Responsive Ad Slot

Hmasawnna Thar | Jan 09, 2015

Friday, January 9, 2015

/ Published by VIRTHLI
Public Ground le Sub-Divn. Hqrts tina Republic Day hmang dingin an rel
CCPUR: January 26, 2015 nia India Republic Day hmangna ding le inzawmin Jan. 8, 2015, 11:00AM khan Mr Lunminthang Haokip, IAS, DC, CCPur inrawinain BRGF Resource Centre, DC Office-ah District Level Coordination Committee for Observation of Republic Day, 2015 nei a nih.

Hi meetinga an rel dungzuiin Churachandpur district a chun Republic Day 2015 hi district level in Public Ground, CCPur hmuna hmang ning a ta, Pherzawl ADC, Singngat, Thanlon, Henglep, Parbung & Vangai Sub-Divisional Hqrts haia khawm Sub Divisional level in Republic Day 2015 hi hmang ning a tih.

Republic Day hmangna ding ground siemthatna chu EE/PWD in thawng an ta, ZEO, CCPur hnuoia school Contingents 30, NYK in boys &girls contingent, Exservicemen in contingent 1 parade-ah thang an ta, ZEO chun practice le rehearsal hun haia refreshment a sum seng ding zat a buoipui ding le parade practice le rehearsal chu Jan. 23-24, 2015 haiah 7 AM a nei ding le Parade Commander dingin SDPO, CCPur thang a tih.

Public Ground-a Republic Day hmangna hmuna hin- DRDA, Veterinary , ICDS, Sericulture, DIC,CAF & PD, Fishery, NRHM, SSA and RMSA, Agriculture , Horticulture , Social Welfare , PHED, IFCD, MSPDC Ltd. , PWD&PMGSY han stalls an hawng ding; Forest in Main Gate, Cooperative & Employment Exchange in Nehru Marg, Transport & Statistics in Police station tuol, Council le TD in Forest Gate le DYASO & NYK han Lanva hmuna Gate an siem ding ti a nih. Chun, Republic Day hmangna huna hin Appreciation Certificates & Awards sem ning a ta, hi ni 12:00Noon in Public Leaders le DLOs team han friendly match inkhel an ta, January 24, 2015, 7AM in Peace Ground via Police Station-Tipaimukh Road to Public ground chenah Mini- Marathon race huoihawt ding ti le thil thaw dan ding dang dang hai hi meeting huna hin an rel.

NEC Fin. Adviser in NERCOMP Office
CCPUR: Mr G.K. Chin, Adviser, Finance, NEC chu zanikhan CCPur-ah a hung inzin a, zani 11:00AM khan Bijang Family Lane-a NERCOMP Office sirin thawktu hai titipuina a nei. NERCOMP hi livelihood project a ni leiin thawktu hai chu ringum taka an sin thaw dingin Mr G.K. Chin chun an fui. CCPur District-a NERCOMP Office hlawtling theina dingin chawl suktlawm a, sin thaw hun suktam le a tlawm thei ang tak chawl la le taima taka thawktu hai office an kai a tul thu a hril bawk.

Training nuomhai ta dingin
CCPUR: Feb. 20, 2015 a inthawk ni 30 sung CCPur district mihai ta dingin Porompat, Imphal-ah Food Processing Industries trainign a um ding a ni a, inhnikna nei, Class X le a chungtieng pasihai chun Application Form General Manager, DIC, CCPur Office-ah lain Jan. 20, 2015 chenin fill up zova peklut nawk ding a nih. Fak le dawn bakah sum seng po po Directorate of Commerce & Industries, Manipur in a tum ding a nih.

Mr Maniram Haryana tieng sawn ding
CCPUR: Mr Maniram Sharma, IAS, Manipur-Tripura Cadre (MT-09), tuta Additional Deputy Commissioner, CCPur chel lai mek chu DoPT (AIS Division) policy guidelines 14.02.2014 dungzuiin Haryana Cadre a sawn ni dinga hril a nih. Mr Maniram Sharma hi August, 2010 a inthawk Churachandpur- a hung um tan a nih. A hung um hlim chun saptawng khawm hmang thei mumal lo a ni a, sienkhawm a tumruna leia IAS hmu a ni ang bawkin tuhin chu Saptawng a hmang thei ta a nih.

SP CCPur Office-ah an hung join
CCPUR: Kum 2013 a Manipur Home Department in Direct Recruitment a thaw huna Male/Civil-a Sub-Inspector hmu thar mi 14 hai chun zanikhan SP, CCPur Office-ah an hung join.

MCS a hmu lawmpuina nei an tum
CCPUR: Hangnung Phungpi Development Society chun Jan. 10, 2015, 11:00AM khin Miinjang, Thingkangphai ah Mr Lamminlal Simte in MCS a hmu lawmpuina nei an tum. Hi huna hin Goukhomang, DI of School/Singngat; Kammuanlal MCS, AC to DC, CCPur le Rev. K. Khangnung, Exe. Secy. NTBCA han thu hril an ta, Rev. Khamthang in Mr Lamminlal Simte ta dinga tawngtaipekna nei a tih.

Editorial
Hmasawn nekin harsatna, a tha nekin a thanaw lem an tlun el dim maw?

 Ei ram sawrkar chun thaw dan thar chi tum tum induongin a hung thaw tan a. Sawrkar tum dan le a riruong dan chun ram le hnam ta dinga thiltha le hmasawnna hrat lema a fe theina ding bakah fakrukna dangna ding ti a nih. Amiruokchu, hieng schemes chi tum tum hai hi Bank fethlenga thaw tul an ni a. Bank thawktuhai le mipui inkara inlaichinna le thangruolna tha nei a tul takzet. Bank thawktu tiengpangin mipui tiengpang an lo ngaisak tha nawh ti chu chanchinbu hran hran haiah zieklang a nih. Hi lei hin mipui harsatna hlipkieng a ni theina dingin sawrkarin Bank chi tum tum hai hi an Customer-hai lo ngaisak le ngaipawimaw dingin hma hung la sien nuom a um. Ienganga programme le scheme tha khawm sawrkarin siem sienla a buoipuitu, a thawtu le enkawl ding han inlaichinna tha taka an neinaw chun sawkrar scheme tha tak tak hai hi a hlawting chuong ring a um nawh. Scheme tha induong ringawt hi mipui le ram hmasawnna ding a ni chuong nawh ti hi sawrkarin a hriet tlat a tul. Hi lei hin ei ram le mipui han sawrkar tha, fel, indik le hrat an mamaw ngawi ngawi a nih.

Ei rama sawrkar thar a hung um a. Central a sawrkar thara ei Prime Minister in Scheme thar a siem le a hawng ta hi a thahnem tawk ta hle. Amiruokchu, a ram mipui han a tak takin ei sawr tangkai thei dim ti hi ngaituo um takel a nih. Sawrkar scheme thar chi tum tum hai hi Bank le inzawm vawng an ni a. Bank Branch tum tum tamna district Headquarters a cheng han Bank Account hawngna ding chauva hman harsatna an tuok chun, tlangram biel, Sub- Divisional Headquarters tum tum biel huop sunga chenghai lem chun harsatna nasa lem an tuok ngei ding a nih ti chu a chieng sa a nih. Hi lei hin Bank le mipui inlaichinna a that a tul a, chu thil chu sawrkarin a ngaipawimaw sa a tul a nih.

January 1, 2015 a inthawk khan India rama State tam lem haia chun LPG chungthuah Direct Benefit Transfer of LPG Scheme hmang tan a ni tawl ta a. Manipur state a ruok chu chun DBTL Scheme a dinga hmalakna chu 100 ah 20 vel chau zo a la ni a. Hi lei hin Manipur a cheng mipuihai khawmin LPG thua hin a hma neka harsatna ei tuok ding niin an lang. DBTL khawm hi Bank Account le inzawm a ni a. Bank Account la nei lo, LPG Consumer ni sihai chun Bank Account hawngna kawngah harsatna an tuok el khelah Bank Account nei ta sa hai khawma harsatna an tuok tho a nih ti hi sawrkarin a hriet a, an harsatna hi a hlipkieng a tul a nih.

Pradhan Mantri Jan Dhan Yojana (PMJDY) Scheme khawm a tha a, India mipuihai khawma tha an ti ve a, PMJDY hnuoia Bank Account nei khawm an nuom. Hi Scheme khawm hi Bank Account le inzawm bawk a ni a. PMJDY Scheme hi zero balance bank account a hawng thei ding ti a ni laiin Bank Branch tum tum hai chun an nuom teu nawh. Hi lei hin PMJDY Scheme thua khawm India mipui han harsatna nasa tak an tuok mek a nih. A chunga mi sawrkar thlungpui scheme-hai hi entirna dinga ei hang tarlang a nih. Hieng Schemes pahni ni lo hai khawm hi sawrkar thlungpui scheme chi tum tum a tam a, chuonghai khawm chu BAnk le inzawm vawng an nih. Amiruokchu, mipui le Bank-hai inkarah inlaichnna a tha si naw chun, ei ram sawrkarin scheme tha an duong hai hi hmasawnpui nekin ei harsatpui lem el thei ding niin an lang. Chun, tar pension le a dang dang hai khawm Bank
le inzawm vawng an ni ta a, Bank a thil va thaw a harsat leiin mipui chu an bei a dawng ta a nih. A tha lem dinga ngai khawm hi a tha naw lem el thei a nih.


Don't Miss
© all rights reserved
made with by Simon L Infimate