CCPur, September 10, 2014 (HT): Churachandpur-Tipaimukh Road, NH-2 (NH-150 ni hlak) kms. 223 lai Parbung khaw tlung hma kms. 2 lai Lamlien mimin nasa taka a kei leiin bufai le nitin mamaw phurtu motor hai an intlanpaw thei nawh.
Hi lei hin Tipaimukh biel mipui haiin harsatna nasa tak an tuo a. Lampui mimin a kei chimna hmun siem ṭhat dan ding ngaituoin bieltu MLA Dr Chaltonlien Amo, Chairman Hill Areas Committee (HAC) ni bawk inrawinain EE/PWD; AE le SO, BRTF ṭhuoituhai bakah Tipaimukh Village Authority Union leaders le Party leaders hai chu September 4, 2014 khan a hmuna fein thil umdan an zu enfel a. Hi lai lampui helna (diversion) siem dan ding an ngaituo a, Sept. 6, 2014 khan an hung kir nawk tah.
BRTF chun hi lai lampui helna ding (diversion road) survey an thaw nghal a, kar khat hnunga report pe lut hman ding le EE/PWD khawma Estimate siem nghala, an rang thei ang taka pelut dingin MLA chun a hril. Dr Amo chun, NH-2 hi BRO (BRTF) hai chun National Highway Authority hai thu naw chun lam thar siem theina thuneina an neinaw leiin BRTF le PWD-hai report nghak lova Manipur PWD Minister le Chief Minister remtina laa, sin thaw ṭan nghal a ṭul thu hrilin, hma a lak ṭan nghal ding thu a hril tiin ei thu dawngna chun a hril.
