Responsive Ad Slot

Hmasawnna Thar | July 10, 2014

Thursday, July 10, 2014

/ Published by Simon L Infimate
India khuo le tui indik takhai kuoma ID Card pek vawng ding: Thil man kaisangna thu Lok Sabha-ah hriltlang
NEW DELHI: Sawrkar chun National Population Register (NPR) a siem mek a, India khuo le tui indik takhai po po kuoma National Identity Card hun bituk sungin pek vawng ning an tih. India khuo le tui indik le indiknaw hai enfel a ni hnungah National Identity Card hi pek ning a tih tiin Union Home Minister Rajnath Singh chun zanikhan Lok Sabha hmuna a hril. National Registration Authority le Unique Identification Authority of India (UIDAI) hai chu ṭhangruolin sin thawtlang an tih tiin PM Narendra Modi chun a hril. Zanikhan Lok Sabha ah thil man kaisang thu members han an hriltlang. Lok Sabha a Congress Party Leader, Amarinder Singh chun BJP in election campaign huna khan ni ṭha le lawmum a hungtlung ding a nih an ti a, Annawleh ni ṭha le thil lawmum ei hmu an ta? Finance Minister Arun Jaitley in thil man kaisang control a ni a, lungkham le inlauna ding a um nawh a ti a, sienkhawm nitin mamaw le thil dang dang man hai a ni telin a kaisang tung pei a, thlai, purunsen, Alu le mantathur (tomato) man hai chenin a kaisang pei bawk a, hi hih thil man kaisang control-na chu a ni? tiin BJP sawrkar an sawisel. Lok Sabha a Selkaltu member-hai chun, Petrol, Diesel man le Rel chuongman bakah Rel-a thil phurman sukpung a nina thuah BJP ṭhuoina hnuoia NDA sawrkar chu nasa taka sawiselin an dem. CPIM member, P. Karunakaran chun, Defence le Communication sectors a Foreign Direct Investment a sukhrat le a suksang chu sawiselin, hi thil hi ei ram ta dinga thilṭha le National interest a ni nawh tiin a hril. Samajwadi Party leader, Ramgopal Yadav chun, ei ramin ruotui ei mamaw tawk a hmu naw leiin India ram chu khuo inṭhalna hmun tia puong dingin sawrkar a ngen. Hi thu hi Rajya SAbha hmuna a hril a nih. Bahujan Samaj Party (BSP) ṭhuoitu, Brajesh Pathak chun loneitu le huon siemtuhai chu suma ṭhangpuina pe dingin sawrkar a ngen. Chun, MGNREGA loneina tienga indik le ṭha taka hmang a ṭul a, mipuihai chu ni 100 chau ni lovin ni 150 inhlawna hun siem pek dingin a ngen bawk.

3rd. Manipur State Finance Commission Chairman Rakesh CCPur a hung
CCPUR: Mr Rakesh, IAS (retd), Chairman, 3rd. Manipur State Finance Commission chu zani 10:30AM khan CCPur-ah a hung inzina ADC Office, Tuibuong a sir a, ADC Office sinthawna le office hmun hai kipkawi takin a enfel. Hi zo 11:30AM khan Mr Langkhanpau, Chairman, ADCC office chamber-ah Mr Demmang Haokip, Vice Chairman, ADCC bakah EMs hai le CEO hai 12:30PM chen meeting a neipui. 13th Financial Year sunga District Council in hmasawnna sin tum tum a thawna hai enfelna neiin sin thaw dan chu lungawi um a ti thu Mr Rakesh chun a hril tiin ADC Chairman in hi meeting zova tuolsung chanchinbu reporters hai an hmupui huna a hril a. 14th Financial year –ah a theina chena ṭhangpui le a recommend ding thu a tiem bawk niin a hril. ADC, CCPur chun harsatna chi tum tum an tuok hai le pension an neinaw thu hai Mr Rakesh hi an intlun a, ama level chena thaw thei a nei chun a ṭhangpui ding thu a tiem bawk. ADC Office a sir zo 12:30 khan Mr Rakesh hin Mr P.K.Jha, IAS, DC, CCPur chu a Office chamber- ah an hmupui a, hi zo hin New Lamka JB School, Hebron Veng New Lamka a V/A House-ah VA member hai an hmupui a, hi zo hin Imphal tieng a kir nawk. Mr Rakesh hi Imphal-a inthawk Mr Amstrong, IAS, Jt.Director TD & Hills/PHED le Mr Munindro, Director, Planning. Govt. of Manipur han an hung zui. Mr Rakesh hi July 7, 2014 a kha Manipur hungtlung a ni a, a tour programme dungzui chun July 12, 2014 a New Delhi pan nawk ding a nih. Manipur-a a cham sungin hmun tum tum a sir ding bakah department tum tuma officials hai an hmupui dinga ti a nih. Rakesh, IAS hi January 9, 1981- April 8, 1982 inkar sung khan Churachandpur District-ah DC (Deputy Commissioner) in a lo hung um ta a nih.

Mi sattua ziek kha a tuortu lem
CCPUR: Patpuihmuna pasal pakhat sat hliemna chungthua zani (July 8, 2014 issue) a mi sattu Mr Samuel Lalbieknuom (24) s/o Darthangsuok of Patpuihmun ti kha ni lem lovin mi sattu chu Mr Lalrintluong (30) s/o Remsung of Patpuihmun tia tiem lem ding a nih. Mr Samuel Lalbieknuom kha a tuortu (victim) le Mr Lalrintluong kha mi sattu (accused) lem ding a nih. Chun, hi thil tlung hun July 17, 2014 tia zieklang khawm kha June 17, 2014 tia tiem lem ding a nih. Hi case hi Parbung Police han lain an buoipui mek a nih. Ei thu lakna a chieng tawk naw lei a ni a, suksuolpalna thuah pawi ei ti hle. Sat hliema um Lalbieknuom hi CHC Jiriah enkawlmek a ni a, Police chun hi thua hin FIR No. 2 (7) 2014 PBG-PS CCP U/S 307/326 IPC an registered a nih.

HSA, TKSU le KSO han an dem thu an puong
CCPUR: Zani hmasa (July 8, 2014) zana tu ti hrietlo mi ṭhenkhatin Tuibuong Service Station (Pudaite Oil Pump) a Diesel Dispensing Unit petrol hmanga an rawna chu HSA, CCPur, TKSU GHQ le KSO, CCPur hai chun an dem thu an puong. Tuibuong area-a cheng han inthuruol taka kangmei suok an ṭhelmit hman leiin pump chau ni lovin pump bul le a sevel kangmei suokin a kang zap ding laka inthawk sanhim a ni thu, hi thil tlung hi mi dawizep thilthaw a nih tiin HSA, TKSU le KSO in joint condemnation an siema chun an zieklang. Hi thilthawtu hai chu ni 3 sung ngeia man dingin District Administration an phut a, ni 3 sung a hi thilthawtuhai man an ninaw chun ṭha an ti anga hma an lak ding thu an zieklang bawk.

July 9 chena Malaria PF 5 an hmu
CCPUR: Malaria Department, Churachandpur chun July 1, 2013 a inthawk zani (July 9, 2014) chen khan hmun tumtum haiah Malaria PF invawi mi 5 an hmu dawk a, hienghai laia 2 hai chu Damdiei a hmu an ni a, Sipuikawnah 1, Singngat Zalenphai-ah 1 le Singngat Thadou Veng-ah pakhat an nih. Chun, June, 2014 thla sung khan Malaria Dept. chun Malaria PF invawi 8 an hmudawk bawk.

Electric drive an ṭan
CCPUR: Electricity Department, CCPur Division chun zanikhan Headquarters Vengah electric thuah phalna nei lova electric latu hai zawngsuokna an nei ṭan. Zanikhan permit nei lo In 3 hai chu an electric lakna an sut pek a, connection thaw thar dingin In 4 hai kuoma Form an pek. Department chun an la sunzawm pei ding a nih.

Hospital Campus-a waiting shed repair lai an sukchim: a hnunga inbiekrem
CCPUR: District Hospital Campus sunga Waiting Shed mi tlawmngai ṭhenkhatin an mimal sum senga zanita an siemṭhat chu zani zantieng ma khan YPA Lamka Block han quality a ṭha nawh tiin an hang sukchim. Hi thua hin Distric Hospital Medical Supdt, Dy. Medical Supdt. Dr Kim Simte le YPA Lamka Block han inbiekna an nei a, Waiting shed repair-a um sukchimtu YPA Lamka Block chun an thil suksiet hi mistiri ruoiin an siemṭha ding tiin an inbiekrem. Ei thu dawngnain a hril danin, Dr Shyamsunder Singh, Medical Superintendent, District Hospital in Hospital campus sungaWaiting shed motor in a bawchim leia hunsawtak siemṭhat (repair) lova um chu Hospital campus-a sinthaw hai siemṭha(repair) dingin a ngen a, chu le inzawm hin Hospital campus-a sinthawtu han sawrkar sum ṭhang lova an mimal sum hmanga zanita an siemṭhat a nih. Amiruokchu, a quality a ṭha nawh tiin YPA Lamka Block han an hang sukchim a nih. Waiting Shed repairing thawtu chun, a cemtent chang huna a thil siem hi a ṭhanaw a ni chun hung sawisel hai sien pawi a tinaw thu a hrila, a cement khawm a chang hmaa siemṭhat ani le inruola hienganga thaw hi pawi a ti thu a hril.

Nupui pakhat ankhaihlum
CCPUR: Mrs Veijanem (37) of Bijang chu zani zantieng 2PM vel khan an Insungah inkhaihlum saa hmu a ni a, a ruong vawisun hin Bijang thlanmuolah vuiliem ning a tih.

AIR, CCPur stn. Prog.
CCPUR: Vawisuna AIR, CCPur station-a Paite programme a chun Nancy Chingbiaklun in hla sak a ta, sin ruok puong ning a tih. Hmar programme a chun hla thlang ngaithlak thei le sin ruok puong ning a tih. Thadou programme a chun Helamboi Baite in hla sak a ta, sin ruok puong ning a tih.

M.Hemanta le Pradhans 5 in BJP an zawm
IMPHAL: Youth Affairs and Sports Minister hlui le AICC Member, Hemanta Singh le Pradhans 5, Uripok A/C a MLA canidate lo ni hlak Dr Dwijamani le Social Worker, Md. Anwar Hussain han zanikhan BJP an zawm a, Th. Chaoba Singh, President, BJP Manipur Pradesh in lawmlutna le BJP an lutna chu zanikhan a pawmpui nghal.

CLP Meeting nei
IMPHAL: Zani zantieng 4PM khan CM Office bungalow hmuna Congress Legislature Party (CLP) meeting nei a nih. CLP meeting chun District tina SP hai chu tlangram biela Shaw Mills um hai permit nei an ni le ninaw enfel dinga inhriettir, Land Used Policy of MLR and LP Act 2006 chungthu khawm hriltlanga ni a, thlai ching theina hmun hai chu mihriem cheng phallo le khuo siem ding chun tlai ching thei nawna hmuna a ni ding tihai an hriltlang. CLP Meeting chun zanita hriltlang hai ennawn le hriltlang dinga July 12, 2014 a review meeting nei dingin an rel bawk.(UNA)

An nuorna an la sunzawm pei ding
IMPHAL: Indira Gandhi National Tribal University Student’s Union (IGNTUSURCM) chun an nuorna an la sunzawm pei ding niin Lelen Vaiphei, Secretary (Information), IGNTUSU-RCM chun a hril.

Manipur CM in Literary Complex a hawng
IMPHAL: Zanikhan Manipur Chief Minister Pu O.Ibobi Singh in Langthabl Kunja Mayai Leikai ah Dr Kamal Literary Complex a hawng. Hi huna hin L. Nandakumar, Uripok A/C MLA le Langthabal A/C MLA Karam Shyam hai khawm an ṭhang.

Miz. Governor thar dingin Kamla laklut
AIZAWL: Mizoram Governor thar dinga ruot Dr Smt. Kamla Beniwal chun zani zantieng 6PM khan Raj Bhavan, Aizawl hmuna Gauhati High Court Judge, Justice B.K. Sharma hmaah Mizoram Governor 12-na dingin sesamna a nei. Mizoram Governor thar laklutna inkhawma hin CM Lalthanhawla, Speaker Hiphei, Ministers, Parliamentary Secretary, MLAs le Police le Civil tienga officer lienhai an ṭhang tawl.

Vakkom Purushothaman an ban ding
AIZAWL: Mizoram Governor, Vakkom Purushothaman, Nagaland Governor thar dinga July 6, 2014 a ruot chun zanikhan Aizawl, Mizoram suoksanin a chengna Kerala a pan tah. Governor-a ruot kan ni ding huna rawn kan ni a, transfer ding khawmin rawn kan ni ding a nih. Sawrkar a hung inthlak leia mi rawn der lova an mi transfer ringawt hi ka nuom nawh. Governor chu State Consitutional Head an ni leiin clerk-hai anga nuom dan dana sawnkuol chi an ni nawh. Hienganga sawrkar thar hmalak dan hi ṭha ka ti naw takzet a nih. July 11, 2014 ni khin Kerala a inthawk Nagaland Governor a ruot a pawmnaw thu le an banna sawrkar thlungpui kuoma a pek ding thu Vakkom Purushothaman chun a hril. Sept. 2, 2011 a inthawka Mizoram Governor sin chel ṭan a nih.

Zu Rs. 10 lakh manhu man
AIZAWL: Zani zantieng khan Mizoram Excise han Luangmual ah Lalsangzuala chu Zu sen chi (IMFL) Rum um 2030 leh an man. Zu mana um hi tuolsung rate a chun Rs. 10 lakh chuong manhu nih tiin Mizoram Excise chun an hril.

BJP National President tharin Amit Shah
NEW DELHI: Zanikhan Parliamentary Board meeing nei a ni a, lungruol takin BJP General Secretary, Amit Shah chu BJP National President dinga ruot a nih tiin BJP National President a inthawka tawp ta ding Rajnath Singh chun a puong. Rajnath Singh hi Union Home Minister a ruot a ni leia BJP National President thar ding hi ruot a hung ṭul a nih. 16th Lok Sabha election a khan Uttar Pradesh a Lok Sabha seats 80 umah BJP in seats 72 an lak a, hi thil hin Amit Shah hming a sukṭha pha hle a nih.

Sheila Dikshit Nagaland Governor dingin
NEW DELHI: Kerala Governor Sheila Dikshit chu inban dinga ti a ni hnung khawma an ban nuom naw leiin a hremnain state chin lem Ngaland Governor dinga tir ni el theia hril a nih. Nagaland Governor thar dinga ruot, Mizoram Governor Vakkom Purushothaman chun a sin thar dinga pek, Nagaland Governor sin chu chel a tum naw nia hril a nih.

Tarun Gogoi thlakthleng a ni ding
NEW DELHI: Assam Chief Minister, Tarun Gogoi chu tuta kar sung hin Assam Chief Minister a inthawk peithlaka thlakthleng ni dinga hril a nih. A thlakthlengtu ding chu Assam Health Minister, Himanta Biswa Sarma ni dinga hril a nih. 16th Lok Sabha election-a khan Congress an tlase hne hle a, kha thil kha Gogoi thlakthlenga a um phana bulpui tak niin an lang.

MNF in property Tax lak lo dingin
AIZAWL: September 1, 2014 a inthawka Aizawl Municipal Council in Property tax lak ṭan an tum chu mi rethei le in neilo hai harsatna le tuorna intluntu ni dinga an ngai thu MNF chun an hril a, hi lei hin sut nawk dingin MNF chun sawrkar an ngen. Aizawl khawpui sungah in neia cheng sungkuo 26,110 an um a, mi in hluoa um chu sungkuo 22,234 an um. Property tax lak a ni chun in neitu han In hluo man an sukpung ding a nih tiin MNF chun an hril.

US Deputy Secy. of State N. Delhi-ah 
NEW DELHI: US Dy. Secretary of State William J. Burn chu New Delhi a ni 2 sung cham dingin vawisun hin New Delhi hungtlung a tih. William J.Burn hi Indo- US Strategic Dialogue buotsailawkna le inzawma New Delhi-a hung inzin ding a nih. Narendra Modi in PM a chel hnunga US high officials India rama hung inzin hmasa tak a nih. July 31, 2014 khin US Secretary of State John Kerry khawm New Delhi-ah hung inzin a tih.

AP & Telangana Governor CBI in thu an indawn
HYDERABAD: VVIP Helicopter (Augusta Westland Chopper) inchawkna thubuoi le inzawmin zanikhan CBI han Andhra Pradesh le Telangana Governor, E.S.L. Narasimhan chu Raj Bhavan, Hyderabad-ah darkar khat le a chanve thu an indawn a, a thu hril hai an record vawng. Mr Narasimhan hin VVIP Chopper inchawk ani lai hin Intelligence Bureau (IB) Chief sin a chel leia thu indawnna neia um a nih.

Bihar sawrkarin Zirtirtu 1,100 a ban
PATNA: Bihar sawrkar chun kum 5 liemta sung khan School Teachers 1,100 a ban. Hieng school teacherhai hin Degree certificate tehlem an hmang leia ban an nih tiin Senior State Education official, R.S. Singh chun a hril. Bihar state a hin contractual school teachers 250,000 zet an um a nih. Bihar State a mihriem umzat hi maktaduoi 100 an tling ṭep nia hril a nih.

Kum 2013-14 Economic Survey report
NEW DELHI: Zanikhan Union Finance Minister, Arun Jaitley chun Lok Sabha-ah kum 2013-14 Economic Survey report a phar a, Minister of State for Finance Mrs Nirmala Sitharaman in Rajya Sabha-ah Economic Survey report, 2013-14 hi a phar. Economic Survey report chun, MGNREGA, NRHM le SSA hai sukthar a ṭulzie, Food market siem ṭhat a pawimaw thu hai a ṭhangsa. Chun, kum 2014-15 a Gross Domestic Product (GDP) chu 5.4 to 5.9 percent-a a kaisang beisei niin a hrillawk.

Mi 3 silai le a mu tam tak leh man
MUNGER: July 8, 2014 khan Police han Munger district a hmun hran hranah pasal 3 silai le a mu tam tak leh an man. Md. Neyaz of Bardah-Purad Sarai Road chu Automatic Pistols 3 le a mu 90 leh an man. Ama inpuongnaa inthawk Md. Mehboob le Md. Imtiyaz hai pahni an man nawk a, an In hai an dap naah 7.65mm Pistol mu 400 le 8mm Rifle mu 19 dapdawk le man a nih tiin Sanjay Kumar Singh, Addl. SP, Munger chun a hril.

Rawpuok siemna chim leiin mi 8 an thi
MUMBAI: Zani hmasa khan Maharashtra State a Osmanabad area sunga Tenkheda village a Welcome and Paris Cracker Factory chu ṭekin a deng a, Factory a umna inchung a sukchim pha a, factory thawktu mi 8 an thi a, ṭhenkhat an hliem. Thina tuok hai lai nupui 5 le naupang pakhat an ṭhang. Inchung a chim el bakh rawpuok hai an puokdar leiin kangmei khawm a suok pha niin Police chun an hril.

SBI ATM rawkin Rs. 5.38 lakh an inruk
RANGIYA: July 7, 2014 zanril lai khan rukru 12 velin State Bank of India ATM, Kamrup (Rural) District an rawk a,Rs. 5.38 lakh an inruk hmang niin Police chun an hril. Thla khat liemta khawm khan Rangiya hmuna ATM chu rukru han an rawk a, Rs. 25 lakh an lo inruk hmang ta a nih tiin Kanteswar Gogoi, SDPO, Rangiya chun a hril.

Meghalaya-ah helpawl 9 man
SHILLONG: Zani hmasa khan East Garo Hills District, Meghalaya-ah A’chik Songna An’pachakgipa Kotok (ASAK) self styled Williamnagar East area commander Merak Sangma @ Suanggre le Operational Commander, Dinesh Ch Marak @ Blackboard hai ṭhangin ASAK helpawl 9 Police han an man. Mana um helpawl hai laia 6 hai chu Williamnagar hmuna man le 3 hai chu Rongjeng hmuna man an nih. ASAK hi helpawl thar, GNLA finance Secretary hlui Reading T. Sangma in an rawi a ni a, mana um haia inthawk Pistols 3 man a ni bawk.

Germany inBrazil 7-1 in an hne : M. Klose in WC record thar a siem
BELO HORIZONTE: Germany chun zani zingkara Fifa World Cup semifinals hmasaa Belo Horizonte hmuna inkhelah a mikhuoltu Brazil chu 7-1 a hnein Germany chu semifinals an lut tah. Tuta ṭum hi Germany in FIFA World Cup semifinalsa an khingpui hai an hnesaw tak ṭum a la ni a, inkhel-a inthawk minutes 29 sungin goals 5 an thun hman a, a tawp chenah goals 7 an thun hman a nih. A khingtiengpang Brazil ta ding khawmin tu ṭum hi World Cup-a an chet siet tak ṭum a la ni bawk. Hieng laizing hin German’s Miroslav Klose chun Brazil le semifinals khel huna hin goal 1 a thun belsa nawk leiin FIFA World Cupa goal thun rawn tak record thar a siem. Klose hin group stages a Ghana le an inkhel ṭumin goal khat a lo thun ta leiin FIFA World Cup-a goal thun tam tak Brazilian legend Ronaldo (15 goals) chu an angpui a, zani zingkara Brazil le inkhel huna goal khat a thun belsa nawk leiin Ronaldo record lo neisa chu a hung khum ta a nih.Chawl lailawk (halftime) khawm a tlung hmaa Germany in goal 5 zeta an hne hnung hin Brazil mipui tam tak inkhel entu hai chun an seat-a inthawk tho dawkin stadium an ṭinsan a. World Cup 2014 lak tuma insingsa an ni leiin hienganga hnesaw le inzakum taka hneban an hang ni hin Brazil mipui le fans hai chu an lungril a na hle a, inkhel tawpna firit mutrik a ni hma khawmin mitthli leh an insawp neng el a nih. Brazil legend Ronaldo in WCs top scorer record Klose lakah a chan el chau ni lovin Brazil in hnesaw taka hnebanna a tuok hin Brazil mipui chu an hmai mawk hle a nih. Players thiem bik taluo um lo thiem dang inang tlangpui Germany chu defense a buoi Brazil ta ding chun tawk an harsa deu a nih. Brazil hi defense nasa taka an buoi naksapah Neymar khel thei lova a um chu an tlaksietna sukzuoltu a ni ngei ring a um.. Brazil coach Luiz Felipe Scolari chun Germany laka an tlawmna chu ama mawinphurin ‘ it is the worst day of my life’ tiin a hril a, Goals 7-1 a hnebana um Coach tia hriet ka ni zing ta ding a nih tiin Scolari chun a hril. Scolari chun, ‘a ṭhat dan dinga kan ring ang tak le kan theitawp kan suo a nih’ tiin Brazil mipui le fans hai kuoma a hril a, final lut zo lova an umna thuah ngaidam inhniin pawi a ti thu a hril. Scolari hin 2002 WC a khan Brazil team hi World Cup a lo lak pui ta bakah kum 4 hungin semifinals a lo lutpui ta bawk a nih.

VAWISUN THUPUI
Nisienlakhawm, unauhai, mi dang beiseina hrim nei nawhai anga in lungngai nâwna dingin, a inhai chanchin in hriet naw kan nuom nawh. - 1 Thessalonika 4:13

EDITORIAL
Sawrkar thar

Democracy ram ei ni angin mipuiin ei aiaw ding ei thlang a, 16th Lok Sabha election a chun BJP chun hne takin sawrkarna an chang ta a, hril buoina le harsatna tlung lovin party pakhat ṭhuoina hnuoiah sawrkarna a hung um thei hi lawm a um hle. BJP chun an party khat chauva sawrkarna chel thei an ni laizinga ni danga an lo inthlawppui (alliance parties) party dang hai hnawl chuong lova National Democratic Alliance (NDA) sawrkar siem a, an inthlawppui party dang hai khawm minister chanvo pe a, sawrkar an hung siem el hin an lungril lienzie le an hmathlir a sei a nih ti a suklang chieng em em el a nih.

Democracy ram a ni angin ieng Political party khawmin sawrkarna siem sienla, sawrkar chu mipui sawrkar a ni ding a nih. Tuta ṭum hin Political party ṭhenkhat chu sawrkarna siem theiin hnena an chang a. chuong lai chun sawrkarna siemtu Political party sawrkarna chau la vung a tih ti hi inlau um takel a nih. Sawrkarna siemtu chu ieng party khawm ni raw seh, ram le hnam ta dinga sin thaw ding a nina hi mi tuelkhawmin ei ngaipawimaw ding a nih. Chuongang bawkin sawrkar thar khawmin Party feeling sie ṭhain, ram le hnamngirhmun ngaipawimawin sin thaw thei sienla nuom a um hle.

Sawrkar thar chun theitawp suoin hma a hang lak ṭan a. Amiruokchu, nitin mamaw le thil man chi tum tum hai a control hne naw ti chu a chieng ta em em el a nih. Mipui chun thil man kaisang hrat taluo control theitu ding sawrkar an dit a, chulei taka chu India rama sawrkarna cheltu thlakthleng dingin an vote hlu tak an pek a nih ti kha sawrkar thar cheltu hai hin an hrietzing nuom a um. Sawrkar ṭha le hrat chun thil man kaisang hi a control thei ngei mipui han an ring tlat a nih.

Sawrkar thlungpuiin thil man kaisang hrat dan hi a hmuin a hriet a. Thil man kaisang hrat taluo control theina dinga hma a hung lak a, a hmalakna a hung hlawtling phawt chun States le UTs sawrkar hai khawma thil man kaisang control-na kawnga thil thaw dan ding an hriet le an hung thaw thei ve ngei ring a um. Thil man kaisang hi control thei lova a um chun mipui han sawrkar thar hi ngaidan pakhatin an hung nei pha ding a ni leiin sawrkar thlungpuiin hi thil hi a ngaipawimaw hle a ṭul a nih. Thil man kaisang hrat taluo control theina pakhat chu thawsuok ei nei tam a, kawng iengkima ei intodel a ṭul a nih. Chu ding chun sawrkarin kut sin thawtuhai, loneimi le huon siemtuhai a ngaisak a, ṭhangpuina le hamṭhatna chi tum tum a pek le a vura a vur a pawimaw a nih.

Kum hieng chen hi fak le dawnah ei intodel nawh ti sawrkar thar cheltuhai hin an hrietchieng ve hle ring a um. sawrkar thar hin fak le dawn thila ei intodel theina dinga hmalak dan ding policy annawleh Plan induong a, mipui hriet thei dinga a puonglang thei a ṭul a nih. Chuonganga a puong thei chun miupi khawma theitawp suo a hma ei lak le sawrkar ei thlawp chu ei mawphurna a ni ve a nih. India ngirhmun insang taka hlangkai theitu sawrkar a ni chun inthlang nawk huna khawm an sinthaw chun sawrkarna siem dingin hlangkai nawk ngei ring a um.



Don't Miss
© all rights reserved
made with by Simon L Infimate