Zou Defence Volunteer (ZDV) a kum 17-na Tangpijol ah ursun taka inser

-LRS Puruolte | Photograph: Alan Famhoite & Joy Ngaihte

CCPur: Oct. 11, 2014 zing dar 11:00am a inthawka hunser thupui taka hmangin, umnikhamin ZDV in an pawl an indin a inthawka a kum 17 Tling Lawmna chu ursun takin Tangpijol, Singat Sub-Division, CCpur hmun ah hmang a nih. Hi hun a hin UPF hnuoia um pawl hran hran a thuoitu le aiaw hai, hnam sunga thuoitu tum tum hieng ZMA, UZO, ZSP, STC le dang dang hai baka Social Worker haiin an uop a. Thuhrilna hun an hmang tawl. Hun karlak a hai hlasak thiem tak tak haia inthawk hla ngaithlak a ni a. ZDV member ram le hnam tadinga an hringna lo inhlan a, fam lo chang tah hai inzanain le hrietzingna’n Minute 1 (Khat) sung totawk a ngirin hun hmang a nih. Hi hunser hmangna hun a hin Retd. Rev. Nengzatun, Zou Presbyterian Church Synod (ZPCS) chun Pathien thu a infuina le UPF hnuoia thang hai chu an aiawhai mipui hmaa ko suok a inngir tirin malsawmna tawngtai pekna hun a nei a. ZDV hi Pu Thangkhanlal President nina hnuoia kum 1997 kum a indin kha a lo nih. Tukum hi a kum 17-na a nih. Zomi Mothers’ Association (ZMA) hai chun hnam pasaltha hai chu inzana le chawimawinain hi hun a thang ZDV Thuoitu le hotu, UPF Thuoitu, UPF member, Pawl aiaw a thanghai chu Par patsum a siem an  luhaia an intawn tir baka, Zou hnam Puon an insiltir tawl.

Hi hun a Khuollien ding a fiel, Pu Thanglianpau President, ZRO chu taksa hrisel nawna leiin hi hun a hin a thang thei naw a. Ama aiawin Pu Keneth Muana Secretary, Ministry of Info., & Public Relation, ZRO/ZRA in hun a hmang a. Hi huna thuhrilna a nei hun ah Mani hmasielna thanglovin, Zogam a parvul theina dingin mipui fekhawmhai thangtlang dingin a fiel. A hun a hmangzo hin hi hun a hlasaktu (Artistes’) mi 9 hai le Fiemthu thaw thiem mi 1 kuom ah lawmthu hrilnain thilpek an hlan. HPC-D aiawin Pu Sanga Hmar Social Worker le India sawrkar le UPF inbiekna le SoO a JMG Member chun hi hun hi a uop ve a. Thuhrilna a nei hun a chun, ZDV in Kum 17 a tling lawmna hunser hmang dinga hung khawm mipuihai chu HPC-D hmingin chibai bukna a nei a. ZDV hi mipui Support-na leia hieng chen dam hi a nih ti a hrilin, mipui chungah lawmthu a hril. Pu Kamkhanpau President, ZDV chun hun sawtnawte a ei thiltum chu ei hmu vat ding a ni a, lunghnuol nawng ei tiu, tiin mipui fe khawmhai lai a hril.

Gen. Secretary, UKLF chun, Inthlungkhawmna Pawl sungtieng ah iengkhawm inremnawna a um naw a. A puotieng inremnaw angin ei inlanga, Sawrkar inza thei dinga ei um a pawimaw zie hai a hril. Eini chu ei tawng ei inhrietpaw a, Naga hai chu an ni nawh. Silai chawia Political Movement Inthuruol taka kalchawi ei pawimaw, UPF-KNO chu inrem takin an um a, an inchibai tuo hlak a nih. UPF hin Full fledge State, Independent khawm a ngen naw a. State within State a ngen a ni thuhai hrilin, Mipui Movement a pawi zie a hril ruolin, India Constitution hnuoiah ei thil ngen chu chun ei hmu thei ding a nih ti hai a hril. Pu Calvin H. Secretary, External Affairs, ZRO/ZRA chun, Communication Gap um talovin America khawm Tangpijol a’nthawk ei biek thei tah a. Thlangtieng-saktieng ti um lova, UPF le KNO khawm inbiektuo hi a pawimaw zie hai hrilin, inthe thei an umnaw zie le pumkhat a ngir tlat ding an nizie hai a hril.

Hi ni ropui tak hin India Sawrkar kuom ah umzie inthuk tak el thu hril a nei a, hi hun a hin UGs hai thaw rawp hlak angin hi an day lawmna hunser a hin Uniform hak le Silai chawi pakhat khawm hmu ding an um der nawh. Chuchu thil mak a ni naw a, chu thil chun a suklang chieng em em el chu ZDV le SoO a thanghaiin inrem taka sawrkar leh um le an thil ngen hai chingfel vat an dit ta tak zet zie tarlangtu pakhat chu a nih. Chuleiin, India Sawrkarin an thil ngen hi a hung ngaiven a, Inkap chawl a puong hun suksei ringawt nilova an hmatienga inbiekna puitling tak a hungum thei ngeina dinga hma a hung lak vat hi thil awm le makmaw chu a ni tah a nih. Hi hun a hin Bawng 6 le Vawk 2 lai thatin zantieng hun ah khawsung mipui hai le fekhawmhaiin ruoi inhniktakin an kiltlang a nih.