Aizawl, March 27, 2015: Febuary ni 3-a District Hospital Kolasib, Mizoram-a naunei laia thi Pi Baby Zothanpari ruong chu vawitûk khan phawr nawk niin, postmortem ṭhat nawk a nih.
Ei thudawngna in a hril danin Febraury ni 3, 2015 a thi Pi. Baby ruong hi a pasal Pu. Steve Lalhruaichhuaka Pudaite in a ngenna angin vawitûk khan District Magistrate Pu Zoramsiama Hmar keiṭhruoina hnuoiah Forensic Doctor pahni- Dr. Lalringmaia le Dr. Lalthakimi Ralte ha’n an endika (re-postmortem), Pu. Steve a dit danin mithi ruong taksa ‘sample’ ṭhenkhat lâk a ni a, hieng taksa sample hai hi Forensic Science Laboratory ah endik nawk nîng a tih.
Hrillang ta angin Pu. Steve Lalhruaichhuaka Pudaite nuhmei Pi. Baby Zothanpari, Electric Veng Kolasib, Mizoram a mi chu February ni 3, 2015 khan vangduoithlak takin a nau neizo in a thi a. Hi chungchang a hin a pasal Pu. Steve hin Febraury ni 14 khan FIR thelûtin a nuhmei chu ngaisak a ninaw (medical negligence) lei le thisen a dawng ding ang dawngnaw leia thi a nih tiin hospital thu neituhai an tum.
Pu. Steve in a hril dan chun a nuhmei hin thisen a seng nasa taluo leiin unit 3 lai zet a mamaw a. Sienkhawm unit 1 man ding chau a nei lei in blood bank a staff hai chu a va hni leh anni chu phalna umlo chun batin thisen bag an peksuok theinaw thu an lo hrila. Chuphing leh Pu. Steve hi ATM booth ah thlan nawkin chutaka chun AMT khawl khawm chu a lo sie leiin a nuhmei chu a hun taka thisen a dawng ding ang dawngnaw leiin a thi a ni a ti a. “Ka nuhmei chun thisen a hun taka a dawng naw leia thi/boral a ni thu Medical Officer Pu. Lalhminghlua death report ah ‘Hypovolaemic’ ti a chuong nghe nghe a nih” a ti bawk.
FIR le inzawm hin Mizoram Health Minister Lal Thanzara chun February ni 17 khan Kolasib ah enquiry thaw dingin official hai a lo tir ta bawka. Sienkhawm vawisun chen hi thina le inzawm hin tukhawm man an la ni nawh.
