Responsive Ad Slot

Haflong a Zo-fest hmangna ding chung changa hrilfiena

Wednesday, August 27, 2014

/ Published by VIRTHLI
Tukum MZP huoihawt Zo-fest Haflong a hmangna chungchang ah hrietthiemnawna le thu vuongva tamtak a um in, HSA NC Hills&Karbi Anglong Jt. Hq. khawm mawsietna tamtak a um pha a. Chu el khelah facebook/internet a hai ngaidan mak tak tak post le comment tamtak hmu ding a um bawk. Chuleichun alo sei met ani khawma hi thu hi mi lo tiem pek seng dingin ka hung ngen tak meu cheu.

Zo-fest hi iengam ana/MZP chu tu ham an ni a?
MZP hi YMA anga ei zuk ngaia, nuom pawnga ei zuk theida bur hin ei ngaisuolna tam tak a um thei anih. Mizo Zirlai Pawl (MZP) hi Zo hnathlak laia NGO lien pawl tak pakhat ani ve a. Zo-fest hi Zo-hnathlak hai inpumkhatna á¹­hanawk zuol nei theina dinga huoihawt ani ang hrim in mani á¹­awng seng hmanga thu le hla a inpawl thlangna hun le seminer hai neiin hmang hlak anih. Hlasakthiem tak tak Burma ram chen anthawk dam a hung in Churachandpur, Guwahati le Darchawi ahai khawm hmang alo ni ta hlak. Zo-fest hmang alo ni hlak. Chun mani hnam lam seng in entirna hun hmang hlak ani bawk. Darchawi, Tripura hmuna Zo-fest hmang á¹­um khan HSA Gen. Hqrs hai hung ngenna angin HSA NCH & KA Jt. Hq. khawm cultural troupe á¹­huoiin an lo zu fe ve tah. MZP chun Zo-fest an huoihawtna san le inzul peiin mikhuol hung hai khawm Hotel a thlung el lovin tlangpa mikhuol thlung dan ang taka mani in a mikhuol inthlung tir hlak anih. Chun hi festival hmangna ding a sengso chu MZP in a tum vawng hlak.
MZP hi YMA naw angtakin ei hnam in nasa takin ei tangkaipui a, a kohran chen khawm ei hlawkpui in mi hum tu anni ve. Zo-Nationalism lungril put a pawl indin ani angin kum tamtak anthawk khan HSA le khawm inlaichinna thatak neiin, YMA in chibil anga inlakhran anga ami ngai hun khawma, lungril lien put a Zo-hnathlak vawng eina ei tawng Hmar tawng khawm hi Zo-hnathlak tawng pakhat anih ti a, Mizoram sunga ei hnam kohran le HSA etc hai YMA in ami do lai khawma YMA hai lakah mi thangpuia mi humtu pakhat chu an lo ni ve. Hi lei tak hin a pawng a puia hnâmna le kalna chu HSA khawma a nei naw a, moral support chu a lo pek ve hlak. Chun unau Dimasa le buoi laia ei hnam raltlan hai lo sawmdawl vetu pakhat le tuchena ei hnam pawitawk la neilo anni vena ah inbiekna dingin chun kawt a hawng peka. Chuongkhelah ei hmatieng le hnungtieng khawm dawn met a ngaina chin a um leiin ngunthluk taka ngaituo ani hnungin ei thuoitu hai kuoma inthlun lem cho anih.

Zo-fest Haflong hmuna innghat thukhawchang.
MZP huoihawt Zo-fest hi Haflong khawpuia inghat ding chungchang chu hieng hi anih. Mizo Zirlai Pawl (MZP) chun Aizawl a Executive meeting anneina ah chun tukum 2014 a ding chun kum hni dan pei a an lo huoihawt hlak, Zo-hnathlak hai inpumphatna ṭhanawk zuol nei theina dinga festival ropui tak Zo-fest chu tukum Haflong ah inghat nisien ti in an lo rêl thluka. An thurel bawzuina ding chun MZP ṭhuoitu iemani zat chu Pu Lalsangzuala Ngente, Vice President rawiin April thlabul khan Haflong hung chuongkai Fiengpui(Unau Biete khuo) ah inghat in Zo-hnathlak hnam hrang hrang hai inhmupuina an hung nei a. Student inzawmkhawm anni ang hrimin an student chanpui HSA khawm hung rawn in inbiekpuina khawm an mi hung nei pui a. Chun Muolhoi ah Pu Darrova Darngawn In ah HSA in committee nei pui in tukum ei platinum Jubilee neina ding thu le a hun(Tarik) hai hril in, an programme siem le inbichil chu a theinaw ding le Haflonga Zo-fest hmang ding le dingnaw thuthlukna HSA khat el a an siemtheinaw zie thu hril anni bawk. Chun Zo-fest an hmangdan le thiltum, Haflonga inghat annuomna san hai hrilthlangna nei ani bawk. Chu ruol ruol chun ei unau Kuki, Biete, Hrangkhol, Vaiphei le Khelma hai khawm an student organisation hai inhmupuina an nei bawk. MZP hai ṭhuoina hnuoiah Fiengpui(Haflonga unau Biete khuo) hmunah Pu Remsang Ngamlai, FAO NCHAC in a in ah ruoi hnienginhnar tak mi buotsai pek in zantieng 3:30 PM in Zo-hnathlak hnamtin a Student body po joint meeting an nei pui nghe nghe. Hi chungchang a hin eini cho eini naw leiin ei unau hnamdang hai ngaidan le ditdan khawm thlir sa zingin HSA Jt Hqrs chun ngaidan khawm siem lem dingin a thlir sa bawk. Joint meeting a ṭhang hai po dit dan a chun Zo-fest chu Haflong a hmang ngei nisien ti chu an dit dan le nuom dan chu anih. Sienkhawm HSA NC Hills & Karbi Anglong chun thuthlukna bur siem thei ah an ngainaw a, chu ruol ruol chun a pawngpui a lo kal el thei ding ziezang ding ngirhmuna ngir an nawh ti a hriet leiin le thuthlukna(A ieng tieng tieng khawm) nei thei ngirhmunah a ngirnaw bawk leiin, MZP hai kuomah "Kan khat in thulthlukna iengkhawm kan nei theinaw a, in hungna san hai popo le iengkim chu kan hotu hai kumah inthlun kan ta chun hung rawn bawk kan ta, chu zoah anni thuthlukna ah inghat lem a tih." ti in thu tawpna siempui anih. Chuong ang tak chun Unau Kuki, Vaiphei, Hrangkhol etc hai khawma an apex body hai kuoma inthlun ve an nuom thu anhril bawk.Chun MZP in Zo-fest Haflonga in hung inghat tum HSA chun nuom pawnga kan ditnaw hulhuol an naw a, amiruokchu tukum 2014 hi keini HSA chun kum tamtak anthawka kan lo nghak le kan lo tung em em Platinum Jubilee kum ana, Kumtluon (yearlong) celebration dinga kan puong le tukum kumtawp Dec. 11-14 a hin Ngurte, CCpur a puithu taka hmang ding kanna. Kan Platinum celebration le hun inbichil (collide) lo ngei ding anih. Chuong ani naw chun HSA(Hmar mipui) chu kan thang theinaw ding anih ti in vawitam tak meeting na a le over telephone chen khawma hril anih.
HSA NC Hills & Karbi Anglong chun official taka ziekin Hmar Inpui, NC Hills & Karbi anglong region a inthlun in nu le pa anni angin anni'n thuthlukna an siem lem dinga peksawng lem anih.
Tarik 22 August khan thu tawpna bawzui dingin MZP President le Gen Secy. hai chu Haflong hungin Fiengpui(unau Biete khuo) a bawk innghatin hnamtin a thuoitu hai inhmupuina an hung nei nawka. Tarik 23 Aug. 2014 zing dar 8 khan Muolhoi Community Hall ah joint meeting nei ani a. Unau Kuki, Vaiphei, Biete, Hrangkhol hai khawm an apex body hai ditdan angin Haflong a Zo-fest innghat chu remti alo ni tah. Chu meeting a khawm chun Zo-fest hmangna hun ding tarik chu thuthlukan siem thei ala ni naw a, amiruokchu an nuomdan December 2014 thla lai vela hmang ding ti ruok a chun HSA platinum Jubilee celebration le inkawkal a siem lo ding le an kawkal chun HSA chu inhnamnawi lo ding zie le min za pek dingin vel tam hril anni bawk. MZP hai chun "HSA Gen Hq. hai lo rawn kan tih" ti in a hun ding chu thuthlukna um lovin meeting chu suktawp anih. Chuonga HSA Gen Hq. hai an rawn ding ani chun ti a ngailai zingin tarik 25 Aug. 2014 khan HSA gen Hqrs. khawm rawn chuong lovin MZP official facebook page ah Dec. 9-12, 2014 sunga Zo-fest Haflong hmuna hmang dinga sukthluk anih ti in an hung insuo el ta a. Chuleichun HSA NC Hills & Karbi Anglong Jt Hqrs chu a ngaidan an ta naw leiin ahun hi thleng ngei ding le an thlengnaw chun inhnamhnawilo or khap(boycott) ding ti in ngaituona tamtak a hung nei ta a nih. Chuleichun HSA chu kei khawma ka na, nang khawm i na, Hmar hnam ta ana. Nuoma in mawsiet el lovin, nasatakin athat lem ding ngaituo in hma alak zing lem anih ti hi hre mawl ei tiu khai..!

Ka Lawm ie..
HSA Jt. Hqrs. NC Hills & Karbi Anglong,
Muolhoi, Haflong.


Don't Miss
© all rights reserved
made with by Simon L Infimate