SEMIKAH hai Music Album tlangzar ani tah

By Alan Famhoite

CCPur, July 11, 2014: Vawizan tieng dar 4:00Pm khan tulai rock music hmanga Pathien hring kuom tienga thalai hai thuoilut tuma hma nasataka la mek, SEMIKAH ti hming chawia indin, thu-le-hla tienga inhnik, anthiemna Pathien tadinga inhlan hai chun hun sawttak a’nthawka an i buoipui tah, an Music Album hmasatakna "SUMRISANG" ti chu Rev.Chawnga Memorial Chapel-ah Pu Vungzabiek Tusing, Addl.Commandent, CRPF, Manipur & Nagaland Sector, Imphal in alo tlangzar tah.

Pu Vungzabiek in Sumrisang music album a tlangzar lai.

Hun hawng tawngtaina Rev.H.P.Runremthang, Evangelist at-large, ICI in a nei a, welcome & introduction hnesaw takin Nk.Judy Vanzaimawi in a nei zawm a, chu zoa Endless Worship Team haiin inpakna hla ansak bawk. Pu James Songrolal Songate in Music Album Preview-na neiin, Tv.Joseph R. Joute in presentation a nei  zawm nawk nghal a, chu zoa chun SEMIKAH Band haia inthawk lawmthu hrilna hun le an hla hung suok dan hai hrilna an nei zoin an Album ami hla pathum sakin hun an hmang. Speech hi khuollien haia inthawk ngaithlak zawm nawk nghal ani a, Tv.Joseph Pakuongte in inpakna hla mawi takin a sak zo hnungin Pu Ramhlunsang, Sielmat-in hunkhar tawngtaina a nei zoin programme hi hmangzo anih. 

Semikah haiin an perform lai

Hi album a hla hai hi an ni kutsuok ngei, a thu nisien, a thluk nisien Tv.Daimond Malsawmthang Tusing le Pu Samuel Lallawmzuol-in Pathien  a inthawka an i dawng hai ani a, Recording hi Pu James Rochullo, Doh Doh Records in a sponsored anih. Hi album a hin hla 10 aum a. Hi band a member hai chu, Diamond Malsawmthang (Manager, Acoustic & Electrical Guitarist- Rhythim) PU Samuel Lallawmzuol (Bass Guitarist), Pu Robert Lalrodik(Lead Guitarist), Pu James Rochullo (Keybordist & Sound Engineer), Lalzarzo@Sangte (Drummer) le Nk.Gloria Khuolhring (Singer) hai an nih.