Workshop on Drug Abuse & HIV/AIDS
CCPUR: Diocesan Social Service (DSS), CCPur huoihawtnain zani 11:00AM khan Synod Hall, IB Road, CCPurah ‘District Level Workshop on Drug Abuse and HIV/AIDS” nei a nih. First session-ah Dr F. Thienkhogin, DACO, CCPur chun CCPur district-a HIV/AIDS ngirhmun le DAPCU activities hai a hril a, SHALOM enkawlna hnuoia um Lailam Veng-a Community Support Centre chu People living with HIV/AIDS hai ta dinga drop-incentre-a hmang a ni thu a hril. Second session-ah Ms N. Mary Master Trainer HBC a inthawk Testimony/experience sharing ngaithlak a nih. T. Lalboi, District Coordinator, DSS/CBDP, CCPur khawmin thuhrilna a nei a. Ms Margret, Nurse-cumCounsellor, DSS/CBDAP, CCPur in vote of thanks a hril zovin Rev. Khamlianlal ZCBC in ṭawngṭainain hun a khar.
Saikawt-ah Awareness programme
CCPUR: HYA, HWA le HSA Saikawt Unit-hai ṭhangruola huoihawtnain vawisun 10:30AM a inthawk hin Saikawt khuoah Awareness programme on Cyber Crime and Human Trafficking nei ning a tih. Resource person in Mr Emmanuel, MPS, SDPO, CCPur le Mr Joseph Joute, Journalist hai ṭhang an tih.
MHJU Election Ukhrul-ah
CCPUR: Manipur Hill Journalists Union (MHJU) kum 2014-2017 inkar sunga ṭhuoitu dinghai thlangna September 23, 2014 khin Ukhrul-ah nei ning a tih. Hi lei hin MHJU hnuoia nitin Chanchinbu office-hai chu Sept. 22 & 23, 2014 haiah khar ning a ta, September 24, 2014 in hawng nawk le September 25, 2014 in MHJU hnuoia tuolsung chanchinbu hai an hung suok nawk chau ding a nih.
Rengkai le Saidan in final an khel ding
CCPUR: HSA CCPur Jt. Hqrts huoihawtnaa Platinum Football Tournament, fe meka zanikhan Rengkai-A le Muolbem han semifinal an inkhel a, Rengkai ‘A’ chun Muolbem chu 3-0 in an hne leiin final an kai. Final lo kai ta sa Saidan le Rengkai chun Final inkhel an tih. Final chu vawisun 2PM hin Rengkai khelmuol-ah inkhel ning a tih. Hi huna hin tuta hmaa Essay Writing Competition neia um lawmman semna um bawk a tih.
Solo audition 1 round vawisun
CCPUR: ICI 54th K|P Annual Conference-cum-PMS Music Fest-2014 First Round (with Acoustic Guiter) chu vawisun (Sept. 20, 2014) 10:30AM hin Hmarveng ICI Church-ah nei ning a tih. Second Round chu Oct. 4, 2014 a nei ning a tih.
Platinum Star Hunt 2nd Audition
CCPUR: HSA Gen. Hqrts. kum 75 tling Platinum Jubilee lawmna fe mek le inzawma HSA CCPur Jt. Hqrts huoihawtnaa Platinum Star Hunt second Audition round chu vawisun 1:00PM hin H.L. Daka Memorial Hall, Rengkai hmuna nei nawk ning a tih. Hi Audition-a ṭhang ding hi chun vawisun 12:30PM chen hin inzieklut thei la ning a tih.
ZYA meeting
CCPUR: Vawisun 1:30PM hin ZYA Central Executive meeting ZC Office, Nehru Marg-ah um a tih. Hi huna hin cabinet activities le Social networking chungthu hriltlang an tih.
China mi i ni? tiin an dawn
NEW DELHI: China President Xi Jinping nuhmei, Peng Liyuan chun Sept. 18, 2014 ni khan Tagore International School- a va sir a, studenthai chu India hnam incheina silfenin an inthuom a, Peng Liyuan chu China ṭawng “Ni Hao” (How are you?) tiin an lo hmuok a, NE students ṭhenkhat a hang hmu chun China mi a sawn a, NE mihai laia Manipur mi Kurta hak chu a va pan hnai a, “Ni Shi Zhongguo ren” (Are you Chinese?) tiin an dawn a, Manipur mi K. Albert Ginsangmuan (12), Class VII inchuklai chun, inringzo tak le thiem takin China ṭawngin, “Bu Woh Shi Indu ren” (No, I am Indian) tiin a dawn thei bawk si chu mak a ti hle. Albert le a ruolhai hin China language course an lak tawl a nih.
Scotland Independence hnawl
EDINBURG: Zani hmasa a Scotland Independence Refrendum a vote lakna result puonglang a ni ta a, Scotland ram mipuihai chun Scotland Independence-a a um ding chu ṭha ti lovin an hnawl. Vote laknaah Scotland Independence dit lo zawnga vote pe 55 percent an ni a, Scotland Independence-in um raw seh ti dit zawnga vote pe 45 percent an nih. Scotland chu Englang/United Kingdom leh rambung pakhatin an la um pei ding nih.
DTC –a Intensive training vawisun zo ding
CCPUR: September 18, 2014 a inthawka, District Training Centre (DTC) Tuibuong-a State Resource Team, RD & PR, Govt. of Manipur huoihawtnaa Intensive Participatory Planning Exercise under MGNREGS training neia um chu vawisun hin zo ni tang a tih. Training sung hin resource person in C. Kamei, State Level Monitor; Dr A. Somarendro, Lecturer, SIRD le D. Gangte, PMRDF hai an ṭhang. Hi training-a ṭhang hai chu SDOs, BDOs, Block-a SO hai bakah PO, APO, DRDA hnuoia NREGS dealing hai, Tipaimukh, Thanlon, Singngat, Samulamlan, Tuibuong Block haia Chief/Secretary hai, IWMP-a Water Shed Devpt. Team an nih. Zanikhan Kingkin village ah practical an nei.
DD Chanchin thar tiemtuin “Eleven Jinping” tiin
NEW DELHI: Doordarshan (TV) a Chanchinthar tiemtu (Casual Newsreader) chun a hriet naw leia suksuolin zan sawt hnunga chanchin thar a tiemnaah, China President hming chu “Eleven Jinping” tiin a puong hlau el a, hi chanchinthar tiemtu chu inchawltir/ban nghal a nih. China President hming chu, ‘Xi Jinping’ a ni a, Chanchinthar tiemtu hin Roman hawrawp (letter) ‘Xi’ chu sawmpakhat (11) angin an let tlat leia hi thil hrilhai le inzakum thlak takel hi a tlung a nih. A tlangpuiin zan sawt hnunga chanchinthar puongtuhai chu Casual announcer/newsreader an ni hlak. Senior le regular newsreaderhai chu zan sawt hnungah sin thaw an pei ta ngai naw leia junior han an tiem hlak a nih.
TKS Vice President hlui a thisain
IMPHAL: Zani zingkar khan Pheiyol English School bul, Pheiyol village, Senapati District ah Tangkhul Katamnao Saklong (TKS) Vice President hlui Mr Ngamreishang (36) s/o Trusun of Alangh village under Phungyar PS chu a thisaa hmu nih. A mit tuom, a kut le ke hai pheihnungkira khit nih. Ngamreishang hi Sept. 17, 2014 zantienga Tangkhul Avenue a inthawka ṭhuoihmang a nih.
Pastor Jacob John Court hmaah
DIMAPUR: Jaipur Child Trafficking Case-a a bulpui taka intum Pastor Jacob John chu September 18, 2014 ni khan Dimapur Judicial Court hmaah inlangtir a nih. Hrietpuitu (witnesses) 11 hai laia mi 5 hai thu hril le Pastor Jacob John thu hril hai Court in a enfel a, hrietpuitu 11 hai thu ngaitlak kim vawng a ni pha Pastor Jacob John hrem dan ding puonglang ni chau dinga hril a nih.
Nuhmei suolluitu vuok hlum
IMPHAL: Melory Village, Phek District, Nagaland a Christian Mission School-a inchuklai, nuhmei tleirawl kum 11 mi suollui a ni a. Nuhmei suolluitu hi Phek A/C MLA, Kuzholuzo Nienu ina sinthaw Thoiba (36), Carpenter, a ni ringhla leiin Sept. 18, 2014 khan Jessami Village a cheng han an khawsungah hmuin an man a, Melory Women Society kuta an pek a, Thoiba hi Melory local ground-ah hruiin a ringah thlungin an sie a, Melory khaw mi han hmawl le thirtluonin an vuok a, a umna hmuna an vuok hlum a, a ruong hi lak lovin a la um.
AIPM le Pre-Dental Entrance Exam
NEW DELHI: All India Pre-Medical le Pre-Dental Entrance Examination, 2015-16 chu May 3, 2015 khin India ram le rambung dang dang haia nei ning a ta, syllabus le a pattern chu kum 2014 a hmang kha la hmang ning a tih tiin Central Board of Secondary Education (CBSE), New Delhi thusuok chun a hril.
Ukhrul-a bomb sukpuoktu mi 3 man
UKHRUL: September 17, 2014 zantieng dar 5:30 vela Viewland, Ukhrul a bomb sukpuoktuhai laia mi 3 an man ta niin NSCN(IM) thusuok chun a hril. Hi bomb puoka hin mi 2 an thi a, midang 2 an hliem a nih. Manipur CM O.Ibobi Singh chun mithi sunghai kuomah zangnadawmna Rs. 5,00,000 ve ve, hliem inrik kuomah ṭhangpuina Rs. 1,00,000 le hliem inriklo kuomah ṭhangpuina Rs. 20,000 pek ni dingin a puong.
Hon’ble Governor hmang ding
IMPHAL: Manipur Acting Governor, Dr Krishant Kant Paul dit dan angin, Manipur Governor chu “His Excellency” tia ko lovin, “Hon’ble Governor” tia ko le ramdang palaihai le hun hmangkhawm huna chun “His Excellency” hmang ning a tih tiin Dy. Secretary to the Governor of Manipur chun zanikhan circular an suo.
Shaktiman eksidenah handyman a thi
IMPHAL: Sept. 18, 2014, 2PM vel khan Chandel District a Anal Khullen ah Shaktiman Truck a eksiden a, a Driver, Nimai of Komlakhong Ereima, tuta Wapokpi, Sugnu cheng chu damin a suokdawk a, a handyman, Moirangthem Naba (40) of Tangjeng Leikai a hliemna tuorzo lovin a thi a, a ruong RIMS Morgue-ah sie a nih.
CM in CCPur, Chandel le Ukhrul District hai kuomah Ambulance Vans 4 an hlan
IMPHAL: Zani chawhnung tieng khan Chief Minister’s Bungalow huopsungah Manipur tlangram kilkhawr haia hmang ding Mobile Health Ambulance Vans 4 inhlanna hunser hmang a ni a, Chief Minister O.Ibobi Singh in Mobile Health Ambulance Vans 4, Deputy Commissioner, Churachandpur le Deputy Commissioner, Ukhrul hai kuoma Ambulance pkhat ve ve le Deputy Commissioner, Chandel kuomah Advanced Life Suport Ambulnce Van pahni an hlan a, a hnungin CM bawk hin an district Headquarters seng pan dingin a vai liem. Hi hunsera hin Pu P.C. Lawmkunga, IAS, Chief Secretary, Mnipur le Barun Mitra, IAS, Principal Secretary (Planning) hai khawm an ṭhang. Hieng Mobile Health Ambulance Vans 4 hai hi Border Areas Development Programme (BADP) Fund hmanga Rs. 70 lakh senga inchawk an nih. A bik takin hieng Ambulance-hai hi tlangram kilkhawr zuola cheng miretheihai hmang ṭangkai dinga ti a ni angin tlangram kilkhawra cheng mi rimsi le rethei han an sawr ṭangkai ngei ka beisei tiin CM O.Ibobi Singh in hi hunsera a thuhrilna huna a hril. Chun, zani zantieng 2PM khan Chief Minister’s Secretariat, Imphal-ah CM O.Ibobi Singh inrawinain Manipur sawrkarin Manipur sawrkar, All Political Parties on ILPS le Joint Committee on ILPS han Parliamentary Tripartite meeting hmasa tak an nei. Meeting a fe tluong a, Sept. 22, 2014, 2PM a Manipur Assembly Secretariat Committee Hall-a meeting nei nawk dingin an rel. JCILPS tieng mi 16, an Convenor, Ibotombi Khuman rawiin hi meeting a hin an ṭhang a, sawrkar tiengpangh CM O.Ibobi Singh le Dy. CM Gaikhangam hai an ṭhang a, All Political parties tienga inthawk members 12, an Convenor R.K. Anand, MLA inrawinain an ṭhang. H. Ibotombi Khuman chun Y. Victoria Devi, SP (Traffic) JCILPS Volunteershai chunga a nunrawngna a hrillang. Swrkarin hi thu hi a ngaimaw a, a chungthu suizui ning a ta, dan anga hrem theina a um a ni chun action lak ngei ning a tih tiin Gaikhangam in thu a tiem.
