Responsive Ad Slot

Mizoram Minister hlui nuhmei nunrawng taka that a nih

Thursday, December 18, 2014

/ Posted by VIRTHLI HMAR
Source: Henry L Khawzawl
AIZAWL, 18th Dec. 2014: Pi Zokhumi (83) W/o Pu. John Lalsangzuala (L), Mizoram Finance Minister hlui chu vawituk dar 9:30 khan an chengna in Mission Veng, Aizawl ah thisa a hmu a ni a. A ring vawitieng pangah hmangruo (chemte) ngeitak hmanga ât/phirthler ni a hmu a nih.

Pi Zokhumi thina le inzawmin vawisun dar 2 pm khan Aizawl SP Pu. C.Laldina chun press briefing neiin Minister nuhmei (hmeithai) chu nunrawng taka that ni dinga ring a ni a, a zalna pindan (bedroom) ah zingkar dar 9:30 vel khan thisa a hmu a nih. “An lang dan chun Pi. Zokhumi imu (in) lai hin a pindan ah hmelhrietlo lutin hriemhrei ngeitak hmangin a ringah a ât ni ngei dingin an langa. Misuol hin inruk ding zawngin Pi. Zokhumi almirah chabi hawngin a dap a, pawisa fai Rs. 64,000 vel a lak ni a hriet a nih”, Aizawl SP chun a tih.

Hi thil hi hriet a ni phing leh, bieltu Police Officer-in-Charge le Police Officer danghai a hmun an tlung nghal a, thilsuina dinga thaw ding pawimaw hai thaw nghal a ni bawk.Police le Forensic tienga mithiemhai in a hmun endik nghalin fingerprint khawm lak a ni a. A thina san tak hi autopsy result a suok hunah hriet thei a ni a ring thu Aizawl SP chun a hril.


Aizawl SP chun tuolthattu suisuok ding hin police han theitawp an insuo ding thu hrilin Special Investigation Team (SIT) khawm indin a ni ding thu a hrila. Hieng anga pawitawklo nunrawngtaka thata la rawk nawk peitu hi suisuoka man a ni ngei theina dingin mipui hai thangpuina a ngen bawk a nih.
Aizawl SP Laldina chun mi tuelkhawm misuol suina kawnga police thangpui thei ding thu (information) an nei chun an mimal fe in amanih phone-ah a hnuoia mi hai hi inhriettir vat dingin a ngen-
1. C. Laldina, IPS, SP Aizawl, Aizawl District- Tel.No-9436146592,
2. Rex Zarzoliana Vanchhawng, MPS, Addl SP Aizawl - 9436154085
3. F. Lalbiakzauva, MPS, SDPO Aizawl South- 9862330565/9863561740


Thulakna dang hril danin Pi. Zokhumi sungkuohai chun ama thattu hi an umpui Siama ni dinga an ring thu an hrila. Siama hin a hma khawm khan an sum a lo inruk pek hlak thu an hril bawk. Siama hi tuhin a umna chin hriet a la ni nawh.


Pi. Zokhumi hi mifeltak le ringumtak el mi pawi khawm hril ngailo a nia, Presbyterian kohran Nuhmei pawl thuoitu khawm lo nita hlak a nih.
Don't Miss
© all rights reserved
made with by Simon L Infimate