Responsive Ad Slot

Hmasawnna Thar | August 3, 2014

Monday, August 4, 2014

/ Published by VIRTHLI
HEADLINES
Saikawt MDC hmalaknain Canal siemṭhatna sin an thaw
CCPUR: Zanikhan Saikawt MDC Pu Hrila inrawinain Eastern Khuga Farmers Association hnuoia um khuo 16 hai chun social work neiin canal-a tui luong thei lo siemṭhatna sin an thaw. Canal siemṭhatnaa hin JCB 1 le Truck pahni hmang a ni a. JCB in canal sung ft. 1 a inthuk huot khur a ni bakah Daizang khuo thlanga protection wall le JCB hmangin canal an siem ṭha bawk. Khuga Right Side Canal Kms. 20 huomsunga Eastern Khuga Farmers Association hnuoia khuo 16 haia mihriem 90% hai chu lo sinthawa fakzawng an nih.

Khuga Right Side Canal tui fa Leilet han tui ṭha taka an hmu theina dinga canal siemnaa hin bieltu MDC Pu Hrila chun Rs. 4 lakh vel a seng phak ta niin a hril a, sawrkar tienga inthawk ṭhangpuina sum a hranpa taka hmu a neinaw thu a hril. Hienganga bieltu MDC in sum tam tak a seng ta lei hin kar hmasa lai khan Eastern Khuga Farmers Association chun thei ang tawk tawk thawkhawmin canal siemnaa hin MDC pa an lo ṭhangpui ta bawk. Khuga Right Side Canal tui fa Eastern Khuga Farmers Association han tuilo/leilet an nei hi Pari 1500 chuong niin ei thu dawngna chun a hril. Eastern Khuga Farmers Association chun tukum sung hin Harvesting Festival khawm hmang an tum a nih. Saikawt MDC Pu Hrila chun JCB le Truck 2 hai ruoina bakah hin canal siemnaa hmang ding Lung, Leingawi le Cement hai khawm a tum vawng a nih.

September 27 ah PM Narendra Modi in UN General Assembly-ah thu a hril ding
UNITED NATIONS: September 24, 2014 a inthawk October 1, 2014 inkar sung khin United Nations (UN) General Assembly 69th Session nei ning a ta, India Prime Minister, Narendra Modi khawm UN General Assembly-a hin ṭhangin khawvel rambung tum tum 200 deuthaw ṭhuoituhai hmaah thu hril a tih. UN General Assembly le khawvel pumpui huopa Narendra Modi in thu a hrilna hmasa tak ding a la nih. UN General Assembly a hin Presidents, Prime Ministers, Lalnu/Lalpa (monarch) le Foreign Ministers han thu hril tawl an tih. Thaw dan pangngaiin (customary) Brazil ram huoituin UN General Assembly- ah thu hril hmasa tak a tih. Hi ni ma (24-9-2014) hin US President Barack Obama in thu hril a tih. India PM Narendra Modi chun September 27, 2014 zingkar session ah thu hril a ta, hi ni hin Bangladesh, China le Russia ram ṭhuoitu han thu hril an tih. Pakistan ram ṭhuoitu chun September 25, 2014 in General Assembly-a hin thu hril a tih. Narendra Modi hin US hung sir malam a ta, Washington khawpuia White House hmuna US President Barack Obama leh inbiekna nei an tih. Modi in hmai sana Barack Obama an biekpuina hmasa tak ding a nih. Modi hin PM a chel hnunga ramdang (foreign) an zinna hmasa tak chu Brazil a ni a, July thla khan BRICS Summit- ah ṭhang dingin Brazil an zin a, BRICS ṭhuoitu an hmupui tawl. Modi hin May thla khan PM a chel ṭan a, ni 2 sung cham dingin PM Modi chun vawisun hin New Delhi suoksanin Kathmandu pan a tih. Modi hin UN Secretary General Ban Ki-Moon khawm hung inhmupui a tih. May thlaa Modi in India PM a chel ṭan huna khawvel rambung tum tum ṭhuoitu, lawmpuina chibai hung buktuhai lai Ban-Ki-Moon hi a hmasa pawl tak a nih. Narendra Modi hi kum 2005 a Gujarat Chief Minister a ni lai khan, US rama an zinna ding visa chu US in a pek phal naw a, sienkhawm May, 2014 a Lok Sabha election a BJP an hung hrat filawr zak a, Modi in PM a hung chel char khan US chun an rama inzin dingin Modi chu a hung fiel nghal a nih. Kum 2002 a Gujarat Riots leia US in Modi hi visa a lo pek nuomnaw a nih.

Silai siemtu mi pahni AR han an man
CCPUR: Police a inthawk ei thu dawngnain a hril danin, August 1, 2014, 5:00PM vel khan 7th Assam Rifles han CCPur Police Station-a inthawk Kms. 20 (north) a hla Ballei khuoah dan lova ralthuom/silai siemna hmun an dap a. Silai siemtu mi pahni- Nehkholal Vaiphei (36) S/o Saikhogen Vaiphei of S. Kotlian le Lambenlian Vaiphei (26) s/o Saikap Vaiphei of S. Kotlian hai an man. Hieng mi pahni hai kuta inthawk hin 9mm Pistol 1, magazine 1 le a mu 6, 9mm empty case 1, Mobile Handset 1 le SIM Card 1 an man sa a, CCPur Police kutah peklut. CCPur Police chun zanikhan Chief Judicial Magistrate (CJM) hmaah an inlangtir a, CJM chun August 7, 2014 chen Police Custody-a um dingin an chungthu a rel phawt. CCPur Police chun hi thua hin FIR No. 82(8) 2014 CCP-PS U/S 25(A) A.Act an registered.

MDC ngir a tum
CCPUR: Mr Zamkholal Baite (32) s/o Jangkhongam Baite of Hengken Village chun, kum 2015 a MDC
Zamkholal Baite
election hung um dinga hin Sangaikot –a inthawk MDC ngir a tum thu zanita Hmarveng- a Hengken lalpa Ngullet ina Lal 10 hai an hmupui huna a hril. Education siem\hat le health tiengpang a ngaipawimaw ding thu a hril.

SDO Singat Office rukru han an rawk
CCPUR: SDO, Singngat Office chu rukru han an rawk a, office sunga Computer hmangruo CPU, UPS bakah Chair, Table, Almirah le Router hai an inrukhmang. Thil inruk hmanga um hi Rs. 60,000-Rs. 70,000/- vel manhu ni dinga hisap a nih. SDO Singngat Office rawk a ni thu hi Singngat Police-ah report a ni a, Singngat Police chun FIR No. 5 (8) 2014 SGT-PS U/S 447/454/380/34 IPC an registered a, suizuina an nei mek.

Zu, Gambling inkhel 7 le Zurui 2 man
CCPUR: Zani hmasa 4PM vel khan New Bazar Bus Parking area-ah SDPO, CCPur inrawinain Zu in hai an dap a, Rum bottle 7, Grape wine bottle 3, rakzu litres 15 an man bakah New Bazar Bus parking area-a Gambling inkhel mi 7 le Zurui 2 an man. SDPO, CCPur Emmanuel Fimate chun, Zurui le Gambling inkhel hai chu uoulau tak le naupang hmu hawia gambling inkhel le zu inrui a ṭhatnaw thu hai ṭha taka thu hrilin an suo nawk. Zu le Beer mana um hai chu zani 5PM khan an bunthlak vawng.


Jehovah Jire Camp
CCPUR: August 4-9, 2014 inkar sung khin Shan-Veng EFCI Biekin-ah JEHOVAH JIRE CAMP a sawng 5-na (5th Batch) um nawk a tih. Hi huna hin Rev. Lalnghaksang, AEAL, EFCI chu speaker in ṭhang a tih. Hi Camp-a lut ding hai chun Bible, thleng, puonthuo, thosilen, note book le pen hai chau chawi a ṭul. Kohran pawl bik um lovin a nuom taphawt lut thei ning a tih.

AIR, CCPur stn. Prog.
CCPUR: Vawisuna AIR, CCPur station-a Paite programme a chun BYF, Pearsonmun EBCC in hla sak an tih. Hmar programme a chun L.B. Sungte & party han hla sak an tih. Thadou programme a chun Nenglhing Baite in hla sak a tih. August 4, 2014 a Paite programme a chun B. Muan Ngaihte le K. Lal John & partner han hla sak an tih. Hmar programme a chun hla thlang ngaithlak thei ning a ta, Thadou prog. ah Glena Thangpu Touthang in hla sak a tih.

STATE NEWS
Mani le mani inthat tum sansuok
IMPHAL: Zanikhan nupui pakhat, naute thla 9 mi pai lai, ama le ama inthat tum chu an sansuok niin General Secretary, Social Action Organisation Laishram Mandhir, Heirok, Thoubal District chun zanikhan Manipur Press Club, Imphal-ah a hril. Naupai lai, mani le mani inthat tum hi Apabi Devi (27) d/o Naba of Heirok Part-I niin a hril. Apabi Devi hi a pasal Thokchom Naorem, a tarpi le a tarpu han an sukrimsi hle leia inthat tum niin hi Organisation General Secretary chun a hril.

ST-hai ta dingin 31% seat huol
IMPHAL: Manipur University admission thawnaah Central Educational Institutions (Reservation in Admission) Amendment Act, 2012 hmang a ni chun Scheduled Tribe hai ta dingin seats 31% huol pek an ni ding a nih. Amiruokchu, hi Act hi hmang lo dingin Joint Student Co- Ordinating Committee chun dodal le dang tlat an tum thu an Convenor, Premananda Thangjam chun a hril.

L.Sarita le L. Devendra han Silver
IMPHAL: Glasgow Commonwealth Games fe meka chun Boxer L. Devendro (49kg. Men’s light flyw4eight) final-ah a khingpui Nothern Ireland mi Paddy Barnes chu a hne zo tanaw a, Silver Medal a dawng. L. Sarita Devi (57-60kg Women’s Lightweight) chun final-ah a khingpui Australia mi S. Watts chu a hnenaw leiin Silver Medal a dawng bawk.

CPI in Manipur-ah ILPS hmang dingin
IMPHAL: Dr M. Nara Singh, State Secretary, CPI, Manipur State le CPI ṭhuoitu hlun D. Raja hai chun zanikhan New Delhi-ah Union Home Minister, Rajnath Singh an inhmupui a, Memorandum an pek. An Memorandum a chun Manipur-ah Inner Line Permit System (ILPS) hmang sunzawm nawk dinga ngenna an zieklang bakah hi thil ngenna hi sukpuitling a ninaw chun Manipur-ah buoina a suksuok el thei ding a nih tiin an zieklang.

ZUF cadres 4 kap hlum hai hming
IMPHAL: July 31, 2014 nia Tamenglong District Tousem Sub-Division sunga Nungkao village-ah 13 Assam Rifles hai le inkaptuona huna Zeliangrong United Front (ZUF) cadre 4 kap hluma um hai hming chu zanikhan Army han official in an puonglang chau. PRO Defence Wing in zanita Imphal-a thusuok a siem dungzuia ZUF cadre kap hluma um hai chu ‘Captain’ Guangloungam Kamei of Reangjang Village, CCPur Dist; ‘Sergeant’ Peter Panmei of Phalong Village, Tamenglong district; ‘Sergeant’ Thuankulung of Nungkao Village, Tamenglong District le ‘Lance Corporal’ Jaojiankhuan of Karulong village, Cachar Dist, Assam hai an nih.

NATIONAL NEWS
NLFT ringhla mi 2 Pawisa lem leh man AGARTALA: Zanikhan Tripura-ah National Liberation Front of Tripura (NLFT) cadre ni dinga ringhla pahni Jyotish Debbarma le Indrajoy Reang hai chu Assam Rifles han an man niin Milan Datta, Police Inspector chun a hril. Hieng mi pahni mana um hai kuta inthawk Mobile Handset 2, India pawisa lem Rs. 10,000 note , NLFT document hai an mansa bawk. Jyotish Debbarma hi Tripura Police-a Constable, political leader pakhat in vengtu-a um lai mek a nih tiin ei thu dawngna chun a hril.

Alliance Air in a service sunzawm
SHILLONG: August 1, 2014 a inthawk khan Alliance Air chun Kolkata- Shillong, Meghalaya inkarah a service a sunzawm nawk tah. June 1, 2014 a inthawka kha NEC in a sum pek ding a peknaw leia a service hi a lo chawlsan a nih. Alliance Air hi Tezpur, Assam le Lilabari, Assam haia khawm a service a, August 10, 2014 a inthawk khin Silchar-Kolkata inkara khawm service ṭan a tih. Haptakar khatah Kolkata-Shillong inkarah ni 6, Kolkata-Guwahati-Tezpur inkarah vawi 3 le Kolkata- Guwahati-Lilabari inkarah ni 4 pei a service hlak.

UP in vuongna le Helicopter an chawk ding
LUCKNOW: Uttar Pradesh a Akhilesh Yadav Chief Minister nina hnuoia Samajwadi Party (SP) sawrkar chun Rs. 45 crore man ve ve Vuongna pakhat le Helicopter pakhat inchawk dingin tender an suo. Vuongna le Helicopter hai hi VIP-hai hmang ding ti a nih. Tuhin UP sawrkar chun Helicopters 3 le Vuongna 2 neisa a nei. Tuta hma deu khan UP sawrkar chun a vuongna hlui, kum 1995 vela an chawk chu Rs. 70 crore in a zawr a, chu ai dinga a thar inchawk a tum a nih.

PM Nepal-ah an zin ding
NEW DELHI: Prime Minister Narendra Modi chu Nepal a ni 2 sung cham dingin vawisun hin New Delhi suoksanin Kathmandu, Nepal pan a tih. Nepal rama a cham sungin, Nepal PM Sushil Koirala le mi pawimaw dang dang hai inhmupui a tih. Modi hi Nepal PM fielna anga Nepal a inzin ding a nih. Nepal rama India PM an zinna hin India le Nepal inlaichinna a siem ṭha zuol ding a nih tiin Nepal Foreign minister Mahendra Bahadur Pandey chun a hril.

Subrata Roy in ni 10 sung Conference Room
NEW DELHI: Zani hmasa khan Supreme Court chun, Sahara Chief Subrata Roy chu a bat a thung theina ding le regular bail a hmu theina dingin New York le London khawpui haia a Luxury Hotels 3 a zawr theina dingin Tihar Jail-a Conference Hall chu ni 10 sung, August 5, 2014 a inthawk a hmang a phal pek. Hi Conference Room a hin a Luxury Hotel inchaw nuomhai an dawrpui ding a nih. Court chun staff 3 secretaries 2 le technical staff a nei a remti pek bawk. A hotels 3 hai hi Rs. 10,000 crore manhu vel bek a ni ring a nih.

Pune mimkei-a thi mi 75 an tling tah
PUNE: Maharashtra state a Pune district-a Malin khuoa mimkei rapthlak tak a tlung leia mihriem thina tuok chu 75 zet an tling tah. National Disaster Response Force (NDRF) personnel 300 han mimkei tlungna hmuna hin sansuokna sin an la thaw zing a, zani khawm khan pilvung hnuoia mithiruong 5 an hmu belsa nawk. Ruo a sur zing leiin sansuokna le mithiruong zawngna sin a sukbahla pha.

Luman Rs. 20 lakh nei an pe 
HYDERABAD: CPI Maoists a Senior Dandakaranya Special Zonal Committee (DKSZC) member, Chambala Ravinder alias Kukkala Ravinder (44) le a nuhmei Devi hai chu August 1, 2014 ni khan Telangana Police kuta an inpe tiin Anuraq Sharma, DGP, Telangana chun a hril. Ravinder hi sawrkarin luman Rs. 20 lakh neia a lo puong ta a nih. Kum 1990 a kha Peoples War Group (PWG) zawm ṭan, an central Committee member-hai leh ditdan le ngaidan an kal leia inpe niin Sharma chun a hril.

Police constable kum 4 jail intang dingin
THANE: Police constable Anant Ganpat Dhake chu zanikhan Alibaug Court Special Judge, PR Bharad chun hmun hni haia thamna Rs. 5,000 ve ve a ngen leiin kum 4 sung rinum taka jail intang dingin thiemnaw an changtir. Constable Anant Ganpat Dhake hi Mangaon Police station-a posting a nih.

Factory a thilpuokah mi 65 an thi
BEIJING: Zani zingkar khan China rama Kunshan City sunga Metal Factory pakhatah thilpuokthei a puok a, Factory hi nasa taka a kang leiin mi 65 an thi a, mi 100 chuong an hliem. Hi thil tlung huna hin hi Factory a hin mi 200 velin sin an thaw niin Xinhua News Agency chun a hril.

EDITORIAL
Zu dawn mi le Zu dawn lo mi

Ei pi le puhai hun laia inthawk ta khan Zu hi ei nitin nun le khawsak phung (culture) leh an zawm ti inla ei hril suol talruo ring a um nawh. Kut ni, khuongchawi ni le sa lu lam nikhuo hai chu Zu ṭhang lovin seramu a thur thei nawh. A hun lai nana na chun Lal le upa han sumdeng Zu dawn hmasa dinga an thlang, tlangval tlawmngai le huoisen bikhai lem chu mipui mimir inza an kai takzet a nih. Tulaia minister, officer lienhai le fakzawngnaa hlawtling bikhai ei ngaisang nekin an ngaisangin an inza lem hiel awm ie. Khangang tak khan an nun le an khawsaknaah a ser laia an mei hiel nisienlakhawm a ngawlinvawi le khawtlang sukbuoi an um ngai mang nawh. A hun le a hmun an hrietthiem a, an hmang thiem a ni deu tak.

Tulaia Zohnathlak hai ruok hin chu Zu le damdawi inruithei (drugs) hai hin ei sungkuo chau ni lovin, khawtlang le ram a chawkbuoi ta a, a ngawlinvawi leiin sungkuo tam lem hai chu lungngaina le manganga inṭaptirtu a ni tah. Sungkuo tam tak drugs leiin an kawidar ta a, a ngawlinvawina hi a re naw chun a la hung kawidar pei ding a nih. inruithei ngawlinvawi leiin a hun hmain ṭhalai tam takin muol an mi lo liemsan ta a, an mi la liemsan pei ding a nih. Ei ram hi ṭapna ramah an chang ta a ni hi!

Tienlaia ei pi le puhai ang khan Zu hi hmang thiem inla chu hieng lawm lawm hin chu ṭhangtharhai hin ei sietpui ring a um nawh. A hun le a hmun hrie lo hiel khawpin ei dawn a, Zu ei dawn pha leh, ka zu dawn mi han mi hrie naw pal an tih ti ding hiel khawpin buoina siem le a hratpa tak insawnin insuolpui ding ei zawng a. Mani inah ei inlawi pha hme ei sawisel a, ei nuhmeihai ei inhrawk khum a, bur le bel ei deng dar a, insunga buoina ei siem hlak hi chu a puitling naw thlak a, thil inzakum takel a nih. Ei nuhmei le ei nauhai khawma hme inhnik, sa le Nga an du ve tho an nawm, chierna ding le lungsenna ding a um der nawh. Hme inhnik ei du chun inchawk a, ei nuhmeihai annawleh ei sunghai insuongtir el ding a nih. Pu L. Keivom in ‘ei ni lai Zu ei sukhmingsie taluo” a ti ku hi an dik a nih. Hi hi Zu hrilmawina a ni der nawh.

Zu le inruithei ngawlinvawi leia khawtlang, sungkuo le ei ram a buoi mup mup lai hin, sum dum kara nisa zung hung inlang (ngawlinvawi si loa an khat mawi tawka ruolhai le inpawlhlimna dinga dawn hlak) khawm Zohnathlakhai lai hin tam tak an um bawk. Hienghai hi (intelligence/self control taka zu dawn hlak) hai hi, Zuin an nun, sungkuo le khawtlang a sukbuoi ve naw a, pi le puhai hun laia kut nia an dawn ang khan, bufak khawm nikhuoa dam le hun remchangah inpawl hlimnain an hmang hlak. Zohnathlakhai laia sawrkar sinthaw, officer le cer lo tamtak khawmin hieng hun le ni haia hin Zu an dawn hlak a, an nitin nun le sinthaw khawm a sukbuoiin a sukchai chuong nawh. Ṭhenkhat lem chu an sina tlawmngai, inrim le sin thiem lem an ni fur hlak.

Sietni le ṭhatni, zan lengkhawm khawvar, thlan cho, mithiruong zawng le thil dang dang haiah tlawmngai thei le a taima hai chu a dawn mihai an ni tlangpui. Chun, sawrkar thawktu, officer le cer lo, milien le milal hai lai khawm a dawn mi le mi lo hai chu inang lo takel an nih. A dawn nawhai nekin a dawn mihai biek an inhawiin nel an um lem a, mi ṭhangpui nuomna le lunginsietna khawm an nei lem el chau ni lvoin an hau zuol bik tiin research thawtu pakhat, a hming zieklang nuomlo chun a lekhabu zieknaah a zieklang tlat el. An dik thawkkhat ring a um.

Zu dawn ngai lo hai chun Zu dawn hlak mihai chu a tlangpuiin an hmusitin an ngainep hle hlak. Zu dawn hlak mihai chun Zu dawn der lo mihai hi chuong bek chun an ngaisang bik ngai nawh. Zu dawn ngai naw mihai chun Zu dawnhai hmusitin an dem rak rak hlak a, Zu dawn hlak mihai chu chuongang chu an ni ve nawh tiin a hril bawk. Zu dawn mi le Zu dawn lo
Don't Miss
© all rights reserved
made with by Simon L Infimate