Responsive Ad Slot

Hmasawnna Thar | August 1, 2014

Friday, August 1, 2014

/ Published by VIRTHLI
HEADLINES
Independence Day hmang dan ding an rel
CCPUR: Zani 11:00AM khan Mr P.K. Jha, IAS, DC, CCPur inrawinain BRGF Resource Centre, DC Office-ah District Level Coordination Committee (DLCC) meeting nei a ni a, hi huna hin August 15, 2014 nia India Independence Day hmang dan ding chungthu an rel. Hi dungzui hin CCPur District- a Independence Day chu Public Ground, CCPur hmuna hmang ning a ta, Singngat, Thanlon, Henglep le Parbung Sub-Divisional Hqrts haia khawm Sub-Divisional level in Independence Day hi hmang ning a tih. EE/PWD chu ground siemṭhat dinga mawphurna pek a ni a. Parade-a ṭhang ding contingents hai chun August 11& 12, 2014, 7:00AM haiah parade rehearsal nei an ta, Parade Commander ding chu SP, CCPur ruot dinga dande a nih. DRDA in main gate, SSA in Lanva, District Council in Forest Gate, PWD & PMGSY in Tiddim Road Nehru Marg Junction, NRHM in Bungmual Forest Gate le NABARD in Police Station tuol haiah Gate siem an ta. Forest, Agri, Horti, Sericulture, PHED, IFCD, Vety. Departments, NYK, Fishery, DSWO & ICDS le CAF&PD han stalls(dawr siem an tih). DLCC Meeting chun department tum tum hai mawphurna a pek seng a. Red Blanket le Appreciation certificates semna um a ta, Public Leaders le DLOs han football exhibition match nei an ta, 7PM in Guest House, Hq. veng-ah Garden Party um a tih.. I-Day le inzawm hin August 13, 2014, 11AM in District Hospital-ah CMO hmalaknain Blood Donation camp um a tih.

NSCN(IM) dotu dingin Manipur CM in Union Home Minister kuomah CAPF Companies 15 a ngen
IMPHAL: Manipur Chief Minister, Pu O.Ibobi Singh chun Manipur State sunga che hlak NSCN(IM) dotu dingin Union Home Minister Rajnath Singh kuoma CRPF le BSF ṭhangsain Central Paramilitary Force (CAPF) Companies 15 hung pe dingin ziek ngeiin ngenna a siem. A ngenna lekha a hin, Manipur-a NSCN(IM) in buoina le harsatna nasa taka an siem thu le law & order suksetu an ni thu CM hin a zieklang sa.

Kum 1997 a inthawka India sawrkar le NSCN(IM) han Ceasefire Agreement an ziek chun Manipur State a huomsa nawh. NSCN(IM) cadres Manipur a um hai chun suol chi tum tum an thaw a, chuhai lai chun, thawluina hmanga mihai pawisa lakpek, mi ṭhuoihmang, civil mi pawitawklo hai that, IED sukpuok le a dang danghai a ṭhangsa. India sawrkar le NSCN(IM) han Ceasefire Agreement an zieka inthawk tuchen hin NSCN(IM) pawl chungah FIRs 424 registered a ni tah. Autonomous District Council, Ukhrul hnuoia MDC, Ngalangzar July 12, 2014 nia Finch Corner a kap hlum a nina le inzawmin NSCN(IM) cadres 8 man an ni a. Hi thila State Forces hai hmalakna (action) dodalnain Naga Organisation ṭhenkhat chun National Highways pahni haia Economic Blockade thaw dingin vauna an siem a nih tiin CM chun Union Home Minister kuoma lekha a thawnnaah a zieklang. Hun tiemchin um lova Economic Blockade thaw a lo ni chun, State sawrkar chun venghimtu a mamaw belsa ding a ni bakah Ukhrul District ngirhmun hi hung ngaipawimaw a, CAPF Companies 15 hung pe ngei dingin CM chun Union Home Minister a ngen a nih tiin ei thu dawngna chun a hril.

LOCAL NEWS
Canal sie an siemṭha
CCPUR: Tuikham bul laia Khuga Canal sie chu zanikhan Saikawt MDC Pu Hrila inrawinain canal tui fa leilet neitu han social work neiin an siem ṭha. Hi Canal sie siemṭhatna dinga cement le lung (material) hai chu bieltu MDC in a thawlawm an nih. Canal tui fa loneitu han canal siemṭhatna dinga sum le pai le tha le zung seng an inhuomna thuah bieltu MDC chun lawmthua hril.

Addl. DC Mr Maniram a hungtlung
CCPUR: July 14, 2014 a inthawk chawl laa New Delhi-a inzin Mr Maniram Sharma,
IAS, Addl. DC, CCPur chu zanikhan CCPur a hungtlung a, zani ma khan office a kai ṭan nawk. Mr Maniram Sharma hi a naupa Arvind Sharma (14) Sept. 30, 2014 nia AIIMS, New Delhi-a operation thaw ding le inzawma Medical Test chi tum tum 20 thaw ding leia Delhi inzin a ni a. Medical test 20 thaw ding laia 15 zo a ni a, vawi 5 dang hai thaw nawk ding a ni leiin August 9-18, 2014 inkar sungin Chawl (leave) la nawk a tih.

UTLA C-in-C Jail-a thun
CCPUR: July 25, 2014 zana 7th Assam Rifles han Chiengkonpang- a an man UTLA Cin- C Seipu@ Ishael (41) s/o Letsieh of Chiengkonpang le UTLA S/S Pvt. Thangboy (20) s/o Lelen of Songsang Village hai chu zanikhan Chief Judicial Magistrate (CJM) hmaah inlangtir an ni a. CJM chun UTLA C-in-C Seipu chu Jail-a thun dinga a chungthu a rel angin Jail-a thun a ni a, S/S Pvt. Thangboy chu CJM in bail-in an suo. Anni hi Rifle 5.56mm HK 33 pakhat, magazine 1, a mu 33; 22mm Pistol 1, magazine 1, a mu 4; 7.62mm AK47 mu 31; Night vision Binocular pakhat, Mobile phone 2, SIM Card 4, Combat dress kekawr 3 le Combat zakuo 1 hai le man an nih.

Tuiring-ah One day market an thaw ding
CCPUR: Vawisun hin ICI Tuiring Nuhmei Pawl chun Tuiring khuoah One Day Market an thaw ding a ni a. Hi huna hin mitin Pathien hminga va dawr seng dingin fielna le ngenna an siem.

HSA V.K. Tawna College Unit
CCPUR: HSA V.K. Tawna College Unit 2014-15 ṭhuoitu ding thlangna nei a ni a, President in Samuel Ngurbiekmawi, Secretary in Joshua Lalmalsawm, Fin. Secy. in Jerusalem Ramcheimawi, Treasurer in Nancy Lalthlawnpek, Games & Sports Secy. in Gordon Malsawmthang le Info. Secy. in Lalrosanga Khawbung hai thlang an nih.

Malaria PF 14 hmu
CCPUR: District Malaria Department, CCPur chun July, 2014 thla sung khan damnaw mi 1558 hai thisen laa an enfelnaah Malaria positive 15 an hmu a, hienghai laia 14 hai chu Malaria PF an nih.

Mass Social Work
CCPUR: Sangaikot Block Chief Assn.; Truck Owners Assn., KSO Sangaikot Block le Social Workers hai chun ṭhangruolin vawisun 9AM a inthawk hin Truck 35 le JCB 2 hmangin Mass Joint Social Work nei an ta, Chura- Sugnu Road lampui sietna hai siemṭhang an tih.

Rukru man
CCPUR: Lianchinzam 24) s/o T.S. Thangkhanpau of Hangzasial Road, N. Lamka G chu zani 5AM vel khan Elim Veng, N. Lamkaa Rangva an ruk tum lai a in nei han hmuin an man a, YPA Elim Veng Unit han thu ṭha taka an hril hnungin a sunghai kuoma an pek. Ama hi No. 4 addict a nih.

AIR, CCPur stn. Prog.
CCPUR: Vawisuna AIR, CCPur station-a Paite programme a chun Hla thlang le This Week in CCPur-Script L. Chinkhanlian ngaithlak thei ning a tih. Hmar programme a chun Jessy Thanzam Sungte, Roselyn Lalhlimpui le This Week in CCPur-Script L. Chinkhanlian ngaithlak thei ning a ta, Thadou programme a chun hlathlang le This Week in CCPur ngaithlak thei ning a tih. Zan dar 7 a chun “Flower gardening’ thuah Lalronghak in thu hril a tih.

STATE NEWS
AR le ZUF an inkaptuonah ZUF 4 thi, AR 1 hliem 
IMPHAL: Zani zingkar dar 5 vel khan Tamenglong District a Nungkou khuo bula 13 Assam Rifles le Zeliangrong United Front ( ZUF) pawl an inkaptuo a, ZUF cadre 4 an thi a, AR pakhat a hliem a, Helicopter in Leimakhong Army Hospital panpui a nih. Inkaptuona hmuna hin AR han M16 Rifle 1, 9mm Pistol 1, Lathode Gun 1, Lathode Shells 21 le Hand Grenades 4 an hmu niin ei thu dawngna chun a hril.

Nuhmei student pakhat ṭhuoihmang
IMPHAL: July 30, 2014, zantieng 1:30PM vel khan Ms Anita (13) d/o Ishak Haokip of Shamurou chu a kaina Bright School, Shamurou a inthawk In pana a hung laiin tu ti hrietlo han Silver Colour Van MNO1L 2412 hmangin an ṭhuoihmang a, a ṭhuoihmangtu hai hi tu ham an nia ti hriet a la ni naw baka iengleia an ṭhuoihmang am ti hriet a la ni nawh.

Driver le handyman ṭhuoihmang
IMPHAL: Truck Driver Langoljam Radhamohon (30) s/o Khelendro of Wangjing Lamding Cherapur le handyman Khumanthem Sanjit (22) s/o Binoy of Wangoo Mamang Nongyai Khong hai NSCN (K-K) ni dinga ringhla han July 25 & 26, 2014 zan khan Imphal le Guwhati inkar, Piphema, Nagaland-ah an ṭhuoihmang. NSCN(KK) chun intlansuokna dingin Rs. 60 lakh an ngen nia hril a nih. Anni hi Cement phur an nih.

TNL in darkar 24 Ukhrul Bandh
IMPHAL: Tangkhul Naga Long chun zani zanril a inthawk khan Ukhrul District sungah darkar 24 sung aw ding total bandh thaw ṭan an tum niin ei thu dawngna chun a hril. Zani hmasaa Tangkhul Naga Long grounda peace prayer neina huna police hai chetna dodalnaa bandh hi thaw an tum niin an hril. Bandh hin Medical, Power, telecom, fire le PHE Department hai chu huom naw ni a, July 31, 2014 zanril-a inthawk August 1, 2014 zanril chen bandh hin awng a tih. Hi le inzawma Manipur Governor kuoma memorandum an pek a chun, Ukhrul District-a inthawk 144 CrPC zama um le Manipur Police Commandos le IRB sie-a um hai chu lakdawk ding le NSCN(IM) cadres 8 mana um hai insuo dinga an ngenna hai an zieklang.

KYKL cadre 1 man
IMPHAL: Zani hmasa 9:25AM vel khan Thoubal Awang Leikai-ah Thoubal Police Commando le 2 Assam Rifles ṭhangruol han KYKL cadre Nongthombam Rashanta @ Tangba (34) s/o N. Padmashi of Huikap Makha Leikai, Imphal East chu 9 mm pistol 1 le a mu 4 leh an man.

Dy. CM in UNC thilthaw tum thlawp lo dingin
IMPHAL: Dy. CM le Home Minister ni bawk Gaikhangam chun, United Naga Council in National Projects hai ban an tumna chu thlawp lo dingin mipui a ngen. Project hai hi sukhnuk a ni chun ei state ta dinga inhmangna ni ding a nih tiin zanita a office chamber-a chanchinbumihai an hmupuina huna a hril. ILP chungthua chu Centre intlun a nita a, hrat lema sawrkar thlungpui nawra ṭul a nih tiin a hril.

Child Welfare Convention nei
IMPHAL: Zanikhan Lamyanba Shanglen, Imphal hmuna One Day Regional Convention of Child Welfare Commitees nei a nih. Hi huna hin Social Welfare Minister A.K. Mirabai chu khuollienin a ṭhang. Hi huna hin Manipur, Mizoram, Nagaland le Arunachal Pradesh haia inthawk Child Welfare Committee members 100 vel an ṭhang.

NATIONAL NEWS
Mizoram sawrkarin tukum sunga Zu zawr hman a tum
AIZAWL: Mizoram Excise & Narcotic Minister R. Lalzirliana chun, Mizoram sawrkarin tukum sung ngei hin Zu zawr hman a tum a, hi le inzawm hin Meghalaya sawrkar thaw dan inchuk dingin July 29, 2014 khan mi an tir bakah rules siem mek a nih tiin a hril. Hieng laizing hin Aizawl khawpui sunga veng 7- Khatla, Mission Veng, Upper Republic, Tuikual North, Tuikual South, Bethlehem Vengthlang le Dam Veng khawtlang ṭhuoitu hai chun an khaw sungah wine shop, bar, le zu sekkhawlna (warehouse) hmun siem an phalnaw thu an puong tah.

Meghalaya Dy. Speaker in Rs. 18 lakh chuong mi pasie hai ta dingin a pek
SHILLONG: Meghalaya Assembly Deputy Speaker, Sanbor Shullai chun a kum khat hlaw Rs. 18 lakh chu Meghalaya state-a BPL sungkuo mi pasie le natna dang danga damnaw hai ta dingin a thawlawm. Sanbor Shullai (47) hi ‘Poor Man’s Leader’ tia hrietlar a ni a, ama hi South Shillong-a NCP MLA a ni a, August 2013-a inthawka a thla hlaw Rs. 18,42,658 le Assemblya inthawka Discretionary grants a dawng Rs. 7 lakh chu mi pasie hai sawmdawlna dingin a thawlawm vawng a nih. Shullai chun, mi pasie le chanhai hai ngirhmun dawmsangna dinga a kum khat hlaw hi a thawlawm a ni thu a hril a, hiengang thil thaw thei ding ngirhmuna a umna thuah a hlimin a lawm hle thu a hril. Mi pasie le damnaw mamaw hai ta dinga sum la thawlawm pei a tum thu Shullai chun a hril bawk. Shullai hin thla khatah Rs. Rs 48,750 hlawin constituency allowance Rs. 55,000 thlatin a dawng hlak a, hieng a hlaw hai hi constituency Monitoring cum Implementation Committee kutah an hlan a nih.

NSCN(IM) interlocutor thar dingin Ajit Lal
NEW DELHI: Intelligence Bureau Special Director hlui Ajit Lal chu NSCN(IM) le sawrkar thlungpui inbiekna-a Centre Interlocutor dinga ruot a ni el thei a hril a nih. Prime Minister Narendra Modi in interlocutor thar ding a sukfel zo hun huna inbiekna hi sunzawm nawk ni dingin ei thu dawngna chun a hril. Ajit Lal hi 1974 batch IPS officer a ni a, zani (July 31, 2014) a kha a sina inthawk pension ta ding a nih. Ajit Lal hi joint intelligence committee chief le temporary-a interlocutor sin chel lai mek a nih. NSCN(IM) chun Ajit Lal interlocutor dinga ruot tumna hi hnawl an tum naw a hril a ni a, tuta thla bul khawm khan NSCN(IM) ṭhuoituhai a lo inhmupui ta a nih.

Gen. Dalbir Singh Suhag in Army Chief
NEW DELHI: Lieutenant General Dalbir Singh Suhag (59) chun zanita inthawk khan Indian Army Chief sin a chel ṭan a, amah in Army Chief a inthawka pension General Bikram Singh a thlakthleng a nih. General Bikram Singh chun zanikhan charge an hlan a nih. Lt. Gen. Suhak hi Gurkha officer niin 1987- a Sri Lanka-a Indian Peace Keeping Force-a lo ṭhang a ni a, Eastern Army Commander a ni lai nikum December thlaa kha Vice Chief of Army Staff a ruot a ni a, Army Chief sin hi thla 30 sung a chel ding a nih.

Haryana in nuhmei Chief Secretary
CHANDIGARH: Ms Shakuntala Jakhu, 1978 batch IAS Officer chu Haryana Chief Secretary dinga ruot a ni a, zanikhan a sin hi a chel ṭan. Ms Jakhu hi Additional Chief Secretary, Disaster Management chel lai mek a ni a, Chief Secretary ni lai SC Choudhury a thlakthleng a nih. Choudhary hin Right to Service Chairman sin chel a tih. Ms Shakuntala Jakhu hi Sepbember 30, 2014-a a sina inthawk pension ta ding a nih. Haryana CM Bhupinder Singh Hooda chun Jakhu hi Haryana State-a IAS Officer senior tak a ni thu a hril. Haryana hin tuta hma khan nuhmei pathum- Meenakshi Anand Chaudharay, a sangnu Urvashi Gulati le midang pakhat Promila Issar hai chu Chief Secretary in a lo ruot ta a, Jakhu hi Haryana nuhmei Chief Secretary palina a nih.

Petrol man Rs. 1.09 a sukhnuoi a nih
NEW DELHI: Zani zanrila inthawk khan Indian Oil Corporation chun Petrol man litre 1-ah Rs. 1.09 in a sukhnuoi a, Diesel man ruok chu litre 1-ah 56 paise-a sukpung a ni thung. Hi dungzui hin Delhi a chun Petrol litre 1-ah Rs. 72.51 ni tang a ta, Diesel chu litre 1-ah Rs. 58.40 a hung nit a ding a nih. Khawvel pumpuia thautui man tlakhnuoi leia thautui man hi sukhnuoi a nih. Chun, non-subsidised LPG (14.2 kg cylinder) chu Rs. 2.50 a sukhnuoi a ni bawk.

Miz. PHED thawktu tanky sukfainaah a thi
AIZAWL: Mizoram Public Health Engineering Department (PHED) thawktu Rohmingthanga (47) chu zani hmasa zan khan Aizawl khawpui tui supply-tu Tlawng vadung bul hnai laia Water Tank a sukfainaah pipe sunga an tawllut leiin a thi. A ruong hi zani zingkar khan tanky sunga hmu a nih. Rohmingthanga thisa ruong hi hun iemanichen zet buoipui a ni hnungin lakdawk thei chau a nih.

Assam-ah mimkei leiin mi 5 an thi
GUWAHATI: Assam rama Barak valley-a Kangtum village a chun ruosur leia mimkei tlung leiin mi 5 an thi. Mi 5 hai hi sinthaw dinga ram hnuoia fe an ni a, sin an zo hnungin ṭute an siemah zan riek an tum a, sienkhawm zan huna ruo nasa taka hung surin mimkei an tlungtir leia pilvungin a vur hlum an nih tiin Police thusuok chun a hril.

Opium kg. 4 leh mi 2 man
MOHALI: Zani hmasa khan Police han Derabassi hmuna Chandigarh registration number nei Car pakhat Derabassi- Barwala road-a tlan Car sukchawla an dapnaah Car sunga inthawk inruithei Opium kg. 4 leh car sunga chuong mi 2 an man. Mana um hai chu Avtar Singh of Baltana le Narender Sing of Naraingarh hai an nih.

Ramdang jail haiah India mi 6000 an intang mek
NEW DELHI: Overseas Indian Affairs Minister Sushma Swaraj chun, tuchena hin khawvel rambung dang danga Jails hran hran haiah India mi 6000 an intang mek tiin zanikhan Rajya Sabha an hriettir. India mi intang tamna tak chu Saudi Arabia niin India mi 1400 an intang mek a, a dawttu chu UAE niin India mi 985 an intang a, Pakistan Jails-ah India mi 468 an intang mek tiin a hril. UK ah
430, Nepal-ah 377, Malaysia- ah 332, Kuwait-ah 274, Singapore-ah 203, USA-ah 195, Italy-ah 135, Bangladesh- ah 128, China-ah 115 le Qatar ah 86 an intang mek a nih. Khawvel rambung tum tum 73 jails haiah India mi intang an um a nih tiin Sushma Swaraj chun a hril.

Army jawan ama le ama an kap hlum pal
SRINAGAR: Central Kashmir-a Ganderbal district- ah Army Jawan Parvinder Kumar chun a service rifle a sukfainaah a sukpuok pal leiin a thi. Parvinder Kumar hi 5 Rashtriya Rifle camp, Duderhama hmuna posting a ni a, hi thil hi July 29, 2014 a kha tlung a nih tiin Police thusuok chun a hril.

Tripura CS dingin G. Kameswara Rao
AGARTALA: Mr G. Kameswara Rao, IAS 1983 batch chun zanikhan Tripura Chief Secretary sin a chel ṭan. Rao hin Sanjay Kumar Panda a thlakthleng a, Panda chun Central Government hnuoia Textile Ministry-ah Secretary sin chel a tih.

EDITORIAL
ILP bova inhumhim dan ngaituo a ngai

Tulaia Manipur-a thu lum tak chu state danga inthawk Manipur- a hung lut ding hnam danghai dangna dinga Bengal Eastern Frontier Regulations, 1873 hnuoia Inner Line Permit(ILP) System Manipur-a hmang nawk dinga phutna hi a nih. ILP hi India hmarsak biel a chun Arunachal Pradesh, Mizoram le Nagaland haiah hmang mek a ni a. ILP dungzui hin hi ILP hmangna states a lut ding hai chu sawrkarin a pek tiemchin neia an cham theina ding permit an nei a ngai. Hi thil hi British han tribal le hnam tlawm lem hai chimrala an um ding vengna dinga an lo induong a nih. Meghalaya state a khawm ILP hmang nawk dinga nawrna hi a fe mek a nih.

ILP System hmang nawk dinga Manipur mipui han ei dit nasan tak nia inlang chu state danga inthawk Vai sumdawng nasa taka an hung pung bakah sin chi tum tum thaw dinga Vai hung lut an pung pei leia a ram (Manipur) mi hai chimral inlauna lei a ni tak. Chimral inlau si hin building bawltu le sin dang dang thaw ding nei han hnam dang vai ruoi le hmang chu insukchangkangna in ei ngai amani ti ding hiel khawpin eini tuolsung mi nekin hnam dang ruoi ei insukhmu hi thil indik a ni am ti dam ei ngaituo a ṭul. Dan mumal nawna, sin vangna, inditsakbikna, inchukna tlahniem, Culture tlusie, tradition inhmang, sum le paia intlansiekna, nuhmei-pasalna hluor, sakhuo ngainepna le nundan inhmang hai hi hnam boral ding hai zie an nih tiin thil suimi hi chun an hril a. Ei ram, a bikin Manipur ei hang thlir a,Law & order ngirhmun a siein, dan mumal a um naw a, dan khawm danlo, danlo khawm dan an changa, sin a vangin thil iengkimah inditsakna a lien a, nundan inhmang ei pung pei bawk hin boralna lampui ei hraw am an ta ding ti hi ngaituo tham tak a nih.

ILP hi ei ram Manipur-a hin hmang hung ni nawk sien khawm a ram mi han ei zir tlat naw chun ILPS hi kumtluonga mi sanhim theitu a ni chu ring a um nawh. Hi lei hin ILP System bo khawma hnamdang laka ei him theina ding le chimrala ei umna ding laka ei him theina dinga ṭhang ei lak chu thil ṭul le makmaw a nih. ILP a insanhim kumkhuo ei tum sung chu ei la puitling tawknaw tina ning a tih. Khawvelin kawng tin renga hmasawnna kalbi a rem mek lai hin hnam dang le ramdangmi hai laka insiehrana inkhuokhir zing khawm chu ram hmasawnna ding daltu a ni thei leiin Inner Line Permit System (ILPS) ṭhang lova ei ram le hnam ei venghim tlat theina dingin hma ei lak a ṭul. Chu ding chun ei sakhuo, culture le tradition hai hrietchieng, inza le ngaihlut thiem thil pawimaw le ṭul makmaw ning a tih. Hi baka hin ei nina ah ei chieng a, nunzie nghet tak ei nei a pawimaw bawk ding a nih. Khawtlang ram hai chetdan le nunzie lo laksawng ei ching khawm hi ei nunzie nghetnaw zie tarlangtu a ni a, hi thila khawm hin ei inennawn thil ṭul makmaw a nih.

Ram le hmasawnna lampui hraw tak tak ding chun ram dang le hnam dang hai le ei inlaichinna le thawtlangna suklien pei a ṭul a. Hnam dang le ramdangmi hai le ei inchie pawl tak tak huna chimrala ei um nawna ding le hnam anga ei damkhawsuok theina ding chun mani nina a ei chieng, inthuruol tak le lungril puthmang indik tak ei nei thil ṭul tak a nih. Mani ninaa chieng lo le lungril puthmang indiklo hi hnam boralna a nih. Mani ninaa ei chieng a, ei inthuruol a, ei hnam nun culture le tradition hai ei vawnghim tlat a ni phawt chun iengangin hnam dang le ramdangmi han mi hung del hai sien khawm chimralin um ngainaw manih. Hnam dang le ramdang mi hai ei rama iengleia lungmuong le nghet taka hung um el am an nia ti khawm hi ei ngaituo rawp dinga ṭul a nih. Hnam dang vai ei ti hai hin sin thaw rin an neinaw a, sum an hmuna ding a ni phawt chun ienganga sin inhnuoi, sawl-um le tirdakum khawm thaw an inhuom a, hi lei hin sin an hmu a, fak an hmu leiin ei ramah an hung lut hut hut a nih. Eini rawi ruok chun ei pasiet zie hre mang lovin mani sin thaw dinga duthu ei la hang sam a, thaw nuom le thaw nuom naw ei la hang nei kuol vel a ni hi tie!

Hnam dangin an mi chimral ei inlau a ni chun khawvel thiemna le varna kawng tinreng-a ei lo intathriem thil ṭul ni bawk a tih. Kawng tinrenga hmasawn ei nuom si a, ei thiemnain a tlin si naw chun hnam dang le ramdang mi chu ei rama ei la kolut pei an ṭul ding a ni a. Hnam dang ruoi lova mani ei intodel theina dinga hma ei lak chu thil ṭul makmaw a nih. ILP ringawta ei ram le hnam chimralna ding laka insanhim tum lovin kawng tin le kil tina inthawk ṭhang laa, ILP ṭhang lova ei him thei dan ding ngaituo chu ei ram intodelna ding le hmasawnna indik le nghet ni ngei a tih.



Don't Miss
© all rights reserved
made with by Simon L Infimate