Ngurte khuo-ah HSA Platinum Jubilee Grand Finale ropui taka hmang a nih

Saikawt TD Block chu Sub-Divisional level a dawmsang ning a tih: O.Ibobi Singh, CM

- Alan Famhoite | Image: Muona Infimate

Tuithaphai: Hmar Students’ Association (HSA) Platinum Jubilee kum tluona hmang a tawpna tak. Grand Finale chu zani December 13,2014 khan Ngurte khuoah puithu taka hmang a nih. Hi huna hin Pu O.Ibobi Singh, Chief Minister, Manipur chu khuollienin a thang a, Functional President in Pu Phungzathang Tonsing, Minister (Health & Family Welfare, GAD, CADA), Manipur, Chief Host in Dr.Chaltonlien Amo, Chairman, HAC, Manipur, Guests of Honours in Pu T.Manga Vaiphei, Honble Chairman, MTDC; Pu Vungzagin Valte, Hon’ble Parliamentary Secretary (Hortl & SC), Manipur; Pu TN Haokip, Hon’ble MLA; Pu Mangchinkhup, EM, CCPur ADC; Special Guests in Pu Ngamrothang, Chairman, NC Hills AC, Halflong, Assam; Pu Khawvelthang, MAC, NC Hills AC, Assam; Dr Rochunga Pudaite, Founder Bibles for the World hai an thang a, Platinum Jubilee Grand Finale hi Hnam sunga thuoitu tum han an uop bawk.

Hi huna Chief Minister Pu O.Ibobi Singh in thuhrilna a nei huna , Saikawt TD Block chu Sub-Divisional level-a dawmsang ning a ta, Divisional Office chu Saikawt-ah innghat a tih. Ngurte khuo in School le Health Center tuchena an la neinawna thua chun, bieltu MLA le concern minister hail eh inbierawna, Ngurte khuoa School le Health Centre indin dan ding ngaituo a ni ding thu a hril. Kawr thar khin Parbung le Perzawl, Tipaimukh Sub-Division le Thanlon A/C hnuoia Sawrkar Building le Office hai hawngna aum ding thu Pu O.Ibobi Singh chun hrilin chu huna Student thuoitu, hnam sunga thuoitu hai popo uopa thang seng dingin a fiel bawk. Pu O.Ibobi Singh chun HSA thangpuina dingin cheng nuoikhat(Rs 1 lakh) a pek bawk. Hi huna hin Pu Phungzathang Tonsing, Dr Amo le Pu TN.Haokip hai khawmin thuhrilna an nei a. Pu Phungzathang Tonsing chun Development fund hai indik taka hmang a pawimaw thu a hril a. Hmar hai hi ei ni laia Kristien hmasa an ni leiin in thaw suol chun in hnungzuitu hai hin kan hung thaw suol ve thei a nih tia hrilin Platinum Jubilee hin hnam sunga inthuruolna thalem a hung intlun ngei a beisei thu a hril. Dr Amo chun Pherzawl ADC hawng a ni ding thu le chu huna thang dinga inpuocha a ni thu, buoina dang a um naw chun Christmas hmain Vangai area sunga electric meivar pek hman thum a ni thu a hril bawk.

Platinum Jubilee hmangna huna hin Jubilee dar vuokna le Jubilee lungdaw hawngna hai nei a ni a, lungdaw hawngna hai nei a ni a, lungdaw hi khuollien Pu O.Ibobi Singh in a hawng. Guest Artiste in Platinum Star Top-5 hai bakah Lalsanglien Zote, Grace Famhoite le Alvina Ramnunmawi (Platinum Little Star) hai thangin hla mawi tak tak hai sakin mipui an inawi.

HSA indin tana inthawk vawisun chena President le General Secretary hai chawimawina inhlan an ni bakah HSA Platinum Star Hunt 2014 huoihawta um final result puong ani a, Christina Shakum chu Platinum Star 2014 a puong a nih. Miss Joslyn Infimate chu a pahnina niin Margy Lalremruot chu pathumna a nih. Choir Competition-a chun Saidan Unit in pakhatna an lak a, Rengkai Unit a pahnina le Sinlung Jt Hqrts han pathumna an lak. Cultural Competition-a chun Rengkai Unit, Muolvaiphei Unit le Kolasib Unit han pakhatna, pahnina le pathumna an lak. Zan huna Ngurte khuoah Concert neia Platinum Jubilee hi sunzawm a nih.