Home Minister chun, "Tuta sawrkarah tum 6 lai misuol dawizep tak ha’n remna le muongna sukbuoi dingin sawrkar le mipui suktia bomb sukpuokin a ruk thei ang takin hma an lak a nih," a ti a. Ringhlana an neina a sawt tah thu hrilin hi hi sukchieng dingin Manipur chanchinbu pakhat ‘The Sangai Express’-ah tulai hnaia Mizorama bomb puok chu HPC(D) ha’n 'kan sukpuok a nih' ti’n an puong a nih ti’n R. Lalzirliana chun a hrila. “Local politics leia hi thil hi thlung a ni nawh” a tih. R. Lalzirliana chun "HPC(D)-in an sukpuok a nih ti an 'claim' hnung khan ngawr takin hma kan laka August ni 1, 2014 a bomb puok le inzawmin HD Lalhmangaiha, Asst. Secy Mizoram Hmar Welfare Committee (MHWC) le HD Lalrinpuia hai chu Mizoram Police ha’n manin hi hmalakna fepeiah Lalringthang hi man a lo ni ta a nih”, a tih.
Minister chun August ni 2 zan dar 11 khan Lalringthang umna hi an hrietsuok thu hrilin hi zan la la hin Vairengte panin police hai hi an fe nghal a. An man hnung hin police hai kuomah, ZS Zuala In bula bomb puok le August ni 22, 2014 zingkara Bungkawn Vengthar-a Pu. Hmingchungnunga, Chairman, SHDC in bawl mek bula police gypsy-a bomb-hai kha ama sukpuok ngei a ni thu a puong a nih ti Home Minister chun chanchinbumihai a hril.
Lalringthang hin HD Lalhmangaiha tirnain bomb hi a sukpuok ti police hmaah a puong a,HD Lalhmangaiha leh Lalringthanga hai hi HPC(D) hai in tukum April thla khan an lo ko ta bawka, chu result chu a ni an ring thu Police hai hin an hril.
SDHC Chairman Hmingchungnunga a chengna Bungkawn Vengthar anthawka veng neituhaiin thla 3 sunga an veng suoksana sawrkar quarters-a in umtir dinga an ti chu Home Minister chun Quarters-ah a um naw ding thu a hril.
Lalringthang hin ZS Zuala In-a bomb a sukpuok hi Kg 2 vela rik gelatin tlawn 15 vel a ni a hrila, a bomb kam a puak meu hin chu Salem venga, Aizawl-a an sunghai in bul a thlung hman nawk tah niin police-hai chun an hril.
Source: Henry L Khojol
