Musical Concert- Thingchom Project le Kanghling Vol- 2 Tlangzarna nei

-LRS Puruolte|Photo: HT Image

CCPur: Dec. 29, 2014 Zatieng dar 3:13pm a inthawk khan Sinlung Royal Riders in a Phursuok Musical Concert- Thingchom Project chu Thingchom Playground ah Open Air a nei a nih. Hi hun a hin Upa L.T. Ngura chun Pathien kuomah Tawngtaina a hun hawngna le Pu Sanga Hmar Social Worker in a Produced, Kanghling Vol- 2 “Lawi Tar” ti Album, Audio CD (MP3) chu mitin inchawk thei dingin tlangzarna a nei a. Chu zo chun Kanghling Father ti a hrietlar le hi Album Tlangzara um Pu Lalthangkung F. Tusing chun “Thing Khawpui” ti hla (Thingchom Hlapui) in mipui an awi zawm nghal a. Mipui a sukhlim hle. 

Hi hun a hin Live Band- Sinlung Royal Riders le Hard Rockers hai baka Hmar Artiste in lar tak tak Kanghling Father, Joslyn Infimate, Fimchunghnung, Teresa Sellate, Lorinda Varte, Christina Shakum, Edward TC Hrangate, Lawmnakim Hrangate, Joshua L. Khawbung le a dang danghaiin rimawi leh hla’n mipui an in awi a. An chetzie le an thiemna an ril tawl bawk leiin mipui mit le na a tlai hle. Hi hun a hin Pu Calvin H. Social Worker chu Khuolliena thangin thilpek an hlan. 

Hi huna sum lamsuok a umhai hi Thingchom khuo a EFCI Biekin bawl meka um thangpuina dinga pek suok a ni ding thu Organiser hai chun an hril. Hi Biekin bawlna ding a Calendar 2015 siema um khawm zawr suok mek a ni a. Unau hnam tum tumhaiin Pathien Biekin bawlna ding a nih ti hrie a an lo hlutsakna thu ah Kohran thuoituhai chun lawmum an ti hle thu an hril. Hi Musical Concert Ticket khawm hi Manipur puotienga Mizoram le Assam a hai chen zawr a fe hle a. Hi le inzawma mani theina inroloa Sum-le-paia thangpuituhai, Fak le dawn buotsai a um dawrtuhai, mani theina chi tum tum thawlawmtuhai po po chunga Organiserhai chun lawmthu an hril bawk. Hi huna Album Tlangzara um hi Cheng 50/- a inthawka a chungtienga ngam zat zat a inchawk thei le hla 10 lai a um a. A Music Video chu kum thar, hun sawtnawte ah zofel beisei a nih.