a sawrkar thawktu pakhat a vuok leia Court in thla 6 lungin intang dinga
thiemnaw an changtir a nih.
Bihar-ah
Tekin mi 15 a deng hlum
Patna:
Zani hmasa khan Bihar State a Patna, Nalanda, Jehanabad le Munger
district haiah Tekin mi 15 zet a deng hlum. Chun, ruopui vanawn a sur lei le
thlipui hrat takin a zui leiin thingkung, in le electric ban hai a mutthluk
bakah sik hmabak tah Vaimim le Wheat hai nasa takin a mut siet bawk. Hi thil
hin huon le loneituhai nasa takin a sukbeidawng pha.
Bank
rawk, Rs. 46 lakh inruk hmang
Purulia:
March 22, 2015 zan khan West Bengal a United Bank of India (UBI),
Bibekanandanagar Branch chu rukru han an
rawk a, Rs. 22 lakh an inruk hmang. Chun, March 23, 2015 zingkar inhma tak khan
West Bengal a Nadia district a UBI, Dhubulia Branch chu rukru han an rawk a,
Rs. 24 lakh an inruk hmang. Bank branch pahnia rukruhai pawisa inrukhmang hi
Rs. 46 lakh zet a tling phak. Bank kawtkhar le CCTV cameras le Alarm hrui hai
suksea Bank hi an rawk niin Asit Ghost, Regional manager, UBI chun a hril.
CM-hai
laia Padma Vibhushan dawng hmasa tak
New Delhi/Chandigarh: March 23, 2015 khan terms 5 zet Punjab Chief Minister sin chel tah
Sardar Parkash Singh Badal (87) chu
Presdient Pranab Mukherjee in
Rashtrapati Bhavan, Delhi-ah
Padma Vibhushan an hlan. Badal hi India
rama Chief Minister ni lai le lo ni ta hai laia Padma Vibhushan Award dawng
hmasa tak a nih. Kum 1969-71, 1977-80, 1997-2002 le 2009-2012 hai khan Punjab
CM sin a lo chel ta a, tukhawm hin CM a la chel a nih.
GNLA
camp hlukhum, 1 kap hlum
Shillong: Meghalaya-a
Special Weapons and Tactics (SWAT) commandos hai chun zanikhan East Garo Hills district-a Nengkhra village huop sung ramhnuoiah GNLA
hai inbikrukna camp an hlukhum a, inkaptuona tlungah GNLA Eastern command area
commander Kiljang Sangma @ Jangjang an
kap hlum niin Police thusuok chun a
hril. Kiljang hi tuolthatna, inthuoihmangna
le sum in ngenna le case dang dang nei
mek a nih. A kuta inthawk AK rifle 1 le a mu iemanizat bakah document thenkhat
le Bangladesh pawisa note thenkhat hmu a nih.
Platform
ticket Rs. 10 a ni ta ding
Patna:
Vawisuna inthawk hin Platform ticket chu Rs. 5 a inthawk Rs. 10 a
sukpung ni tang a tih tiin Railway Ministry thusuok chun a hril. Vawisun a
inthawk hin thla 4 ( ni 120) hmain Rel
ticket ch advance a booking/reserved thaw thei ni ta bawk a tih tiin ministry thusuok chun a hril. A hma chun ni 60
(thla 2) advance a booking thaw thei hlak a nih.
AP
Capital siemna dingin Rs. 1,500 crore
New Delhi: Andhra Pradesh state capital thar siemna
dingin NDA sawrkarin March 23, 2015 khan Rs. 1,500 crore a sanctioned. Hi
laia Rs. 500 crore chu Andhra Pradesh Raj Bhavan, Secretariat, High Court le
Assembly building thar bawlnaa hmang
dinga ti a nih. Andhra Pradesh capital siem le cheimawina dingin Rs. 1,000
crore hmang dinga ti a nih tiin Union
Finance Ministry thusuok chun a hril.
Swine
Flu leia thi mi 2,044
New
Delhi: Swine Flu leiin mi 9 an thi nawk leiin March 29, 2015 chena India rama hi
natna leia thi chu 2,044 an tling ta a, an vawi zat mi 33,877 an tling phak ta
niin Union Health Ministry thusuok chun a hril. Swine Flu leiin Gujarat-ah 430,
Rajasthan 417, Maharashtra-397, Madhya Pradesh 299, Karnataka 82,
Telangana 76, Punjab 53, Haryana
51, J&K 18, Uttarakhand ah 12, West Bengal-ah 25, Uttar Pradesh-ah 38,
Delhi ah 12, Kerala 14, Andhra Pradesh le
Chhattisgarh ah 22 ve ve le Himachal Pradesh-ah mi 21 an thi ta niin ei
thu dawngna chun a hril.
VAWISUN
THUPUI
Nangni khawm inring zingin um ro,
in ring naw hunah Mihriem Naupa chu a
hung ding a ni sih a,” a ta. Luka 12:40
Editorial
Bawng that khapna
Congress party
inrawina hnuoia United Progressive
Alliance (UPA) in Centreah sawrkarna an
chel huna khan Bawng that khapna thu hi a re vang vang a. Amiruokchu, Centreah
BJP thuoina hnuoia National Democratic
Alliance (NDA) in sawrkarna an hung chela inthawk hin bawng that khapna ri a
hung inri veng vung nawk el chu an ta hi!BJP sawrkarna states Madhya Pradesh le Maharashtra haia chun Bawng
that le bawngsa zawr khap hmakna dan siem le hmang tan a ni ta leiin Bawng that
le a sa zawr tumna leia case nei khawm an
um ta a nih. Bawng that chau ni lovin Lawi that khawm khap a nuom thu le
Parliament Budget session ah Lawi that khapna dan siemna ding Bill putlut tha a
ti thu Acharya Shivmuni chun a hril.
Hieng laizing hin Union Home Minister Rajnath
Singh chun NDA sawrkarin India ram pumpui huopa Bawng that khapna dingin hma
lang a tih tiin March 29, 2015 nia Indore, Madhya Pradesh a Jainism sakhuo thuoituhai
kuomah a hril. BJP sawrkarna Madhya Pradesh le Maharashtra state haia Bawng
that khapna ding dan an siem khawm tukhawma dang thei naw ni hai a, sawrkar
thutlukna chu lakkir thei ni ta naw nih tiin Rajnath Singh chun a hril. Acharya
Shivmuni in Bawng that bakah Lawi that khapna ding dan siem tha a ti thu a
hrilna huna khawm Rajnath chun a thlawp a. Hi thua hin BJP chu Parliamentah
majority an ni leiin Bawng le Lawi that khapna ding dan siem harsa naw nih tiin
a hril.
Rajnath Singh in a hril peinaa chun, kum
2003 a Union Agriculture minister a ni laiin Bawng that khap hmakna ding Bill
Pariamentah ka putlut a, sienkhawm selkaltu pawl han nasa taka an dodal leiin
hi Bill hi pass thei lovin a um a nih tiin a hril. Union Home Minister in hieng
khawpa Bawng that khap hmakna ding thua
inhnikna le phurna a nei chun India ram pumpuia
Bawng that khap hmakna dan hi siem a la hung ni el naw ding maw?
Parliament House pahni Rajya Sabha le Lok Sabha haiah hlak BJP thuoina hnuoia
NDA chu absolute majority an ni ta si leiin Parliament ah bawng that khap
hmakna ding Bill putlut a ni chun awlsam taka pasi thei ding ngirhmuna um a
nih.
Union Home Minister Rajnath Singh in Bawng
that khap hmak dinga hiengang lawm lawma inhnikna le phurna a neina thu hin Manipur
a ADCs 6 haia inthlangna hung um dinga hin nghawng a nei phak ding am ti hi
tulaia Manipur tlangram biela chenghai titi inhnikna pakhat a nih. Bawng le
Lawi that khapna ding thu hin bawngsa du le fa hlak hai lungril a khei hle ti
chu Kerala state a bawngsa fa hlak han an dodalnaa “Bawngsa fak Kût” an
buotsaia inthawk khan hriet thei a nih. Bawngsa hi Christian le Muslim hai chau
ni lovin Hindu lai khawm a fa an um ngei ti kha Kût a khan hriet thei a
nih. Hi lei hin Bawng that khapna hin
chu India ram pumpui ta dingin thiltha nekin thiltha lo an tlun lem el naw ding
maw?
May 30, 2015 a Manipur tlangrama ADC 6 haia inthlangna hung um dinga khawm BJP
le an candidatehai ta ding chun Bawngsa zawr le bawng that khapna thu hin
harsatna a siem pha el naw ding maw? ti
hi mi tam tak ngaidan a nih. Bawng that khapna hi state thenkhatah chau a ninaw
ding thu Union Home Minister thuhril hin a sukchieng si leiin MDC election huna
chun hrilfie le inhril hlip a harsa pha
hle ring a um.
Bawng
that khap hmakna dan siem tum a ni hin Manipur a ADC election um dinga hin
Congress party le NDA a thang lo party hai ta ding chun hamthatna le malsawmna
hung ni thei a nih. Congress party le NDA a thang lo party hai ta ding chun
Campaign hla ding tha tak siemtu le BJP dem le sawisel nuom hai ta dinga dem le
sawisel theina tha tak a nih. BJP ta
dingin Hembawk a hung ni pha dim maw? Ngaituo chet chet a hlaw khawp el.
